Janeiru

Tempu neʼebé lori ksolok boot ba kaben-naʼin mak bainhira sira-nia bebé foin moris. Maski sira hadomi tebes bebé neʼe, maibé sira lakohi sira-nia oan atu nafatin sai bebé. Loloos, inan-aman sei hanoin barak se sira-nia bebé la sai boot. Nuneʼe mós, Jeová kontente tebes bainhira ita hahú aprende kona-ba nia, maibé nia lakohi ita atu para deʼit iha neʼe. (1 Kor 3:1) Jeová hakarak ita atu “sai boot” nuʼudar ema Kristaun. Iha Bíblia, liafuan Gregu neʼebé tradús nuʼudar “ema boot” bele mós inklui ideia katak sai maduru nuʼudar ema Kristaun. (Éf 4:​13, nota) Entaun, hanesan bebé ida kontinua sai boot, ita mós presiza kontinua haburas ita-nia relasaun ho Jeová. Hodi halo nuneʼe, ita bele sai ema Kristaun neʼebé maduru. Klaru katak, maski ita maduru ona, maibé ita hakarak atu kontinua laʼo ba oin iha dalan espirituál.—1 Tim 4:15. w24.04 p. 2 par. 1, 3

Se ema ida husu: ‘Ita haree Jeová hanesan saida?’ Karik Ita sei hatán: ‘Haʼu haree Jeová hanesan haʼu-nia Aman, haʼu-nia Maromak, no haʼu-nia Belun.’ Iha mós títulu balu neʼebé Ita bele uza atu esplika kona-ba Jeová. Maibé, Ita haree nia nuʼudar ida neʼebé fó konvite mai Ita ka lae? Liurai David kompara Jeová nia relasaun belun ho Ninia atan sira neʼebé laran-metin hanesan relasaun entre tenda-na’in no ninia bainaka. Nia husu: “Oh Jeová, sé mak bele sai bainaka iha Ita-nia tenda? Sé mak bele hela iha Ita-nia foho santu?” (Sal 15:1) Liafuan sira-neʼe hanorin ita katak ita mós bele sai Jeová nia bainaka, ka ninia belun. Antes Jeová kria buat hotu, nia mesak deʼit. Maibé depois neʼe, nia kria ninia Oan-Mane primeiru. Jeová konvida ninia Oan-Mane atu sai bainaka primeiru iha ninia tenda simbóliku, no nia kontente tebes atu halo nuneʼe. Bíblia hatete katak Jeová “gosta tebes” ninia Oan-Mane. Ninia bainaka primeiru “haksolok iha [Jeová] nia oin durante tempu hotu”.—Prov 8:30. w24.06 p. 2 par. 1-3

Imajina toʼok iha mane naʼin-340.000 liu neʼebé halibur hamutuk no hakarak foti David nuʼudar liurai ba nasaun Izraél. Durante loron tolu, mane sira-neʼe hela iha área foho neʼebé besik Hebron. Sira koʼalia ba malu no kanta knananuk hahiʼi nian ba Jeová. (1 Krón 12:39) Iha mane joven ida naran Zadoc mós hamutuk ho sira. Ema seluk karik la nota katak Zadoc mós iha neʼebá. Maibé Jeová nota, no nia hakarak ita mós hatene ida-neʼe. (1 Krón 12:​22, 26-28) Zadoc mak amlulik ida neʼebé serbisu hamutuk ho Amlulik Boot Abiatar. Zadoc mós konsellu-naʼin neʼebé hetan matenek husi Maromak atu bele komprende kona-ba Maromak nia hakarak. (2 Sam 15:27) Nia mós mane neʼebé aten-brani. Durante loron ikus sira, Satanás fó susar liután ba Maromak nia povu. (1 Ped 5:8) Ita presiza aten-brani nuʼudar ita hein Jeová atu halakon Satanás no sistema aat neʼe. (Sal 31:24) Hodi halo nuneʼe, ita bele banati-tuir Zadoc nia aten-brani. w24.07 p. 2 par. 1-3

Bainhira Jeová kria mane no feto primeiru, nia hakarak sira atu moris kontente. Nia fó sira hela-fatin neʼebé furak no moris kaben nuʼudar prezente. Nia mós fó sira knaar neʼebé lori kontente, neʼe mak halo nakonu mundu ho sira-nia jerasaun, no halo mundu tomak sai paraízu hanesan jardín Eden. Nia fó ba sira mandamentu ida deʼit. Nia fó avizu ba sira katak se sira la halo tuir mandamentu neʼe, sira sei mate. Hanesan ita hatene ona, iha anju aat ida neʼebé la hadomi Maromak no ema. Nia book Adão no Eva atu la halo tuir Maromak. Sira halo tuir anju aat neʼe duké tau fiar ba sira-nia Aman neʼebé hadomi tebes sira. Rezultadu mak sira halo sala. Buat neʼebé Jeová hatete sai loos duni. Husi tempu neʼebá, sira tenke simu konsekuénsia. Sira komesa sai ferik-katuas, no ikusmai mate.—Gén 1:​28, 29; 2:​8, 9, 16-18; 3:​1-6, 17-19, 24. w24.08 p. 3 par. 3

