Treinu Ita-nia konxiénsia hodi uza Bíblia nia prinsípiu

1-2. (a) Maromak fó prezente saida ba Adão no Eva? (b) Oinsá mak sira bele hatudu agradese ba prezente neʼe?

ANIMÁL sira halo buat oioin hodi la hanoin uluk tanba Maromak kria sira iha dalan hanesan neʼe. Mákina sira mós halo tuir deʼit programa neʼebé matenek-naʼin sira mak halo. Maibé ita ema la hanesan neʼe. Maromak fó ita prezente espesiál ida neʼebé folin-boot, neʼe mak liberdade atu hili ka abilidade atu halo desizaun oioin iha ita-nia moris. Bíblia hatete katak Maromak kria ema primeiru Adão tuir Ninia ilas. (Gén 1:​26, 27) Maromak fó ba Adão no Eva abilidade atu halo desizaun rasik.

² Jeová la fó ukun-fuan barak ba Adão no Eva. Nia haruka deʼit sira atu tau matan ba mundu, halo nakonu mundu ho sira-nia oan no bei-oan, no hatudu respeitu ba Ninia direitu atu deside buat neʼebé sira bele halo no labele halo. (Gén 1:28; 2:​16, 17) Oinsá mak Adão no Eva bele hatudu agradese ba Maromak neʼebé fó liberdade ba sira? Sira presiza hafolin buat hotu neʼebé Jeová fó ba sira no neʼe tenke book sira atu halo tuir mandamentu simples sira-neʼe tanba hadomi Jeová no hakarak halo nia kontente.—Prov 23:15.

3. Adão no Eva uza sira-nia liberdade iha dalan oinsá?

³ Bíblia fó sai katak Adão no Eva la uza ho didiʼak sira-nia liberdade atu halo desizaun. Sira halo desizaun la diʼak tanba sira hanoin an deʼit duké hadomi Jeová no fó agradese ba nia. (Gén 3:​1-7) Rezultadu husi sira-nia desizaun neʼe lori impaktu aat ba ema hotu toʼo ohin loron.—Rom 5:12.

4. (a) Tuir Galásia 6:​5, ita hotu tenke halo saida? (b) Iha lisaun neʼe, ita sei buka-hatene kona-ba saida?

⁴ Ohin loron, ita halaʼo moris neʼebé komplikadu tebes. Loroloron ita tenke halo desizaun barak tanba neʼe mak ita-nia todan rasik. (Lee Galásia 6:5.) Desizaun balu mak simples, maibé balu lae. Oinsá mak ita bele foti desizaun neʼebé halo Jeová kontente? Ulukliu, ita tenke rekoñese katak ita presiza Jeová nia ajuda. (Prov 16:3; Jer 10:23) Jesus neʼebé perfeitu mós rekoñese katak nia presiza Maromak nia ajuda, sá tan ho ita. (Ebr 5:7) Agora, mai ita buka-hatene Maromak nia prezente ida tan neʼebé ajuda ita atu halo desizaun diʼak, neʼe mak ita-nia konxiénsia.

SAIDA MAK KONXIÉNSIA?

5. (a) Saida mak konxiénsia? (b) Oinsá mak konxiénsia bele ajuda ita? (Roma 2:​14, 15)

⁵ Konxiénsia mak kbiit iha ita-nia laran neʼebé fó-hatene ita buat neʼebé loos no sala. Ema neʼebé la hatene Maromak nia ukun-fuan mós iha konxiénsia. (2 Kor 4:2) Konxiénsia mak hanesan juís iha ita-nia laran neʼebé tesi-lia ba ita-nia hanoin no hahalok. (Lee Roma 2:​14, 15.) Ita-nia konxiénsia bele fó avizu mai ita atu la halo buat neʼebé sala. (1 Sam 26:​8-11) Ita-nia konxiénsia mós book ita atu halo buat neʼebé loos. Ita iha liberdade atu halo desizaun, maibé neʼe la dehan katak ita-nia desizaun hotu mak halo Jeová kontente. Ita-nia konxiénsia bele ajuda ita atu hatene desizaun neʼebé ita halo mak diʼak ka la diʼak.

6. Tanbasá dala ruma ita-nia konxiénsia labele ajuda ita?

⁶ Triste mak dala ruma ita-nia konxiénsia la laʼo ho didiʼak. Tanba ita la perfeitu, ita-nia konxiénsia mós la perfeitu. Ita-nia konxiénsia bele hetan impaktu husi dalan neʼebé inan-aman haboot ita, kultura, no ita-nia hakarak neʼebé sala. Bíblia hatete katak konxiénsia bele sai “fraku”, “foʼer”, “labele sente tan buat ida hanesan kulit neʼebé hanas ona ho besi”, ka “aat”. (1 Kor 8:12; Tito 1:15; 1 Tim 4:2; Ebr 10:22) Konxiénsia hanesan neʼe labele ajuda ita atu halo desizaun diʼak. Neʼe hanesan dasin neʼebé aat ona no presiza hadiʼa. Tan neʼe, ita tenke hakaʼas an atu treinu beibeik ita-nia konxiénsia. (1 Ped 3:16) Oinsá atu halo ida-neʼe?

