Laran-metin nafatin maski ita-nia fiar hetan koko

1-2. Saida mak akontese bainhira Jesus hanorin iha Kafarnaum?

LORON ida, Jesus hanorin ema-lubun iha Kafarnaum. Nia hatete: “Se imi la han Oan-Mane husi Ema nia isin no la hemu ninia raan, imi sei la hetan moris.” Nia hatutan tan: “Ema neʼebé han haʼu-nia isin no hemu haʼu-nia raan sei hetan moris rohan-laek, no haʼu sei fó moris-hiʼas ba nia iha loron ikus.” (João 6:​53, 54) Dixípulu barak la kontente ho liafuan neʼe no hatete: “Liafuan sira-neʼe todan tebes. Sé mak bele rona ida-neʼe?”—João 6:60.

² Sira barak lakohi laʼo tuir tan Jesus. Neʼe tanba sira la iha fiar ba Jesus ka lae? Loloos, antes akontesimentu neʼe, sira haree milagre neʼebé Jesus halo no sira balu hatete: “Nia mak Profeta neʼebé eskritura fó-hatene nanis ona atu mai iha mundu.” (João 6:14) Neʼe hatudu katak dixípulu sira-neʼe iha ona fiar ba Jesus. Maibé kuandu sira-nia fiar hetan koko, sira la laran-metin tan ba nia.

3. Apóstolu sira-nia reasaun mak oinsá, no tanbasá? (Haree mós dezeñu.)

³ Maibé apóstolu sira-nia reasaun la hanesan, sira nafatin laran-metin ba Jesus. Bainhira Jesus husu sira se sira mós hakarak husik hela nia ka lae, Pedro hatán: “Naʼi, ami atu bá ho sé loos? Ita-Boot iha liafuan moris rohan-laek nian. Ami fiar ona no hatene katak Ita mak Ida neʼebé Santu husi Maromak.” (João 6:​68, 69) Pedro la dehan katak nia no apóstolu sira seluk komprende didiʼak Jesus nia liafuan kona-ba han ninia isin no hemu ninia raan. Maski sira komprende ka la komprende, sira deside atu laran-metin nafatin ba Jesus. Tanbasá? Tanba sira-nia fiar bazeia ba lia-loos neʼebé metin, katak Jesus mak “Kristu neʼebé Maromak haruka mai”.—Lc 9:​20, 35.

4. Saida deʼit mak bele koko ita-nia laran-metin ba Jeová?

⁴ Ita-nia laran-metin ba Jeová mós bele hetan koko iha situasaun oioin. Porezemplu, bainhira iha mudansa kona-ba dalan atu komprende eskritura ruma ka kona-ba haklaken, ita-nia reasaun mak oinsá? Ka oinsá kuandu ita sente susar atu komprende tanbasá Jeová husik dezastre kona ema neʼebé diʼak? Ita-nia fiar mós bele hetan koko se belun Kristaun ida hakanek ita-nia laran ka maluk Kristaun ida neʼebé ita respeitu mak trata ita iha dalan neʼebé la justu.

5. Tanbasá ita presiza hametin ita-nia fiar? Fó toʼok ezemplu. (Koloso 1:23)

⁵ Atu kontinua laran-metin ba Jeová iha situasaun naran deʼit, ita presiza iha fiar neʼebé metin. Porezemplu, uma tenke iha fundasaun neʼebé metin atu la naksobu kuandu akontese rai-nakdoko. Hanesan neʼe mós, ita tenke iha fiar neʼebé metin atu nafatin laran-metin ba Jeová maski hetan koko hanesan temi iha parágrafu antes neʼe. Tan neʼe, ita presiza hametin ita-nia fiar atu bele kontinua serbí Jeová maski hasoru susar naran deʼit.—1 Kor 15:58; lee Koloso 1:23.

6. Saida mak ajuda apóstolu sira atu laran-metin nafatin ba Jesus?

⁶ Saida mak ajuda apóstolu sira atu laran-metin nafatin ba Jesus kuandu ema seluk husik hela nia? Apóstolu sira fiar metin katak sira presiza adora Jeová tanba Nia mak Kriadór, Jesus mak Ninia Oan-Mane, no se sira halo tuir Jesus nia liafuan, sira sei simu moris ba nafatin. No sira mós hatene katak Jeová apoia buat neʼebé Jesus halo. Nuneʼe mós ho ita, se ita fiar metin ba lia-loos báziku neʼebé ita aprende ona, neʼe sei ajuda ita atu laran-metin nafatin maski hasoru susar. Agora, mai ita hanoin kona-ba lia-loos tolu: (1) Jeová mak Kriadór. (2) Bíblia mak Jeová nia liafuan. (3) Jeová apoia ninia povu ohin loron. Se ita fiar metin ba lia-loos tolu neʼe, ita bele nafatin laran-metin kuandu hasoru situasaun neʼebé koko ita-nia fiar.