Jeová no ninia Oan hakarak ita atu moris kontente. Salmo 119:2 hatete: “Ksolok ba sira neʼebé halo tuir ninia avizu sira, sira neʼebé buka nia ho sira-nia laran tomak.” Jesus mós hatete: “Ksolok ba sira neʼebé rona Maromak nia Liafuan no halo tuir!” (Lc 11:28) Jeová nia povu mak ema neʼebé kontente tanba lee Maromak nia Liafuan loroloron no hakaʼas an atu halo tuir buat neʼebé sira aprende. (Tgo 1:​22-25) Kuandu ita halo nuneʼe, ita halo Jeová kontente. (Ecle 12:13) Neʼe mós halo ita-nia moris família nian kontente, no hametin ita-nia relasaun ho irmaun-irmán sira. Liután neʼe, ita bele hasees an husi problema sira neʼebé baibain mosu tanba la halo tuir Jeová nia matadalan. Neʼe mak buat neʼebé Liurai David hatete. Depois temi tiha Jeová nia ukun-fuan, orden, no desizaun, nia hatete: “Sira neʼebé halo tuir desizaun sira-neʼe sei simu kolen boot.”—Sal 19:​7-11. w24.09 p. 2 par. 1-3

Jeová haree buat hotu neʼebé akontese ba ninia atan sira. Nia haree kuandu ita kontente no kuandu ita triste. (Sal 37:18) Jeová orgullu tebes bainhira haree ita hakaʼas an serbí nia ho laran tomak maski ita sente laran-kanek no neon-susar. Liután neʼe, nia hakarak tebes atu apoia no fó kmaan ba ita. Salmo 147:3 hatete katak Jeová ‘kura ema neʼebé laran-kanek no falun ninia kanek’. Eskritura neʼe fó sai oinsá Jeová tau matan ba ema neʼebé laran-kanek no neon-susar. Saida mak ita tenke halo atu bele hetan benefísiu husi Jeová nia domin? Hanoin toʼok kona-ba ilustrasaun tuirmai. Doutór neʼebé matenek bele ajuda ema neʼebé hetan kanek. Maibé atu ema neʼe hetan benefísiu, nia tenke halo tuir doutór nia matadalan. Entaun ita mós presiza halo tuir Jeová nia matadalan se ita hakarak hetan kura. Liuhusi ninia Liafuan, Jeová koʼalia ba ema neʼebé neon-susar, no fó sira matadalan iha sira-nia moris. w24.10 p. 6 par. 1-2

Uluk, ita-nia publikasaun sira koʼalia kona-ba saida mak sei akontese ba sira neʼebé Jeová tesi-lia nuʼudar ema neʼebé halo hahalok la loos. No ita dehan katak sira neʼebé Jeová halakon, sei la hetan moris-hiʼas. Iha istória balu kona-ba oinsá Jeová tesi-lia ba ema neʼebé halo hahalok la loos. Porezemplu, Jeová halakon ema aat iha Rai-Nabeen. Nia uza ema Izraél atu halakon ema neʼebé hela iha rai-Kanaan. No nia mós uza anju ida atu halakon Asíria nia tropa naʼin-185.000 iha kalan ida deʼit. (Deut 7:​1-3; Isa 37:​36, 37) Iha situasaun sira-neʼe, Bíblia hatete ho klaru ka lae katak Jeová deside ona sira hotu sei mate ba nafatin no la hetan moris-hiʼas? Lae. Ita la hatene oinsá Jeová tesi-lia ba ema ida-idak iha grupu sira-neʼe, no ita mós la hatene se sira neʼebé mate ona hetan oportunidade atu aprende kona-ba Jeová no arrepende an ka lae. w24.05 p. 3 par. 5-7

