Mtumaini Mtawala Mwenye Enzi Kuu ya Ulimwengu Wote

1. Ayubu alikabili matukio gani yenye kuhuzunisha sana?

AYUBU, mwanamume wa kale mwenye imani, alikuwa amepoteza karibu kila kitu: watoto wake, afya yake, na utajiri wake. Zaidi ya hayo, sifa yake nzuri iliharibiwa. Na ilipohusu “marafiki” wake, mambo mengi waliyosema yalimvunja moyo. Hata mke wake mpendwa alitaabishwa sana hivi kwamba alimhimiza Ayubu ‘amtukane Mungu, afe.’ (Ayu. 2:9; 15:​4, 5; 19:​1-3) Matukio hayo yenye kuhuzunisha yangeweza kumfanya Ayubu aache kumtumaini Mungu wa kweli, na kumfanya atilie shaka kwamba Yehova anawalinda wale wanaompenda na kumtumikia.

2-3. Huenda tukajiuliza nini, na tutajifunza nini katika kitabu cha Ayubu?

² Nyakati fulani, sisi pia tunakabili hali ngumu zinazoweza kujaribu vikali uhakika wetu katika Yehova. Tunaishi katika “nyakati za hatari zilizo ngumu kushughulika nazo.” (2 Tim. 3:1) Tunapokabili jaribu baada ya jaribu, huenda tukahisi tumelemewa na kwamba hatuwezi kuvumilia. Hali kama hizo zimewafanya baadhi ya watu wajiulize ikiwa kwa kweli Yehova anawajali.

³ Ikiwa umewahi kuhisi hivyo, usivunjike moyo. Ayubu alijifunza kwamba Yehova huwaokoa wale walio washikamanifu Kwake. Sisi pia tunaweza kujifunza kumtumaini kikamili Baba yetu wa mbinguni. Ili tuweze kufikia lengo hilo, acheni tuchunguze kitabu cha Ayubu na kuona jinsi kinavyoweza kutuhakikishia mambo haya mawili muhimu: Kwanza, Yehova pekee ndiye Mtawala Mwenye Enzi Kuu ya ulimwengu wote. Pili, Mungu wetu mweza-yote anaweza kuongoza matukio ulimwenguni ili kuhakikisha kwamba kusudi lake linatimizwa na kwamba watu wake wanalindwa kutokana na madhara ya kudumu ya kiroho na kimwili.

SHETANI AKAINGIA KATI YAO

4. Ni nani waliohudhuria mkutano uliofanyika mbinguni unaotajwa katika kitabu cha Ayubu?

⁴ Siku moja, “wana wa Mungu wa kweli” walikusanyika mbele za Yehova mbinguni. Simulizi hilo linaongezea hivi: “Shetani pia akaingia kati yao.” (Ayu. 1:6) Hii ni mara ya kwanza katika Biblia ambapo tunapata jina la cheo linalomfafanua yule anayempinga zaidi Yehova, yaani, “Shetani,” au “yule Mpinzani.” Kufikia wakati huo, Shetani hakuwa mwana wa Mungu mwaminifu. Alikuwa adui ya Yehova na wa sehemu ya kimbingu na ya kidunia ya familia Yake. Yehova alionyesha kwamba Shetani hakuwa tena sehemu ya familia Yake ya mbinguni alipozungumza maneno yanayopatikana kwenye Mwanzo 3:15. Hivyo, Shetani si sehemu ya yule “mwanamke”—familia ya Yehova ya viumbe wa kiroho—ambao wangetokeza ule “uzao.”

5. Tunajifunza nini kwa kuchunguza mambo yaliyosemwa katika mkutano uliofanyika mbinguni?

⁵ Yehova alihakikisha mambo yaliyosemwa katika mkutano huo mbinguni yaliandikwa katika Biblia. Maneno ya Shetani yalionyesha kwamba yeye ni mchongezi na mwovu. (Ayu. 1:9; linganisha Ufunuo 12:10.) Kitendo cha Yehova kutia ndani katika Biblia tukio hilo lililofanyika mbinguni, kinatuhakikishia kwamba anatumia mamlaka yake kuu kwa njia iliyo kamilifu na ya haki. Kinaonyesha pia kwamba akiwa Mweza-Yote, Yehova ndiye anayeweka mipaka ya mambo ambayo wengine wanaweza kufanya.

