Testemuña ba Jeová mak seita ida ka lae?

Lae. Ami Testemuña ba Jeová laʼós seita, ka sektu ida. Ami mak ema Kristaun neʼebé hakaʼas an banati-tuir Jesus Kristu nia ezemplu no moris tuir ninia hanorin.

“Seita” katak sá?

Ema ida-idak iha hanoin la hanesan kona-ba ida-neʼe. Mai ita hanoin kona-ba buat rua neʼebé baibain ema hatete:

• Tuir ema balu nia hanoin, seita ka sektu katak relijiaun foun ida neʼebé oin-seluk liu, la hanesan ho ema maioria nia relijiaun. Ami Testemuña ba Jeová laʼós relijiaun foun ida, maibé ami halaʼo ami-nia adorasaun ba Maromak hodi banati-tuir ema Kristaun iha apóstolu sira-nia tempu, tuir buat neʼebé hakerek ona iha Bíblia kona-ba sira-nia hanorin no ezemplu. (2 Timóteo 3:16, 17) Ami fiar katak adorasaun ba Maromak tenke tuir duni buat neʼebé fó sai iha Bíblia laran.

• Ema balu hanoin katak seita mak grupu relijiaun neʼebé perigu, no ema hotu iha grupu neʼe tenke tuir ulun-naʼin fanátiku ida. Ami Testemuña ba Jeová la haree ema ida nuʼudar ami-nia ulun. Ami halo tuir Jesus nia liafuan ba ninia dixípulu sira neʼebé dehan: “Imi-nia Ulun-Naʼin ida deʼit, neʼe mak Kristu.”​—Mateus 23:10.

Ami-nia atividade mós la lori perigu ba komunidade, maibé lori buat diʼak ba ema iha komunidade laran. Porezemplu, liuhusi ami-nia haklaken, ema barak husik ona sira-nia toman aat, hanesan uza droga ka hemu toʼo lanu. Iha rai barak, ami mós loke kursu alfabetizasaun hodi ajuda ema barak neʼebé lee la hatene, ikusmai sira hatene ona lee no hakerek. Ami mós hola parte iha atividade fó ajuda ba área neʼebé kona dezastre naturais. Ami hakaʼas an atu ajuda ema seluk hodi halo tuir Jesus nia mandamentu.​—Mateus 5:13-16.