Jesus konta ai-knanoik kona-ba feto-faluk neʼebé husu beibeik juís ida atu bele hetan justisa. Dixípulu sira komprende didiʼak ai-knanoik neʼe tanba iha tempu neʼebá povu sempre hasoru situasaun la justisa. (Lc 18:​1-5) Ita mós bele komprende ai-knanoik neʼe tanba ita hotu hasoru ona situasaun la justisa. Ohin loron, mundu nakonu ho ema neʼebé todan ba sorin, diskrimina no hanehan ema seluk. Tan neʼe ita la hakfodak kuandu ema trata aat ita. (Ecle 5:8) Maibé, karik ita bele sente laran-kraik ka hakfodak kuandu ita-nia irmaun ka irmán ida trata aat ita. Tuir loloos neʼe bele akontese. Klaru, irmaun-irmán sira laʼós ema neʼebé kontra lia-loos, sira mak sala-naʼin deʼit. Ita bele aprende buat barak husi Jesus nia reasaun kona-ba situasaun la justisa. Se ita bele hatudu pasiénsia ba ema neʼebé trata aat ita, neʼe katak ita presiza hatudu pasiénsia liután ba maluk fiar-naʼin sira! w24.11 p. 2 par. 1-2

Paun mak ai-han importante iha Bíblia nia tempu. (Gén 14:18; Lc 4:4) Tan neʼe, dala ruma Bíblia temi “paun” atu refere ba ai-han loroloron nian. (Mt 6:​11, nota) Jesus halo milagre dala rua hodi fó paun ba ema-lubun nuʼudar ai-han. (Mt 16:​9, 10) Milagre sira-neʼe ida fó sai iha João kapítulu 6. Bainhira Jesus nia apóstolu sira haklaken hotu ona, Jesus lori sira saʼe ró hodi hakur Tasi Galileia atu sira bele deskansa. (Mc 6:​7, 30-32; Lc 9:10) Depois sira toʼo tiha iha fatin hakmatek ida besik Betsaida, lakleur ema-lubun mós tuir. Jesus la duni sira, maibé nia ho laran-diʼak fahe tempu atu hanorin sira kona-ba Maromak nia Ukun no kura ema moras. Nuʼudar kalan besik ona, dixípulu sira komesa hanoin oinsá ema-lubun neʼe bele hetan ai-han. Karik ema balu lori sira-nia ai-han uitoan, maibé ema barak presiza bá knua sira atu sosa hahán.—Mt 14:15. w24.12 p. 2 par. 1-2

Ita-nia inan-aman primeiru Adão no Eva moris ho perfeitu iha paraízu neʼebé furak. (Gén 1:27; 2:​7-9) Sira iha esperansa atu moris kontente ba nafatin. Maibé tuirmai buat hotu troka. Sira lakon sira-nia hela-fatin neʼebé furak no mós esperansa atu moris ba nafatin. Sira fó liman-rohan saida ba sira-nia oan no bei-oan iha futuru? Bíblia hatete: “Sala tama iha mundu liuhusi ema ida [Adão], no mate tanba sala. Nuneʼe ema hotu mate tanba ema hotu halo ona sala.” (Rom 5:12) Liman-rohan neʼebé Adão fó mai ita mak sala, no neʼe lori ita ba mate. Sala neʼebé mai husi Adão mak hanesan debe neʼebé boot tebes no la iha ema ida mak bele selu fali. (Sal 49:8) Jesus kompara sala hanesan “tusan”. (Mt 6:​12, nota; Lc 11:4) Bainhira ita halo sala, neʼe hanesan ita debe Jeová. Ita presiza selu ita-nia sala. Se Jeová la halo arranju atu perdua ita-nia sala, debe neʼe bele selu fali só deʼit kuandu ita mate.—Rom 6:7. w25.02 p. 2-3 par. 2-3

Ita iha priviléjiu boot atu fahe lia-loos kona-ba Maromak nia Ukun! Laʼós ema hotu mak iha priviléjiu neʼe. Porezemplu, kuandu Jesus iha rai, nia la husik anju aat sira atu fó sasin kona-ba nia. (Lc 4:41) Ohin loron, antes ema ida bele hola parte atu haklaken hamutuk ho Jeová nia povu, nia presiza kumpre kritéria. Ita bele hatudu katak ita hafolin ita-nia priviléjiu neʼe hodi haklaken iha situasaun no tempu naran deʼit. Hanesan Jesus, ita-nia objetivu mak atu kuda no rega fini lia-loos nian iha ema nia laran. (Mt 13:​3, 23; 1 Kor 3:6) Jeová nia organizasaun banati-tuir Jesus hodi halo buat oioin atu ajuda ema seluk hatene kona-ba Maromak nia naran. Dalan ida neʼebé Jeová nia organizasaun halo nuneʼe mak hodi tau fali Maromak nia naran iha fatin neʼebé loos iha Bíblia Sagrada Tradusaun Mundu Foun. Agora iha ona Bíblia neʼe kompletu ka parte balu deʼit neʼebé fó sai ona iha língua 270. w24.04 p. 9 par. 8-9

