Bacha, na Boitšoaro ba Bibele ke Tsela e Molemo Haholo?

“’Na Jehova, Molimo oa hao, ke u ruta se u tšoanelang, ke u tsamaisa ka tsela eo u tšoanetseng ho tsamaea ka eona.”—Esa. 48:17.

1. Ke hobane’ng ha bocha e le nako e monate bophelong, empa ba bang ba na le boikutlo bofe?

“BOCHA ke palesa,” kamoo ho ngotseng moroki. Bacha ba bangata baa lumela, hobane ke nako ea thabo le bolokolohi boikarabelong bo boima ba batho ba baholo. Empa bacha ba bangata ba laba-labela ho fumana menyaka eohle e bulehetseng bona le batho ba baholo. Boikutlo ba bona bo ka akaretsoa ka hore: ‘Re ke ke ra ema, che, re batla monyaka o mong le o mong hona joale.’

2. (a) Lipalo tsa morao tjena li bontša eng ka bacha le boitšoaro? (b) Na u ikutloa hore liphetoho tsee li ama bacha ka phuthehong ea Bokreste?

² Nakong ena e monate haholo ea bophelo ho kena monyakeng o mong le o mong ho felletse ka batho ba bangata haholoanyane ba bacha ba kopanelang likamanong tsa botona le botšehali pele ho lenyalo, ho bitsoang bohlola, ho feta ka nako leha e le efe paleng ea kajeno.a Moroallo ona oa likamano tsa botona le botšehali tsa bootsoa o bile o ama bacha ba bang ba ka phuthehong ea Bokreste. Joaloka Mokreste u ka ’na ua ipotsa, ‘Ke eng ho thatafaletsang bacha ho itšoara hantle hakaale, haholo “mehleng ena ea qetello”?’—Moek. 11:10; 2 Tim. 3:1-5.

HO KENE KHATELLO!

3, 4. (a) Ke hobane’ng ha ho se bonolo hore mocha a lule a hloekile? (b) Khatello ea lithaka le ho hloka kutloisiso li baka mathata joang?

³ Lilemong tsa bocha, litakatso tsa botona le botšehali ‘lia khaba.’ Nako ena, e bitsoang ‘palesa ea bocha’ ka Bibeleng, ka tloaelo e tlisa ho hohela ba batona kapa ba batšehali ka matla. Kahoo hase mohlolo ha uena, joaloka motho e mocha, u khathatsoa ke litakatso tsa botona kapa botšehali. Leha ho le joalo, takatso ena e loketseng e phahamisoa ke boithabiso ba kajeno le liphatlalatso, tse tlotlisang likamano tsa botona le botšehali.—1 Ba-Kor. 7:36.

⁴ Khatello e etsoang ke bacha ba bang le eona e ka ba matla, joalokaha ngoanana e mong e monyenyane oa Mokreste a hlalosa, a re: “Ruri ho thata ho ba ea fapaneng kajeno. Banana ba bang ba botsa sekolong hore na se nkile ka ba le likamano tsa botona le botšehali. Eare ha ke ba bolella hore che, kaofela ba qala ho tšeha. Ka ikutloa eka nka lla le hore ke re nkile ka ba le tsona.” Ho phaella moo, bacha ba hloka lerato le ho utloisisoa ’me mohlomong a ke ke a khotsofatsoa ho sena lapeng. Ba qenehela motsoalle oa mohlankana kapa oa ngoanana ea ba tšoarang ka “mokhoa o khethehileng” le ea nang le tsebe e qenehelang. Ho atamelana haufi Joalo ka boikutlo ho ka isa katamelanong ea likamano tsa botona le botšehali. Bacha ba bang ba hlolloa ke ho ata ha boikutlo bona bo bocha. Ba ka ’na ba ipotsa, “Na ntho e monate hakana e ka ba phoso? Na boitšoaro ba Bibele ruri ke tsela e molemo haholo?’

TSELA E MOLEMO HAHOLO

5. (a) Esaia 48:17 e re bolella eng ka Molimo? (b) Ho ea ka 1 Ba-Thessalonkika 4:3-8 thato ea Molimo ke efe ho rōna ka boitšoaro?

