Jeová nota buat neʼebé Ita halo ka lae?
OINSÁ mak Ita sei hatán ba pergunta neʼe? Ema barak sei hatán: ‘Haʼu fiar katak Maromak nota buat neʼebé Moisés, Gideão, no David halo, maibé haʼu duvida Maromak interese ho buat neʼebé haʼu halo. Tanba haʼu la hanesan duni ho Moisés, Gideão, ka David.’
Klaru katak iha Bíblia nia tempu, iha duni fiar-naʼin balu neʼebé halo buat kmanek oioin tanba iha fiar neʼebé metin. Sira ‘manán funu hasoru liurai sira, taka leaun nia ibun, ahi la han sira, no halai sees husi surik’. (Ebreu 11:33, 34) Maibé laʼós Maromak nia atan hotu mak halo buat kmanek hanesan neʼe, maski nuneʼe Bíblia fó sai katak Maromak mós nota sira-nia hahalok neʼebé hatudu fiar. Atu aprende kona-ba neʼe, mai ita haree ezemplu balu iha Bíblia laran kona-ba bibi-atan, profeta, no feto-faluk ida.
Bibi-atan ida oferese sakrifísiu
Saida Ita hanoin-hetan kona-ba Adão no Eva nia oan-mane segundu, Abel? Karik Ita hanoin-hetan katak nia mate tanba ninia fiar, no karik ita barak sei nunka hasoru situasaun neʼebé hanesan ho nia. Maibé Maromak nota Abel tanba razaun seluk.
Loron ida, Abel hili animál balu neʼebé diʼak liu husi ninia bibi-lubun, no fó ida-neʼe nuʼudar sakrifísiu ba Maromak. Karik tuir ema nia haree ohin loron, buat neʼebé Abel fó mak simples deʼit, maibé Jeová nota ida-neʼe no hatudu ba Abel katak nia simu Abel nia sakrifísiu. Maibé laʼós neʼe deʼit. Maizumenus tinan rihun haat liutiha, Jeová dirije apóstolu Paulo atu hakerek kona-ba neʼe iha livru Ebreu. Entaun maski tinan barak liu tiha ona, maibé Maromak la haluha sakrifísiu neʼe!—Ebreu 6:10; 11:4.
Oinsá Abel bele deside sakrifísiu hanesan saida mak nia sei fó? Bíblia la temi, maibé ita bele fiar katak nia hanoin kleʼan kona-ba neʼe. Nia mak bibi-atan ida, tan neʼe ita la hakfodak kuandu nia foti bibi husi ninia bibi-lubun atu hasaʼe nuʼudar sakrifísiu. Maski nuneʼe, nia fó buat neʼebé diʼak liu, neʼe mak bibi nia “naʼan bokur”. (Génesis 4:4) Karik Abel mós hanoin kleʼan kona-ba Jeová nia liafuan ba samea iha jardín Eden, neʼebé dehan: “Haʼu sei halo ó no feto neʼe odi malu, nuneʼe mós ho ó-nia bei-oan no ninia bei-oan. Nia sei harahun ó-nia ulun, no ó sei hakanek ninia ain-tuban.” (Génesis 3:15; Apokalipse 12:9) Maski Abel la komprende kona-ba sé mak “feto neʼe” no feto neʼe nia “bei-oan”, maibé karik Abel rekoñese katak ‘hakanek ain-tuban’ husi feto neʼe nia bei-oan mak envolve fakar raan. Abel hatene duni katak kriatura neʼebé moris mak buat neʼebé folin-boot. No buat neʼebé importante liu mak Jeová simu Abel nia sakrifísiu.
Hanesan Abel, ema Kristaun ohin loron mós fó sakrifísiu ba Maromak. Ita-nia sakrifísiu laʼós bibi-oan primeiru husi bibi-lubun, maibé “sakrifísiu hahiʼi nian ba Maromak, neʼe katak, liafuan neʼebé sai husi ita-nia ibun hodi fó sai ninia naran ba ema hotu”. (Ebreu 13:15) Ita halo nuneʼe bainhira haklaken ba ema seluk.
Ita hakarak atu hasaʼe sakrifísiu neʼebé diʼak liután ka lae? Entaun, hanoin didiʼak kona-ba saida mak ema iha Ita-nia haklaken-fatin presiza. Sira hanoin barak kona-ba saida? Sira interese ba saida? Bíblia nia mensajen ida-neʼebé mak sei kona sira-nia laran? Tempu ida-idak neʼebé Ita haklaken hotu tiha, hanoin kona-ba oinsá Ita bele aumenta Ita-nia matenek atu haklaken. No bainhira Ita koʼalia kona-ba Jeová, halo ida-neʼe ho fiar metin no husi laran. Hodi halo nuneʼe, Ita-nia sakrifísiu sei fó hahiʼi duni ba Jeová.
