Ungakhombisa Njani Kutsi Uyabonga Ngenhlawulo?

1-2. Inhlawulo yaJesu kufanele isente kutsi senteni, futsi ngasiphi sizatfu? (2 KubaseKhorinte 5:14, 15) (Buka nesitfombe.)

ASE SITSI lotsite ukusitile ngesikhatsi ubambeke esakhiweni lesidzilikile, bewungeke yini utive umkweleta lomuntfu ngenca yekutsi usindzise kuphila kwakho? Ngisho nobe nalabanye basitwe ngendlela lefanako, bewungafuna kutibongela wena kuze ukhombise kutsi awulutsatseli phansi lusito lolutfolile.

² Njengobe sihloko lesendlulile sichazile, angeke sikhone kutikhulula emiphumeleni yesono lesasitfola njengelifa. Nanobe kunjalo, inhlawulo yaJesu ingasikhulula ngekutsi (1) sicolelwe tono tetfu, (2) sibe nelitsemba lekuphindze sibe bete sono, futsi (3) sibuyisane naNkulunkulu. Ngenca yaloko, sinelitsemba lekuphila phakadze eveni lelisha laJehova. Ngako kusebaleni kutsi inhlawulo iveta lutsandvo Jesu lanalo ngebantfu, lokulutsandvo lebekanalo ngisho nangaphambi kwekutsi abe ngumuntfu lote sono. (Taga 8:30, 31) Umphostoli Pawula wabhala kutsi “lutsandvo Khristu lanalo luyasichuba.” (Fundza 2 KubaseKhorinte 5:14, 15.) Loku kusho kutsi kufanele sikhombise kutsi siyabonga ngelutsandvo lwaJesu, futsi sikhombise kutsi asiyibukeli phansi inhlawulo yakhe.

3. Yini leyenta ingafani indlela umuntfu ngamunye lakhombisa ngayo kutsi uyabonga ngenhlawulo?

³ Ungakhombisa njani kutsi wena uyabonga ngenhlawulo? Imphendvulo yakho ingahle yehluke kuneyalabanye. Kuze sibekise kutsi sisho ngani, cabanga ngebantfu labatsatfu labafuna kuya endzaweni lefanako kepha labasuka emadolobheni langafani. Batawuhamba ngetindlela letingafani. Ngendlela lefanako, indlela lekuyisa lapho uya khona, nobe kuze ufinyelele umgomo wekukhombisa kutsi uyabonga ngenhlawulo itawuya ngekutsi umephi nyalo ebuhlotjeni bakho naJehova. Unaloko engcondvweni, lesihloko sitawucoca ngemacembu lamatsatfu ebantfu: (1) bafundzi beliBhayibheli, (2) emaKhristu labhajatisiwe, kanye (3) netimvu letidukelene nemhlambi.

BAFUNDZI BELIBHAYIBHELI

4. Jehova ukhombisa njani kutsi uyabanaka bafundzi beliBhayibheli?

⁴ Nangabe udadisha liBhayibheli, cabanga nganaku: Lokutsi uyafuna kufundza ngaJehova nangetimfundziso teliBhayibheli kukhombisa kutsi usemkhatsini walabo Jehova lafuna babe bangani bakhe. (Joh. 6:44; Imis. 13:48) “Tinhlitiyo tebantfu . . . tihlolisiswa nguJehova.” Loku kusho kutsi Jehova uyayinaka imetamo loyentako kuze ufundze ngaye, futsi uyajabula nakakubona utfutfuka njengobe wenta lushintjo kuze uphile ngetimiso takhe. (Taga 17:3; 27:11) Inhlawulo ikuvulela litfuba lekutsi ube nebuhlobo lobuhle naJehova. (Rom. 5:10, 11) Ungacali ukutsatsele phansi loko.

5. Bafundzi beliBhayibheli bangasisebentisa njani seluleko lesiKubaseFiliphi 3:16?

⁵ Njengobe ungumfundzi weliBhayibheli, yini longayenta kuze ukhombise kutsi uyabonga ngenhlawulo? Lokunye longakwenta kulalela seluleko semphostoli Pawula lesiya kubaseFiliphi lesitsi: “Ngelizinga lesesitfutfuke ngalo, asichubekeleni embili ngendlela lefanako.” (Fil. 3:16) Lelinye lihumusho leliBhayibheli lilibeka kanjena lelivesi: “Asichubekeni sihamba ngendlela lesihamba ngayo nyalo.” Ngekuvumelana naleseluleko, ungavumeli lutfo lukuvimbe njengobe uhamba ngalendlela leya ekuphileni.​—Mat. 7:14; Luk. 9:62.