⁵ Ntate oa rōna oa leholimo o ile a hopotsa batho ba khethiloeng ba hae: “’Na Jehova, Molimo oa hao, ke u ruta se u tšoanelang, ke u tsamaisa ka tsela eo u tšoanetseng ho tsamaea ka eona.” (Esa. 48:17) ‘Tsela eo re tšoanelang ho tsamaea ka eona’ boitšoarong ke efe? “Ho rata ha Molimo ke hore . . . le tšabe bofebe, le hore e mong le e mong ho lōna a tsebe ho bolokela pitsa [’mele oa] hae khalalelong le hlonephong, e seng litakatsong tse mpe, . . . Hobane Molimo ha oa ka oa re biletsa litšileng.”—1 Ba-Thess. 4:3-8.

6. (a) Moapostola Pauluse o ile a laela Bakreste ba tlotsitsoeng eng mabapi le bofebe, hona hobane’ng? (b) Ke hobane’ng ha hona ho lokela ho etsa bacha hore ba inahane ka tsela ea bona

⁶ Thato ea Molimo tabeng ea boitšoaro e hlakile—‘laolang ’mele ea lōna; telang bofebe le litšila. Lōna bacha ba neetseng bophelo ba lōna ho Molimo le theile kopano e haufi le oona ’me le fetohile karolo ea phutheho e hloekileng. Molimo o thabetse tsela e joalo hakaakang.’ Empa hore le kopanele likamanong tsa botona le botšehali pele ho lenyalo ho ka tšoana leha e mong oa batlotsuoa ba ‘litho tsa Kreste’ ea ‘leng kopanong le Morena’ a ka ‘kopana [likamanong tsa botona le botšehali] le seotsoa.’ “Che, le ho leka,” kamoo ho boletseng moapostola Pauluse. Ekaba thohako e phahameng haholo ea kamano ea bohlokoa joalo. Ha ho sebe se seng se joalo, hobane “ea febang o siteloa ’mele oa hae.” Ka sebele, sebe se joalo se ka senya kamano ea moea eo re nang le eona le Molimo. Hase feela Pauluse a ileng a phehella hore “tšabang bofebe.” E, “tšabang”! Le se ke la emela hore le beelane mabaka kapa le ngangisane ka bona. Suthela hole le bona kamoo u ka khonang—le hona ka potlako! Empa ho joang haeba motho a sa ‘balehele’ boitšoaro bo joalo?—1 Ba-Kor. 6:15-18.

‘HO ITŠITELOA’

7-9. (a) 2 Petrose 2:9-13 e re’ng ka ba kopanelang boitšoarong bo bobe? (b) Ba bang ba keneng litšileng ba ‘itšitetsoe joang’?

⁷ Moapostola Petrose o re ba ka phuthehong ba buang hampe ka ba “khanyang” ’me ba qetella ba kene boitšoarong bo bobe ba felella ka ‘ho itšiteloa e le moputso oa bobe.’ (2 Pet. 2:9-13, NW) ‘Meputso’ ena ea ho etsa hampe likamanong tsa botona le botšehali e teba ho feta hore ho ba le mafu a litšila kapa kemaro e sa lokelang. E senya lerato, hlompheho le khotso ea kelello. Ka mohlala, bacha ba bang ba ‘ileng ba fetela pele haholo,’ ba etsa bohlola, ka masoabi ba ile ba lumela hore:

“Ke ile ka soetseha haholo. Ha nka ka ikutloa hamonate kapa ho utloa mofuthu oa lerato kamoo ho neng ho boleloa hore ho ee ho be kateng. Ho e-na le hoo, ho hlokomela ka ho feletseng hore na ketso ke e mpe hakaakang ha iteanya le ’na.”

“Ka lla bosiu kaofela.”

“Ka ikutloa ke tepeletse joaloka ntja. E ne e le boikutlo bo feela bo kulisang. Ka felloa ke boitlhompho le ho hlompa ngoanana. Ha e le hantle, ka iphumana ke tšoaea ngoanana phoso hore na o ne a ho lumella’ng.”