OINSÁ ATU TREINU ITA-NIA KONXIÉNSIA

7-8. (a) Saida mak bele ajuda ita atu treinu ita-nia konxiénsia? (b) Oinsá mak Bíblia nia prinsípiu sira bele ajuda ita? Esplika toʼok. (Haree mós dezeñu.)

⁷ Oinsá mak ita bele treinu ita-nia konxiénsia? Ita tenke lee Bíblia beibeik no aprende saida mak loos no sala tuir Jeová nia haree. Hodi estuda kona-ba Maromak nia ukun-fuan sei ajuda ita atu komprende ninia hanoin. Maibé hanesan ita aprende iha lisaun antes neʼe, ukun-fuan bele aplika deʼit iha situasaun balu. Tan neʼe, ita presiza buka prinsípiu sira atu komprende liután Jeová nia hanoin no sentimentu.—Isa 55:9.

⁸ Ita-nia moris mak hanesan viajen iha rai-fuik neʼebé la iha estrada, dalan, ka sinál ruma. Loro-matan no fitun nia pozisaun bele ajuda ita hatene dalan neʼebé ita liu atu toʼo fatin neʼebé ita hakarak bá. Maibé se ita iha mapa neʼebé hatudu buat oioin neʼebé ita sei haree, hanesan fatuk boot ka mota sira, neʼe sei ajuda tebes ita, tanba nuʼudar ita laʼo daudaun, ita bele hatene katak ita liu iha diresaun neʼebé loos ka sala. Objetivu husi ita-nia viajen moris nian mak atu halo Jeová kontente. Bíblia mak hanesan mapa neʼebé fó sai matadalan espesífiku. Bíblia nia prinsípiu mak hanesan fatuk boot ka mota sira iha mapa. Hodi laʼo tuir prinsípiu sira-neʼe bele ajuda ita kumpre ita-nia objetivu atu halo Jeová kontente.

9. Saida tan mak bele ajuda ita atu treinu ita-nia konxiénsia? (Roma 9:​1, 2)

⁹ Atu treinu ita-nia konxiénsia ho didiʼak, ita presiza hetan ajuda husi Maromak nia espíritu santu. (Lee Roma 9:​1, 2.) Espíritu santu bele ajuda ita atu komprende Jeová nia hanoin iha situasaun oioin. Espíritu santu mós bele motiva ita no fó forsa mai ita atu halo buat neʼebé tuir Jeová nia hakarak. (Flp 2:13) Maibé saida mak ita presiza halo atu hetan ajuda husi espíritu santu?

10. Saida mak ita presiza halo atu hetan ajuda husi espíritu santu? (Lucas 11:​10, 13)

¹⁰ Halo orasaun atu husu espíritu santu. (Lee Lucas 11:​10, 13.) Ita bele fiar katak Jeová sempre prontu atu fó ninia espíritu santu mai ita. (João 3:34) Nia fó ida-neʼe ho laran-luak ba ninia atan neʼebé hakarak halo tuir nia. (Prov 1:23; Tgo 1:5) Maibé saida tan mak ita presiza halo atu treinu ita-nia konxiénsia?

11. (a) Saida mak importante liu ba ita iha ita-nia moris? (b) Tanbasá ita presiza iha konxiénsia neʼebé laʼo ho diʼak?

¹¹ Sempre buka dalan atu halo Jeová kontente. (Prov 8:​34, 35) Neʼe mak buat neʼebé importante liu iha ita-nia moris. Se ita la haluha kona-ba neʼe iha situasaun hotu, neʼe sei ajuda ita treinu ita-nia konxiénsia. Ita-nia konxiénsia sei laʼo ho diʼak kuandu ita iha hanoin no sentimentu hanesan Jeová nian. Neʼe importante tebes, liuliu tanba ita moris iha tempu neʼebé susar. Dala barak ita presiza halo desizaun kona-ba buat ruma neʼebé Bíblia la fó ukun-fuan espesífiku. Porezemplu, ita presiza deside kona-ba múzika ka filme, serbisu, edukasaun, ka ema neʼebé ita ransu. Oinsá mak ita bele hatene katak Jeová kontente ho desizaun neʼebé ita halo?—2 Kor 1:12.