6. Yini bafundzi beliBhayibheli labangayenta nangabe bakutfola kumatima kwenta lushintjo? (Dutheronomi 30:11-14) (Buka nesitfombe.)

⁶ Yini longayenta nangabe ukutfola kumatima kwemukela imfundziso leseBhayibhelini losandza kuyifundza? Cwaninga ngayo futsi uthantaze kuze uyicondze kancono. (Hla. 86:11) Nangabe ukutfola kumatima kucondza lemfundziso, yibeke eceleni kwanyalo, kodvwa ungayekeli kudadisha liBhayibheli. Yini longayenta nangabe ukutfola kumatima kuyekela umkhuba lawenyanyako Jehova? Khumbula kutsi Jehova akayuze acele bantfu labanesono kutsi bente intfo labangeke bakhone kuyenta. Ungakhona kuphila ngetimiso takhe. (Fundza Dutheronomi 30:11-14.) Ngetulu kwaloko, wetsembisa kukusita. (Isa. 41:10, 13; 1 Khor. 10:13) Ngako ungapheli emandla. Kunekutsi unake lenkinga lobhekene nayo, naka kakhulu indlela longakhombisa ngayo kutsi ubonga kakhulu ngako konkhe Jehova lakwentele kona, lokufaka ekhatsi inhlawulo. Njengobe ikhula indlela lomtsandza ngayo Jehova, utawutfola kutsi “imiyalo yakhe ayisiwo umtfwalo.”​—1 Joh. 5:3.a

7. Yini bantfu labasha labakhulela ecinisweni labangacabanga ngayo?

⁷ Kutsiwani ngani nine labasha lenikhulela ecinisweni? Nani nibafundzi beliBhayibheli. Ecinisweni, nibafundzi beliBhayibheli lababaluleke kakhulu kubatali benu. LiBhayibheli litsi: “Sondzelani kuNkulunkulu, naye utawusondzela kini.” (Jak. 4:8; 1 Khr. 28:9) Nangabe wena utsatsa sinyatselo kucala sekusondzela kuJehova, naye ubese usondzela kuwe. Jehova akakunaki nje ngenca yekutsi ukhulela emndenini waboFakazi. Udvonsa umuntfu ngamunye, lokufaka ekhatsi umuntfu ngamunye lokhulela ecinisweni. Yini Jehova layentile kuze wena ukhone kuba nebungani naye? Ukunikete inhlawulo, lokuyintfo lokungakafaneli uyitsatsele phansi. (Rom. 5:1, 2) Ngako ngaphambi kwekutsi uye eSikhumbutweni salomnyaka, kungaba njani ucabangisise ngekutsi kusho kutsini kuwe kufa kwaJesu? Shengatsi kucabanga ngaloko kungakusita kutsi ufinyelele umgomo lotawutibekela wona ekukhonteni Nkulunkulu, ngisho nobe kungaba ngumuphi, kuze ukhombise kutsi uyabonga ngenhlawulo Jehova lakunikete yona asebentisa iNdvodzana yakhe.b

EMAKHRISTU LABHAJATISIWE

8. EmaKhristu labhajatisiwe akhombise njani kutsi anekukholwa enhlawulweni?

⁸ Nangabe ungumKhristu lobhajatisiwe, sewuvele ukhombise ngetindlela letinyenti kutsi unekukholwa enhlawulweni. Sibonelo nje, wente lokutsite kuze usondzelane naJehova futsi uphile ngekuvumelana netimiso takhe. Uwulalele umyalo waJesu wekwenta bafundzi ngekutsi ucocele labanye ngekukholwa kwakho. Utinikele kuJehova futsi wabhajatiswa. Ukile yini waphikiswa ngenca yekutsi umelele kukhonta kweliciniso? (2 Thim. 3:12) Kucinisela kwakho kukhombisa kutsi uyamtsandza Jehova futsi uyabonga ngenhlawulo lakunikete yona asebentisa iNdvodzana yakhe.​—Heb. 12:2, 3.