Irmaun balu neʼebé iha moris kaben nian neʼebé kontente iha toman atu hatudu sai loroloron katak nia hadomi tebes ninia feen. (1 João 3:18) Laʼen ida bele hatudu sai ninia domin iha dalan neʼebé kiʼik, hanesan kaer feen nia liman ka hakoʼak ho domin. Karik laʼen bele haruka mensajen badak ba feen no hatete: “Haʼu saudades Ita”, ka “Ita diʼak hela ka lae?” Karik nia mós bele hakerek karta ba ninia feen ho liafuan murak. Bainhira laʼen halo buat sira-neʼe, nia hatudu domin no respeitu ba ninia feen no hametin sira-nia moris kaben nian. Laʼen neʼebé hadomi ninia feen halo feen sente iha folin. Dalan ida mak hodi hatudu agradese ba buat hotu neʼebé feen halo atu apoia nia. (Kol 3:15) Bainhira laʼen ida ho laran gaba ninia feen, neʼe halo feen sente kontente, seguru, domin, no respeitu. w25.01 p. 11 par. 15; p. 13 par. 16

Salmo 15 remata ho promesa: “Ema neʼebé halo buat sira-neʼe sei hamriik metin nafatin.” Iha neʼe, David esplika razaun tanbasá Jeová hakarak ita atu halo buat hotu neʼebé temi iha salmo neʼe. Jeová hakarak ita atu moris kontente. Tan neʼe, nia fó ita matadalan neʼebé sei lori bensaun no protesaun. Ema neʼebé Jeová simu nuʼudar ninia bainaka sei iha futuru neʼebé kapás. Kristu nia alin sira sei moris iha lalehan, fatin neʼebé Jesus prepara ona ba sira. (João 14:2) Ema neʼebé iha esperansa atu moris iha rai hein namanas ba promesa neʼebé hakerek iha Apokalipse 21:3. Klaru katak ita hotu hafolin tebes Jeová nia konvite atu sai bainaka iha ninia tenda ba nafatin!—Sal 15:​1-5. w24.06 p. 13 par. 19-20

Glória katak sá? Iha Bíblia, liafuan “glória” bele refere ba buat naran deʼit neʼebé halo ema ruma admira. Loron balu liu tiha depois Jeová halo povu Izraél livre husi Ejitu, nia hatudu sai ninia glória neʼebé boot ba sira. Imajina toʼok: Ema Izraél millaun ba millaun halibur hamutuk iha Foho Sinai nia hun atu rona ba Maromak. Kalohan metan taka foho tomak. Derrepente deʼit rai nakdoko makaʼas, no suar nakonu iha foho neʼe. Povu haree rai-lakan, rona rai-tarutu no dikur nia lian neʼebé makaʼas. (Éx 19:​16-18; 24:17; Sal 68:8) Bainhira Jeová halo buat sira-neʼe, ita bele fiar katak ema Izraél sente admira tebes ho Jeová nia forsa. Ohin loron, ita fó glória ba Jeová hodi fó-hatene ema seluk kona-ba ninia forsa no hahalok furak sira no bainhira ita fó sai katak ita bele halo buat hotu tanba ninia ajuda.—Isa 26:12. w25.01 p. 2 par. 2-3

Durante povu Izraél laʼo ba Rai neʼebé Maromak Promete, mane balu neʼebé iha naran-boot kontra hasoru Moisés no knaar neʼebé Jeová fó ba nia. Sira hatete: “Povu tomak [laʼós Moisés deʼit] mak santu, sira hotu santu, no Jeová iha sira-nia leet.” (Núm 16:​1-3) Neʼe loos, tuir Jeová nia haree “povu tomak” mak santu, maibé Jeová hili ona Moisés atu dirije Ninia povu. Hodi kritika Moisés, loloos sira kritika Jeová. Sira la fokus ba buat neʼebé Jeová hakarak, maibé fokus ba sira-nia hakarak, neʼe mak atu iha podér liután no ema barak respeitu. Jeová oho mane sira-neʼe no mós ema rihun ba rihun neʼebé apoia sira. (Núm 16:​30-35, 41, 49) Ohin loron, ita bele fiar katak Jeová la simu ema neʼebé la hatudu respeitu ba arranju husi ninia organizasaun. w24.07 p. 11 par. 11

