Ita hatudu agradese ka lae?

Tinan balu liubá, uma misionáriu ida iha Áfrika Oeste iha asu seguransa naran Teddy. Bainhira ema ruma soe naʼan ba Teddy, nia tolan kedas, nia la nata ka sente naʼan nia gostu. Tuirmai, nia hein namanas atu ema ruma soe tan naʼan ba nia maski nia iha loron manas laran. Bainhira nia hatene katak naʼan la iha, nia fila no bá.

Teddy nunka hatudu agradese ba buat neʼebé nia simu. No la iha ema ida mak espera Teddy atu fó agradese tanba nia mak asu.

MAIBÉ se ema, ita espera sira atu hatudu agradese mai ita. No dala barak ita sente laran-kraik. Ema barak foti deʼit buat neʼebé sira bele hetan, no hakarak simu buat barak liután. Ita la hakfodak ho ida-neʼe, tanba Bíblia fó-hatene nanis katak iha loron ikus sira ema sei la hatene fó agradese.​—2 Timóteo 3:1, 2.

Maibé Maromak nia atan sira la hanesan. Sira halo tuir konsellu husi apóstolu Paulo neʼebé hatete: “Sempre hatudu agradese bá.”​—Koloso 3:15.

Jeová rasik hatudu agradese ba ema

Maromak Jeová mak ezemplu perfeitu kona-ba hatudu agradese. Hanoin toʼok nia sente oinsá ho ninia atan sira neʼebé laran-metin. Maromak dirije Paulo atu hakerek ba ema Kristaun Ebreu: “Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ona ba ninia naran, tanba imi serbí ona no kontinua serbí ema santu sira.”​—Ebreu 6:10.

Bíblia fó sai ezemplu barak kona-ba oinsá Jeová hatudu agradese ba ninia atan sira. Nia haraik bensaun ba Abraão hodi halo ninia bei-oan sira sai barak “hanesan fitun iha lalehan no rai-henek iha tasi-ibun”. (Génesis 22:17) Jeová mós hatudu agradese ba Job neʼebé tahan susar ho laran-metin. Jeová la fó deʼit rikusoin neʼebé uluk Job iha, maibé nia fó “dala rua”. (Job 42:10) Dalan neʼebé Jeová trata ema durante tinan rihun ba rihun prova katak “Jeová nia matan hateke didiʼak ba mundu tomak atu hatudu ninia kbiit hodi salva ninia atan sira neʼebé laran-metin ba nia”.​—2 Krónikas16:9.

Importante tebes ba ema Kristaun atu fiar katak Maromak hafolin sira no hakarak fó kolen ba sira neʼebé hakaʼas an atu halo tuir ninia hakarak. Paulo hakerek: “Se ita la iha fiar, ita labele halo Maromak kontente. Tanba ema neʼebé hakbesik ba Maromak tenke fiar . . . katak Maromak sei fó kolen ba sira neʼebé buka nia ho laran.”​—Ebreu11:6.

Se Jeová mak Maromak neʼebé gosta kritika, ita hotu labele tahan iha ninia tesi-lia. Hakerek-naʼin ba salmo dehan: “Oh Jah, oh Jeová, sé mak bele tahan se Ita hateke deʼit ba sala sira?” (Salmo 130:3) Jeová la fokus ba ema nia sala, maibé nia hafolin ema neʼebé serbí nia. Nia mak Maromak neʼebé hatudu agradese.

Jesus mós hafolin tebes ema nia hahalok diʼak

Jesus Kristu haleno ninia Aman nia hahalok iha dalan perfeitu, tan neʼe nia hatudu agradese ba buat neʼebé ema seluk halo ho fiar metin. Hanoin toʼok kona-ba akontesimentu ida iha templu iha Jeruzalein: “[Jesus] haree ema riku sira tau osan ba osan-fatin. Tuirmai, nia mós haree feto-faluk kiak ida tau osan kiʼik rua ho folin neʼebé kiʼik tebes. No nia hatete: ‘Haʼu hatete loloos ba imi katak feto-faluk kiak neʼe tau barak liu fali ema sira seluk hotu. Tanba ema sira-neʼe hotu tau buat neʼebé resin husi sira-nia rikusoin, maibé feto neʼe, maski nia kiak, nia fó buat hotu neʼebé nia iha.’”​—Lucas 21:1-4.

Osan neʼebé feto-faluk fó mak kiʼik deʼit se kompara ho osan neʼebé ema riku sira tau. Ema barak la tau atensaun ba feto-faluk neʼe. Maibé Jesus lae. Nia haree ba feto neʼe no rekoñese ninia situasaun. Jesus hafolin duni buat neʼebé feto-faluk neʼe halo.

