Kwa Nini Tunahitaji Fidia?

1-2. Tunahitaji kuokolewa kutokana na nini, na kwa nini? (Waroma 7:​22-24) (Tazama pia picha.)

WAZIA hali hii. Jengo limeporomoka na mwanamume amenaswa kwenye kifusi. Yuko hai, lakini hawezi kujitoa katika hali hiyo. Jambo pekee analoweza kufanya ni kuomba msaada na kutumaini kwamba ataokolewa.

² Kila mmoja wetu yuko katika hali kama hiyo. Kwa njia gani? Alipomwasi Muumba wake, Adamu akawa mtenda dhambi. Baadaye, aliwapitishia watoto wake hali yake ya dhambi. Matokeo ni kwamba wanadamu wote tumenaswa kwenye kifusi cha dhambi ya kurithi, na hatuwezi kujitoa wenyewe ili tusipatwe na madhara yake. Mtume Paulo alifafanua vizuri hali yetu ya dhambi katika barua yake kwa Waroma. (Soma Waroma 7:​22-24.) Aliomba aokolewe “kutoka katika mwili unaopatwa na kifo hiki.” Paulo alikuwa amenaswa na dhambi ya kurithi, ambayo husababisha kifo. (Rom. 6:23) Sisi pia tuko katika hali hiyo. Tunahitaji kuokolewa!

3. Fidia inaweza kutuokoa kwa njia gani?

³ Paulo hakumalizia maelezo yake kuhusu dhambi bila kutupatia tumaini. Baada ya kuuliza: “Ni nani atakayeniokoa kutoka katika mwili unaopatwa na kifo hiki?” alijibu hivi swali lake mwenyewe kwa uhakika: “Shukrani kwa Mungu kupitia Yesu Kristo Bwana wetu!” (Rom. 7:25) Paulo alikuwa akirejelea dhabihu ya fidia ya Yesu.a Fidia hiyo inaweza kutuokoa kwa kutuwezesha kupata (1) msamaha wa dhambi zetu, (2) kuponywa kutokana na hali yetu ya dhambi, na (3) kupatanishwa na Muumba wetu. Upendo wetu kwa Yehova, “Mungu anayetoa tumaini,” utakua tunapochunguza mambo hayo. (Rom. 15:13) Pia, uthamini wetu kwa Yesu utaongezeka—“ambaye kupitia kwake tunaachiliwa huru kwa fidia.”—Kol. 1:14.

FIDIA INATUWEZESHA KUPATA MSAMAHA WA DHAMBI

4-5. Kwa nini sisi sote tunahitaji fidia? (Mhubiri 7:20)

⁴ Tunahitaji fidia ili tusamehewe dhambi zetu. Kila mwanadamu ambaye si mkamilifu hutenda dhambi, iwe kwa maneno au matendo. (Soma Mhubiri 7:20.) Dhambi nyingine ni nzito zaidi. Kwa mfano, chini ya Sheria ya Musa, adhabu ya makosa yaliyohusisha uzinzi na kuua ilikuwa kifo. (Law. 20:10; Hes. 35:​30, 31) Bila shaka, dhambi nyingi si nzito kama hizo; hata hivyo, bado ni dhambi. Kwa mfano, mtunga zaburi Daudi alisema hivi: “Nitailinda hatua yangu ili niepuke kutenda dhambi kwa ulimi wangu.” (Zab. 39:1) Naam, nyakati nyingine tunaweza kutenda dhambi kupitia mambo tunayosema.—Yak. 3:2.

⁵ Fikiria kuhusu maneno na matendo yako ya zamani. Je, umewaambia watu mambo ambayo unajutia kuyasema? Je, umetenda makosa ambayo unajutia? Bila shaka, umejibu ndiyo kwa maswali hayo yote. Biblia inasema hivi: “Ikiwa tunasema, ‘Hatuna dhambi,’ tunajipotosha wenyewe na kweli haimo ndani yetu.”—1 Yoh. 1:8.

6-7. Ni nini kinachotoa msingi wa Yehova wa kutusamehe dhambi zetu? (Tazama pia picha.)

⁶ Fidia inatoa msingi thabiti wa Yehova kutusamehe dhambi zetu. (Efe. 1:7) Hata hivyo, hilo halimaanishi kwamba Yehova hajali tunapofanya dhambi. Yehova anachukizwa na dhambi. (Isa. 59:2) Haki yake kamilifu inahitaji kuwe na msingi wa kusamehe.