9. Nguyiphi ingoti emaKhristu labhajatisiwe lokufanale ayicaphele?

⁹ Njengobe singemaKhristu labhajatisiwe, kunengoti lokufanele siyicaphele. Njengobe sikhatsi sichubeka, singacala kuyitsatsela phansi inhlawulo. Kungenteka njani loko? Cabanga ngemaKhristu ekucala ase-Efesu. Jesu lovusiwe wawancoma ngekucinisela kwawo. Nobe kunjalo, wawatjela watsi: “Naku lokungangijabulisi ngawe, kutsi sewute lutsandvo lobewunalo ekucaleni.” (Semb. 2:3, 4) Loko Jesu lakusho kukhombisa kutsi umKhristu angacala kwenta tintfo letiphatselene nekukhonta Nkulunkulu ngekwetayela. Umuntfu lowenta njalo angahle athantaze, aye emihlanganweni yelibandla futsi ente umsebenti wekushumayela kodvwa loko angakwenti ngalokusuka enhlitiyweni. Letintfo akasatenti ngenca yelutsandvo. Yini longayenta nangabe uva shengatsi lutsandvo lonalo ngaJehova alusafani nalolu bewunalo ekucaleni?

10. Yini longayenta kuze ‘ucabangisise’ futsi ‘utinikele’ nawenta imisebenti yebuKhristu? (1 KuThimothi 4:13, 15)

¹⁰ Umphostoli Pawula watjela Thimothi kutsi ‘acabangisise’ futsi ‘atinikele’ emisebentini yebuKhristu. (Fundza 1 KuThimothi 4:13, 15.) Ngekuvumelana naleseluleko, yetama kucabanga ngetindlela longachubeka ngato ‘uvutsa emoyeni.’ (Rom. 12:11) Sibonelo nje, mhlawumbe ungatfutfukisa indlela lolalela ngayo emihlanganweni yelibandla ngekutsi ulungiselele kahle. Nobe ungetama kutfola indzawo lekahle lapho khona ungaba wedvwa nawutidadishela liBhayibheli kuze ukhone kucabangisisa ngaloko lokufundzako. Njengobe nje ungangeta tinkhuni kuze ugcine umlilo uvutsa, ungatimisela nawenta letintfo kuze uhlale ubonga ngako konkhe Jehova lakwentele kona, lokufaka ekhatsi kukunika inhlawulo. Ngetulu kwaloko, kungaba njani kutsi kulamaviki langaphambi kweSikhumbuto ucabangisise ngaletibusiso letikhetsekile lesinato tsine BoFakazi BaJehova? Siyaciniseka kutsi loko kutakwenta ubonge kakhulu ngenhlawulo, leyenta ube nebuhlobo lobuhle naJehova.

11-12. Kuphelelwa ngumdlandla sikhashana kusho kutsi sewute yini umoya waNkulunkulu? Chaza. (Buka nesitfombe.)

¹¹ Nangabe sekuphele sikhatsi solo ute umdlandla lofise kuba nawo ekukhonteni Nkulunkulu, ungadvumateki nobe ucabange kutsi sewute umoya waNkulunkulu. Khumbula loko Pawula lakubhalela baseKhorinte mayelana nemsebenti wakhe wekushumayela, watsi: “Ngisho nobe ngiwenta ngingatsandzi, kufanele ngiwente ngobe ngiphatsisiwe.” (1 Khor. 9:17) Bekasho kutsini?

¹² Pawula bekahle aba bete sifiso sekushumayela. Nobe kunjalo, bekatimisele kuchubeka ashumayela ngisho nobe bekativa njani ngaleso sikhatsi. Nawe ungatimisela kwenta lokufanako. Timisele kwenta lokulungile ngisho nobe ute sifiso. Ngako thantazela “sifiso nemandla ekwenta intsandvo [yaNkulunkulu].” (Fil. 2:13) Chubeka wenta tintfo letitakusita kutsi uhlale usondzelene naJehova. Ciniseka kutsi ngekuhamba kwesikhatsi, loko lokwentako kutayitsintsa indlela lotiva ngayo futsi utawuvusetela lutsandvo lolukhona enhlitiyweni yakho.

13. Singachubeka njani sitihlola kutsi ‘sisekukholweni yini’?

¹³ Senta kahle ngekuhle sitihlola sisebentisa seluleko lesiku-2 KubaseKhorinte 13:5 lesitsi: “Chubekani nitihlola kutsi nisekukholweni yini; chubekani nihlola loko nine leningiko.” Kufanele sihle sitibuta imibuto lenjengaletsi: ‘Ngitibeka kucala yini ekuphileni kwami tintfo letiphatselene neMbuso?’ (Mat. 6:33) ‘Loko lengikhetsa kutijabulisa ngako kuyakhombisa yini kutsi ngiyakwenyanya lokubi?’ (Hla. 97:10) ‘Ngikhutsata kuthula nebunye yini kubazalwane bami nabodzadze?’ (Ef. 4:2, 3) Sikhumbuto, lokusikhatsi lapho khona sicabangisisa ngenhlawulo Jehova lasiphe yona, sisiniketa litfuba lekutihlola kutsi siphilela Khristu yini hhayi tsine.c