Ita moris iha tempu neʼebé ema barak la simu Bíblia nia avizu katak mundu nia rohan besik ona, no sira mós goza ita tanba ita tau fiar ba ida-neʼe. (2 Ped 3:​3, 4) Maski iha buat barak neʼebé ita seidauk hatene, ita presiza iha fiar neʼebé metin katak mundu aat neʼe nia rohan sei mai iha tempu neʼebé loos no Jeová sei tau matan ba ita durante tempu neʼe. Ita mós presiza hametin ita-nia fiar ba “atan laran-metin no matenek” neʼebé Jeová uza atu dirije ita ohin loron. (Mt 24:45) Bainhira terus boot hahú, karik ita sei simu matadalan espesífiku oioin neʼebé bele salva ita-nia moris. Agora mak tempu atu hametin ita-nia fiar ba sira neʼebé dirije Jeová nia organizasaun. Se ita sente susar atu halo tuir sira-nia matadalan agora, neʼe sei halo susar liután ba ita atu halo tuir matadalan neʼebé ita sei simu durante terus boot. w24.09 p. 11 par. 11-12

Inan-aman rekoñese katak fiar ba Maromak laʼós buat neʼebé automátiku deʼit. Tan neʼe, karik Ita-nia oan komesa husu pergunta hanesan: ‘Oinsá haʼu hatene katak Maromak iha? Haʼu bele fiar duni saida mak Bíblia hatete ka lae?’ Tuir loloos, Bíblia anima ita atu uza ita-nia “kbiit atu hanoin” no “buka-hatene uluk buat hotu se neʼe mak loos ka lae”. (Rom 12:1; 1 Tes 5:21) Oinsá mak Ita bele ajuda Ita-nia oan atu hametin sira-nia fiar? Anima oan buka rasik prova katak Bíblia nia hanorin mak loos. Bainhira oan husu pergunta, uza oportunidade neʼe atu hatudu ba nia oinsá atu hetan resposta hodi uza ita-nia publikasaun sira, hanesan Livru atu ajuda Testemuña ba Jeová buka informasaun. Iha tópiku “Bíblia”, nia bele haree ba subtópiku “Eskritura hotu mai husi Maromak” atu buka-hetan evidénsia katak Maromak mak dirije ema atu hakerek Bíblia. Neʼe katak Bíblia mak “Maromak nia liafuan”.—1 Tes 2:13. w24.12 p. 14-15 par. 4-5

Oinsá katuas sira bele banati-tuir Jesus? Sira presiza treinu no ajuda irmaun sira, inklui sira neʼebé sei joven atu bele kaer responsabilidade. Katuas sira labele hanoin katak ema neʼebé sira treinu tenke sai perfeitu. Sira presiza fó konsellu ho domin, atu nuneʼe irmaun joven sira bele hetan esperiénsia no komprende tanbasá sira presiza haraik an, prontu atu serbí ema seluk, no laran-metin. (1 Tim 3:1; 1 Ped 5:5) Jesus fó ba ninia dixípulu sira responsabilidade laʼós deʼit atu haklaken, maibé mós atu hanorin. Karik dixípulu sira sente katak sira la iha matenek atu halaʼo knaar neʼe. Maibé Jesus fiar katak sira bele, no haruka sira atu halo ida-neʼe. Jesus tau fiar ba sira hodi hatete: “Hanesan Aman haruka haʼu mai, haʼu mós sei haruka imi.”—João 20:21. w24.10 p. 16 par. 15; p. 17 par. 17

David mak liurai neʼebé diʼak, funu-naʼin, profeta, no nia mós halo múzika no poezia. Nia hasoru susar oioin. Ba tinan barak, nia subar tanba Liurai Saul koko atu oho nia. Depois sai tiha liurai, David mós presiza halai tanba ninia oan Absalão koko atu hadau ninia ukun. Maski David hasoru susar barak no nia rasik mós halo sala sériu balu, maibé nia kontinua serbí Maromak iha ninia moris tomak. Jeová temi nia nuʼudar ‘mane ida neʼebé monu loos ba Ninia laran’. Entaun, David nia lia-menon mós bele ajuda ita ohin loron! (1 Reis 15:5) Porezemplu, haree toʼok David nia lia-menon ikus ba ninia oan Salomão neʼebé atu sai liurai. Jeová hili Salomão atu harii templu hodi povu Izraél bele uza atu halaʼo adorasaun. (1 Krón 22:5) Salomão sei hasoru susar oioin. Saida mak David hatete ba nia? David hatete katak se Salomão halo tuir Jeová, nia sei hetan susesu.—1 Reis 2:​2, 3. w24.11 p. 10 par. 9-11

