Dezembru

Jesus nia dixípulu sira simu Maromak nia Liafuan no hakaʼas an atu aplika iha sira-nia moris. (João 17:6) Maski nuneʼe, sira konfuzaun tanbasá Jesus tenke mate nuʼudar kriminozu. Jesus hatene katak dixípulu sira iha fiar no hadomi Jeová, maibé sira seidauk komprende didiʼak Eskritura sira. (Lc 9:​44, 45; João 20:9) Tan neʼe nia ajuda sira atu komprende kona-ba Eskritura sira. Haree toʼok oinsá mak nia halo nuneʼe ba dixípulu naʼin-rua iha dalan atu bá Emaus. Jesus la fó-hatene kedas ba dixípulu naʼin-rua neʼe kona-ba nia mak sé. Maibé nia husu pergunta balu. Tanbasá? Karik nia hakarak sira atu fó sai sira-nia hanoin no sentimentu. No sira halo nuneʼe. Sira fó-hatene nia katak sira hakarak tebes atu Jesus halo ema Izraél livre husi Roma nia ukun. (Lc 24:​18-27) Jesus uza Eskritura atu ajuda sira komprende saida mak akontese ona. Tuirmai iha kalan, Jesus uza tempu atu ajuda dixípulu seluk komprende profesia kona-ba nia.—Lc 24:​33-48. w24.10 p. 14 par. 9-10

Jesus aprende husi ninia Aman iha lalehan kona-ba saida mak nia presiza halo no koʼalia. Jeová nia organizasaun halo tuir Jesus nia ezemplu hodi uza Maromak nia Liafuan atu hanorin ita kona-ba morál neʼebé loos no dirije ita. (2 Tim 3:​16, 17) Ita hetan beibeik anima atu lee no halo tuir Maromak nia Liafuan. Ita bele hetan benefísiu barak kuandu ita estuda Bíblia hodi uza ita-nia publikasaun sira. Porezemplu, ita bele kompara Bíblia nia hanorin ho matadalan sira neʼebé ita simu husi Jeová nia organizasaun. Bainhira ita haree katak matadalan neʼebé ita simu bazeia ba Bíblia, neʼe hametin liután ita-nia fiar ba Jeová nia organizasaun. (Rom 12:2) Jesus haklaken “liafuan diʼak kona-ba Maromak nia Ukun”. (Lc 4:​43, 44) Jesus mós haruka ninia dixípulu sira atu haklaken kona-ba Ukun neʼe. (Lc 9:​1, 2; 10:​8, 9) Ohin loron, ema hotu neʼebé sai parte ba Jeová nia organizasaun mós haklaken kona-ba Maromak nia Ukun, maski sira hela iha fatin naran deʼit. w24.04 p. 9 par. 5-7

Kontinua tau fiar ba matadalan husi Jeová nia organizasaun. Iha Izraél antigu, Jeová uza Moisés, no tuirmai Josué atu fó matadalan ba Ninia povu. (Jos 1:17) Povu Izraél hetan bensaun kuandu sira haree Moisés no Josué nuʼudar Jeová nia reprezentante. Tinan atus ba atus liutiha, bainhira kongregasaun Kristaun foin harii, apóstolu naʼin-12 mak fó matadalan. (Após 8:​14, 15) No tuirmai grupu neʼe mós inklui katuas sira seluk iha Jeruzalein. Hodi halo tuir matadalan neʼebé mai husi mane fiar-naʼin sira-neʼe, “kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik”. (Após 16:​4, 5) Ohin loron, ita mós sei simu bensaun bainhira ita halo tuir matadalan neʼebé mai husi Jeová nia organizasaun. w24.07 p. 10 par. 10

Jeová hadomi tebes Liurai David no bolu nia nuʼudar ‘mane neʼebé monu loos ba ninia laran’. Maibé David halo sala balu neʼebé sériu, inklui adultériu no oho ema. Tuir Moisés nia Ukun-fuan, David tenke mate. (Lev 20:10; Núm 35:31) Maibé, Jeová ho laran-diʼak ajuda nia atu arrepende sala. Nia haruka profeta Natan atu vizita David maski David seidauk hatudu katak nia arrepende sala. Natan uza ai-knanoik atu ajuda David rekoñese ninia sala. Neʼe book tebes David nia laran. (2 Sam 12:​1-14) Nia hakerek salmo ida neʼebé hatudu katak nia arrepende an duni. (Sal 51, introdusaun) Ema barak neʼebé halo ona sala sente kmaan bainhira lee salmo neʼe, no neʼe book sira atu arrepende sala. Ita kontente tanba Jeová hadomi no ajuda David atu arrepende sala. w24.08 p. 10 par. 9

