Saida mak Maromak nia hakarak ba ita?

BAINHIRA Ita lee jornál, haree notísias iha televizaun ka internét, ka rona rádiu, Ita haree no rona notísias barak kona-ba krime, funu no terrorizmu. Karik Ita rasik mós hasoru susar tanba moras ka ema neʼebé Ita hadomi mate.

Husu Ita-nia an:

• Neʼe mak Maromak nia hakarak ba haʼu no haʼu-nia família ka lae?

• Iha neʼebé mak haʼu bele hetan ajuda atu tahan hasoru haʼu-nia susar?

• Loron ida, haʼu bele moris ho dame ka lae?

Bíblia iha resposta ba pergunta sira-neʼe.

BÍBLIA HANORIN KATAK MAROMAK SEI HALO BUAT FURAK OIOIN IHA MUNDU.

• Ema sei la terus tan, la sai ferik-katuas no mate.​—Apokalipse 21:4

• “Ema ain-kudeʼik sei haksoit hanesan bibi-rusa.”​—Isaias 35:6

• “Ema matan-delek sei haree fali.”​—Isaias 35:5

• Ema mate sei moris hiʼas.​—João 5:28, 29

• Moras sei la iha tan.​—Isaias 33:24

• Sei iha ai-han barak iha mundu.​—Salmo 72:16

  

BENEFÍSIU HUSI BÍBLIA NIA HANORIN

Karik fasil atu hanoin katak buat sira neʼebé ita foin lee mak mehi deʼit. Maibé Maromak promete ona katak lakleur tan nia sei halo nuneʼe, no Bíblia esplika oinsá mak nia sei halo ida-neʼe.

Laʼós neʼe deʼit, Bíblia mós esplika saida mak ita presiza halo atu halaʼo moris kontente agora. Hanoin toʼok buat oioin neʼebé halo Ita laran-susar. Karik Ita hanoin barak kona-ba problema família, ekonomia, moras, ka ema neʼebé Ita hadomi mate. Bíblia bele ajuda ita atu tahan hasoru susar sira-neʼe no fó kmaan ba ita hodi hatán ba pergunta sira tuirmai neʼe:

• Tanbasá mak ita terus?

• Oinsá mak ita bele tahan hasoru ita-nia susar sira?

• Ita-nia moris família nian bele sai kontente ka lae?

• Saida mak akontese kuandu ita mate?

• Ita bele hasoru fali ema neʼebé mate ona ka lae?

• Tanbasá mak ita bele fiar katak Maromak sei kumpre buat neʼebé nia promete ona?

Ita lee daudauk livru neʼe tanba Ita hakarak atu hatene liután Bíblia. Livru neʼe sei ajuda Ita. Iha pergunta sira ba parágrafu ida-idak neʼebé sei ajuda Ita komprende liután Bíblia. Ema rihun ba rihun hetan ona benefísiu husi estuda Bíblia ho Testemuña ba Jeová. Ami hein katak Ita mós sei estuda Bíblia no hetan benefísiu. Maromak sei haraik bensaun ba Ita bainhira Ita buka-hatene Bíblia nia hanorin!