Laʼen neʼebé trata aat ninia feen iha dalan fíziku ka liuhusi liafuan, presiza halo tuir hakat sira tuirmai neʼe atu hadiʼa ninia relasaun ho Jeová no ninia feen. Primeiru, nia rekoñese katak ninia hahalok mak aat duni. La iha buat ida mak subar husi Jeová. (Sal 44:21; Ecle 12:14; Ebr 4:13) Segundu, nia tenke para atu trata aat ninia feen no troka ninia hahalok. (Prov 28:13) Terseiru, nia husu deskulpa ba ninia feen no mós ba Jeová hodi husu perdua. (Após 3:19) Nia mós presiza husu Jeová nia ajuda hodi bele haburas hakarak atu troka ninia hanoin, liafuan, no hahalok. (Sal 51:​10-12; 2 Kor 10:5; Flp 2:13) Kuartu, ninia hahalok tenke tuir ninia orasaun, neʼe mak hodi halo buat hotu neʼebé nia bele atu odi violénsia no liafuan neʼebé kroʼat. (Sal 97:10) Kintu, nia buka kedas ajuda husi katuas kongregasaun. (Tgo 5:​14-16) Sestu, nia halo planu neʼebé bele ajuda nia atu hasees an husi buat sira-neʼe iha futuru. w25.01 p. 11 par. 14

Ita hadomi Jeová ka lae, Maromak neʼebé fó prezente diʼak hotu, inklui Ita-nia moris? Ita hakarak hatudu Ita-nia domin ba nia ka lae? Dalan diʼak liu atu halo nuneʼe mak hodi dedika Ita-nia an ba nia no hetan batizmu. Kuandu Ita halo nuneʼe, Ita sei sai parte ba Jeová nia família. Rezultadu mak Ita-nia Aman no Belun sei dirije no tau matan Ita tanba Ita mak ninian. (Sal 73:24; Isa 43:​1, 2) Dedikasaun no batizmu mós loke dalan ba Ita atu moris haksolok ba nafatin. (1 Ped 3:21) Iha buat ruma neʼebé hanetik Ita atu hetan batizmu ka lae? Se nuneʼe, Ita la mesak. Iha ema barak neʼebé uluk presiza halo mudansa ba sira-nia hanoin no hahalok atu bele hetan batizmu. Maibé agora sira serbí Jeová ho haksolok no laran-manas. w25.03 p. 2 par. 1-2

Dala barak Bíblia kompara ita-nia sala hanesan naha todan. Liurai David esplika kona-ba ninia sala hodi dehan: “Haʼu-nia sala sira barak toʼo liu haʼu-nia ulun; sala sira-neʼe todan liu ba haʼu atu lori hanesan naha todan.” (Sal 38:4) Maibé Jeová fó perdua ba ita bainhira ita arrepende ita-nia sala. (Sal 25:18; 32:5) Liafuan Ebraiku neʼebé tradús nuʼudar “fó perdua” iha versíkulu sira-neʼe signifika “hiʼit saʼe” ka “lori”. Karik ita bele kompara Jeová hanesan ho mane forte neʼebé hiʼit saʼe ita-nia todan husi ita-nia kabaas no lori dook tiha husi ita. Ilustrasaun seluk hatudu oinsá Jeová lori dook tiha ita-nia sala sira. Salmo 103:12 hatete: “Hanesan lorosaʼe dook husi loromonu, nuneʼe mós nia tau ita-nia sala sira dook loos husi ita.” Lorosaʼe dook husi loromonu. Parte rua neʼe nunka bele hasoru malu. Neʼe katak Jeová lori ita-nia sala sira dook tiha husi ita toʼo ita labele imajina. Neʼe hametin ita katak Jeová perdua duni ita iha dalan neʼebé kompletu! w25.02 p. 9 par. 5-6

Depois Jesus saʼe ba lalehan, Pedro halo milagre ida hodi kura mane neʼebé ain-aat husi moris mai kedas. (Após 1:​8, 9; 3:​2, 6-8) Neʼe dada ema barak nia atensaun. (Após 3:11) Maibé Pedro lakohi dada atensaun ba ninia an maski nia moris iha kultura neʼebé ema barak hakarak atu iha naran-boot. Duké buka glória ba ninia an, nia hatudu haraik an no dehan ba ema atu fó hahiʼi ba Jeová no Jesus, hodi hatete: “Liuhusi [Jesus nia] naran no liuhusi ami-nia fiar ba ninia naran mak ema neʼe, neʼebé imi haree no hatene, sai forsa fali.” (Após 3:​12-16) Ita bele banati-tuir Pedro atu haburas haraik an. Ita serbí ema seluk tanba ita hadomi Jeová no ema, laʼós tanba hakarak ema gaba ita. Ita hatudu katak ita mak ema neʼebé haraik an se ita kontente serbí Jeová no irmaun-irmán sira maski ema la haree buat neʼebé ita halo.—Mt 6:​1-4. w25.03 p. 10-11 par. 11-12

