Je, Niache Kuendesha Gari?

Je, unakabili hali kama hiyo? Ikiwa ndivyo, ni jambo gani linaloweza kukusaidia kuamua ikiwa utaendelea kuendesha gari?

Katika baadhi ya nchi, madereva wanaofikisha umri fulani wanapaswa kupata kibali kutoka kwa daktari ili waweze kuendelea kuendesha gari. Wakristo wanaoishi katika nchi hizo wanafuata sheria na maamuzi ya wenye mamlaka. (Rom. 13:1) Lakini haidhuru mahali unapoishi, kuna njia za kuchanganua uwezo wako wa kuendesha gari kwa usalama.

CHANGANUA JINSI UNAVYOENDESHA GARI

Kama ilivyopendekezwa na tovuti ya shirika la National Institute on Aging (NIA) la Marekani, unaweza kuanza kwa kujiuliza maswali yafuatayo:

• Je, ni vigumu kwangu kusoma alama za barabarani au kuona ninapoendesha gari usiku?

• Je, ninaweza kugeuza shingo yangu kwa urahisi ili nitazame vioo vya gari na maeneo ambayo siwezi kuyaona kupitia vioo?

• Je, ninaona kuwa changamoto kutenda kwa haraka, kwa mfano inapohusu kuhamisha mguu wangu kutoka kwenye pedali ya mafuta hadi kwenye breki?

• Je, mimi huendesha polepole sana hivi kwamba ninasababisha foleni ya magari?

• Je, hivi karibuni bado kidogo nisababishe aksidenti, au je, gari langu lina mikwaruzo kwa sababu ya kugonga vitu?

• Je, nimewahi kusimamishwa na polisi kwa sababu ya jinsi ninavyoendesha gari?

• Je, nimewahi kusinzia nikiwa ninaendesha gari?

• Je, ninatumia dawa zozote ambazo zinaweza kuathiri uendeshaji wangu wa gari?

• Je, watu wa familia au rafiki zangu wameniambia kwamba wana wasiwasi kuhusu udereva wangu?

Ikiwa umejibu ndiyo kwa swali moja au mawili kati ya maswali hayo, huenda ukahitaji kufikiria kufanya mabadiliko fulani. Kwa mfano, huenda ukaamua kupunguza mara unazoendesha gari, hasa usiku. Chunguza mara kwa mara udereva wako. Unaweza kuwauliza watu wa familia au marafiki ili wakupatie maoni yao kuhusu udereva wako. Unaweza pia kuamua kujiandikisha kwenye masomo ya kuendesha gari kwa usalama. Hata hivyo, ikiwa umejibu ndiyo katika maswali kadhaa yaliyo hapo juu, huenda ingekuwa jambo zuri ikiwa utaacha kuendesha gari.a

ONGOZWA NA KANUNI ZA BIBLIA

Huenda tusitambue kwamba uwezo wetu wa kuendesha gari umeanza kupungua. Na suala la ikiwa unahitaji kuacha kuendesha gari linaweza kuwa jambo gumu kwako kulizungumzia. Hivyo, ni kanuni gani za Biblia zinazoweza kukusaidia kufikiria kwa njia inayofaa na kufanya uamuzi wenye hekima? Fikiria kanuni hizi mbili.

Dumisha sifa ya kiasi. (Met. 11:2) Kadiri tunavyozeeka, uwezo wetu wa kuona, kusikia, na misuli yetu hudhoofika. Kwa mfano, watu wengi huacha kucheza michezo fulani wanapozeeka kwa sababu wanatambua kwamba wanaweza kuumia kwa urahisi kadiri umri unavyozidi kusonga. Kanuni hiyo inaweza kutumika inapohusu kuendesha gari. Pindi fulani, mtu anaweza kuonyesha sifa ya kiasi na kuamua kuacha kuendesha gari kwa ajili ya usalama wake mwenyewe. (Met. 22:3) Na ikiwa wengine watakuwa na wasiwasi kuhusu udereva wake, mtu mwenye kiasi atasikiliza na kukubali maoni yao.—Linganisha 2 Samweli 21:​15-17.

Epuka hatia ya damu. (Kum. 22:8) Gari linaweza kuwa silaha hatari ikiwa halitatumiwa kwa njia ya usalama. Mtu ambaye anaendelea kuendesha gari licha ya kwamba uwezo wake wa kuendesha gari umepungua, anaweza kuhatarisha uhai wake na wa wengine. Na ikiwa atasababisha aksidenti na mtu akafa, huenda akawa na hatia ya damu.

Ikiwa unahitaji kufanya uamuzi mgumu wa kuamua ikiwa uache kuendesha gari, epuka kufikiria kwamba utapoteza thamani au heshima yako. Yehova anakupenda kwa sababu ya sifa zako maridadi, kutia ndani sifa yako ya kiasi, unyenyekevu, na hangaiko lako kuelekea watu wengine. Na anaahidi kukutegemeza na kukufariji. (Isa. 46:4) Hatakuacha kamwe. Hivyo, mwombe akusaidie kupata hekima inayotumika na utambuzi wa kiroho unapoamua ikiwa utaendelea kuendesha gari.