⁸ Ntate oa rōna oa leholimo o re bolella hore re se ke ra qoba bofebe feela, empa le “litšila.” (1 Ba-Thess. 4:7) Le hoja lentsoe lena le akaretsa ho hongata, le bua ka boitšoaro bo nyatsehang. Ka mohlala, ho pholla litho tsa botona le botšehali ho li tsosa ke mokhoa o “litšila” oo bacha ba bangata ba ’nileng ba tšoareha ho oona. O hlile o phahamisa ‘Takatso ea botona le botšehali’ ’me o ka kenyelletsa letsoalo le matla. Mabakeng a mang, moo motho a sa kang a loanela ka matla hore a o loantše, monahano ona o ile oa thea bothata hoba a nyale. Mohlankana e mong o ile a nyaroha ho fumana hore kamora hore a nyale mokhoa oa hae oa nako e telele oa ho ikhotsofatsa e le eena botoneng o mo sitisa ho fana ka “tšoanelo” ea lenyalo. Ha latela likhoeli tse telele tsa mahlomola!—1 Ba-Kor. 7:3.

⁹ Ba bang ba s’o nyalane ba ’nile ba tšoarana ka mokhoa o tsosang takatso le o khothalletsang likamano tsa botona le botšehali. Hona le hona ke “litšila” ’me habonolo—’me ho etsahala hangata—ho isa kamanong ea botona le botšehali ea boitšoaro bo bobe. Mokhoa ona o ka chesa motho ka ‘takatso ea botona le botšehali ho isa ho se itsebeng. Mohlankana e mong a lumela: “U ipona u le phoofolo e nang le litakatso tsa bophoofolo, e leng ho kotsi boikutlong.” Boitšoaro bo joalo bo ’nile ba fella ka litebeletsano tse qhalanangb ’me hangata ka mathata bakeng sa ba nyalanang hamorao. “Re ile ra etsa ntho e ’ngoe le e ’ngoe e khannelang bofebeng ’me ra batla re bo etsa pele re nyalana,” kamoo ho ileng ha ipolela banyalani ba bang ba bacha. “Le hoja re ile ra fumana thuso ho baholo, ha hoa hlola ho tšoana le pele. Ho bile thata ho fumana tlhomphano eo re neng re e-na le eona e mong ho e mong.”

10. Ke hobane’ng ha “litšila” li le kotsi ho bobeli bo sa nyalanang?

¹⁰ Ha motho ea seng lenyalong a qala ho kopanela mekhoeng e meng e ‘tahang’ ea likamano tsa botona le botšehali e boloketsoeng liphate tsa lenyalo, a ka ’na a phoqeha hore a nyalane le motho ea se nang litšoaneleho tse hlileng li hlokahalang bakeng sa monna ea molemo kapa mosali ea molemo. Likamano tsa botona le botšehali li sekamela ho pata liphapang tse tebileng tse hlahang hape kamorao ho lenyalo ’me li bake mathata. Ha ho makatse hore boithuto bo senola hore manyalong a 265 moo monyaluoa e neng e le moimana kamorao ho lilemo tse hlano ke ba manyalo a 15 feela ba neng ba ntse ba le hammoho! Boithuto bo bong bo etsoang ka lipatlisiso bo bontša hore haeba motho a kopanela likamanong tsa botona le botšehali pele ho lenyalo, o mocheng oa hore a febe joaloka ba bang. Kahoo lōna baena le likhaitseli ba bacha, le se ke la phoqoa ke “lipolelo tsa lefeela” tsa batho ba bolelang hore ho ba le likamano tsa botona le botšehali pele ho lenyalo ho fella ka lenyalo le thabileng haholoanyane. (Ba-Ef. 5:6) Ba bang ba bile ba bolela hore u tla hlanya ha u sa be le likamano tsa botona le botšehali ha u kene boroetsaneng kapa bohlankaneng. Ke leshano. Ha ho ho kula hoo lingaka li kileng tsa ho amahanya le bohloeki! Ka masoabi, batho ba bang ba iphileng sebaka sa litakatso ho e-na le lerato, ba ile ba ikoahlaela hona bophelo bohle ba bona!

11, 12. (a) Jehova o otlela boitšoaro bo bobe ba botona le botšehali joang? (b) Jobo o re’ng ka ba bontšang manganga ho Molimo? (c) Joale re tla inahana ka potso efe?