12. Saida mak bele ajuda ita atu hatene katak ita-nia konxiénsia laʼo ho diʼak? (Éfeso 5:10)

¹² Medita kona-ba buat neʼebé Ita lee iha Bíblia. (Sal 49:3) Kuandu Ita lee Bíblia, buka prinsípiu sira neʼebé ajuda Ita atu komprende Jeová nia hanoin. (Lee Éfeso 5:10.) Bainhira hasoru problema neʼebé susar atu rezolve, ita presiza buka prinsípiu sira husi Bíblia atu hatene se ita-nia konxiénsia sei dirije ita atu halo desizaun neʼebé diʼak ka lae. (Prov 2:​4-9, 11-13) Prinsípiu sira-neʼe bele ajuda ita atu hadiʼa no korrije ita-nia konxiénsia hodi bele kontinua halo tuir Jeová nia hakarak.—Ebr 5:14.

13. Ita tenke kuidadu kona-ba saida bainhira halo desizaun? Fó toʼok ezemplu.

¹³ Keta deside uluk no tuirmai mak buka prinsípiu atu apoia Ita-nia desizaun. Ita lakohi sai hanesan ema Izraél neʼebé hela nafatin iha Judá bainhira Jeruzalein naksobu iha tinan 607 AEC. Sira hatete ba Jeremias: “Ami hein katak Jeová, Ita-Boot nia Maromak, sei fó-hatene ami dalan neʼebé ami tenke laʼo no buat neʼebé ami tenke halo.” (Jer 42:​3-6) Maibé sira deside nanis ona buat neʼebé sira hakarak halo. Bainhira sira la kontente ho Jeová nia matadalan, sira kaer metin ba sira-nia desizaun rasik. Rezultadu mak sira hasoru susar barak. (Jer 42:​19-22; 43:​1, 2, 4) Lisaun mak, antes atu halo desizaun, ita presiza buka-hatene Bíblia nia prinsípiu sira atu komprende Jeová nia hakarak no halo tuir ida-neʼe.

14. Tanbasá ita presiza aplika Bíblia nia prinsípiu bainhira halo desizaun?

¹⁴ Halo desizaun bazeia ba Bíblia nia prinsípiu. (Mt 7:​24-29; Tgo 1:​23-25) Kuandu ita halo nuneʼe, ita husik espíritu santu dirije ita. Rezultadu mak Jeová kontinua haraik ninia espíritu mai ita. (Após 5:32) Maibé se ita la husik Jeová nia espíritu dirije ita, ita bele halo “espíritu santu triste”, ka kontra espíritu santu. (Éf 4:30; Isa 63:10; Após 7:51) Jeová mós bele hasai ninia espíritu husi ita. (Sal 51:11; 1 Tes 5:19) Neʼe bele lori susar boot mai ita tanba ita presiza duni forsa no kbiit husi espíritu santu.—Éf 3:16.

OINSÁ ATU HETAN BÍBLIA NIA PRINSÍPIU NEʼEBÉ KONA ITA-NIA SITUASAUN

15-16. (a) Oinsá mak ita bele hetan Bíblia nia prinsípiu neʼebé kona ita-nia situasaun? (b) Bíblia nia prinsípiu saida deʼit mak bele ajuda estudante atu para fuma?

¹⁵ Uza didiʼak ekipamentu atu estuda. Atu bele aplika Bíblia nia prinsípiu, ita presiza hatene uluk prinsípiu sira neʼebé kona ita-nia situasaun. Porezemplu, oinsá se Ita-nia estudante Bíblia la komprende tanbasá presiza para fuma? Karik nia hanoin: ‘Bíblia la koʼalia kona-ba fuma. Oinsá ita hatene katak sala atu fuma?’ Oinsá mak Ita bele ajuda nia atu hanoin tuir Bíblia nia prinsípiu? Ekipamentu ida mak Livru atu ajuda Testemuña ba Jeová buka informasaun. Ita bele hatudu parte “Fuma”. Nia bele hetan referénsia ba informasaun “Maromak gosta haree ema fuma ka lae?” (Haree Livru Haklaken, 1 Jullu 2014.) Husi informasaun neʼe, nia sei hetan eskritura no prinsípiu saida deʼit?

¹⁶ Haree toʼok prinsípiu lima neʼebé temi iha informasaun neʼe. (1) Ita labele sai atan ba buat neʼebé bele oho ita. (Rom 6:16) (2) Ita presiza hasees an husi buat naran deʼit neʼebé bele estraga ita-nia isin. (2 Kor 7:1) (3) Jeová hakarak ita atu serbí nia ho moris tomak. (Mt 22:37) (4) Ita labele halo buat neʼebé lori perigu ba ema seluk. (Mt 22:39; 1 Kor 10:24) (5) Jeová bele fó ita forsa atu halo buat neʼebé loos. (Flp 4:13) Maski Bíblia la temi espesífiku kona-ba fuma, maibé prinsípiu sira-neʼe bele ajuda estudante atu komprende Jeová nia hanoin.