Profeta ida haklaken ba viziñu neʼebé lakohi simu
Agora mai ita hanoin kona-ba profeta Enoc. Iha tempu neʼebá, karik nia mesak deʼit mak serbí Maromak Jeová. Ita mak hanesan ho Enoc ka lae? Ita mesak deʼit mak serbí Jeová iha Ita-nia família laran ka lae? Ita mesak deʼit mak moris tuir Bíblia nia matadalan sira iha eskola ka serbisu-fatin ka lae? Se nuneʼe, karik Ita hasoru dezafiu oioin. Karik belun, família, kolega eskola, ka kolega serbisu anima Ita atu kontra Maromak nia ukun-fuan. Karik sira hatete: “Halo deʼit sá! Ema sei la hatene saida mak ó halo, no ami sei la fó-hatene ema ida.” Ka karik sira mós hatete beibeik katak lalika halo tuir Bíblia nia matadalan kona-ba morál tanba Maromak la interese ba Ita-nia hahalok. No bainhira sira haree katak Ita-nia hanoin no hahalok la hanesan ho sira, neʼe sei halo sira sai hirus no sira sei hakaʼas an liután hodi book Ita atu halo tuir sira.
Klaru katak la fasil atu tahan hasoru presaun hanesan neʼe, maibé Ita bele tahan hasoru ida-neʼe. Hanoin kona-ba Enoc, nia mak jerasaun hitu husi Adão. (Judas 14) Bainhira Enoc moris, ema barak la iha morál neʼebé diʼak. Sira-nia liafuan aat tebes no sira halo hahalok aat oioin. (Judas 15) Sira hatudu hahalok hanesan ho ema barak ohin loron.
Oinsá mak Enoc tahan hasoru situasaun neʼe? Resposta ba pergunta neʼe bele ajuda ita hotu ohin loron. Karik Enoc mesak deʼit mak serbí Jeová iha tempu neʼebá. Maibé loloos nia la mesak deʼit. Bíblia hatete katak Enoc laʼo ho Maromak.—Génesis 5:22.
Durante Enoc nia moris, nia fokus atu halo kontente Maromak. Nia hatene katak laʼo ho Maromak, laʼós deʼit halaʼo moris neʼebé moos no iha morál neʼebé diʼak, maibé Jeová mós hakarak nia atu haklaken. (Judas 14, 15) Ema iha tempu neʼebá presiza rona avizu katak Maromak haree ona sira-nia hahalok aat. Enoc kontinua laʼo ho Maromak ba tinan 300 liu, no nia tenke tahan susar ba tempu kleur. Toʼo nia mate, nia kontinua laʼo ho Maromak.—Génesis 5:23, 24.
Hanesan Enoc, ita mós presiza haklaken. (Mateus 24:14) Ita presiza haklaken husi uma ba uma, maibé ita mós presiza hakaʼas an atu fahe liafuan diʼak ba família, kolega serbisu, no kolega eskola. Maibé dala ruma ema balu dada an atu koʼalia. Ita mós sente hanesan neʼe ka lae? Keta laran-kraik. Banati-tuir ema Kristaun iha apóstolu sira-nia tempu, no halo orasaun ba Maromak hodi husu aten-brani. (Apóstolu 4:29) Hanoin-hetan katak nuʼudar Ita laʼo hamutuk ho Maromak, Ita nunka mesak.
Feto-faluk ida prepara hahán
Iha feto-faluk ida neʼebé Bíblia la temi ninia naran no Jeová fó bensaun rua ba nia tanba nia prepara hahán neʼebé simples! Nia laʼós ema Izraél, maibé nia mak ema estranjeiru neʼebé moris iha tinan 2.800 liubá iha sidade Sarepta. Iha tempu neʼebá, udan la tun ba tempu kleur no hahán mós menus ona. Feto-faluk neʼe nia hahán mós besik hotu, nia só iha deʼit trigu uut uitoan no mina natoon atu prepara hahán ikus ba nia no ninia oan-mane.
Tuirmai, ema oin-foun ida hakbesik ba feto-faluk neʼe. Nia mak Maromak nia profeta naran Elias no nia husu atu feto-faluk neʼe fahe hahán ba nia. Feto-faluk neʼe iha deʼit hahán natoon ba nia no ninia oan-mane. Tan neʼe, nia la iha buat ida atu fahe ba Elias. Maibé Elias fó sai Jeová nia liafuan no promete ba feto-faluk neʼe katak se nia fó hahán ba Elias, nia no ninia oan-mane sei la hamlaha. Feto-faluk neʼe presiza duni iha fiar neʼebé metin atu bele fiar katak Jeová, Maromak Izraél nia sei tau matan ba nia maski nia husi rai seluk. Feto-faluk neʼe tau fiar duni ba Elias, no Maromak haraik bensaun ba nia. Bíblia hatete: “Sanan-rai boot trigu nian la sai mamuk, no sanan-rai kiʼik mina nian la sai maran, hodi tuir Jeová nia liafuan neʼebé fó sai ona liuhusi Elias.” Feto neʼe no ninia oan-mane iha hahán natoon toʼo rai-hamlaha remata.—1 Reis 17:8-16.