JEOVÁ MAK KRIADÓR

7. Apokalipse 4:11 fó-hanoin ita kona-ba saida, maibé saida mak bele akontese kuandu ita-nia fiar hetan koko?

⁷ Lee Apokalipse 4:11. Eskritura neʼe fó-hanoin ita katak Jeová mak kria buat hotu. Neʼe mak razaun importante tanbasá ita presiza adora nia. No kuandu ita hanoin kleʼan kona-ba Jeová nia kbiit boot, ita bele fiar katak nia bele salva ita iha susar naran deʼit. Maibé, Satanás halo mundu neʼe nakonu ho lia-bosok no halo ema hanoin katak Maromak la iha. Sientista sira mós hatete katak moris hotu mosu mesak deʼit. Se ita ladún fiar katak Jeová mak Kriadór no nia hadomi ita, ita bele komesa hanoin katak nia la iha ka lakohi ajuda ita kuandu ita hasoru situasaun neʼebé koko ita-nia fiar.—Ebr 11:6.

8-9. Saida mak Ita presiza halo se Ita komesa duvida katak Jeová mak Kriadór? (Haree mós foto.)

⁸ Se Ita komesa duvida katak Jeová mak Kriadór, Ita presiza halo kedas buat ruma. Halo peskiza hodi uza ita-nia publikasaun sira atu hetan prova katak Jeová mak kria buat hotu. Ita bele hetan informasaun barak neʼebé hametin Ita-nia fiar husi broxura Moris Hotu Mosu Mesak Deʼit ka lae? no Asal Mula Kehidupan—Lima Pertanyaan yang Patut Direnungkan. Ita mós bele hetan evidénsia barak husi série “Maromak mak kria ka lae?” iha jw.org. Irmán joven ida naran Jessica iha Estadus Unidus hatete: “Depois lee tiha broxura Asal Mula Kehidupan, haʼu fiar metin katak iha duni Kriadór. Loloos haʼu hatene ona, maibé broxura neʼe ajuda tebes haʼu atu prova rasik no halakon haʼu-nia dúvida.” Ema barak mós hetan ona benefísiu husi livru Apakah Ada Pencipta yang Mempedulikan Anda? Karik Ita lee ona livru neʼe, maibé diʼak atu lee fali.

⁹ Porezemplu, Ita bele halo planu hodi uza tempu atu halo estudu pesoál kona-ba razaun sira neʼebé bele ajuda Ita fiar katak Maromak iha duni. Informasaun sira-neʼe bele hametin Ita-nia fiar katak Maromak iha, no neʼe mós bele ajuda Ita atu koñese nia diʼak liután. (Rom 1:20) Ita mós bele uza buat neʼebé Ita aprende atu ajuda fali ema seluk neʼebé duvida katak Maromak iha. Pontu importante mak: Jeová fó ona evidénsia barak mai ita katak nia mak ita-nia Kriadór.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

BÍBLIA MAK JEOVÁ NIA LIAFUAN

10. Tanbasá Bíblia mak importante mai ita? (2 Timóteo 3:​16, 17)

¹⁰ Lee 2 Timóteo 3:​16, 17. Bíblia mak Maromak Jeová nia liafuan mai ita ema. Bíblia hatán ba pergunta importante sira hanesan oinsá moris hahú, tanbasá ita iha, no saida mak Jeová hakarak ita atu halo. Ita fiar katak Jeová mak Autór ba Bíblia, tan neʼe Bíblia mak livru neʼebé importante liu hotu iha ita-nia moris. Ita hakarak duni komprende buat neʼebé ita lee no hakaʼas an atu aplika ida-neʼe.

11. Tanbasá Ita fiar katak Bíblia mak Jeová nia liafuan?

¹¹ Tanbasá ita fiar katak Bíblia mak Jeová nia liafuan? Iha razaun barak. Bíblia konta ho loloos istória neʼebé akontese duni. (Lc 3:​1, 2) Bíblia mós fó sai ho loloos kona-ba siénsia. (Job 26:7) Bíblia mak livru neʼebé fahe ona ba ema barak liu se kompara ho livru seluk maski Satanás koko makaʼas atu halakon Bíblia. Maizumenus mane naʼin-40 mak hakerek Bíblia durante maizumenus tinan 1.600, maibé informasaun iha Bíblia la kontra malu. Maski Bíblia mak livru antigu, maibé ninia matadalan ajuda ona ema rihun ba rihun toʼo ohin loron. (Prov 13:20; 15:21; Mt 7:12) No profesia barak husi Bíblia mak sai loos ona, no neʼe halo ita tau fiar liután ba Bíblia. (Jos 23:14) Sin, ita iha razaun barak atu fiar katak Bíblia mai husi Maromak!