¹¹ Le ka mohla u se lebale hore “Morena [Jehova] ke mophetetsi oa ntho tsohle tse joalo [bofebe le litšila].” (1 Ba-Thess. 4:6) Kotlo ena e ka ’na ea e-ba letsoalo le molato, khalemelo ea baholo ba phutheho, kapa ho kotula liphello tsa seo u se jalileng. Koana, ha re baka, Jehova ka bolokolohi o-oa tšoarela ’me ka ho feletseng o koahela libe tsa rōna. Empa ba bang ba manganga ’me ba hana ho hlokomela melao ea Molimo. ‘Ke mang ea ka bang manganga ho [Molimo] a se ke a tsoa kotsi?’ ke Jobo ea ileng a botsa. (Jobo 9:4, NW) Lea mong! Ho utloisa Jehova bohloko ho bona “manganga” a joalo. Ho utloisa baholo ba amehang bohloko ba boneng bacha ba bangata ba rōna ba kena mahlomoleng a ho imeloa kelellong ho seng ho boletsoe. Balebeli bana ba hlokomela hore ha ho ea ka tlōlang melao ea Molimo le metheo ’me a se ‘ke a tsoa kotsi.’ Joalokaha mocha e mong ea ileng a bakela boitšoaro bo bobe ba hae a ile a bolella baholo ba phutheho ea habo. “Ke lakatsa eka nka bolella mocha e mong le e mong ea ’Neteng, ‘U se ke ua ho etsa!’ Jehova o tla u tšoarela liphoso tsa hao empa uena u ke ke [ua itšoarela]. Mehopolo e mebe e tla u ja. Ha ho molemo oa letho. Baholo ba ikopanya le Jehova ka thapeli: “Oho! hoja u ka lemoha litaelo tsa ka!—Esa. 48:18.

¹² Empa mocha oa Mokreste a ka latela melao ea Jehova joang ’me a qoba maraba a mangata le likotsi tse bolotsana tsa boitšoaro bo bobe ba botona le botšehali?

NEA BATSOALI PELO EA HAO

13. Bacha ba nang le batsoali ba barapeli ba ka sebelisa Liproverbia 23:26 joang, hona ka liphello life?

¹³ “Ngoan’aka, mphe pelo ea hao, mahlo a hao a khahloe ke tsela tsa ka.” (Liprov. 23:26) Boipiletso bona bo hloka ho fetang kutlo e tlang “hobane.” Mocha o lokela ho ba batsi le ho tšepa. Leha ho le joalo, joaloka mocha, u ka ’na ua ikutloa hore ntate oa hao oa Mokreste kapa ’Mè ho hang ha a utloisise boikutlo ba hao. Ngoanana e mong oa Mokreste ea neng a e-na le bothata ba ho pholla litho tsa botona le botšehali ho li khotsofatsa ’me a hloka thuso o ne a ikutloa ka tsela ena. A tšoenyeha ka hore a ka bua le ’mè oa hae joang. ’Mè oa hae o tla itšoara joang? Na o tla utloisisa? “Ka ba ka bua le eena ka hona, a mamela ’me a se ke a mpuisa hampe,” kamoo ho ileng ha bolela mocha. “A nkopa ka letsoho, a mpolella hore o-oa nthata ’me o batla ho nthusa hore ke hlōle bothata. Ra bua ka hona ka mokhoa o tobileng ’me ha re qetile a ntšoara ka matsoho ’me ra rapela hammoho. Ho tloha nakong eo nka bua le eena ka eng kapa eng.”

14. Bacha ba Bakreste ba lokela ho talima melao ea batsoali ba bona ba barapeli joang?

¹⁴ E, bacha ba fumane thuso e nakong ka ho itšeba le batsoali ba bona ba Bakreste. Ba ‘nyakallisoa’ ke litsela tsa batsoali ba bona ba barapeli ’me ba talima litaelo tsa bona le khalemelo e le ‘sefaha’ sa bohlokoa sa molala ho e-na le ‘ketane’ e hoashang e ba sitisang ‘nako e monate.’ (Liprov. 1:8, 9) Na kannete u-ua tšepahala ho batsoali ba hao? Kapa u tšoana le mocha e mong ea ileng a lumela: “Ha ke e-na le batsoali ba ka ke seo ba batlang ha ke le sona, empa ha ke le mong, joale ke ba seo ke batlang ho ba sona.” Ka ho atamella haufi le batsoali ba tšabang Molimo, u ka thuseha ho qoba tsieleho e ngata e sa hlokahaleng. Ba se nang batsoali ba Bakreste ba ka atamela Bakreste ba hōlileng tsebong—banna le basali—hammoho le baholo ka phuthehong. Batla thuso ea bona e tlang ka boithatelo.—Tite 2:3, 4; Jak. 5:14, 15.

