Saida mak razaun rua neʼebé Maromak la simu orasaun balu?

Bíblia nia resposta

Iha orasaun balu neʼebé Maromak la simu. Hanoin toʼok razaun rua neʼebé halo Maromak la simu ema nia orasaun balu.

1. Orasaun neʼebé la tuir Maromak nia hakarak

Maromak la hatán ba orasaun neʼebé la tuir ninia hakarak, ka la tuir ninia matadalan, neʼebé hakerek iha Bíblia laran. (1 João 5:14) Porezemplu, Bíblia haruka ita atu hasees an husi hahalok kaan-teen. Joga osan haburas hahalok kaan-teen. (1 Korinto 6:​9, 10) Tan neʼe, Maromak sei la hatán ba ita-nia orasaun se ita husu atu manán osan bainhira joga osan ka lotaria. Maromak laʼós hanesan atan neʼebé ita bele manda deʼit hodi kumpre ita-nia hakarak. Tuir loloos, ita agradese tebes tanba Maromak laʼós hanesan neʼe. Se lae, ita sei sente taʼuk tanba ema seluk mós bele manda Maromak atu halo buat ruma.—Tiago 4:3.

2. Orasaun husi ema neʼebé kontra

Maromak la rona ba orasaun husi ema neʼebé ho neon kontra nia liuhusi sira-nia hahalok. Porezemplu, Maromak hatete ba ema neʼebé dehan serbí nia maibé kontra fali nia: “Maski imi halo orasaun dala barak, haʼu la rona; imi-nia liman nakonu ho raan.” (Isaias 1:15) Maibé se sira troka sira-nia hahalok no “hadiʼa problema” ho Maromak, nia sei rona kuandu sira halo orasaun ba nia.—Isaias 1:18.