Khuluma Emavi Lanemusa Nangesikhatsi Lesikahle Nawufundzisa Liciniso

1. Yini lokufanele siyente kuze sibe yincenye yemndeni waJehova?

NASICALA kuhlangana nemuntfu lokhonta Jehova, lomunye wemibuto lesivamise kuwubuta ngulotsi: “Walitfola njani liciniso?” Labanye baphendvula lombuto ngekutsi batsi “bakhulele ecinisweni.” Labanye bangahle bawuphendvule ngekutsi batsi “basandza kulitfola liciniso.” Siphendvula ngaleyondlela ngobe liciniso leliseVini laNkulunkulu liyayitsintsa indlela lesiphila ngayo. Ngasiphi sizatfu? Ngobe siyati kutsi kuphela kwendlela lesingaba ngayo yincenye yemndeni waJehova kutsi sikhombise kutsi siyalitsandza liciniso futsi siphile ngalo. Loko kufaka ekhatsi kwetsembeka ngalesikushoko nalesikwentako.​—Hla. 15:1-3.

2. (a) Bantfu bebamati njengemuntfu lonjani Jesu? (b) Yini bantfu labebatawuyenta nabeva emaciniso lafundziswa nguJesu?

² Jesu bekahlale akhuluma liciniso. Titsa takhe tavuma kutsi bekakhuluma liciniso, ngisho nobe betihle tingakutsandzi loko bekakusho. (Mat. 22:16) Jesu watjela balandzeli bakhe indlela bantfu lebebatawenta ngayo nabeva emaciniso lebekawafundzisa, watsi: “Ngitele kutewuhlukanisa: Indvodzana imelane nababe wayo, indvodzakati imelane namake wayo, makoti amelane namaketala.” (Mat. 10:35) Jesu bekafuna kutsi bantfu bawemukele umlayeto wakhe naloyo lebewushunyayelwa balandzeli bakhe, kodvwa bekati kutsi loko bekungeke kuhlale kwenteka. (Mat. 23:37) Bekati kutsi umlayeto wakhe bewutawehlukanisa bantfu babe ngemacembu lamabili​—kube ngulabo labatsandza liciniso leliseBhayibhelini nalabo labangalitsandzi.​—2 Thes. 2:9-11.

3. Sitawucoca ngani kulesihloko?

³ NjengaJesu, setama kwetsembeka, ngekutsi sikhulume liciniso ngaso sonkhe sikhatsi, ngisho nobe kwenta njalo kutawenta singatsandvwa ngulabanye. Ngetulu kwaloko, sishumayela futsi sifundzise liciniso leliseBhayibhelini, ngisho nobe labanye bantfu bangahle batfukutseliswe nguloko lesikushoko. Loko kusho kutsi ngeke sisayinaka yini indlela lesikhuluma ngayo liciniso nekutsi silikhuluma nini? Cha! Kulesihloko, sitawucale siphendvule nangu umbuto lobalulekile: Singalitfola kuphi liciniso? Sitawubese siphendvula lomunye umbuto lotsi: Ngusiphi sizatfu lesenta sikhulume liciniso, silikhuluma njani futsi nini? Timphendvulo talemibuto titasisita sitfutfukise likhono letfu lekukhuluma liciniso ngendlela lenemusa, lokusho kulikhuluma ngekuhlakanipha nangesikhatsi lesikahle.

SINGALITFOLA KUPHI LICINISO?

4. Yini lengasenta sitsi Jehova unguMtfombo weliciniso?

⁴ Jehova unguMtfombo weliciniso. Konkhe lakushoko kuliciniso. Sibonelo nje, konkhe lasitjela kona mayelana nalokulungile nalokungakalungi kuliciniso. (Hla. 19:9; 119:142, 151) Konkhe lakukhulumile mayelana nelikusasa kwentekile. (Isa. 55:10, 11) Akwenteki ephule setsembiso. (Num. 23:19) Ecinisweni, ngeke kwenteke kutsi Jehova acambe emanga! (Heb. 6:18) Kube kufanele, ngobe Jehova watiwa ngekutsi ‘unguNkulunkulu weliciniso.’​—Hla. 31:5.

