Kusho Ini Kuba NgumKhristu?​—Litsini LiBhayibheli?

Lamuhla, bantfu labanyenti emhlabeni wonkhe batibita ngekutsi bangemaKhristu, kodvwa babe benta tintfo letimbi kulabanye. Labanye baticabangela bona, abaketsembeki futsi bete umusa. Labanye abaketsembeki kulabo labashade nabo. Indlela labatiphatsa ngayo yenta labanye batibute kutsi, ‘kusho ini kantsi vele kuba ngumKhristu?’

Loko lokushiwo kuba ngumKhristu

Kumelula ngemuntfu kutsi atsi ungumKhristu, kodvwa kunyenti lokufanele sikubuke ngobe kusho ngemlomo nje akukeneli. Ngekusho kweliBhayibheli, umKhristu ngumuntfu longumfundzi waJesu Khristu. (Imisebenti 11:26) Jesu watsi: “Nanigcina emavi ami, nisuke nibafundzi bami sibili.” (Johane 8:31) Kuliciniso kutsi kute umuntfu longagcina emavi aJesu ngalokuphelele. Nobe kunjalo umKhristu ngamunye kufanele etame kulalela timfundziso taJesu futsi aphile ngato. Cabanga nganati tibonelo.

EmaKhristu ayatsandzana

Loko Jesu lakusho: “Ngininika umtsetfo lomusha, wekutsi nitsandzane; njengobe nje nami nginitsandzile, nani tsandzanani. Nangabe nitsandzana, bonkhe batawukwati kutsi nibafundzi bami.”​—Johane 13:34, 35.

Loko Jesu lakwenta: Jesu bekabatsandza bonkhe bantfu, kungenandzaba kutsi bakhule njani. Welapha labagulako, wondla labalambile waphindze wanikela ngekuphila kwakhe ngenca yalabanye.​—Matewu 14:14-21; 20:28.

Indlela emaKhristu lenta ngayo: EmaKhristu akhombisa kutsi ayatsandzana ngekutsi angakhetsi, ephane futsi atsetselelane. Ayabasita labo labadzinga lusito futsi atimisele kutidzela ngenca yalabanye.​—1 Johane 3:16.

EmaKhristu etsembekile

Loko Jesu lakusho: ‘Mine ngiliciniso.’​—Johane 14:6

Loko Jesu lakwenta: Jesu beketsembekile kuko konkhe lebekakusho nalebekakwenta. Bekangabayengi labanye. Bekatiwa njengemuntfu lotsembekile ngisho nobe loko bekwenta kutsi aphikiswe.​—Matewu 22:16; 26:63-67.

Indlela emaKhristu lenta ngayo: EmaKhristu akawacambi emanga. Akhokha umtselo, awebi, futsi asebenta ngekwetsembeka emisebentini lacashwe kuyo. (KubaseRoma 13:5-7; Kubase-Efesu 4:28) Akabakhohlisi labanye kuze atizuzise wona, awakopi nakabhala luhlolo nobe abhale imininingwane lengesiyo nakafaka ticelo tekufuna umsebenti.​—KumaHebheru 13:18.

EmaKhristu anemusa

Loko Jesu lakusho: “Wotani kimi nonkhe nine lenidziniwe nalenisindvwako, futsi mine ngitaniphumuta. Bekani lijoka lami kini, nifundze kimi, ngobe nginemoya lophansi futsi ngitfobekile, nanenta njalo nitawuphumula. Ngobe lijoka lami limelula, kantsi nemtfwalo wami awusindzi.”​—Matewu 11:28-30.

Loko Jesu lakwenta: Jesu bekanemusa futsi angeneka. Bekabemukela bantfwana, advudvuta labacindzetelekile futsi aphatsa bonkhe bantfu ngenhlonipho.​—Makho 10:13-15; Lukha 9:11.

Indlela emaKhristu lenta ngayo: EmaKhristu abakhulumisa ngemusa labanye, akabahlukumeti labanye nobe abaphatse ngelunya. (Kubase-Efesu 4:29, 31, 32) Ayabatsandza labanye futsi ahlale afuna ematfuba ekubasita.​—KubaseGalathiya 6:10.

EmaKhristu ahlala etsembekile kulabo lashade nawo

Loko Jesu lakusho: “Loko Nkulunkulu lakuhlanganisile, akungehlukaniswa ngumuntfu.”​—Makho 10:9.

Loko Jesu lakwenta: Nanobe Jesu bakangakashadi, kodvwa wakhutsata labashadene kutsi betsembeke kulomunye nalomunye. (Matewu 19:9) Wecwayisa ngetento lebetingalimata umshado.​—Matewu 5:28.

Indlela emaKhristu lenta ngayo: EmaKhristu ayakugwema kutiphatsa lokukhombisa kungawuhloniphi umshado. (KumaHebheru 13:4) Labashadene baphatsana ngenhlonipho nangelutsandvo.​—Kubase-Efesu 5:28, 33.