2 ராஜாக்கள்

21 மனாசே+ 12 வயதில் ராஜாவாகி, 55 வருஷங்கள் எருசலேமில் ஆட்சி செய்தார்.+ அவருடைய அம்மா பெயர் எப்சிபாள். 2 யெகோவா வெறுக்கிற காரியங்களை மனாசே செய்தார். இஸ்ரவேலர்களின் கண் முன்னால் யெகோவா விரட்டியடித்த மற்ற தேசத்தாரின் அருவருப்பான பழக்கவழக்கங்களைப் பின்பற்றினார்;+ 3 தன்னுடைய அப்பாவான எசேக்கியா அழித்துப்போட்ட ஆராதனை மேடுகளைத்+ திரும்பக் கட்டினார்; இஸ்ரவேலின் ராஜா ஆகாபைப் போலவே+ இவரும் பாகாலுக்குப் பலிபீடங்கள் கட்டி, பூஜைக் கம்பத்தை* நிறுத்தினார்.+ வானத்துப் படைகள் முன்னால் மண்டிபோட்டு வணங்கி, அவற்றுக்குச் சேவை செய்தார்.+ 4 அதோடு, யெகோவாவின் ஆலயத்திலேயே, “எருசலேமில் என் பெயரை நிலைநாட்டுவேன்”+ என்று யெகோவா சொல்லியிருந்த ஆலயத்திலேயே, பலிபீடங்களைக் கட்டினார்.+ 5 வானத்துப் படைகளை வணங்குவதற்காக யெகோவாவுடைய ஆலயத்தின் இரண்டு பிரகாரங்களிலும்+ பலிபீடங்களைக் கட்டினார்.+ 6 சொந்த மகனையே நெருப்பில் பலி கொடுத்தார்.* மாயமந்திர பழக்கங்களில் ஈடுபட்டார், சகுனங்கள் பார்த்தார்,+ ஆவிகளோடு பேசுகிறவர்களையும் குறிசொல்கிறவர்களையும் நியமித்தார்.+ யெகோவா வெறுக்கிற காரியங்களைக் கணக்குவழக்கில்லாமல் செய்து, அவரைப் புண்படுத்தினார்.

7 மனாசே தான் உண்டாக்கிய உருவச் சிலையை, அதாவது பூஜைக் கம்பத்தை,* கடவுளின் ஆலயத்தில் வைத்தார்;+ அந்த ஆலயத்தைப் பற்றித்தான் தாவீதிடமும் அவருடைய மகன் சாலொமோனிடமும் யெகோவா இப்படிச் சொல்லியிருந்தார்: “இஸ்ரவேலில் உள்ள எல்லா கோத்திரத்திலிருந்தும் நான் தேர்ந்தெடுத்த எருசலேமிலும், இந்த ஆலயத்திலும், என் பெயரை என்றென்றும் நிலைநாட்டுவேன்.+ 8 இஸ்ரவேலர்களுக்கு நான் கொடுத்த கட்டளைகள் எல்லாவற்றையும், அதாவது என்னுடைய ஊழியன் மோசே கொடுத்த திருச்சட்டம் முழுவதையும், அப்படியே அவர்கள் பின்பற்றி நடந்தால்+ அவர்களுடைய முன்னோர்களுக்கு நான் கொடுத்த தேசத்தைவிட்டு ஒருபோதும் அவர்களை அலைந்து திரிய விடமாட்டேன்.”+ 9 ஆனால், அவர்கள் கீழ்ப்படியவில்லை. இஸ்ரவேலர்களின் கண் முன்னால் யெகோவா அழித்துப்போட்ட மற்ற தேசத்தார் செய்ததைவிட படுபயங்கரமான காரியங்களைச் செய்ய மனாசே அந்த மக்களைத் தூண்டிக்கொண்டே இருந்தார். இப்படி, கடவுளைவிட்டு அவர்கள் வழிவிலகிப் போகும்படி செய்தார்.+