Ita bele aumenta ita-nia laran-manas atu haklaken hodi fokus ba ita-nia domin ba Jeová no ema seluk. (Mt 22:​37-39) Hanoin toʼok kona-ba oinsá Jeová sente kontente bainhira nia haree ita haklaken, no oinsá ema sei sente kontente bainhira sira komesa estuda Bíblia! Hanoin-hetan mós katak ema neʼebé simu ita-nia mensajen bele hetan salvasaun. (João 6:40) Iha situasaun ruma neʼebé hanetik Ita atu sai husi uma ka lae? Se nuneʼe, fokus ba buat neʼebé Ita bele halo atu hatudu domin ba Jeová no ema seluk. Durante pandemia COVID-19, Samuel no Dania labele sai husi sira-nia uma. Maski nuneʼe, sira haklaken beibeik liuhusi telefone, hakerek karta, no mós halaʼo estudu Bíblia liuhusi Zoom. Maski Samuel no Dania labele halo buat barak hanesan uluk, maibé sira halo buat neʼebé sira bele hodi tuir sira-nia kbiit no neʼe lori ksolok ba sira. w24.04 p. 18 par. 15-16

Maski ita la presiza kaben atu sente kontente, maibé ema Kristaun barak neʼebé joven ka idade ona hakarak atu kaben. Klaru katak antes namora, Ita presiza iha relasaun neʼebé metin ho Jeová, koñese didiʼak Ita-nia an, no prontu ona atu tau matan ba família nia presiza bainhira kaben. (1 Kor 7:36) Antes atu hahú namora, diʼak mós atu hatene hahalok saida mak Ita hakarak Ita-nia pár atu hatudu. Tanba se Ita la halo nuneʼe, karik Ita sei la nota ema neʼebé diʼak atu sai Ita-nia pár, ka karik Ita sei hahú namora deʼit ho ema neʼebé la diʼak ba Ita. Klaru katak diʼak atu buka pár neʼebé hetan ona batizmu. (1 Kor 7:39) Maibé, laʼós ema hotu neʼebé hetan ona batizmu mak pár neʼebé diʼak ba Ita. Tan neʼe, husu ba Ita-nia an: ‘Saida mak haʼu-nia planu? Tuir haʼu-nia hanoin, importante atu haʼu-nia pár hatudu hahalok saida? Haʼu-nia kritéria mak aas liu ka lae?’ w24.05 p. 20 par. 1, 3

Bainhira namora, Ita bele halo saida se dala ruma mosu problema entre Ita ho Ita-nia pár? Neʼe hatudu katak imi la cocok ka lae? Laʼós sempre hanesan neʼe, dala ruma ema neʼebé namora no mós kaben-naʼin la konkorda malu. Moris kaben nian bele metin se feen no laʼen apoia malu atu rezolve problema neʼebé mosu entre sira. Entaun dalan neʼebé imi rezolve problema kuandu imi namora bele hatudu se imi-nia moris kaben nian sei susesu ka lae. Karik imi bele koʼalia hamutuk pergunta hanesan: ‘Bainhira iha problema ruma, ita ida-idak bele koʼalia ba malu ho kalma no respeitu ka lae? Ita rekoñese ita ida-idak nia fraku no koko atu hadiʼa ida-neʼe ka lae? Ita lalais husu deskulpa no fó perdua ka lae?’ (Éf 4:31) Maibé, se durante tempu namora mak imi diskute malu beibeik no sempre mosu problema, situasaun neʼe sei la troka kuandu imi kaben. Se Ita rekoñese katak ema neʼe la diʼak atu sai Ita-nia pár, desizaun neʼebé diʼak liu ba imi naʼin-rua mak hapara imi-nia relasaun. w24.05 p. 29 par. 12

Ita bele sai nuʼudar ezemplu diʼak ba ema seluk se ita kaer metin ba buat neʼebé loos no halo desizaun bazeia ba Bíblia. Bainhira ita-nia fiar no koñesimentu sai boot liután, ita sei kaer metin ba lia-loos. Ita sei rekoñese hanorin falsu sira no ideia sira neʼebé la tuir Jeová nia hanoin, no ita sei la husik buat sira-neʼe atu fó influénsia ba ita. (Éf 4:14; Tgo 1:​6-8) Ita mós bele ajuda ema neʼebé karik hasoru daudaun susar. (1 Tes 3:​2, 3) Katuas sira presiza kontrola sira-nia hahalok, iha hanoin neʼebé loos, moris iha dalan neʼebé loos, no la ulun-toos. Sira bele ajuda ema seluk atu sente kalma, atu “kaer metin ba Maromak nia liafuan”. (Tito 1:9; 1 Tim 3:​1-3) Liuhusi sira-nia ezemplu no dalan neʼebé sira tau matan ba kongregasaun sira bele ajuda irmaun-irmán sira atu tuir reuniaun, haklaken, no estuda mesak. Bainhira irmaun-irmán sira hasoru susar neʼebé halo sira laran-kraik, katuas sira sei ajuda sira atu sadere ba Jeová no fokus ba ninia promesa sira. w24.06 p. 31 par. 16-18