Ita barak konkorda katak atu haboot oan mak serbisu boot. Se Ita mak inan-aman neʼebé haboot hela oan, ami gaba Ita tanba hakaʼas an atu hametin sira-nia fiar. (Deut 6:​6, 7) Nuʼudar oan sai boot, karik nia sei husu pergunta importante sira kona-ba ita-nia fiar neʼebé bazeia ba Bíblia, inklui Bíblia nia hanorin kona-ba morál. Karik Ita hanoin katak Ita-nia oan husu pergunta sira-neʼe tanba nia la iha fiar neʼebé boot ba Maromak no Bíblia. Maibé, loloos nuʼudar oan sai boot, sira presiza husu pergunta sira atu bele hametin sira-nia fiar. (1 Kor 13:11) Tan neʼe lalika hanoin barak. Bainhira oan husu pergunta, Ita bele haree ida-neʼe nuʼudar oportunidade atu ajuda aumenta ninia kbiit atu hanoin. w24.12 p. 14 par. 1-2

Ema Kristaun Ebreu presiza iha fiar neʼebé metin atu bele moris liu susar boot neʼebé lakleur tan sei akontese iha Judeia. (Ebr 10:​37-38) Jesus hatete ba ninia dixípulu sira katak bainhira sira haree tropa haleʼu Jeruzalein, sira presiza halai ba foho. Ninia konsellu neʼe aplika ba ema Kristaun hotu iha tempu neʼebá maski sira hela iha sidade laran ka sidade liʼur. (Lc 21:​20-24) Baibain bainhira tropa mai atu ataka, ema neʼebé hela iha sidade liʼur halai ba sidade laran tanba moru neʼebé bele proteje sira. Tuir ema nia haree, atu halai ba foho mak ideia neʼebé la lójiku, tan neʼe ema Kristaun presiza iha fiar neʼebé metin atu halo tuir Jesus nia liafuan. Ema Kristaun Ebreu mós presiza tau fiar ba ema neʼebé Jesus uza atu dirije kongregasaun. Karik sira neʼebé dirije kongregasaun fó matadalan espesífiku kona-ba bainhira atu halai no oinsá atu halo ida-neʼe.—Ebr 13:17. w24.09 p. 10 par. 9-10

Bainhira iha rai, Jesus ho perfeitu halaʼo knaar neʼebé nia simu husi ninia Aman. (João 17:4) Maibé Jesus la hanoin katak nia deʼit mak bele halo knaar neʼebé husi Jeová. Nia mós treinu ninia dixípulu sira. Jesus tau fiar ba ninia dixípulu sira, nia fó sira responsabilidade atu tau matan ba Jeová nia bibi no atu dirije serbisu haklaken no hanorin. Jesus mós fó konsellu ho domin ba dixípulu sira hodi tuir sira-nia presiza. Sira balu sei duvida hela, tan neʼe nia fó konsellu ba sira. (Lc 24:​25-27; João 20:27) Nia fó-hanoin sira atu fokus tau matan ba Jeová nia povu duké buka osan. (João 21:15) Nia mós hanorin sira atu la kompara buat neʼebé sira halo ba Jeová ho buat neʼebé ema seluk halo. (João 21:​20-22) Nia mós korrije sira-nia ideia balu neʼebé sala kona-ba Maromak nia Ukun no ajuda sira atu fokus ba serbisu haklaken.—Após 1:​6-8. w24.10 p. 15-16 par. 13-14

Halo tuir lori ba moris. Hanesan povu Izraél neʼebé besik ona atu tama ba rai neʼebé Maromak promete, ita mós besik ona atu tama ba mundu foun neʼebé Maromak promete, no lakleur tan mundu tomak sei sai paraízu. (Isa 35:1; Lc 23:43) Diabu no anju aat sira sei la iha tan. (Apok 20:​2, 3) La iha tan relijiaun falsu neʼebé hanetik ema atu hakbesik ba Jeová. (Apok 17:16) La iha tan ema nia governu neʼebé fó-terus ba povu. (Apok 19:​19, 20) Sei la iha tan ema neʼebé hamosu problema. (Sal 37:​10, 11) Ema hotu sei halo tuir Jeová nia mandamentu neʼebé lori dame no unidade. No ema hotu sei hadomi no tau fiar ba malu. (Isa 11:9) Neʼe mak bensaun neʼebé furak tebes! No se ita halo tuir Jeová, ita bele moris ba nafatin iha paraízu.—João 3:16. w24.11 p. 9 par. 7