PHELISA ’MELE JOALOKA MOHLANKA

15. Moapostola Pauluse o hlalosa tsela ea hae joang ho 1 Ba-Korinthe 9:27, ’me bacha ba ka itšoara ka tsela e joalo joang?

¹⁵ Moapostola Pauluse o itse: “Ke mpa ke laea ’mele oa ka, ke ithapisetsa oona [e seng oona o nthapise]; e se re mohlomong ha ke boleletse ba ba bang Evangeli, ’na ka fumanoa ke sa lokeloa ke ho amoheloa.” (1 Ba-Kor. 9:27) Pauluse a itšoara ka ‘thata.’ Kahoo, le uena, ho e-na le ho lumella litakatso tsa ’mele oa hao li buse, lebela maemo a tla tsosa boikutlo ba botona le botšehali ’me u a qobe ka morero. Ka mohlala, u tseba se tla etsahala ka litakatso tsa ’mele oa hau ha u bala libuka le ho shebella mananeo a TV le libaesekopo tse tlotlisang likamano tsa botona le botšehali. Kahoo, li qobe joaloka seso se kekang.’ Ho laetsana (moo ho amohelehang) ha u sa lokela lenyalo, mefuta eitseng ea litantši, mekete e se nang tsamaiso e hloekileng le moo batho ba ka ’nang ba iketsa lipara, kaofela li sebeletsa ‘ho tsosa takatso ea botona le botšehali.’ Kahoo li qobe ’me ‘le bolaee ke hona litho tsa lōna tse leng lefatšeng ke ho re, bofebe, le litšila, le maikutlo a mabe le litakatso tse mpe.’—Ba-Kol. 3:5.

16. Ke boitlhokomelo bofe boo Bakreste ba babeli ba laetsanang le ba lokisetsang ho nyalana ba lokelang ho bo nka?

¹⁶ Haholo ha ba babeli ba laetsana ’me ba lokisetsa ho nyalana, ke hona moo ho hlileng ho hlokahalang hore ba be seli ka maemo a bona. Ho ba bang ka koloing, ntlong e hiriloeng (mohlomong motho ea phelang hole le hae a le mong), kapa sebakeng se siretseng ka ntle lintho tsena li ka eka ba babeli hore ba atamelane haufi haholo. E mong ea lilemo li 17 o ile a re ka ho toba: “Mang le mang a ka re, ‘re tseba hore na re emise neng.’ Ke ’nete, motho a ka tseba hore na neng, empa ke ba bakae ba ka ho etsang? Ho molemo ho qoba boemo. Le be le ba bang.” E, molebeli a ka le nea matla a eketsehileng ho laola ka ho feletseng litakatso tsa botona le botšehali ’meleng ea lōna ha le le hammoho. Hape, “beang meeli” hore na le tla bontšana ho ratana ho fihlela kae. Tšoarellang ho eona.

17. Na ke habohlokoa ho alosa setsoalle sa rona? Hobane’ng?

¹⁷ Ha ’mele o laba-labela ho ba har’a ba boitšoaro bo hlephileng, u ‘laee’ hore u tlohe botsoalleng bo joalo. “Tsela ea hao u e fetise hole le eena [mosali ea boitšoaro bo bobe], u se ke ua atamela monyako oa ntlo ea hae,” kamoo ho khothalletsang Bibele. (Liprov. 5:8) Koana, ha ba le sekolong, bacha ba kene setsoalleng le batho ba bangata ba boitšoaro bo bobe. Empa na le itsoakanya le bona boithabisong? Ngoanana e mong ea lilemo li 18 o ile a bolela maikutlo a ba bangata ha a re: “Litloaelano tsa hao li na le tšusumetso e matla boitšoarong ba hao. Hoba u mamele moqoqo oa bona ka likamano tsa botona le botšehali, u tlaloa ke ho batla ho tseba. U ipotsa hore na likamano tsa botona le botšehali li hlile li Joang. Na li molemo joalokaha ba bolela? Kea tseba hore hona ke ’nete hobane ke hōlisa ngoana ke le mong ka baka la linnete tsona tsena.”—Liprov. 13:20.