5. Yini lesenta sitsi akusilukhuni kutfola “Nkulunkulu weliciniso”? Chaza. (Imisebenti 17:27)

⁵ Ngisho nobe labanye bantfu bangatsini, akusilukhuni kutfola Jehova ‘longuNkulunkulu weliciniso.’ Bufakazi bekutsi ukhona bugcwele yonkhe indzawo. (Rom. 1:20) Ngesikhatsi umphostoli Pawula akhuluma nemaGriki lafundzile ase-Athene, wawatjela kutsi Nkulunkulu ufuna kutsi ‘simtfole’ futsi ‘akekho khashane kuloyo naloyo kitsi.’ (Fundza Imisebenti 17:27.) Ecinisweni, Jehova ubadvonsela kuye bantfu labatfobekile labafuna liciniso.​—Joh. 6:44.

6. Ngumaphi lamanye emaciniso laseBhayibhelini, futsi yini lekwenta ubonge ngekuwati?

⁶ Lenye yetindlela lesingamtfola ngayo Jehova kutsi sidadishe liBhayibheli. Emadvodza labhala lencwadzi bekaphefumulelwe ngumoya longcwele waNkulunkulu. (2 Phet. 1:20, 21) Ngako konkhe lokuseBhayibhelini kuliciniso, futsi singakwetsemba. Sibonelo nje, singakwetsemba loko lelikushoko mayelana nekutsi yonkhe indalo kanye nekuphila emhlabeni kwacala njani. (Gen. 1:1, 26) Singakwetsemba loko lelikushoko mayelana nekutsi yini leyenta sone nekutsi yini leyenta kube nekuhlupheka lokungaka kanye nekufa. (Rom. 5:12; 6:23) Singaletsemba ngalokuphelele nalitsi Jehova utawucedza wonkhe umonakalo lobangelwe nguSathane, ‘longubabe wemanga,’ asebentisa iNdvodzana yakhe. (Joh. 8:44; Rom. 16:20) Ngetulu kwaloko, singasetsemba setsembiso seliBhayibheli sekutsi Jesu utawubhubhisa lababi, avuse labafile, abuyisele umhlaba ube sesimeni sawo sakucala, futsi asisite siphindze sibe bete sono. (Joh. 11:25, 26; 1 Joh. 3:8) Jehova usinikete litfuba lelimangalisa kakhulu! Usifundzise liciniso futsi wasinika nelitfuba lekulifundzisa labanye.​—Mat. 28:19, 20.

YINI LEYENTA SIKHULUME LICINISO?

7-8. Kunendzaba yini kutsi yini leyenta sikhulume liciniso? Shano sibonelo. (Makho 3:11, 12) (Buka netitfombe.)

⁷ Njengobe kuke kwavetwa, kufanele sikhulume liciniso nangabe sifuna kuba yincenye yemndeni waJehova. Nanobe kunjalo, kuze simjabulise, kufanele sente lokungetulu nje kwekukhuluma liciniso. Sizatfu lesenta sikhulume liciniso sibalulekile kuJehova. Cabanga ngaloko lokwenteka ngesikhatsi Jesu ashumayela lamhlabeni. (Fundza Makho 3:11, 12.) Ngesikhatsi ashumayela ngaseLwandle LwaseGalile, sicumbi lesikhulu sebantfu seta kuye. Emkhatsini wabo bekunalabo lebebanemadimoni futsi baguca embikwaJesu bamemeta batsi: “Wena uyiNdvodzana yaNkulunkulu.” Yini leyenta lamadimoni akhuluma liciniso ngaJesu? Kungenteka umgomo wawo bewukutsi bekafuna kwenta labantfu labawalalele bawetsembe futsi ngemuva kwaloko abente bangamkhonti Jehova. Lamadimoni acale akhuluma liciniso, kodvwa tizatfu tawo tekwenta loku betinebugovu. Jesu bekatati tizatfu tawo tekwenta loko, futsi awazange amjabulise. Ecinisweni, wawatjela kutsi angashumayeli ngaye.