Profesia neʼebé temi iha eskritura ohin nian kumpre daudaun iha ita-nia tempu iha dalan neʼebé boot liu. Liafuan diʼak kona-ba Maromak nia Ukun fó sai ona iha língua 1.000 liu, no liuhusi ita-nia website jw.org ema barak iha mundu tomak bele aprende kona-ba liafuan diʼak neʼe. Maski nuneʼe, Jesus mós hatete ba ninia dixípulu katak sira sei la konsege halo ‘remata sira-nia serbisu iha sidade hotu’ antes Jesus mai. (Mt 10:23; 25:​31-33) Neʼe katak ita sei la konsege haklaken ba ema hotu antes Jesus mai. Ema millaun ba millaun ohin loron hela iha fatin neʼebé ita labele haklaken ho livre. Liután neʼe, kada minutu bebé atus ba atus mak moris. Klaru katak ita halo buat neʼebé ita bele atu haklaken ba ema husi ‘nasaun, suku, no língua’ hotu. (Apok 14:6) Maski nuneʼe, ita sei la konsege haklaken ba ema hotu iha mundu tomak antes mundu nia rohan toʼo mai. w24.05 p. 10 par. 6-7

Jesus uza ninia liafuan atu anima no fó kmaan ba ema seluk. Nia la koʼalia ho hirus ba dixípulu sira. (Lc 8:​47, 48) Jesus hanorin laʼen sira atu laran-metin ba sira-nia feen. Nia temi fali ninia Aman nia liafuan katak laʼen ida tenke “hamutuk ho ninia feen”. (Mt 19:​4-6) Liafuan Gregu neʼebé tradús nuʼudar “hamutuk” signifika katak “belit metin hanesan goma”, tan neʼe domin entre laʼen no feen tenke metin hanesan goma neʼebé belit metin. Se sira ida halo buat neʼebé hakanek sira-nia pár nia laran, neʼe sei lori susar ba sira naʼin-rua. Laʼen neʼebé laran-metin ba feen sei hasees an husi buat naran deʼit neʼebé liga ho pornografia. Nia sei la hateke ba “buat neʼebé folin-laek”. (Sal 119:37) Hanesan Job, nia deside metin atu la hateke ba feto seluk hodi kaan feto neʼe.—Job 31:1. w25.01 p. 10 par. 12-13

Ema ida-idak nia hanoin la hanesan bainhira sira hatete katak sira perdua ita. Dalan neʼebé Jeová perdua ita la hanesan ho dalan neʼebé ita fó perdua ba malu. Jeová nia dalan atu fó perdua mak úniku. Hakerek-naʼin ba salmo hatete kona-ba Jeová: “Ita sei perdua duni ema nia sala sira, atu nuneʼe ema sei hamtaʼuk Ita.” (Sal 130:4) Sin, bainhira Jeová fó perdua, neʼe katak nia “perdua duni”. Nia mak ida neʼebé hatudu mai ita oinsá atu fó perdua iha dalan neʼebé loos. Iha versíkulu balu iha Bíblia, hakerek-naʼin sira uza liafuan husi lian Ebraiku kona-ba fó perdua neʼebé aplika deʼit ba dalan neʼebé Jeová fó perdua, laʼós ba dalan neʼebé ema fó perdua ba malu. Bainhira Jeová fó perdua ba ema ida, ema neʼe nia sala hamoos ona. Ema neʼe bele nafatin iha relasaun besik ho Jeová. Dalan neʼebé Jeová fó perdua mak kompletu no ho laran-luak. w25.02 p. 8 par. 1-3

Ita-nia susesu la depende ba rezultadu neʼebé ita hetan iha serbisu haklaken. Tanbasá? Tanba ita halo ona buat neʼebé Jeová no ninia Oan-Mane hakarak, neʼe mak atu fó sasin. Maski ita la hasoru ema ka ema lakohi rona ita, ita bele nafatin sente kontente tanba hatene katak ita halo ita-nia Aman iha lalehan kontente. (Prov 27:11) Ita mós bele sente kontente kuandu haklaken-naʼin seluk hetan ema neʼebé hatudu interese. Livru Haklaken kompara ita-nia serbisu haklaken hanesan ho buka labarik neʼebé lakon. Ema barak hola parte atu buka labarik neʼe, no buka nia iha fatin oioin. Bainhira ema ida hetan labarik neʼe, ema hotu bele sente kontente laʼós deʼit ida neʼebé hetan nia. Nuneʼe mós ho serbisu haklaken, irmaun-irmán hotu mak ajuda atu ema ida bele sai Jesus nia dixípulu. Irmaun-irmán hotu presiza apoia malu atu bele haklaken ba ema hotu iha haklaken-fatin. No kuandu ema foun ida komesa tuir reuniaun, kongregasaun tomak bele sente kontente. w24.04 p. 18 par. 13-14