TIMVU LETIDUKILE

14. Yini lengenta lamanye emaKhristu adukelane nemhlambi?

¹⁴ Lamanye emaKhristu ayekele kutihlanganisa nelibandla ngemuva kwetinyanga nobe ngisho nangemuva kweminyaka akhonta Jehova ngekwetsembeka. Ngasiphi sizatfu? Lamanye acindzetelwe ‘tinkhatsato tekuphila.’ (Luk. 21:34) Lamanye akhutjwa nguloko lokwashiwo ngumzalwane nobe dzadze nobe loko lakwenta. (Jak. 3:2) Kantsi lamanye ente tono letinkhulu futsi anemahloni ekucela lusito. Kunobe ngukuphi, yini longayenta nangabe udukelene nemhlambi? Lesipho lesihle lesiyinhlawulo sikukhutsata kutsi wenteni?

15. Jehova ukhombisa njani kutsi unendzaba netimvu letidukelene nemhlambi? (Hezekeli 34:11, 12, 16)

¹⁵ Cabanga ngendlela Jehova lativa ngayo ngalabo labadukelene nemhlambi. Akabalahli. Kunaloko, uyatifuna timvu letilahlekile. Uyatondla futsi atisite tibuyele kuye. (Fundza Hezekeli 34:11, 12, 16.) Kungenteka yini kutsi Jehova wenta lokufanako nakuwe? Yebo! Lokutsi nje ufundza lomagazini kukhombisa kutsi uyafuna kwenta lokulungile. Njengobe nje Jehova ayibona inhlitiyo yakho futsi wakudvonsela ecinisweni, kungenteka yini kutsi nanyalo uyakudvonsa kuze uphindze ubuyele kuye?

16. Yini lengasita timvu letilahlekile kutsi tibuyele kuJehova? (Buka nesitfombe.)

¹⁶ Incwajana letsi Buyela KuJehova inemavi lakhutsatako latsi: “Ungangabati kutsi Jehova utakusekela njengoba ubuyela kuye. Utakusita kutsi ulwisane nekukhatsateka, wendlulise tintfo letikuvise buhlungu futsi utfole kuthula engcondvweni nasenhlitiyweni yakho lokubangelwa kuba nanembeza lote licala. Kungenteka loko kutakukhutsata kutsi ubuyele ukhonte Jehova kanye nalabanye labamkhontako.” Khumbula nekutsi labadzala belibandla bafuna mbamba kukusita. Bangakhombisa kutsi ‘batawuba njengendzawo yekukhosela nakunemoya, indzawo yekukhosela nakunemvula lenesiphepho.’ (Isa. 32:2) Kuze ukhombise kutsi uyabonga ngenhlawulo, tibute: “Yini lengingayenta nyalo kuze ‘ngilungise tindzaba’ naJehova?” (Isa. 1:18; 1 Phet. 2:25) Sibonelo nje, ungaya yini emihlanganweni yelibandla eHholweni leMbuso? Ungakhuluma yini nalomunye lomdzala welibandla umtjele kutsi ufuna kubuyela kuJehova? Angahle acele lotsite kutsi adadishe nawe liBhayibheli kwesikhashana. Ungaciniseka kutsi Jehova utayibusisa imetamo yakho loyenta ngemuva kwekuthantaza kuze ukhombise kutsi uyabonga ngenhlawulo yeNdvodzana yakhe.

YINI LOTAWUYENTA?

17-18. Singasisebentisa njani kahle sikhatsi setfu ngaphambi kweSikhumbuto salomnyaka?

¹⁷ Jesu watsi inhlawulo yaba khona “kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Joh. 3:16) Inhlawulo iyindlela Jehova layisebentisako kuze asikhulule emiphumeleni yesono nasekufeni. Kute kitsi lokufanele ayibukele phansi. (Rom. 3:23, 24; 2 Khor. 6:1) Emalanga langaphambi kweSikhumbuto asiniketa litfuba lekutsi sicabangisise ngelutsandvo Jehova naJesu labasikhombisa lona, futsi lolutsandvo kufanele lusente sibonge.

¹⁸ Inhlawulo itawukwenta kutsi wenteni? Kungenteka imphendvulo yakho itawehluka kuneyalomunye. Kodvwa ciniseka kutsi Jehova utayibusisa imetamo yakho kanye nemetamo yebazalwane bakho nabodzadze labanyenti emhlabeni wonkhe ‘labangasatiphileli bona, kodvwa labaphilela loyo lowabafela.’​—2 Khor. 5:15.