Bainhira Jesus iha rai, nia hanorin katak ninia Aman prontu atu fó perdua. Hanoin toʼok ai-knanoik kona-ba oan-mane neʼebé lakon. Oan neʼe hili atu sai husi uma no halo hahalok aat oioin. Tuirmai, “bainhira ninia hanoin loos ona”, nia fila fali ba uma. Aman nia reasaun mak oinsá? Jesus hatete katak nuʼudar oan neʼe “sei dook hela, ninia aman haree nia no . . . , halai hasoru nia hodi hakoʼak no reʼi nia.” Loloos, oan neʼe planu atu husu sai atan iha ninia aman nia umakain, maibé ninia aman bolu nia “haʼu-nia oan” no simu fali nia. Aman neʼe hatete: “Nia lakon tiha maibé hetan fali ona.” (Lc 15:​11-32) Antes Jesus mai mundu, nia haree duni ninia Aman hatudu beibeik laran-sadiʼa ba ema neʼebé arrepende an. Ai-knanoik neʼe hatudu katak Aman Jeová mak laran-sadiʼa duni, no neʼe fó kmaan mai ita! w24.08 p. 11 par. 11-12

Se ita iha hanoin neʼebé loos, ita sei hakaʼas an atu foti desizaun neʼebé haleno Jeová nia hanoin. Ita hatene katak la iha buat ida mak importante liu fali ita-nia relasaun ho Jeová. Ita mós la hanoin demais kona-ba ita-nia an no rekoñese katak ita-nia koñesimentu mak limitadu. Se ita iha hanoin neʼebé loos, ita sei sadere ba Jeová hodi halo orasaun beibeik no buka ninia matadalan. Ita rekoñese katak ita presiza kontinua halo orasaun maski ita iha ona abilidade atu halo buat ruma ho didiʼak. Se ita halo nuneʼe, bainhira ita presiza halo desizaun importante ruma, ita sei halo uluk orasaun ba Jeová atu husu ninia matadalan hodi fiar metin katak Jeová hatene buat neʼebé diʼak liu mai ita. Ita agradese tebes tanba Jeová kria ita ho abilidade atu haleno ninia hahalok furak sira. (Gén 1:26) Klaru katak ita labele banati-tuir Jeová ho perfeitu.—Isa 55:9. w25.03 p. 11 par. 13; p. 13 par. 17-18

Keta hanoin sala kona-ba ema nia motivu. Se ema seluk la hatudu agradese ba buat neʼebé ita halo ona, ita bele husu ba ita-nia an: ‘Loloos, nia hafolin buat neʼebé haʼu halo ka lae? Ka haluha deʼit atu fó agradese?’ Karik iha mós razaun seluk tanbasá sira la hatudu agradese iha dalan neʼebé ita espera. Sira balu sente agradese tebes maibé susar atu fó sai ida-neʼe. Ka karik sira moe atu simu ajuda, liuliu se uluk sira mak iha toman atu ajuda ema seluk. Se ita hadomi tebes irmaun-irmán sira, ita sei la hanoin sala kona-ba sira-nia motivu, no ita sei kontinua fó ho kontente. (Éf 4:2) Hatudu pasiénsia. Liurai Salomão neʼebé matenek hatete kona-ba hahalok laran-luak: “Soe ó-nia paun iha bee leten, tanba liutiha loron barak ó sei hetan fali ida-neʼe.” (Ecle 11:1) Liafuan neʼe hanorin ita katak dala ruma “liutiha loron barak” mak ema fó agradese. w24.09 p. 30 par. 18-19

Dala ruma ita rona anúnsiu iha kongregasaun katak ema ida hetan dixiplina. Iha situasaun hanesan neʼe, ita bele kontinua ransu ho nia tanba nia arrepende an ona no troka ninia hahalok. Ema neʼe nafatin parte ba kongregasaun no presiza hetan anima husi irmaun-irmán sira. (Ebr 10:​24, 25) Maibé neʼe la hanesan ho ema neʼebé kongregasaun hasai. Ita “labele ransu tan” no ‘la han’ hamutuk ho ema hanesan neʼe. (1 Kor 5:11) Neʼe katak ita labele duni koʼalia ho ema neʼe ka lae? Lae. Klaru katak ita sei la ransu ho nia. Maibé ita bele uza ita-nia konxiénsia neʼebé hetan ona treinu husi Bíblia hodi deside atu konvida ema neʼebé kongregasaun hasai ona atu tuir reuniaun, karik neʼe mak ita-nia família ka uluk nia mak ita-nia belun ida. w24.08 p. 30 par. 13-14