YEHOVA ANAWEKA MIPAKA

6. Yehova alionyeshaje kwamba aliongoza mambo kikamili wakati wa mkutano huko mbinguni? (Ayu. 1:​7, 8)

⁶ Soma Ayubu 1:​7, 8. Katika mkutano huo, Yehova aliongoza mambo kikamili. Alionyesha kwamba yeye ndiye atakayeamua kitakachotokea katika mkutano huo. Alimuuliza hivi Shetani: “Je, umemwona mtumishi wangu Ayubu?” Ndiyo, Yehova alitambua vizuri kwamba Shetani alitaka kumshambulia Ayubu aliyekuwa mwaminifu. Acheni tuchunguze jinsi Yehova alivyotumia nguvu zake zilizo kuu zaidi kwa niaba ya Ayubu.

7. Kulingana na Ayubu 1:​10, 11, Shetani alidai wanadamu wanamtumikia Yehova kwa sababu gani?

⁷ Soma Ayubu 1:​10, 11. Yehova ndiye Mweza-Yote, Mwenye Enzi Kuu ya ulimwengu wote, naye anatumia nguvu na mamlaka yake kwa njia ambazo anaona zinafaa. (Yer. 32:17; Dan. 4:35) Hata hivyo, Shetani alidai kwamba Yehova alitumia nguvu Zake kwa njia isiyofaa. Kwa maneno mengine, Shetani alidai kwamba Mungu aliwapa wanadamu, kama vile Ayubu, vitu vingi vizuri ili wamtumikie. Shetani pia alidai kwamba wale wanaomtumikia Yehova wanafanya hivyo kwa sababu tu ya mambo mazuri wanayopata kutoka Kwake. Yehova alijibuje madai hayo?

8-9. Yehova alimwekea Shetani mipaka gani, na kwa nini? (Ayubu 1:12) (Tazama pia picha.)

⁸ Soma Ayubu 1:12. Yehova alimpa Ibilisi fursa ya kuthibitisha dai lake—lakini alimwekea mipaka. Mungu alisema hivi waziwazi: “Usimguse mwanamume huyo [Ayubu]!” Mbele ya wahudhuriaji wote, Yehova alimwekea Shetani mipaka ya mambo ambayo anaweza kufanya. Shetani hakuwa na uwezo wa kuvuka mipaka hiyo, hivyo alilazimika kuitii. Na hali iko hivyo leo. Hivyo, Yehova alitumia mamlaka na nguvu Zake kumlinda Ayubu na sifa Yake mwenyewe.

⁹ Shambulizi la kwanza la Shetani halikufanikiwa hata kidogo. Ayubu aliendelea kuwa mwaminifu kwa Baba yake wa mbinguni. (Ayu. 1:22) Hata hivyo, yule Mpinzani hakuwa amemaliza kumjaribu Ayubu.

10. Kwa nini Yehova alimruhusu Shetani amjaribu tena Ayubu? (Ayubu 2:​2-6)

¹⁰ Soma Ayubu 2:​2-6. Pindi hii, Shetani aliongeza jitihada zake za kumfanya Ayubu amwache Yehova. Shetani alidai kwamba kwa hakika Ayubu angemlaani Mungu ili kuokoa uhai wake. Ili kujibu mashtaka hayo, Yehova alimruhusu Ibilisi amshambulie mwanamume huyo mwaminifu. Lakini kwa mara nyingine tena, Yehova aliweka mipaka kwa kusema hivi: “Usiondoe uhai wake!” Shetani hakuwa na la kufanya zaidi ya kukubali vizuizi alivyowekewa. Tunaona tena kwamba Aliye Juu Zaidi alikuwa akiongoza mambo wakati wa jaribu la Ayubu kwa sababu Shetani hakuweza kupita mipaka ambayo Yehova alikuwa ameweka.

YEHOVA AKOMESHA KUTESEKA KWA AYUBU

11. Yehova alimthawabishaje Ayubu baada ya kukomesha majaribu yake? (Ayubu 42:​10-13)

¹¹ Soma Ayubu 42:​10-13. Ilikuja kuonekana wazi kwamba Ayubu asingelegeza msimamo wake, na Yehova akakomesha mashambulizi ya Shetani. Yehova alichukua hatua ili kukomesha kuteseka kwa mtumishi wake mwaminifu. Kwa mara nyingine tena, yule Mpinzani hakuwa na nguvu za kuzuia uamuzi wa Yehova. Shetani hakuruhusiwa tena kuendelea kumshambulia moja kwa moja Ayubu, mtumishi mwenye thamani wa Yehova.

