“Nkulunkulu Lowetsembekile” Uhlale Ayifeza Injongo Yakhe

1. Ngekusho kweTihlabelelo 31:2-5, yini leyenta simetsembe Jehova?

SIPHILA eveni lelibuswa nguSathane. Emanga nekukhohlisa kuyintfo levamile. Kungaba matima kubona kutsi ngubani longametsemba. Bosomabhizinisi abaketsembeki kulabanye bosomabhizinisi. Labo labakhangisako bakhohlisa bantfu mayelana naloko labakutsengisako. Ngetulu kwaloko, labanye batfole kutsi kumatima ngisho nekwetsemba bangani babo labakhulu kutsi batakwenta loko labakushoko. Nanobe kunjalo, kuyasidvudvuta kwati kutsi singahlale simetsemba Jehova! ‘UnguNkulunkulu lowetsembekile.’ (Fundza Tihlabelelo 31:2-5.) Kwetsembeka kubuntfu bakhe. Singakwetsemba konkhe lakushoko nalakwentako.

2. Sitawucoca ngani kulesihloko?

² Kulesihloko, sitawucale sicoce ngaletinye tizatfu letingasenta simetsembe ngenhlitiyo yetfu yonkhe Jehova. Sitawubese sicoca ngekutsi Nkulunkulu lowetsembekile utalicedza njani lelive lelibi laDeveli, nekutsi yini layentako nyalo kuze afeze lenjongo yakhe. Lesihloko sitasisita sibe BoFakazi BaJehova labanesibindzi futsi labangesabi.

YINI LENGASENTA SIMETSEMBE NKULUNKULU LOWETSEMBEKILE?

3. Yini lengenta simetsembe ngalokuphelele Jehova?

³ Singametsemba Jehova ngobe unguMdali. UnguMdali wemazulu nemhlaba futsi unguMtfombo wako konkhe kuphila. (Gen. 1:1; Hla. 36:9; Semb. 4:11) Nguye lowenta kutsi kuchubeke kukhona kuphila. Wenta umhlaba kuze konkhe lesikudzingako kuchubeke kusebenta, njengemoya lesiwuphefumulako kanye nemanti lesiwanatsako. Nguye loyilawula ngalokuphelele indalo yonkhe, futsi utawuhlale ayilawula. Ngako singametsemba ngalokuphelele ngekuphila kwetfu nyalo nangelikusasa letfu, njengobe anguMdali lohlakaniphile nalonemandla.

4. Sati njani kutsi Jehova uyasitsandza?

⁴ Singetsembela kuJehova ngobe uyasitsandza. Jehova wadala bantfu ngenca yekutsi bekafuna nabo bajabulele sipho sekuphila njengaye. Wayisho injongo yakhe ngesikhatsi atsi: “Asente bantfu bafane natsi, basifute.” (Gen. 1:26) Wasiniketa inkhululeko yekutikhetsela. Wadala likhaya lelihle, alidalela nje tsine. (Hla. 115:16) Ngetulu kwaloko, wabusisa batali betfu bekucala ngemsebenti lojabulisako wekwenta lelikhaya libe lipharadisi. (Gen. 1:28; 2:15) Wabaniketa wonkhe umcebo kanye nemnotfo losemhlabeni kuze bawusebentise. Nembala, loku lakwenta kukhombisa kutsi ‘lutsandvo lolucotfo lwaJehova luhlala kuze kube phakadze.’​—Hla. 103:17, umbhalo longentasi.

5. (a) Jehova wasigcina njani setsembiso sakhe ngisho nangetulu kwemetamo yaDeveli yekucotfula bantfu? (b) Ngutiphi letinye tetsembiso Nkulunkulu latifezile? (Buka libhokisi lelitsi “Nkulunkulu Uhlale Akhuluma Liciniso.”)