⁸ Yini lesingayifundza kulendzaba? Jehova unendzaba nekutsi siyini sizatfu lesenta sikhulume liciniso. Ngako kubaluleke kakhulu kutsi sizatfu setfu sekufundzisa liciniso sibe sihle, futsi nobe nguluphi ludvumo lesilutfolako siluyise kuJehova hhayi kitsi!​—Mat. 5:16; catsanisa neMisebenti 14:12-15.

9. Yini lokufanele singayenti, futsi ngasiphi sizatfu?

⁹ Cabanga nganasi lesinye simo lakufanele sikugweme khona kutifunela ludvumo. Asesitsi umzalwane lowenta imisebenti letsite enhlanganweni usitjela intfo leyimfihlo futsi tsine sibese siyitjela labanye. Nangabe labo labasivile batfola kutsi loko lesibatjele kona kuliciniso, kungahle kubajabulise loko futsi bangahle bacabange kutsi kunalokunye lokunyenti lokuyimfihlo lesikwatiko. Loku kungahle kushintje indlela labasibuka ngayo, bacabange kutsi sibalulekile, kodvwa Nkulunkulu angeke kumjabulise loko. (Taga 11:13) Ngasiphi sizatfu? Ngobe asikagcini nje ngekukhuluma intfo leyimfihlo, kodvwa nesizatfu setfu sekukhuluma leliciniso besisibi.

INDLELA YEKUKHULUMA LICINISO

10. Kusho kutsini kukhuluma emavi ‘lanemusa’? (KubaseKholose 4:6)

¹⁰ Fundza KubaseKholose 4:6. Umphostoli Pawula wakhumbuta emaKhristu lebekahlala eKholose kutsi ‘ngaso sonkhe sikhatsi emavi lawakhulumako kufanele abe nemusa.’ Kusho kutsini loko? Ngelulwimi lwekucala, lamavi anemcondvo wekutsi loko lesikukhulumako akukafaneli nje kugcine ngekubasita labo labalalele kodvwa kufanele kube nemusa futsi kube mnandzi.

11-12. Kubaluleke ngani kutsi sinake nasifundzisa liciniso? Fanekisa. (Buka netitfombe.)

¹¹ Kufanele sisisebentise seluleko saPawula sekukhuluma emavi lanemusa nasifundzisa labanye liciniso. LiBhayibheli lifananisa liciniso lelikulo nenkemba lekhaliphako lengehlukanisa umphefumulo nemoya. Ngalamanye emavi, lingaveta indlela lesitiva ngayo kanye netizatfu letenta sente lokutsite. (Heb. 4:12) Kodvwa nangabe singalisebentisi ngelikhono liBhayibheli, singatfukutselisa labanye bantfu ngalokungenasidzingo nobe sisuse imphikiswano. Kungenteka njani loko?

¹² Cabanga nganasi simo. Asesitsi nasishumayela, sihlangana nalenye indvodza levame kuthantaza etitfombeni futsi iyakutsandza kugubha Khisimusi nema-Easter ikanye nemndeni wayo. Sisebentisa liBhayibheli, singayikhombisa kutsi kubulima kangakanani kuthantaza etitfombeni letingaphili, futsi siyikhombise kutsi Khisimusi nema-Easter yimikhosi legujwa bantfu labangamkhonti Nkulunkulu. (Isa. 44:14-20; 2 Khor. 6:14-17) Nangabe loko sikwenta nasicala nje kuyibona, sitawube sikhuluma liciniso, kodvwa sitawube singalisebentisi ngelikhono liVi laNkulunkulu.

13. Emavi etfu singawavanga njani ngeluswayi?

¹³ Pawula waphindze watsi kufanele sikuvange ngeluswayi loko lesikushoko. Bekangasho kutsi kufanele silembatsise liciniso nobe silifihle. Kunaloko, bekasikhutsata kutsi sisebentise emavi ‘lavangiwe,’ kuze sikhulume liciniso ngendlela labatayitsandza labo labasilalele. (Jobe 12:11) Kwenta njalo kungahle kube matima. Nasicabanga ngekudla, singahle sicabange kutsi loko lokuvakala kumnandzi kitsi kutawuvakala kumnandzi nakulabanye. Ngendlela lefanako, singahle sicabange kutsi indlela lesikhuluma ngayo batayitsandza nalabanye. Kodvwa loko akusilo liciniso. Sibonelo nje, labanye bantfu bakulamanye emasiko bangahle bacondze ngco endzabeni nabaveta umbono wabo, ngisho nalapho bakhuluma nemuntfu lomdzala kunabo. Kungenteka bantfu bakulamanye emasiko batfole lendlela yekukhuluma ingemukeleki, futsi ize ibaphatse kabi. Pawula watsi kufanele siyati “indlela yekuphendvula umuntfu ngamunye.” Loku kusho kutsi kufanele siyishintje indlela lesikhuluma ngayo, hhayi nje kuze ivumelane nendlela tsine lesitsandza kukhuluma ngayo nobe emasiko etfu, kodvwa kuye ngekutsi yini langayitsandza lona losilalele.