⁷ Sheria ya Musa ilisema kwamba Waisraeli walihitaji kutoa dhabihu za wanyama ili kufunika dhambi zao. (Law. 4:​27-31; 17:11) Dhabihu hizo zilionyesha kimbele dhabihu kubwa zaidi ya Yesu na baraka zake. Dhabihu yake ingeandaa msingi wa kisheria ili Yehova atusamehe dhambi zetu. Paulo alielewa thamani ya kifo cha kidhabihu cha Yesu, kama inavyoonyeshwa na kile alichowaandikia Wakristo katika jiji la Korintho. Baada ya kuorodhesha mazoea yao mabaya ya zamani, aliwaambia hivi: “Mmeoshwa mkawa safi; mmetakaswa; mmetangazwa kuwa waadilifu katika jina la Bwana Yesu Kristo na kwa roho ya Mungu wetu.”—1 Kor. 6:​9-11.

8. Unaweza kutafakari kuhusu nini unapofikiria kuhudhuria Ukumbusho wa mwaka huu?

⁸ Unapojitayarisha kuhudhuria Ukumbusho wa mwaka huu, tumia wakati kutafakari msamaha wa Yehova unamaanisha nini kwako. Kwa mfano, kwa sababu ya fidia, huhitaji kulemewa na hisia za hatia kutokana na dhambi ulizofanya zamani ambazo tayari umetubu. Namna gani ikiwa ni vigumu kwako kukubali jambo hilo? Huenda umejiambia hivi, ‘Ninaelewa kwamba Yehova anaweza kusamehe, lakini siwezi kujisamehe.’ Ikiwa unahisi hivyo, kumbuka jambo hili: Yehova ndiye anayetusamehe, na amempa Mwana wake mamlaka ya kuhukumu. Yehova hajakupatia wewe au mwanadamu yeyote jukumu la kuamua ni nani atapokea au hatapokea rehema zake. Biblia inasema hivi: “Ikiwa tunatembea katika nuru kama [Yehova] mwenyewe alivyo katika nuru, . . . damu ya Yesu Mwana wake hutusafisha kutoka katika dhambi yote.” (1 Yoh. 1:​6, 7) Tunaweza kuwa na uhakika na fundisho hilo kama fundisho lingine lolote la Biblia. Fidia imempa Yehova msingi wa kisheria wa kutuonyesha rehema, na Neno lake linasema kwamba yuko “tayari kusamehe.”—Zab. 86:5.

FIDIA INATUWEZESHA KUPONYWA

9. Mbali na kutenda mabaya, dhambi inahusisha nini kingine? (Zaburi 51:5 na maelezo ya chini)

⁹ Katika Biblia, neno “dhambi” halirejelei tu tendo lakini pia hali, ambayo tumerithi mara tu mimba ilipotungwa. (Soma Zaburi 51:5 na maelezo ya chini.) Hali hiyo haisababishi tuwe tu na mwelekeo wa kutenda mabaya, bali pia inasababisha tuwe na udhaifu unaofanya tupate magonjwa, tuzeeke, na kufa. Hilo linasaidia kufafanua kwa nini watoto wachanga—ambao hawajatenda dhambi yoyote—wanakuwa wagonjwa na hata kufa. Pia, inatusaidia kufafanua kwa nini watu wabaya na pia watu wazuri wanateseka na kufa. Wazao wote wasio wakamilifu wa Adamu wamerithi hali ya dhambi.

10. Adamu na Hawa waliathiriwaje na hali yao ya dhambi?

¹⁰ Fikiria jinsi hali ya dhambi ilivyowaathiri wenzi wa ndoa wa kwanza. Dhambi hiyo iliwafanya wajihisi vibaya. Baada ya kuasi, mara moja Adamu na Hawa walipata matokeo ya kuvunja sheria ya Mungu—sheria ambayo “[iliandikwa] ndani ya mioyo yao.” (Rom. 2:15) Walihisi badiliko ndani yao—ambalo halikuwa zuri. Walihisi walipaswa kufunika sehemu za mwili wao na kujificha kutoka kwa Muumba wao kama wahalifu. (Mwa. 3:​7, 8) Kwa mara ya kwanza, Adamu na Hawa walikuwa na hisia za hatia, wasiwasi, kutojiamini, maumivu, na aibu. Kwa njia moja au nyingine, hisia hizo zingewasumbua mpaka walipokufa.—Mwa. 3:​16-19.