Jesus mós hafolin buat neʼebé feto riku ida halo. Loron ida bainhira Jesus han hela, Maria fui mina-morin neʼebé karun tebes ba Jesus nia ain no ulun. Ema balu kritika ho buat neʼebé Maria halo. Sira hanoin katak diʼak liu nia faʼan mina neʼe no uza osan neʼebé nia hetan atu ajuda ema kiak. Jesus nia reasaun mak oinsá? Nia hatete: “Husik bá. Tanbasá mak imi halo susar ba nia? Nia halo buat diʼak ba haʼu. Haʼu hatete loloos ba imi katak, iha fatin naran deʼit iha mundu tomak neʼebé ema haklaken liafuan diʼak, ema mós sei fó sai buat neʼebé feto neʼe halo hodi hanoin fali nia.”​—Marcos 14:3-6, 9; João 12:3.

Jesus la kritika katak Maria la uza ho didiʼak mina-morin neʼebé karun, maibé hafolin Maria nia hahalok laran-luak. Maria halo ida-neʼe atu hatudu domin no fiar ba Jesus. Bíblia konta akontesimentu neʼe atu ema bele hanoin-hetan Maria nia hahalok diʼak. Istória sira-neʼe no istória seluk tan hatudu katak Jesus hafolin tebes ema seluk nia hahalok diʼak.

Se Ita mak Maromak nia atan ida, Ita bele fiar katak Maromak Jeová no Jesus Kristu hafolin tebes Ita-nia hakaʼas an atu apoia adorasaun neʼebé loos. Hatene ida-neʼe sei book ita atu hakbesik liután ba Jeová no Jesus, no motiva ita atu banati-tuir sira hodi hatudu agradese liután.

Satanás la hatudu agradese

Agora mai ita hanoin ezemplu la diʼak kona-ba ida neʼebé la hatudu agradese. Neʼe mak Diabu Satanás. Tanba Satanás la haburas sentimentu agradese, neʼe sai razaun ida ba nia atu kontra hasoru Jeová.

Satanás haburas sentimentu la agradese no la kontente iha ninia laran, no ikusmai nia mós kuda sentimentu neʼe iha ema nia laran. Hanoin toʼok buat neʼebé akontese iha jardín Eden. Jeová kria mane no feto primeiru hodi fó sira jardín furak nuʼudar sira-nia hela-fatin, no hatete ba sira: “Ai-fuan husi ai-hun hotu iha jardín neʼe ó bele han toʼo bosu.” Tuirmai Jeová fó mandamentu ida deʼit hodi dehan: “Kona-ba ai-hun neʼebé hanaran nuʼudar ai-hun koñesimentu kona-ba buat diʼak no aat, ó labele han ninia fuan, tanba iha loron neʼebé ó han ai-fuan neʼe, ó sei mate duni.”​—Génesis 2:16, 17.

Maibé lakleur, Satanás book ema atu duvida kona-ba Jeová. Nia hakarak Eva la hatudu agradese ba Jeová toʼo kontra hasoru Jeová hanesan Satanás. Satanás husu ba Eva: “Maromak dehan duni katak imi labele han ai-fuan husi ai-hun hotu iha jardín neʼe ka?” (Génesis 3:1) Liafuan neʼe fó ideia katak Maromak lakohi fó ba Eva buat folin-boot neʼebé bele halo ninia matan nakloke no sai hanesan Maromak. Neʼe book Eva atu la hafolin bensaun barak neʼebé nia simu ona husi Jeová, no komesa kaan buat neʼebé Jeová bandu.​—Génesis 3:5, 6.

Ita hotu hatene didiʼak konsekuénsia neʼebé aat. Adão hanaran ninia feen Eva “tanba nia sei sai inan ba ema hotu”, maibé ikusmai Eva sai inan ba ema hotu neʼebé sei mate. Liuhusi Adão, ema hotu sai sala-naʼin no rezultadu mak mate.​—Génesis 3:20; Roma 5:12.

Banati-tuir Maromak no Kristu

Hanoin toʼok diferensa entre Satanás no Jesus. Bíblia temi Satanás nuʼudar “ida neʼebé duun ita-nia maun-alin sira loron no kalan iha Maromak nia oin”. (Apokalipse12:10) Maibé Jesus “bele halo kompletu serbisu atu salva ema sira neʼebé hakbesik ba Maromak liuhusi nia, tanba nia moris nafatin hodi harohan kona-ba sira”.​—Ebreu 7:25.

Satanás duun Maromak nia atan sira. Maibé Jesus hafolin sira no harohan kona-ba sira. Ita neʼebé hakarak banati-tuir Kristu presiza hakaʼas an atu fokus ba ema seluk nia hahalok diʼak hodi hafolin no hatudu agradese ba malu. Se ita halo nuneʼe, ita hatudu katak ita agradese ba Maromak Jeová neʼebé fó ezemplu diʼak liu kona-ba hatudu agradese.​—1 Korinto 11:1.

[Dezeñu]

Jesus hatudu katak nia hafolin Maria nia hahalok diʼak