Maibé, feto-faluk neʼe simu bensaun seluk tan. Tempu balu liutiha, ninia oan-mane sai moras no mate. Elias hanoin tebes feto-faluk neʼe no harohan ba Maromak atu fó moris-hiʼas ba labarik mane neʼe. (1 Reis 17:17-24) Jeová nia atan ida seidauk halo milagre hanesan neʼe. Antes neʼe, seidauk iha istória kona-ba ema ida neʼebé hetan moris-hiʼas! Jeová sei hatudu tan laran-sadiʼa ba feto-faluk estranjeiru neʼe ka lae? Sin. Jeová fó kbiit ba Elias atu fó moris-hiʼas ba labarik mane neʼe. Jesus mós koʼalia kona-ba feto neʼebé hetan priviléjiu neʼe, hodi dehan: “Iha feto-faluk barak iha Izraél. Maski nuneʼe, Maromak la haruka Elias ba feto-faluk sira-neʼe, maibé haruka deʼit ba feto-faluk ida iha Sarepta iha área Sidon.”—Lucas 4:25, 26.
Ohin loron, ema barak iha mundu tomak hasoru problema ekonomia. Iha kompañia boot balu, patraun sira hapara ona serbisu-naʼin neʼebé serbisu ho laran-metin ba tinan barak. Tan neʼe, ema Kristaun balu taʼuk katak sira mós sei lakon serbisu. Entaun sira balu gasta tempu barak demais iha serbisu-fatin no hanoin katak se sira serbisu ba oras barak patraun sei la hasai sira. Maibé ikusmai, sira ladún iha tempu atu tuir reuniaun, bá haklaken, ka atu tau matan ba família nia presiza espirituál no emosaun. Sira hanoin katak sira tenke kontinua serbisu maski neʼe bele lori rezultadu aat oioin.
Se ema Kristaun ida hasoru problema ekonomia hanesan neʼe, la sala atu sente laran-taridu. Ohin loron, susar atu hetan serbisu. Maski ita la buka atu sai riku, maibé ita nafatin hakarak atu tau matan ba ita-nia presiza loroloron nian hanesan feto-faluk iha Sarepta. Tan neʼe, apóstolu Paulo fó-hanoin ita kona-ba Maromak nia liafuan neʼebé dehan: “Haʼu sei nunka husik ó, no haʼu sei nunka fila kotuk ba ó.” Atu nuneʼe ita bele sai brani no dehan: “Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?” (Ebreu 13:5, 6) Paulo sadere tomak ba promesa neʼe, no Jeová sempre tau matan ba nia. Maromak mós sei halo nuneʼe ba ita se ita la husik nia.
Karik ita sente katak ita sei nunka bele halo buat kmanek neʼebé Moisés, Gideão, no David halo, maibé ita bele banati-tuir sira-nia fiar. Ita mós bele hanoin-hetan buat simples neʼebé Abel, Enoc, no feto-faluk iha Sarepta halo tanba sira-nia fiar. Jeová nota ita-nia hahalok hotu neʼebé ita hatudu tanba fiar, maski kiʼik deʼit. Porezemplu, Jeová haree bainhira joven ida neʼebé serbí nia la simu droga iha eskola. Nia haree bainhira irmaun ka irmán ida la monu ba tentasaun atu halo relasaun seksuál ho maluk serbisu-naʼin. Nia mós haree bainhira irmaun ka irmán neʼebé idade ona kontinua tuir reuniaun maski isin fraku no saúde sai aat ba beibeik. Bainhira Jeová haree buat hotu neʼe, nia sente haksolok!—Provérbios 27:11.
Ita nota buat neʼebé ema seluk halo ka lae?
Hanesan ita aprende ona, Jeová nota buat neʼebé ita halo. Tan neʼe, ita hakarak banati-tuir nia hodi haree ema seluk nia hakaʼas an. (Éfeso 5:1) Haree didiʼak oinsá irmaun-irmán sira hakaʼas an atu tuir reuniaun, atu bá haklaken, no halaʼo moris loroloron nian maski hasoru susar oioin.
Tuirmai, fó-hatene ita-nia irmaun-irmán sira katak Ita hafolin sira-nia hakaʼas an. Sira sei kontente tanba Ita nota no neʼe bele fó konfiansa ba sira katak Jeová mós nota buat neʼebé sira halo.