11. Hali yetu ya dhambi inatuathirije?

¹¹ Hali ya dhambi inatuathiri leo kama ilivyowaathiri wenzi wa ndoa wa kwanza. Chanzo cha taabu na maumivu yetu ni hali yetu ya dhambi. Hata tujaribu kadiri gani kuboresha hali yetu, hatuwezi kutatua matatizo yetu yote. Kwa nini? Kwa sababu Biblia inasema kwamba ‘tumetiishwa chini ya ubatili.’ (Rom. 8:20) Hilo limethibitika kuwa kweli kwetu, na kwa wanadamu wote kwa ujumla. Kwa mfano, fikiria kuhusu jitihada za wanadamu za kutunza mazingira, kudhibiti uhalifu, kuondoa umaskini, na kuleta amani miongoni mwa mataifa. Licha ya maendeleo yoyote ambayo wanadamu wamefanya, bado hawajafanikiwa kutatua matatizo hayo. Fidia inawezaje kutuokoa kutokana na hali yetu ya dhambi?

12. Fidia inatupatia tumaini gani?

¹² Fidia inatupatia tumaini kwamba “uumbaji wenyewe . . . utawekwa huru kutoka katika utumwa wa uharibifu.” (Rom. 8:21) Tutakapopata manufaa kamili ya fidia katika ulimwengu mpya wa Mungu, hatutasumbuliwa tena na magonjwa ya akili, hisia, na ya kimwili; wala hatutasumbuliwa na hisia za hatia, wasiwasi, kutojiamini, maumivu, au aibu. Zaidi ya hayo, jitihada zetu za kuitunza dunia na kuishi kwa amani hazitakuwa za bure, bali zitafanikiwa chini ya utawala wa yule aliyetoa fidia kwa ajili yetu, “Mkuu wa Amani,” Yesu Kristo.—Isa. 9:​6, 7.

13. Unaweza kutafakari kuhusu jambo gani lingine unapojitayarisha kuhudhuria Ukumbusho wa mwaka huu?

¹³ Fikiria itamaanisha nini kwako kuokolewa kutokana na hali ya dhambi. Wazia jinsi utakavyohisi utakapoamka kila asubuhi ukiwa na afya nzuri, na kuishi kila siku bila kuogopa kwamba wewe au wapendwa wako watakosa chakula, watakuwa wagonjwa, au watakufa. Hata sasa unaweza kupata amani ya kadiri “[unaposhika] imara tumaini . . . kama nanga ya nafsi, likiwa hakika na imara.” (Ebr. 6:​18, 19) Kama tu ambavyo nanga inaweza kuimarisha mashua, tumaini lako la Kikristo linaweza kuimarisha imani yako na kukusaidia kuvumilia jaribu lolote unalokabili sasa. Kwa kweli, unaweza kuwa na uhakika kwamba Yehova atakuwa “mthawabishaji wa wale wanaomtafuta kwa bidii.” (Ebr. 11:6) Faraja unayopata sasa na tumaini ulilo nalo la wakati ujao, linawezekana tu kwa sababu ya fidia.

FIDIA INATUWEZESHA KUPATANISHWA

14. Dhambi imeathirije uhusiano wetu na Muumba wetu, na kwa nini?

¹⁴ Tangu Adamu na Hawa walipotenda dhambi, wanadamu wametengwa kutoka kwa Mungu. Hata Biblia inasema kwamba wanadamu kwa ujumla wametengwa kutoka kwa Muumba. (Rom. 8:​7, 8; Kol. 1:21) Kwa nini? Kwa sababu viwango vikamilifu vya Yehova havimruhusu kuendekeza dhambi. Biblia inasema hivi kumhusu Yehova: “Macho yako ni safi sana yasiweze kutazama uovu, nawe huwezi kuvumilia uovu.” (Hab. 1:13) Hivyo, dhambi imemtenganisha Mungu na wanadamu. Hakuna yeyote kati yetu anayeweza kuwa na uhusiano na Yehova mpaka utengano huo utakaporekebishwa, na tupatanishwe naye. Fidia inawezesha upatanisho huo.