12. Toa mfano unaoonyesha matokeo wanayopata wale wanaotumaini nguvu za Yehova za kuokoa.

¹² Katika siku za mwisho, watu wengi wamejionea nguvu za Yehova za kuokoa. Kwa mfano, katika mwaka wa 1945, kulikuwa na Mashahidi wa Yehova 230 waliookoka ile safari ya kifo ya Wanazi kutoka kwenye kambi moja ya mateso. Waliandika maneno yafuatayo katika azimio lililohusu jaribu kali walilopitia: “Tumetoka katika kipindi kirefu chenye magumu na majaribu na wale ambao wamehifadhiwa, twaweza kusema walinyakuliwa kutoka katika tanuru la moto, hata hawana harufu ya moto. . . . Badala yake, wanajawa na nguvu na uwezo kutoka kwa Yehova.” Waliongezea hivi: “Tunatamani jambo moja tu . . . [baada] ya kutoka kwenye shimo la simba, turuhusiwe kumtumikia Yehova . . . milele. Hiyo itakuwa zawadi bora zaidi kwetu.”—Linganisha Danieli 3:27; 6:22.

13. Unaweza kuwa na uhakika gani unapokabili majaribu? (Tazama pia picha.)

¹³ Sisi pia tunaweza kukabili hali maishani ambazo ni kana kwamba tumetupwa kwenye shimo la simba. (1 Pet. 5:​8-10) Nyakati fulani, tunaweza kuhisi tumelemewa na kujiuliza ikiwa kwa kweli jaribu letu litaisha. Katika pindi kama hizo, kukumbuka kisa cha Ayubu kunaweza kutusaidia. Tunaweza kutumaini kabisa nguvu za Yehova za kukomesha kuteseka—iwe atafanya hivyo sasa au katika ulimwengu mpya unaokuja. Hataruhusu mfumo huu uendelee kuwapo kupita wakati alioweka ili kuukomesha!

YEHOVA ANAWAPENDA WATUMISHI WAKE WASHIKAMANIFU

14-15. Yehova anahisije kuhusu kuwathawabisha watumishi wake washikamanifu? (Ayubu 14:15) (Tazama pia picha.)

¹⁴ Soma Ayubu 14:15. Baba yetu wa mbinguni anawaonyesha ushikamanifu wa pekee wale walio washikamanifu kwake. Anawathamini sana hivi kwamba ikiwa watalala usingizi katika kifo, atawarudishia uhai wao. Ataondoa maumivu yanayosababishwa na kifo.—Isa. 65:17.

¹⁵ Ingawa Ayubu aliendelea kuishi katika ulimwengu unaotawaliwa na Shetani, kupitia rekodi inayotegemeka ya Biblia tunajua kwamba Yehova alimrudishia Ayubu afya nzuri na kumpa baraka nyingi hata zaidi ya alizokuwa nazo kabla ya kujaribiwa. Baraka hizo zilikuwa kionjo tu cha mambo ambayo Yehova atamfanyia Ayubu wakati ujao. Yehova alionyesha kwamba anataka washikamanifu wake wawe na shangwe nyingi na wafurahie maisha. Kwa kweli, Yehova atawapa wote wanaothibitika kuwa washikamanifu fursa ya kufurahia maisha makamilifu katika dunia paradiso. (Ufu. 21:​3, 4) Akiwa Mtawala Mwenye Enzi Kuu ya ulimwengu wote, anatamani kufanya hivyo. Jambo hilo linatufariji sana tunapolazimika kukabili majaribu!

16. Tuna sababu gani nyingine ya kumtumaini Yehova akiwa Mtawala Mwenye Enzi Kuu?

¹⁶ Baada ya kuishi kwa muda mrefu, hatimaye Ayubu alikufa. Lakini Yehova ndiye Mtawala Mwenye Enzi Kuu, Mweza-Yote, aliye na nguvu za kushinda hata kifo. (Kum. 32:39) Hivyo, hakuna mtu yeyote anayeweza kumzuia kuwafufua wale anaowapenda. Naye atafanya hivyo kwa wakati atakaochagua.—Rom. 8:​38, 39.