KUKUNINI LAKUFANELE UKHULUME KHONA LICINISO?

14. Ngesikhatsi Jesu alamhlabeni, wabafundzisa konkhe lebekakwati yini bafundzi bakhe? Chaza.

¹⁴ Jesu bekahlale akhuluma emavi lanemusa kubalandzeli bakhe, futsi ngemusa wabafundzisa tintfo letinyenti. (Mak. 6:34) Kodvwa bekusenalokunyenti kakhulu lebekusafanele bakufundze. Jesu akazange etame kubafundzisa konkhe lebekakwati. Bekabacabangela. Bekati kutsi bekungasiso sikhatsi lesikahle sekutsi bafundze lamanye emaciniso. Ecinisweni, washo kutsi angeke bakhone kuwacondza lamaciniso. (Joh. 16:12) Kusifundzisani loku?

15. Umfundzi kufanele simfundzise konkhe yini lesikwatiko ngasikhatsi sinye? Chaza. (Taga 25:11) (Buka nesitfombe.)

¹⁵ Sibonelo saJesu sikhombisa kutsi kwati liciniso akusho kutsi kufanele sifundzise bantfu konkhe lesikwatiko ngasikhatsi sinye. Singasilingisa njani sibonelo sakhe? Kufanele sibacabangele bantfu. Phindze ucabange ngalendvodza letsandza kugubha Khisimusi nema-Easter nemndeni wayo. Siyati kutsi lemikhosi yacalwa bantfu labangamkhonti Nkulunkulu futsi akayemukeli. Kodvwa asesitsi ucala kudadisha liBhayibheli nalendvodza kusasele liviki linye nobe lamabili kube nguKhisimusi. Sitawube sikhuluma emavi lanemusa yini nasimkhombisa loko liBhayibheli lelikushoko ngemikhosi yebantfu labangamkhonti Nkulunkulu, futsi silindzele kutsi ayekele kugubha Khisimusi ngaleso sikhatsi? Kuliciniso kutsi labanye lesidadisha nabo liBhayibheli bayashesha kukusebentisa loko labakufundza eBhayibhelini. Kodvwa kulabanye kutsatsa sikhatsi kutsi bashintje indlela labacabanga ngayo nalabenta ngayo. Singamsita umfundzi kutsi atfutfuke ngekutsi simtjele loko ladzinga kukwati nangesikhatsi ladzinga kukwati ngaso, lokusikhatsi latawukhona ngaso kukucondza.​—Fundza Taga 25:11.

16. Singabasita njani labo lesidadisha nabo liBhayibheli kutsi ‘bachubeke bahamba ecinisweni’?

¹⁶ Timbalwa tintfo letisijabulisa kakhulu kwendlula kusita labanye bafundze liciniso ngaJehova. Singabasita kutsi ‘bachubeke bahamba ecinisweni’ ngekutsi sichubeke sibabekela sibonelo lesihle. (3 Joh. 3, 4) Ciniseka kutsi indlela lophila ngayo iyakhombisa kutsi uyatetsemba tetsembiso letiseVini laNkulunkulu. Khuluma liciniso ube unetizatfu letinhle tekwenta njalo. Khuluma emavi lanemusa, lamnandzi nangesikhatsi lesikahle nawufundzisa liciniso. Lonkhe ludvumo lolutfolako lumikise kuJehova. Nawenta njalo, utawukhombisa kutsi ukhonta Jehova, longuNkulunkulu weliciniso.