Ita hakarak tebes atu haree saida mak sei akontese lakleur tan! Ita hein katak ho Jeová nia bensaun ema barak liután sei simu lia-loos antes terus boot hahú. No mós ita sente kontente katak durante terus boot, karik ema barak sei husik Satanás nia mundu no adora Jeová hamutuk ho ita! Antes tempu neʼe toʼo mai, ita iha serbisu barak atu halo, no neʼe sei la repete fali. Ita iha priviléjiu atu haklaken liafuan diʼak kona-ba Maromak nia Ukun iha mundu tomak. Ita mós presiza kontinua fó avizu ba ema. Ema presiza hatene katak mundu nia rohan besik ona. Tanba ita hadomi liafuan diʼak, hadomi ema, no importante liu hotu mak hadomi Jeová no ninia naran, neʼe sei book ita atu kontinua haklaken ho laran-manas no urjente toʼo Jeová dehan: “Para ona!” w24.05 p. 19 par. 14-16

Iha kalan antes Jesus mate, nia hanorin Pedro no apóstolu seluk lisaun importante kona-ba haraik an. Apóstolu sira hakfodak hodi haree Jesus halo serbisu neʼebé baibain atan sira mak halo. Nia hasai ninia roupa liʼur, kesi toalla iha ninia knotak, tau bee iha basia laran, no komesa fase apóstolu sira-nia ain. (João 13:​4, 5) Jesus fase apóstolu sira hotu nia ain, no karik neʼe han tempu balu. Nia fase Judas nia ain maski hatene katak lakleur tan Judas sei faʼan nia. Maski nuneʼe, Jesus haraik an hodi halo hotu ninia serbisu. Tuirmai, Jesus ho pasiénsia esplika: “Imi komprende buat neʼebé haʼu foin halo ba imi ka lae? Imi bolu haʼu ‘Mestre’ no ‘Naʼi’, no ida-neʼe loos, tanba haʼu hanesan neʼe duni. Entaun, maski haʼu mak Naʼi no Mestre, maibé haʼu fase imi-nia ain, se nuneʼe imi mós tenke fase imi-nia maluk nia ain.”—João 13:​12-14. w25.03 p. 10 par. 9-11

Mundu neʼe halo susar ba ita atu nafatin hakbesik ba Jeová. Ema barak la fiar katak Maromak iha duni. Dala barak, ema neʼebé lakohi halo tuir Maromak haree hanesan sira iha moris neʼebé diʼak. No bainhira ita haree ida-neʼe, neʼe bele koko ita-nia fiar. Maski ita fiar katak Maromak iha duni, karik ita komesa dúvida katak nia sei ajuda ita. Hakerek-naʼin ba Salmo 73 mós sente buat neʼebé hanesan. Nia haree ema barak la halo tuir Maromak nia ukun-fuan, maibé sira nafatin moris kontente. Neʼe halo nia komesa hanoin katak saugati deʼit atu serbí Maromak. (Sal 73:​11-13) Saida mak ajuda hakerek-naʼin ba salmo neʼe atu hadiʼa ninia hanoin? Nia medita kona-ba buat neʼebé sei akontese ba sira neʼebé la tau fiar tan ba Jeová. (Sal 73:​18, 19, 27) Nia mós hanoin kona-ba benefísiu husi serbí Jeová. Ita mós bele hanoin kona-ba bensaun neʼebé Jeová fó mai ita. w24.06 p. 25 par. 16-17

Iha Bíblia nia tempu, ema balu aproveita sira-nia maun-alin neʼebé kiak hodi haruka sira selu osan-funan kuandu fó-empresta. No mós, juís balu simu osan subasubar no la hatudu justisa bainhira tesi-lia ba ema neʼebé la sala. Jeová odi tebes hahalok sira-neʼe. (Eze 22:12) Diʼak atu analiza ita-nia hanoin kona-ba osan. Husu Ita-nia an: ‘Haʼu hanoin beibeik kona-ba osan no buat neʼebé haʼu hakarak sosa? Se haʼu empresta osan, haʼu neineik atu selu fali tanba hanoin ema neʼebé fó-empresta la presiza? Haʼu sente katak haʼu mak ema neʼebé importante tanba iha osan? Susar ba haʼu atu hatudu laran-luak ka lae? Haʼu hanoin katak irmaun no irmán sira neʼebé iha osan barak mak materializmu ka lae? Haʼu habelun ho ema neʼebé riku no la hatudu interese ba ema neʼebé kiak?’ Ita bele proteje ita-nia relasaun belun ho Maromak hodi la hadomi osan. Se ita halo nuneʼe, Jeová sei nunka husik hela ita! w24.06 p. 12-13 par. 17-18