10 யெகோவா தன்னுடைய ஊழியர்களான தீர்க்கதரிசிகள் மூலம் எச்சரித்துக்கொண்டே இருந்தார்.+ 11 “யூதாவின் ராஜா மனாசே இந்த அருவருப்பான காரியங்களையெல்லாம் செய்திருக்கிறான். அவனுக்கு முன்பிருந்த எமோரியர்கள்+ எல்லாரையும்விட படுமோசமான காரியங்களைச் செய்திருக்கிறான்.+ அருவருப்பான* சிலைகளை நிறுத்தி யூதா மக்களைப் பாவம் செய்ய வைத்திருக்கிறான். 12 அதனால், இஸ்ரவேலின் கடவுளான யெகோவா சொல்வது என்னவென்றால், ‘எருசலேம்மீதும் யூதாமீதும் பயங்கரமான அழிவைக் கொண்டுவரப்போகிறேன்.+ அதைப் பற்றிக் கேள்விப்படுகிறவர்கள் எல்லாரும் அதிர்ச்சியடைவார்கள்.*+ 13 சமாரியாவை அளந்த+ அதே அளவுநூலால் எருசலேமையும் அளப்பேன்;+ ஆகாப் வீட்டாருக்குப் பயன்படுத்திய அதே தூக்குநூலை* எருசலேமுக்கும் பயன்படுத்துவேன்.+ ஒரு கிண்ணத்தை ஒருவன் சுத்தமாகத் துடைத்துக் கவிழ்த்து வைப்பதுபோல, நான் எருசலேமைத் துடைத்துப்போடுவேன்.+ 14 என் சொந்த மக்களில்* மீதியாக இருப்பவர்களைக் கைவிடுவேன்,+ எதிரிகளின் கையில் கொடுப்பேன்; அந்த எதிரிகள் எல்லாரும் அவர்களைக் கொள்ளையடித்து கைதிகளாகப் பிடித்துக்கொண்டு போவார்கள்.+ 15 அவர்களுடைய முன்னோர்கள் எகிப்திலிருந்து வந்த நாள்முதல் இன்றுவரை, நான் வெறுக்கிற காரியங்களைச் செய்து என்னைப் புண்படுத்தியதால் இப்படியெல்லாம் செய்வேன்’”+ என்று சொன்னார்.

16 யூதா மக்கள் யெகோவா வெறுக்கிற காரியங்களைச் செய்வதற்கு மனாசே காரணமாக இருந்தார்; அதுமட்டுமல்லாமல், எருசலேமின் ஓர் எல்லைமுதல் மறு எல்லைவரை ஏராளமான அப்பாவி மக்களைக் கொன்று குவித்தார்.*+ 17 மனாசேயின் வாழ்க்கையில் நடந்த மற்ற விஷயங்களைப் பற்றியும், அவர் செய்த எல்லாவற்றைப் பற்றியும், அவர் செய்த பாவங்களைப் பற்றியும் யூதா ராஜாக்களின் சரித்திரப் புத்தகத்தில் எழுதப்பட்டிருக்கிறது. 18 பின்பு, மனாசே இறந்துபோனார்.* அவருடைய அரண்மனையிலிருந்த தோட்டத்தில், அதாவது ஊத்சா தோட்டத்தில், அவரை அடக்கம் செய்தார்கள்.+ அவருக்குப் பிறகு, அவருடைய மகன் ஆமோன் ராஜாவானார்.

19 ஆமோன்+ 22 வயதில் ராஜாவாகி, இரண்டு வருஷங்கள் எருசலேமில் ஆட்சி செய்தார்.+ அவருடைய அம்மா பெயர் மெசுல்லேமேத். அவள் யோத்பாவைச் சேர்ந்த ஆரூத்சின் மகள். 20 ஆமோன் தன்னுடைய அப்பா மனாசேயைப் போலவே யெகோவா வெறுக்கிற காரியங்களைச் செய்துவந்தார்.+ 21 தன்னுடைய அப்பா வழியிலேயே நடந்தார், தன்னுடைய அப்பா வழிபட்ட அருவருப்பான சிலைகளுக்கு முன்னால் மண்டிபோட்டு வழிபட்டுவந்தார்.+ 22 தன்னுடைய முன்னோர்களின் கடவுளான யெகோவாவை ஒதுக்கித்தள்ளினார். யெகோவாவின் வழியில் ஆமோன் நடக்கவில்லை.+ 23 கடைசியில், அவருடைய ஊழியர்கள் அவருக்கு எதிராகச் சதித்திட்டம் தீட்டி, அவருடைய அரண்மனையிலேயே அவரைக் கொலை செய்தார்கள். 24 ஆமோன் ராஜாவைக் கொன்ற அந்தச் சதிகாரர்கள் எல்லாரையும் பொதுமக்கள் வெட்டிக் கொன்றார்கள். பின்பு, அவருடைய மகன் யோசியாவை ராஜாவாக்கினார்கள்.+ 25 ஆமோனின் வாழ்க்கையில் நடந்த மற்ற விஷயங்கள் எல்லாம் யூதா ராஜாக்களின் சரித்திரப் புத்தகத்தில் எழுதப்பட்டிருக்கிறது. 26 ஊத்சா தோட்டத்தில் இருந்த அவருடைய கல்லறையில் அவர் அடக்கம் செய்யப்பட்டார்.+ அடுத்ததாக, அவருடைய மகன் யோசியா+ ராஜாவானார்.