MTUMAINI YEHOVA KIKAMILI

17. Ni nini kinachoonyesha kwamba Shetani ameshindwa katika jitihada zake za kuwaangamiza watu wa Yehova?

¹⁷ Simulizi la Biblia la Ayubu linatupatia sababu thabiti za kumtumaini Yehova kikamili. Tunashukuru sana kwamba jitihada za Shetani za kuwaangamiza watu wa Yehova zimeshindwa! Leo, watumishi waaminifu wa Yehova milioni tisa hivi ni ushahidi ulio hai wa nguvu za Mtawala wa kweli Mwenye Enzi Kuu. Tena na tena, tumejionea kwamba silaha zozote zinazotokezwa dhidi ya watumishi wa Yehova hazifanikiwi. (Isa. 54:17) Mataifa yaliyo kama chuma na mashirika ya kidini hayajafanikiwa kuwaharibu watu wa Yehova wanaoonekana kuwa hawana ulinzi. Na hakuna jambo lolote litakalotuzuia kutangaza ukweli kumhusu Yehova na kufunua kwamba Shetani ni mlaghai na muuaji. Hata kifo hakiwezi kutuzuia kwa sababu Yehova atamfufua mtu yeyote anayekufa akiwa mshikamanifu kwake.—Hos. 13:14.

18. Kwa nini tunaweza kutazamia wakati ujao tukiwa na uhakika?

¹⁸ Tunapotafakari kuhusu simulizi halisi la maisha ya Ayubu, tunaimarisha imani yetu kwamba tunaweza kutazamia wakati ujao tukiwa na uhakika. Wakati wa dhiki kuu, watu wa Mungu wataonekana ni kana kwamba hawana ulinzi na itaonekana kana kwamba Shetani na wale wanaomuunga mkono watashinda. Lakini kama tu ilivyokuwa katika siku za Ayubu, Yehova atakuwa akiongoza mambo kikamili na hataruhusu Shetani asababishe madhara yoyote ya kudumu. Wakati umekaribia sana wa Yehova kukomesha kuteseka kwa wanadamu kunakotokana na Shetani. Ibilisi na malaika wake waovu watatupwa katika shimo refu lisilo na mwisho kwa miaka 1,000. (Luka 8:31; Ufu. 20:​1-3) Hatimaye, Shetani na wale wote wanaomuunga mkono watafikia mwisho wao. (Ufu. 20:10) Kichwa cha Shetani kitapondwa, kama Yehova alivyotangaza. Ataangamizwa kabisa mara moja kwa wakati wote.—Mwa. 3:15; Rom. 16:20.

19. Wale wanaomtumaini Yehova kikamili wanatazamia thawabu gani? (Tazama pia picha.)

¹⁹ Waabudu wa kweli wanatazamia kwa hamu kurudishwa kwa uhai mkamilifu na kuwa wenye furaha katika ulimwengu mpya ulio karibu. Maisha yatakuwa mazuri zaidi kuliko hata tunavyoweza kuwazia. Yehova anaahidi hivi: “Tazama! Ninafanya vitu vyote kuwa vipya.” (Ufu. 21:5) Hilo linamaanisha nini? Kwa mara ya kwanza baada ya maelfu ya miaka, wanadamu watakuwa huru kutokana na uvutano wa Shetani na malaika wake waovu waliopotoka, wenye chuki, na waharibifu. Amani tutakayohisi itakuwa ya pekee sana! Mahangaiko ya ulimwengu huu wa zamani hayatatukosesha usingizi tena. Wale watakaookoka Har–​Magedoni wataona uponyaji wa kimuujiza utakaohusisha ulimwengu wote. Kwa kuongezea, ufufuo wa wapendwa wetu waliokufa hatimaye utaanza. Tutaweza kufurahia maisha kama Baba yetu wa mbinguni alivyokusudia!

20. Umeazimia kufanya nini?

²⁰ Tunapoendelea kukabiliana kwa ujasiri na changamoto katika siku hizi za mwisho, na tuazimie kumtumaini Yehova kikamili na kuunga mkono enzi yake kuu. Acheni tuendelee kuonyesha upendo wetu kwa Baba yetu wa mbinguni na kuthibitisha kwamba Shetani ni mwongo. Naam, tunaweza kutazamia kwa hamu wakati ujao chini ya utawala wa Yehova, Mwenye Enzi Kuu, ambaye anatamani kuwathawabisha waaminifu wake kwa njia kubwa!