Atu proteje ita-nia an husi tentasaun, ita presiza haburas hakarak neʼebé loos. Se ita aprende atu “odi buat neʼebé aat, no hadomi buat neʼebé diʼak”, ita sei hametin ita-nia hakarak atu halo buat neʼebé loos. (Amós 5:15) Bainhira ita iha hakarak neʼebé loos, neʼe sei ajuda ita atu la monu ba tentasaun. Ita presiza kontinua okupadu ho atividade espirituál. Bainhira ita tuir reuniaun sira ka haklaken, ita haburas ita-nia hakarak atu halo Jeová kontente. (Mt 28:​19, 20; Ebr 10:​24, 25) Hodi lee no estuda Bíblia no medita kona-ba neʼe sei hametin ita-nia domin ba buat neʼebé diʼak, no odi buat neʼebé aat. (Jos 1:8; Sal 1:​2, 3; 119:97) Hanoin-hetan, Jesus hatete ba ninia dixípulu sira: “Harohan beibeik, atu nuneʼe imi labele monu ba tentasaun.” (Mt 26:41) Hodi halo nuneʼe, ita fó oportunidade ba Jeová atu ajuda ita no ita sei deside metin atu halo nia kontente.—Tgo 4:8. w24.07 p. 17 par. 14-16

Hakaʼas an atu banati-tuir Jeová bainhira treinu ema seluk. Hanoin-hetan katak Jeová fó ninia matenek ho laran-luak. Tan neʼe ita mós hakarak hatudu laran-luak kuandu fahe ita-nia koñesimentu no esperiénsia ba sira neʼebé aprende hela. Ita lakohi karak ita-nia matenek tanba taʼuk katak ema neʼebé ita treinu sei foti ita-nia knaar. Ita mós lakohi hanoin hanesan ema balu neʼebé dehan: ‘Tanba la iha ema ida mak treinu haʼu, entaun haʼu lakohi treinu ema seluk.’ Nuʼudar Jeová nia povu, ita lakohi hanoin hanesan neʼe. Ita kontente tebes atu fahe ita-nia koñesimentu no hakaʼas an atu treinu ema seluk. (1 Tes 2:8) Ita mós hakarak sira atu “kumpre kritéria atu hanorin ema seluk”. (2 Tim 2:​1, 2) Se ita ho laran-luak fahe ita-nia matenek, ita hotu sei sai matenek no kontente liu. w24.09 p. 29 par. 12-13

Se Ita sente la iha abilidade espesiál ruma, keta laran-kraik. Klaru katak Ita iha hahalok diʼak neʼebé bele lori benefísiu ba kongregasaun. Ita bele lee Paulo nia liafuan iha 1 Korinto 12:​12-30 no husu Jeová nia ajuda atu bele haree oinsá eskritura neʼe aplika ba Ita. Paulo nia liafuan hatudu katak Jeová nia atan hotu inklui Ita mak folin-boot ba kongregasaun. Kontinua hakaʼas an atu serbí Jeová no ajuda irmaun-irmán sira. Se Ita halo nuneʼe, Ita bele fiar katak katuas sira hanoin kona-ba Ita-nia abilidade, no sei fó ba Ita knaar neʼebé tuir Ita-nia kbiit. (Rom 12:​4-8) Ita hotu presiza hakbesik liután ba Jeová, prontu atu ajuda ema seluk, no moris tuir Maromak nia hakarak. w24.11 p. 17 par. 12-13

Ana hasoru susar balu neʼebé halo ninia matan-been suli. Susar ida neʼebé nia hasoru mak ninia laʼen iha feen kiʼik naran Penina, no Penina la gosta Ana. No mós, Ana labele iha oan, maibé Penina iha oan balu. (1 Sam 1:​1, 2) Penina hatún beibeik Ana tanba labele iha oan. Ana triste tebetebes toʼo “tanis no lakohi han”, no nia sai “laran-susar tebes”. (1 Sam 1:​6, 7, 10) Saida mak Ana halo atu bele sente kmaan? Buat ida neʼebé ajuda nia mak nia bá tenda santu ka tabernákulu atu adora Jeová. Iha fatin neʼe nia harohan ba Jeová: “Haree ba Ita-nia atan nia terus no hanoin-hetan Ita-nia atan.” (1 Sam 1:11) Jeová haree Ana nia susar, rona bainhira Ana tanis, no tuirmai ajuda Ana atu iha oan.—1 Sam 1:​19, 20; 2:21. w24.12 p. 21 par. 5-7