18. Ha ba songoa ka baka la bohloeki ba bona, Mokreste e monyenyane o lokela ho nahana ka lipotso life?

¹⁸ Mangolo a bontša hore batho ba bang ba boitšoaro bo bobe ba ne ba tla kenella ka phuthehong ea Bokreste. Ka baka leo, lebela. Haeba u lumela hore ho na le bang ba mofuta ona, ba lebise ho baholo bakeng sa thuso ea moea. Kahoo u tla be u ba bontša hore ruri ua ba rata haesita mohlomong le ho sireletsa ba bang ba ka phuthehong. Ke ’nete, batho ba bang ba boitšoaro bo bobe ba lefatše ba ka u soma ka baka la boemo ba hao bo hloekileng. Empa, ak’u nahane! Na u tla lumella batho bao e leng “bahlanka ba ho bola”—e, bahlanka ba litakatso tsa bona—ba u etse hore u ikutloe u soabile! (2 Pet. 2:19) Ke mang ea matla haholo—mosali (kapa monna) ea boitšoaro bo hlephileng ea tla “phallela linyatsi tsa hae,” kapa moroetsana ea hloekileng ea ka buang tjee ka matla a hae a boitšoaro, “ke lerako”? (Sefela sa Lifela 8:10; bapisa Hosea 2:7) Ke ofe ho lōna ea ka lahleheloang ke boitlhompho habonolo le ho ‘nea ba bang bokhabane ba hae’?—Liprov. 5:9; Juda 4, 8-13.

19. (a) Ke mang ea ileng a ‘ithapisetsa ’mele’ joaloka mohlanka—bobeli bo hlalosoang ho Sefela sa Lifela, kapa Amnone? (b) Liphello ea e-ba life?

¹⁹ Ka ho laola ’mele oa hao, u o busa u tla tseba ho hetla morao ntle ho ho ikoahlaea. Nahana ka thabo ea Mosulame e monyenyane le moratuoa oa hae oa molisana ha ba qetella ba tlamahantsoe ka lenyalo. Ka thuso ea ba bang, le ka boiteko ba bona, ba hapa takatso ea ’mele ea bona ’me ba lula ba hloekile. Le hoja ba ile ba bua lipolelo tsa ho ratana, ha baa ka ba ba le boitšoaro bo bobe pele ba kena lenyalong, kahoo ba felisa nyakallo eo ba neng ba tla ba le eona hoba ba tloaelane lenyalong. Ba fapana hakaakang le Amnone ea busoang ke takatso ea neng a ke ke a ema le eo ‘ ’mele oa hae o neng o mo entse mohlanka’ ho kena boitšoarong bo bobe!—Sefela sa Lifela 2:16; 4:16; 5:1; 2 Sam. 13:1, 2, 10-16.

HAHA KAMANO EA HAO LE MOLIMO

20. (a) Ho ka etsahala joang ha motho a se na kamano ea botho le Molimo? (b) Ke eng e neng e haella ho batho ba boitšoaro bo bobe ba hlalosoang ke Pauluse ho Ba-Roma khaolo ea pele?

²⁰ “Ha ho mohla nkileng ka haha kamano ea botho le Jehova,” kamoo ho ileng ha ipolela ngoanana ea lilemo li 22 ea hōletseng lelapeng la Bokreste. “Molimo e ne se motho oa sebele ho ’na. Ke lumela hore ke ka baka leo ke sa kang ka tšoenyeha ha ke feba.” Boemo ba hae bo ne bo tšoana le ba batho ba boitšoaro bobobe ba hlalosoang ke Pauluse. Bana ‘ba ne ba tseba Molimo’; ba ‘tseba ka botlalo melao ea hae ea ho loka,’ empa ba haelloa ke “tsebo e nepahetseng”c (Ba-Roma 1:21, 28, 32) ‘Tsebo ena e tebileng le e atamelaneng haholo le botsoalle,’d tsebo ea botho, e ka beng e holisitsoe, e ne e haella. Na uena, joaloka mocha, u na le ‘tsebo e nepahetseng’ ee? Ho hlokahala hore u ithute Lentsoe la Molimo e le uena le ka mehla e le hore u ka ananela litšoaneleho tsa Molimo. Hopola kamoo ‘tsebo e nepahetseng’ joalo e ileng ea tiisa Bakreste ba pele. (Bona leqephe la 6.) Empa ho hlokahala ho fetang ho ithuta libuka.

