Je, Kuna Serikali Imara Inayoweza Kuitawala Dunia?​—Biblia Inasema Nini?

Serikali nyingi katika ulimwengu wetu zinakabili misukosuko. Hata nchi zinazoonekana kuwa na serikali imara, bado zinakabili mambo mengi mabaya kama, kashfa serikalini, matokeo tata ya uchaguzi ambapo inakuwa vigumu kuamua mshindi, migawanyiko ya kisiasa, na maandamano yenye vurugu.

Hata hivyo, Biblia inafunua kwamba kuna serikali moja ambayo ni imara. Huenda umewahi kusikia kuhusu serikali hiyo. Ni serikali ambayo Yesu Kristo alitaja katika sala ya mfano.

• “Basi, salini hivi: ‘Baba yetu uliye mbinguni, jina lako na litakaswe. Ufalme wako na uje. Mapenzi yako na yatendeke duniani kama ilivyo mbinguni.’”​—Mathayo 6:9, 10.

Biblia inasema nini kuhusu Ufalme huo?

Ufalme—⁠serikali imara

Ufalme huo unatawala kutoka mbinguni.

•  Yesu aliiita serikali hiyo “Ufalme wa mbinguni.” (Mathayo 4:17; 5:3, 10, 19, 20) Hiyo ndiyo sababu alisema: “Ufalme wangu si sehemu ya ulimwengu huu.”​—Yohana 18:36.

Ufalme huo utaziondoa serikali za wanadamu.

• Biblia inasema: “Ufalme [huo] . . . utazipondaponda na kuzikomesha falme hizi zote [za wanadamu], nao pekee utasimama milele.”​—Danieli 2:44.

Ufalme huo, ambao Mfalme wake ni Yesu Kristo, hautaangamizwa kamwe.

• Biblia inasema: “Utawala wake ni utawala wa milele ambao hautapitilia mbali, na ufalme wake hautaangamizwa.”​—Danieli 7:13, 14.

Ufalme huo utaleta amani na usalama duniani.

• Biblia inasema: “Kila mtu atakaa kwa amani chini ya mitini na mizabibu yake, bila kutishwa na mtu yeyote.”​—Mika 4:4, Biblia Habari Njema.

Jifunze mengi kuhusu Ufalme huo

Yesu alipokuwa duniani, alitumia wakati mwingi “kuhubiri habari njema ya Ufalme.” (Mathayo 9:35) Isitoshe, alitabiri hivi:

• “Hii habari njema ya Ufalme itahubiriwa katika dunia yote inayokaliwa ili kuwa ushahidi kwa mataifa yote, na ndipo ule mwisho utakapokuja.”​—Mathayo 24:14.

Leo, habari njema ya Ufalme inahubiriwa katika nchi zaidi ya 240. Tunakualika ujifunze mengi zaidi kuhusu serikali hii na jinsi unavyoweza kunufaika kutokana na utawala wake.

Tafadhali tazama video yenye kichwa Ufalme wa Mungu Ni Nini?