Jesus nia sakrifísiu hanorin ita katak nia hadomi tebes ema, liuliu ninia dixípulu sira. (João 13:1) Porezemplu, Jesus hatene katak buat balu neʼebé nia sei halo iha mundu mak susar, liuliu nia presiza hetan terus toʼo mate. Maski nuneʼe, Jesus halaʼo ninia knaar hotu laʼós deʼit tanba Jeová mak haruka, maibé mós tanba nia hadomi ema. Jesus haklaken, hanorin, no ajuda ema seluk ho laran tomak. Iha kalan antes Jesus mate, nia uza tempu atu fase apóstolu sira-nia ain, hanorin sira, no fó kmaan ba sira. (João 13:​12-15) Tuirmai, kuandu nia iha ai-riin terus nian, nia fó esperansa ba kriminozu ida neʼebé iha ninia sorin no husu João atu tau matan ninia inan Maria. (Lc 23:​42, 43; João 19:​26, 27) Jesus hatudu domin ba ema laʼós deʼit hodi mate ba sira, maibé mós hodi trata sira ho domin no laran-diʼak. w25.01 p. 23 par. 11

Bíblia uza ilustrasaun atu ajuda ita komprende liberdade neʼebé ita hetan bainhira Jeová perdua duni ita. Tanba ita mak ema sala-naʼin, Bíblia hatete katak ita mak “atan ba sala”. Maibé tanba Jeová fó perdua ba ita, ita mak hanesan atan neʼebé “sai livre ona husi sala”. (Rom 6:​17, 18; Apok 1:5) Sin, dalan neʼebé Jeová fó perdua halo ita sente kontente hanesan atan neʼebé livre. Tanba Jeová fó ninia Oan-Mane nuʼudar sakrifísiu, neʼe hanesan ita hetan kura iha dalan simbóliku. (1 Ped 2:24) Bainhira ita halo sala, ita sai moras iha dalan espirituál. Maibé liuhusi Jesus nia sakrifísiu, ita bele iha fali relasaun diʼak ho Jeová. Hanesan ema neʼebé hetan kura husi moras todan no sente kontente, ita mós kontente bainhira hetan kura iha dalan espirituál no iha fali relasaun diʼak ho Jeová tanba nia fó perdua ba ita. w25.02 p. 11 par. 16; p. 13 par. 17

Iha ai-knanoik kona-ba osan talentu, Jesus koʼalia kona-ba atan naʼin-rua neʼebé laran-metin ba sira-nia naʼi no atan ida neʼebé la laran-metin. (Mt 25:​14-30) Atan naʼin-rua neʼebé laran-metin reprezenta Kristu nia alin sira neʼebé laran-metin. Naʼi Jesus konvida sira atu ‘hola parte iha sira-nia naʼi nia ksolok’. Sira simu kolen atu bá lalehan, neʼe mak moris-hiʼas primeiru. (Mt 25:​21, 23; Apok 20:5a) Maibé, ezemplu kona-ba atan neʼebé baruk-teen sai nuʼudar avizu ba Kristu nia alin sira. Oinsá? Sira presiza hatudu katak sira badinas. Iha ai-knanoik kona-ba feto virjen no osan talentu, Jesus la dehan katak ema Kristaun neʼebé atu bá lalehan sei sai baruk-teen. Maibé nia esplika kona-ba buat neʼebé sei akontese se sira lakon sira-nia badinas. Sira sei la sai ema neʼebé “Maromak bolu no hili ona” no labele hola parte iha Ukun lalehan nian. w24.09 p. 22 par. 10; p. 23 par. 12-13