21, 22. Ke eng se tla haha kamano e matla le ea botho le Molimo?

²¹ Lithapelo tse tlohang botebong ba pelo li haha ho atamelana le Molimo. Ngoanana e mong oa Mokreste, ea ileng a pitloa ke boitšoaro bo bobe empa a hlaphoheloa hamorao, o itse:

“Tsela feela ea ho boloka kamano eo ea botho ke ka thapelo, e seng lithapelo tse etsoang ka tloaelo empa tse phallang li tloha pelong. Ha ke bolella Jehova hore na ke ikutloa joang ’me re buisana ka mehla, ke hlokomela hore ke motho oa sebele, le hore o thahasella bophelo ba ka. Kamano ea ka le eena ke ntho ea bohlokoa haholo lefatšeng.”

²² Na lithapelo tsa hao li matla hakaalo? Na u sebetsa tumellanong le tsona? Hape, ka ho ‘sebetsa le Molimo,’ u kopanela mosebetsing oa ho bolela, lithahasello tsa hao le litlameho li tla tšoana le tsa Molimo. Hona ka tlhaho ho tla haha ho atamela haufi le Jehova. Hopola, ke uena feela ea ka hahang kamano ena e haufi ea botho le Molimo.—1 Ba-Kor. 3:9.

23. (a) Na ntoa ea ho loana le boitšoaro bo bobe e tla tsoela pele ka ho sa feleng? (b) Ke hobane’ng ha u lokela ho ithaopela ho iteka leha e le ka tsela efe ho khahlisa Jehova?

²³ Ke ’nete, khatello e ho ba banyenyane kajeno. Ho tšepahala ke ntoa ea letsatsi le leng le le leng. Leha ho le joalo, hang ha u fetile “palesa ea bocha,” ntoa e ka ba molemonyana. Le teng, ntoa e ke ke ea tsoela pele ka ho sa feleng. Haufi Satane, mosusumelletsi e moholo oa seoa sena sa boitšoaro bo bobe, o tla timetsoa. Taolong e ncha ea Molimo, e haufi hakana, ho tla ba le tikoloho ea ho loka e tla nolofatsa tsela ea rōna haholo. Nahana ka mahlohonolo a taolo eo e ncha, ruri lumellana le maikutlo a mosali e mong e monyenyane, ea itseng: “Ke nahana ka ntho e ’ngoe eo Jehova a nketselitseng eona le eo a ntšepisitseng eona. Ha ho mohla a kileng a ntšoetsa. O ntlhohonolofalitse ka litsela tse ngata haholo. Ke tseba hore o batla se molemo feela bakeng sa ka, ’me ke batla ho mo khahlisa. Bophelo bo sa feleng bo lokeloa ke boiteko leha e le bofe lebitsong la Jehova.”—Ba-Roma 16:20; 2 Pet. 3:13.

[Mongolo o botlaaseng ba leqephe]

Tlhahlobong, na u ka tseba ho arabela lipotso tsee?

◼ Thato ea Molimo ke efe ho Bakreste ka boitšoaro ba botona le botšehali?

◼ Ke hobane’ng ha “litšila” tsa botona le botšehali li le kotsi ho ba babeli ba sa nyalanang?

◼ Bacha ba Bakreste ba lokela ho talima thuto e theiloeng Bibeleng e fanoang ke batsoali ba bona ba barapeli joang?

◼ Bakreste ba babeli ba lokisetsang ho nyalana ba lokela ho itlhokomela joang?

◼ Kamano e matla ea botho le Jehova Molimo e ka hōlisoa joang?

[Setšoantšo se leqepheng la 10]

Boitšoaro bo bobe bo kotsi hobane bo senya letsoalo le letle le tlhomphano

BOITŠOARO BO BOBE

TLHOMPHOLLANO

[Setšoantšo se leqepheng la 13]

Kamano ea botho le Molimo, e ntlafalitsoeng ka thapelo, ke tšireletso