12. Saida mak ita presiza halo se ita komesa duvida katak Bíblia mak Jeová nia liafuan?

¹² Saida mak ita presiza halo se ita komesa duvida katak Bíblia mak Jeová nia liafuan? Ita presiza halo orasaun ba Jeová hodi fó sai ita-nia sentimentu, husu ninia ajuda, no tuirmai halo peskiza. Irmaun joven ida naran Jordan, neʼebé boot nuʼudar Testemuña hatete: “Haʼu la fiar kedas buat neʼebé haʼu rona husi haʼu-nia inan-aman ka ema seluk. Haʼu presiza buka-hatene didiʼak uluk. Dala ruma haʼu duvida kona-ba buat neʼebé haʼu rona ka lee. Maibé kuandu neʼe akontese, haʼu halo peskiza husi ita-nia publikasaun sira atu hetan resposta ba haʼu-nia pergunta.” Nuʼudar ita kontinua hametin ita-nia fiar katak Bíblia mak Jeová nia liafuan, ita-nia fundasaun ka fiar ba Jeová mós sei sai metin liután.—1 Kor 3:​12, 13.

JEOVÁ APOIA NINIA POVU OHIN LORON

13. Saida mak ita presiza halo se ita komesa duvida katak Testemuña ba Jeová ohin loron hetan apoiu husi Jeová?

¹³ Se Ita komesa duvida katak Testemuña ba Jeová ohin loron hetan apoiu husi Jeová, ita presiza halo kedas buat ruma. Porezemplu, ita bele hanoin kona-ba pergunta sira hanesan: ‘Sé mak hakaʼas an duni atu moris tuir Bíblia nia hanorin? Organizasaun ida-neʼebé mak hanorin buat neʼebé bazeia ba Bíblia?’ (2 Tim 4:​3, 4) ‘Sé mak halaʼo Jeová nia hakarak ohin loron?’—Mt 7:​20, 21.

14. Oinsá mak Testemuña ba Jeová kumpre eskritura iha Mateus 24:14?

¹⁴ Porezemplu, Maromak hakarak ema iha mundu tomak atu rona liafuan diʼak antes mundu aat neʼe lakon. Tan neʼe ita bele husu ita-nia an: ‘Sé mak haklaken liafuan diʼak ohin loron?’ (Mt 24:14) Resposta mak klaru. Maromak Jeová uza ninia Testemuña sira atu halaʼo serbisu haklaken. Só Testemuña ba Jeová deʼit mak haklaken liafuan diʼak kona-ba Maromak nia Ukun iha rai 240 liu. No ita halo ona serbisu neʼe ba tinan 100 liu. Sin, haklaken no hanorin mak serbisu neʼebé importante liu hotu mai ita.—Mt 28:​19, 20.

15. Oinsá mak Testemuña ba Jeová halo santu Maromak nia naran? (Mateus 6:9; Isaias 43:10)

¹⁵ Lee Mateus 6:9 no Isaias 43:10. Ema koñese ita nuʼudar organizasaun neʼebé lori Maromak nia naran Jeová, no ita orgullu atu sai nuʼudar Testemuña ba Jeová. Ema barak iha mundu la hatene Maromak nia naran. Maibé ita hakaʼas an atu prodús Bíblia neʼebé fó sai Maromak nia naran hodi tuir testu orijinál. Maromak nia naran mosu dala 7.000 liu iha Bíblia Sagrada Tradusaun Mundu Foun.

16. Tanbasá ita bele dehan katak Testemuña ba Jeová halo tuir mandamentu iha João 13:​34, 35? (Haree mós foto.)

¹⁶ Lee João 13:​34, 35. Domin no unidade entre Jeová nia povu mak hanesan milagre ida iha mundu neʼebé ema la hadomi malu no haketak malu. Maski ita mai husi rasa, nasaun, ka situasaun moris neʼebé la hanesan, maibé ita iha dame no domin ba malu. Ita vizita ona kongregasaun iha rai seluk ka lae? Tempu tuirmai kuandu Ita vizita, hanoin kleʼan kona-ba domin no unidade entre irmaun-irmán sira. Neʼe fó prova katak Jeová uza ninia Testemuña sira atu kumpre ninia hakarak ohin loron. Hodi hanoin kona-ba neʼe bele ajuda Ita atu laran-metin nafatin ba Jeová maski Ita-nia fiar hetan koko.

KETA HUSIK JEOVÁ

17-18. Situasaun susar saida deʼit mak karik ita hasoru, maibé hanesan Pedro, ita bele hatete saida?

¹⁷ Ita moris iha loron ikus sira, tan neʼe ema hotu hasoru susar barak. (2 Tim 3:​1, 13) Karik ita mós hasoru situasaun seluk tan neʼebé koko ita-nia fiar. Porezemplu, Maromak nia organizasaun halo desizaun neʼebé susar ba ita atu komprende. Ka irmaun ka irmán ida halo buat ruma neʼebé hakanek ita-nia laran. Karik ita la hatene oinsá atu rezolve ita-nia problema, ka la komprende tanbasá ida-neʼe akontese ba ita.

¹⁸ Maski situasaun sira-neʼe afeta ita iha dalan emosionál, ita bele nafatin laran-metin ba Jeová se ita fiar katak nia mak Kriadór, Bíblia mak ninia liafuan, no Testemuña ba Jeová mak ninia povu. No hanesan Pedro nia liafuan ba Jesus, ita mós bele hatete ba Jeová: “Ami atu bá ho sé loos? Ita-Boot iha liafuan moris rohan-laek nian.”