Ita hotu hakarak tau matan ba ita-nia presiza no mós família. (Ecle 7:12; 1 Tim 5:8) Bainhira hili serbisu, klaru katak ita hanoin kona-ba saláriu neʼebé ita sei simu. Maibé, se ita hanoin deʼit kona-ba neʼe, neʼe katak ita la laʼo tuir fiar. Se ita laʼo tuir fiar, ita mós sei hanoin didiʼak kona-ba oinsá mak serbisu neʼe kona ita-nia relasaun ho Jeová. Ita bele husu ita-nia an: ‘Serbisu neʼe envolve ho buat neʼebé Jeová odi ka lae?’ (Prov 6:​16-19) ‘Neʼe sei hanetik haʼu atu tuir reuniaun, bá haklaken, estuda Bíblia, no halo haʼu dook husi família ba tempu naruk ka lae?’ Se resposta ba pergunta sira-neʼe mak sin, diʼak atu la simu serbisu neʼe maski susar ba ita atu buka serbisu. Tanba ita laʼo tuir fiar, ita sei halo desizaun neʼebé hatudu katak ita fiar Jeová sei tau matan mai ita.—Mt 6:33; Ebr 13:5. w25.03 p. 21 par. 5-6

Ita presiza hakaʼas an atu haree irmaun-irmán sira tuir dalan neʼebé Jeová haree sira. Ita bele halo nuneʼe hodi fokus ba sira-nia hahalok diʼak, laʼós sira-nia fraku. Iha futuru sira-nia fraku sei la iha tan. Ita bele rezolve problema sira ho domin. Hodi halo nuneʼe, ema seluk neʼebé hakarak sente domin hanesan neʼe sei hakarak tama ba paraízu espirituál. Ita hakarak kontinua hafolin paraízu espirituál neʼebé Jeová kria ba ita. Ema neʼebé hakarak atu sente kmaan, kontente, hakmatek, no kalma presiza tama ba paraízu espirituál no nunka sai fali! Maibé ita presiza kuidadu tebes tanba Satanás halo buat oioin hodi koko lohi ita atu sai husi paraízu espirituál. (1 Ped 5:8; Apok 12:9) Ita lakohi nia atu susesu. Mai ita hakaʼas an atu proteje dame no unidade iha paraízu espirituál. w24.04 p. 24-25 par. 18-19

Inan-aman bele ajuda oan hatudu laran-manas iha sira-nia adorasaun ba Jeová. Hanorin Ita-nia oan liuhusi Ita-nia liafuan no ezemplu katak atividade espirituál hanesan estuda Bíblia, tuir reuniaun, no hola parte iha serbisu haklaken mak importante liu fali atividade sira seluk. Tanba se lae, karik Ita-nia oan sei hanoin katak sira sai Testemuña ba Jeová tan deʼit neʼe mak “família nia relijiaun”. Rezultadu mak karik sira sei la tau uluk adorasaun iha sira-nia moris, ka husik tiha lia-loos. Se ema ida para atu serbí Jeová, nia bele fila fali ka lae? Sin, naran katak nia arrepende an no adora fali Jeová. Atu halo nuneʼe, nia presiza hatudu hahalok haraik an no simu ajuda husi katuas kongregasaun. (Tgo 5:14) Se ita hakaʼas an atu sai fali Jeová nia belun, nia sei simu ita! w24.07 p. 25 par. 18-19

Oinsá mak Ita bele namora iha dalan neʼebé moos tuir Jeová nia haree? Nuʼudar imi-nia sentimentu sai buras, neʼe bele halo imi sai besik liután ba malu. Saida mak bele ajuda imi atu kontinua moos iha dalan morál? Labele koʼalia kona-ba buat seksuál, labele mesamesak, no labele hemu tua barak. (Éf 5:3) Buat sira-neʼe bele hamosu hakarak seksuál no halo susar ba imi atu halo buat neʼebé loos. Diʼak atu koʼalia hamutuk beibeik kona-ba buat neʼebé imi presiza halo atu hatudu respeitu ba malu no mós ba Jeová nia matadalan sira. (Prov 22:3) Nuʼudar imi-nia domin sai buras, karik imi deside atu hatudu domin ba malu tuir dalan neʼebé loos. Maibé, se Ita-nia hakarak seksuál sai makaʼas, neʼe bele halo susar ba Ita atu halo desizaun neʼebé matenek kona-ba Ita-nia pár. (Kna 1:2; 2:6) No se imi hatudu domin iha dalan neʼebé la loos, neʼe bele halo fasil ba imi atu la kontrola an no halo buat neʼebé kontra Jeová nia matadalan. (Prov 6:27) Tan neʼe, kuandu foin hahú namora, koʼalia hamutuk kona-ba Bíblia nia prinsípiu no saida mak imi bele halo no labele halo.—1 Tes 4:​3-7. w24.05 p. 29 par. 10-11