15. Fidia ililetaje maelewano, na matokeo yalikuwaje?

¹⁵ Biblia inasema kwamba Yesu ni “upatanisho kwa ajili ya dhambi zetu.” (1 Yoh. 2:2) Neno la Kigiriki linalotafsiriwa “dhabihu ya upatanisho” linaweza kumaanisha “njia ya kuleta maelewano.” Fidia ililetaje maelewano kati yetu na Yehova? Hatupaswi kufikiri kwamba kifo cha Mwana Wake kilimletea Yehova faraja kwa njia fulani. Badala yake, fidia ilileta maelewano, au kutosheleza kiwango cha haki cha Yehova. Sasa alikuwa na msingi wa kurudisha uhusiano kati yake na wanadamu. (Rom. 3:​23-26) Hata angeweza “kuwahesabia uadilifu” wale ambao walimwabudu kwa uaminifu kabla ya kifo cha Kristo. (Mwa. 15:​1, 6, maelezo ya chini) Jinsi gani? Kwa msingi wa fidia ambayo ilitolewa baadaye. Yehova alikuwa na uhakika kabisa kwamba Yesu, Mwana wake, angeitoa. (Isa. 46:10) Fidia iliwafungulia wanadamu njia ya kupatanishwa na Mungu.

16. Ni jambo gani lingine unaloweza kutafakari kuhusu unapojitayarisha kuhudhuria Ukumbusho wa mwaka huu? (Tazama pia picha.)

¹⁶ Fikiria kupatanishwa na Mungu kunamaanisha nini kwako. Kwa mfano, huenda unamrejelea Yehova kuwa “Baba” yako, kama Yesu alivyotufundisha. (Mt. 6:9) Nyakati nyingine, huenda hata unamrejelea Yehova kuwa “Rafiki” yako. Tunapotumia maneno kama “Baba” au “Rafiki,” tunapaswa kufanya hivyo kwa heshima kubwa na unyenyekevu. Kwa nini? Kwa sababu ya hali yetu ya dhambi, ukaribu wetu na Yehova hautokani na jitihada zetu wenyewe. Ni kwa sababu tu ya fidia tunaweza kuwa na uhusiano mzuri na Yehova. Kupitia Yesu, Yehova “[amepatanisha] kwake mwenyewe vitu vingine vyote kwa kufanya amani kupitia damu aliyomwaga [Yesu] juu ya mti wa mateso.” (Kol. 1:​19, 20) Hiyo ndiyo sababu tunaweza kufurahia uhusiano mzuri na Yehova—licha ya hali yetu ya sasa ya kutokamilika.

FIDIA INAONYESHA REHEMA YA YEHOVA

17. Fidia inaonyeshaje rehema ya Yehova? (Waefeso 2:​4, 5)

¹⁷ Fidia inaonyesha kwamba Yehova ni “tajiri katika rehema.” “Alitufanya hai . . . tulipokuwa wafu katika makosa.” (Soma Waefeso 2:​4, 5.) Wale walio na “mwelekeo unaofaa kwa ajili ya uzima wa milele” wanalilia msaada, wakitambua kwamba wamenaswa kwenye kifusi cha dhambi tuliyorithi na wanahitaji kuokolewa. (Mdo. 13:48) Yehova anajibu ombi lao la msaada kupitia ujumbe wa Ufalme, ili wamjue yeye na Yesu, Mwana wake. (Yoh. 17:3) Ikiwa Shetani alifikiri kwamba dhambi ya Adamu na Hawa ingemzuia Mungu kutimiza kusudi lake, alikuwa amekosea sana.

18. Tunapotafakari kuhusu fidia, tunapaswa kukumbuka suala gani?

¹⁸ Tunapotafakari kuhusu manufaa ambayo fidia inatuwezesha kupata, tunahitaji kukumbuka lile suala kubwa zaidi. Badala ya kuiona fidia kuwa uandalizi kwa ajili ya kutunufaisha sisi tu, tunapaswa kukumbuka kwamba fidia ni njia ambayo Yehova anatumia kujibu shtaka ambalo Shetani alizusha katika bustani ya Edeni. (Mwa. 3:​1-5, 15) Kupitia fidia, Yehova analitakasa jina lake, na kuliondolea shutuma zote. Pia, anatuokoa kutokana na dhambi na kifo, akithibitisha kwamba yeye ni Mungu mwenye upendo. Na kwa sababu ya fadhili zake zisizostahiliwa, Yehova anaturuhusu—licha ya hali yetu ya dhambi—tushiriki katika kujibu shtaka la Shetani. (Met. 27:11) Unawezaje kuonyesha kwamba unathamini fidia? Tutajibu swali hilo katika makala inayofuata.