17. Oinsá mak irmaun-irmán neʼebé planu atu halaʼo kazamentu bele hetan Bíblia nia prinsípiu neʼebé ajuda sira?

¹⁷ Oinsá mak irmaun-irmán neʼebé planu daudaun atu halaʼo kazamentu bele hetan Bíblia nia prinsípiu atu ajuda sira halo desizaun diʼak? Sira mós bele uza Livru atu buka informasaun. Iha parte “Kazamentu no festa kazamentu nian”, iha lista ba informasaun neʼebé fó sai Bíblia nia prinsípiu. Haree toʼok prinsípiu neen neʼebé bele ajuda. (1) Arranju hotu tenke lori hahiʼi ba Jeová. (1 Kor 10:​31, 32) (2) Presiza hatais iha dalan neʼebé modestu no la halo ema seluk sidi. (1 Tim 2:9; 1 Ped 3:​3, 4) (3) Labele buka oin hodi hatudu ita-nia rikusoin hanesan ema halo iha Satanás nia mundu. (João 17:14; Tgo 1:27; 1 João 2:​15, 16) (4) Presiza organiza ho loloos. (1 Kor 14:40) (5) Labele halo festa arbiru no husik ema hemu toʼo lanu. (Gal 5:21) (6) Presiza husu ema ruma atu tau matan ba serimónia no festa.—João 2:​8, 9.

18-19. (a) Ekipamentu saida tan mak bele ajuda ita? (b) Kuandu ita hanoin kona-ba selebrasaun sira, prinsípiu saida deʼit mak ita bele hetan husi ekipamentu neʼe? (Haree kaixa “Buka-hatene Bíblia nia prinsípiu sira”.)

¹⁸ Ekipamentu ida tan neʼebé ajuda ona ema barak mak Eskritura sira neʼebé Ajuda Ita-nia Moris. Publikasaun neʼe fó sai lista ba eskritura sira hodi tuir tópiku oioin. Kuandu ita hili tópiku ida, ita bele haree pergunta ho eskritura sira neʼebé ajuda ita hatene Bíblia nia prinsípiu. Porezemplu, karik ema Kristaun ida laran-rua kona-ba atu tuir selebrasaun ruma. Se nia loke tópiku “Selebrasaun”, nia bele hetan subtópiku “Selebrasaun neʼebé ema Kristaun la hola parte”.

¹⁹ Haree toʼok informasaun balu iha subtópiku neʼe: “Tanbasá sala atu hola parte iha selebrasaun neʼebé liga ho relijiaun falsu? (1Ko 10:21; 2Ko 6:​14-18; Éf 5:​10, 11)” Tuirmai, ita mós bele haree selebrasaun balu neʼebé sala. Iha subtópiku “Selebrasaun nasaun nian”, fó sai prinsípiu sira husi Bíblia neʼebé ita bele aplika kuandu ita hanoin kona-ba selebrasaun neʼebé liga ho polítiku, komemorasaun kona-ba funu, ka serimónia atu fó onra ba ema ruma. Ita agradese tebes tanba Jeová nia organizasaun fó ita ekipamentu neʼebé diʼak atu ajuda ita treinu ita-nia konxiénsia!

PROVA KATAK ITA IHA KONXIÉNSIA NEʼEBÉ TREINU DIDIʼAK ONA

20. Oinsá mak ita bele hatudu katak ita treinu didiʼak ita-nia konxiénsia?

²⁰ Ita hafolin tebes ita-nia liberdade atu foti desizaun. Maibé ita mós labele haluha katak ita tenke treinu ita-nia konxiénsia atu bele uza didiʼak ita-nia liberdade atu foti desizaun. Konxiénsia neʼebé treinu ho didiʼak sei ajuda ita atu halo desizaun neʼebé lori hahiʼi ba Jeová no tuir ninia hakarak. Atu halo nuneʼe, ita presiza espíritu santu nia ajuda. Tan neʼe, ita tenke kontinua husu Jeová atu fó espíritu santu no husik espíritu santu mak dirije ita-nia moris. Bíblia nia prinsípiu mós ajuda ita treinu ita-nia konxiénsia. Mai ita uza didiʼak ita-nia liberdade no konxiénsia no ita sei haree oinsá Maromak nia Liafuan iha kbiit atu ajuda ita iha ita-nia moris.—2 Tim 3:​16, 17; Ebr 4:12.