Ita hakarak ema atu tau fiar katak ita sei ajuda sira kuandu sira presiza. (Prov 17:17) Ita bele halo saida atu ema bele tau fiar ba ita? Hakaʼas an atu banati-tuir Jeová nia hahalok loroloron. Porezemplu, hakaʼas an atu kumpre ita-nia promesa sira no halo buat hotu tuir tempu. Oinsá mak kongregasaun hetan benefísiu tanba tau fiar ba katuas sira? Bainhira irmaun-irmán sira hatene katak sira bele bolu katuas sira iha tempu naran deʼit neʼebé sira presiza, neʼe sei ajuda sira atu hamenus sira-nia estrese. Irmaun-irmán sira mós bele sente domin bainhira sira hatene katak katuas sira prontu atu ajuda sira. Bainhira katuas sira uza Bíblia no publikasaun sira atu fó konsellu duké sadere ba sira-nia hanoin rasik, irmaun-irmán sira sei tau fiar liután ba sira. Irmaun-irmán sira mós bele tau fiar liután ba katuas sira se sira la fó sai ema nia problema pesoál, no mós se sira kumpre sira-nia promesa. w24.06 p. 30 par. 14-15

Ohin loron, ita labele espera katak Jeová sei halo milagre atu halakon ita-nia susar hotu, maibé ita bele fiar katak nia sempre ajuda ita. (Sal 41:3) Liuhusi espíritu santu, Jeová fó ita forsa, matenek, no dame atu ita bele tahan. (Prov 18:14; Flp 4:13) Nia mós fó kmaan mai ita hodi fó esperansa katak nia sei halakon moras hotu iha futuru. (Isa 33:24) Kuandu ita hasoru susar, Jeová nia liafuan bele ajuda ita sai kalma. (Rom 15:4) Bainhira irmán ida iha Áfrika Oeste hatene katak nia iha kankru, nia tanis beibeik. Nia konta: “Eskritura ida neʼebé halo haʼu sente kmaan mak Isaias 26:3. . . . Jeová bele halo ita sente dame iha laran, no neʼe ajuda ita atu kontrola ita-nia reasaun.” Oinsá ho Ita? Eskritura saida mak fó kmaan ba Ita bainhira hasoru situasaun susar? w24.12 p. 24 par. 17-18

Katuas sira mós hakaʼas an atu hatudu hahalok perdua ba ema neʼebé laʼo sala dalan. Sira hakarak bibi neʼebé lakon atu fila fali ba Jeová. (Lc 15:​22-24, 32) No kuandu ema neʼe fila fali, Jeová, Jesus, anju sira, no kongregasaun hotu sei sente haksolok tebes! (Lc 15:7) Jeová lakohi ema neʼebé la arrepende an atu nafatin iha kongregasaun. Maibé, nia kontinua koko atu ajuda ema hanesan neʼe. Nia hakarak ema neʼe atu fila fali. No bainhira ema neʼe arrepende an, Jeová sente hanesan ho liafuan neʼebé hakerek iha Oseias 14:4: “Haʼu sei kura sira husi sira-nia hahalok la laran-metin, haʼu sei hadomi sira ho haʼu-nia hakarak rasik, tanba haʼu hadook tiha ona haʼu-nia hirus husi sira.” Liafuan neʼe book katuas sira atu matan-moris kona-ba sinál sira neʼebé hatudu katak ema neʼe komesa arrepende an. Liafuan neʼe mós bele book ema neʼebé husik ona Jeová hodi la demora atu fila fali ba nia. w24.08 p. 28 par. 8-9

Maibé realidade mak ema balu la hatudu agradese. Dala ruma ita sente katak ema seluk la hafolin buat neʼebé ita halo ba sira, ka sira la rekoñese tempu, forsa, ka osan neʼebé ita uza atu fó ajuda. Se neʼe akontese, oinsá mak ita bele sente kontente nafatin duké sai laran-kraik? Hanoin-hetan ita-nia kontente la depende ba sira hafolin ka lae. Ita bele deside atu nafatin fó ho kontente maski ita sente ema la hatudu agradese. Oinsá? Fokus hodi banati-tuir Jeová. Jeová fó buat diʼak barak ba ema maski sira hafolin ka lae. (Mt 5:​43-48) Jeová promete katak bainhira ita fó “hodi la hein atu ema selu fali”, ita sei simu “kolen boot tebes”. (Lc 6:35) Neʼe katak ita lakohi espera buat naran deʼit husi ema neʼe, inklui liafuan agradese. Hanoin-hetan, Jeová sei fó kolen ba buat diʼak neʼebé ita halo atu ajuda ema tanba ita “fó ho laran-haksolok”.—Prov 19:17; 2 Kor 9:7. w24.09 p. 29 par. 14-16