Saida mak “tasi neʼebé iha ahi-lakan”? Neʼe hanesan ho infernu ka Gehena?

Bíblia nia resposta

“Tasi neʼebé iha ahi-lakan” reprezenta mate ba nafatin. Neʼe hanesan ho liafuan Gehena, maibé diferente ho infernu. Kuandu tradusaun Bíblia balu temi liafuan infernu, tuir lian orijinál baibain neʼe refere ba kondisaun husi ema rihun ba rihun neʼebé mate ona.

Neʼe mak símbolu deʼit

Bíblia temi iha versíkulu lima liafuan “tasi neʼebé iha ahi lakan”, no kontestu hatudu katak neʼe mak símbolu deʼit, laʼós refere ba tasi duni. (Apokalipse 19:20; 20:10, 14, 15; 21:8) Buat neʼebé soe ba tasi neʼebé ahi-lakan mak:

• Diabu. (Apokalipse 20:10) Diabu mak kriatura espíritu, ahi labele han nia.​—Éxodo 3:2; Juís 13:20.

• Mate. (Apokalipse 20:14) Mate reprezenta kondisaun la ativu ka la moris. (Eclesiastes 9:10) Ahi labele han kondisaun mate.

• “Animál fuik” no “profeta falsu”. (Apokalipse 19:20) Tanba buat rua neʼe mak símbolu, ita bele fiar katak tasi neʼebé ahi-lakan mós símbolu ida.​—Apokalipse 13:11, 12; 16:13.

Símbolu mate ba nafatin

Bíblia hatete katak tasi neʼebé ahi-lakan reprezenta “mate segundu”. (Apokalipse 20:14; 21:8) Mate primeiru neʼebé temi iha Bíblia mak rezultadu husi Adão nia sala. Ema neʼebé lakon moris liuhusi mate primeiru bele hetan moris-hiʼas, no ikusmai Maromak sei halakon mate neʼebé mosu tanba Adão nia sala.​—1 Korinto 15:21, 22, 26.

Tasi neʼebé ahi-lakan reprezenta mate neʼebé akontese tanba razaun seluk, no temi nuʼudar mate segundu. Hanesan ho mate primeiru, mate segundu mós refere ba kondisaun la ativu. Maibé tuir Bíblia, ema neʼebé hetan mate segundu labele moris filafali. Porezemplu, Bíblia hatete katak Jesus iha “xave ba mate no ba rate”. Neʼe hatudu katak Jesus iha kbiit atu fó moris-hiʼas ba ema neʼebé mate ona tanba Adão nia sala. (Apokalipse 1:18; 20:13) Maibé, Jesus ka kriatura naran deʼit la iha xave ba tasi neʼebé ahi-lakan. Tasi neʼe reprezenta kastigu mate ba nafatin.​—2 Tesalónika 1:9.

Neʼe hanesan ho Gehena, Foho-Leet Hinom

Bíblia temi liafuan “Gehena” (Gregu geʹen·na) dala 12. Hanesan tasi neʼebé ahi-lakan, Gehena reprezenta mate ba nafatin. No liafuan neʼe la hanesan ho liafuan Ebraiku Siol no Gregu Hades neʼebé tradusaun Bíblia balu tradús nuʼudar infernu.

Liafuan “Gehena” signifika “Foho-Leet Hinom”, neʼebé refere ba foho-leet ida besik Jeruzalein. Iha tempu antigu, ema husi sidade Jeruzalein uza foho-leet neʼe atu soe foʼer. Sira halo ahi lakan nafatin atu sunu foʼer; no ular-oan han foʼer neʼebé ahi la han mohu.

Jesus uza Gehena atu refere ba kondisaun mate ba nafatin. (Mateus 23:33) Nia hatete katak iha Gehena “ular-oan la mate no ahi mós nunka mate”. (Marcos 9:47, 48) Bainhira Jesus koʼalia kona-ba kondisaun iha Foho-Leet Hinom, nia temi fali profesia iha Isaias 66:24, neʼebé hatete: “Sira sei sai bá liʼur hodi hateke ba mate-isin husi ema neʼebé kontra hasoru haʼu; ular-oan neʼebé han sira-nia isin sei la mate, no ahi neʼebé han sira sei nunka mate.” Jesus koʼalia kona-ba buat neʼebé lakon mohu, laʼós kona-ba terus. Ular-oan no ahi han mate-isin, laʼós ema neʼebé moris hela.

Bíblia la fó sai katak buat ruma sei moris filafali husi Gehena. “Tasi neʼebé iha ahi-lakan” no “Gehena neʼebé ahi lakan” reprezenta mate ba nafatin.​—Apokalipse 20:14, 15; 21:8; Mateus 18:9.

“Hetan terus tinan ba tinan ba nafatin” signifika saida?

Se tasi neʼebé ahi-lakan reprezenta mate ba nafatin, tanbasá Bíblia dehan katak Diabu, animál fuik, no profeta falsu sei “hetan terus tinan ba tinan ba nafatin”? (Apokalipse 20:10) Haree toʼok razaun haat neʼebé hatudu katak terus iha versíkulu neʼe mak símbolu deʼit:

1. Se Diabu hetan terus ba nafatin, neʼe hatudu katak nia sei nunka mate. Maibé Bíblia hatete katak Jesus sei halo nia mate ba nafatin.​—Ebreu 2:14.

2. Moris ba nafatin mak prezente husi Maromak, laʼós kastigu.​—Roma 6:23.

3. Animál fuik no profeta falsu mak símbolu deʼit, tan neʼe sira labele hetan terus.

4. Kontestu iha Bíblia hatudu katak terus neʼebé Diabu hetan mak mate ba nafatin.

Iha Bíblia, liafuan neʼebé uza ba “terus” mós signifika “kondisaun hanetik nian”. Ezemplu ida mak liafuan iha Mateus 18:34 neʼebé temi “guarda komarka nian”. Iha liafuan Gregu signifika “ema neʼebé fó-terus”, no neʼe hatudu katak liafuan “terus” no “hanetik” iha ligasaun metin. Nuneʼe mós, versíkulu sira iha Mateus 8:29 no Lucas 8:30, 31 koʼalia kona-ba istória neʼebé hanesan no uza liafuan “fó-terus” no “rai-kuak neʼebé kleʼan tebes” atu refere ba kondisaun la ativu ka mate. (Roma 10:7; Apokalipse 20:1, 3) Tuir loloos, livru Apokalipse uza liafuan “fó-terus” dala balu nuʼudar símbolu deʼit.​—Apokalipse 9:5; 11:10; 18:7, 10.