⁵ Singetsembela kuJehova ngobe uhlale akwenta loko lakushoko. Jehova akazange ‘awudalele lite umhlaba, kodvwa wawudalela kutsi kuhlalwe kuwo.’ (Isa. 45:18, 19) Ngesikhatsi bo-Adamu na-Eva bavukela, batfola sigwebo sekufa. Ngako bekungabonakala ngatsi injongo yaNkulunkulu ngeke isafezeka. Kodvwa Jehova utigcina tonkhe tetsembiso takhe. (Isa. 46:10, 11) Injongo yakhe yekugcwalisa umhlaba ngebantfu labalungile ayizange itsintseke. Kungako avumela Adamu na-Eva kutsi babe nebantfwana. Ngetulu kwaloko, watfumela iNdvodzana yakhe lekuphela kwayo kutsi ibe yinhlawulo letawusindzisa situkulwane sa-Adamu, futsi isinikete litsemba lelihle lekuphila phakadze.​—Joh. 3:16.

NKULUNKULU LOWETSEMBEKILE UYAYIFEZA INJONGO YAKHE

6. Yini Jehova layisho ngemuva kwekuvukela kwa-Adamu na-Eva e-Edeni?

⁶ Loyo lowabangela bo-Adamu na-Eva kutsi bavukele Nkulunkulu ‘yinyoka yekucala, lebitwa ngekutsi nguDeveli nangekutsi nguSathane.’a (Semb. 12:9; Gen. 3:4, 5; Joh. 8:44) Jehova washo sehlulelo lesimelene naye, sekutsi utawubhujiswa. (Gen. 3:15) Kodvwa ngaphambi kwekutsi kwenteke loko, bantfu labanyenti bebatawulandzela Sathane, futsi bente njengaye. Nobe kunjalo, labanye bebatawuhlala betsembekile kuJehova.

7. Bobani labalandzela Develi, futsi kutakwentekani kubo?

⁷ Labo labalandzela Sathane Develi, tingilosi letavukela kanye nebantfu labavukelako. Ngenca yekutsi baphikisana nenjongo yaNkulunkulu, nobe bamelene nayo, batenta babe yincenye yentalelwane yaSathane. Kodvwa ngesikhatsi saNkulunkulu lasibekile, Sathane kanye nalabo labamlandzelako batawubhujiswa.​—Dan. 2:44; Rom. 16:20.

8. Yini Jesu layenta nga-1914? (Buka netitfombe.)

⁸ Ngubuphi bufakazi lobusenta siciniseke kutsi injongo yaNkulunkulu yekubhubhisa Sathane nebalandzeli bakhe lababi itawufezeka? Nga-1914, Jesu walwa naSathane Develi kanye nemadimoni akhe, futsi wabajikijela emhlabeni. (Semb. 12:7-9) Nanobe lemphi yenteka ezulwini, labo labasemhlabeni bayibona imiphumela yayo. LiBhayibheli litsi: “Maye ngemhlaba nangelwandle, ngobe Develi wehlele kini atfukutsele kakhulu, ati kutsi unesikhatsi lesincane.” (Semb. 12:12) Kusukela nga-1914, Sathane bekanake kakhulu umhlaba, futsi umphumela waloko kube kutsi timo emhlabeni tisuke kulokubi taya kulokubi kakhulu. Kushiwo kufanele kutsi “maye ngemhlaba”! Kodvwa ngekushesha Jesu ‘utawucedzela kuncoba kwakhe,’ futsi Sathane nabo bonkhe labamsekelako batawubhujiswa. (Semb. 6:2) Jesu utalingcwelisa ngalokuphelele libito laNkulunkulu. (Hla. 45:4-6) Bonkhe batawukwati kutsi Jehova unguNkulunkulu lowetsembekile!​—Hez. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

NKULUNKULU LOWETSEMBEKILE UBABUTSELA NDZAWONYE BONKHE LABATSANDZA LICINISO

9. Bobani Jehova lababutsela ndzawonye lamuhla?

⁹ ‘NgaKhristu, [Jehova] ubutsela ndzawonye tonkhe tintfo, lokutintfo letisezulwini netintfo letisemhlabeni.’ (Ef. 1:10) ‘Letintfo letisezulwini’ timelela labagcotjiwe, lokungulabo Jehova labakhetse kutsi babuse naKhristu ezulwini. “Tintfo letisemhlabeni,” timelela labo labatawuphila phakadze ePharadisi emhlabeni. Tonkhe letikhonti taJehova timatasa, tiwabeka ebaleni emanga aSathane futsi tisita labo labanetinhlitiyo leticotfo kutsi balati liciniso.

10. Jehova ubakhulula njani bantfu emangeni lafundziswa yinkholo yemanga? (Sembulo 14:6, 7)

¹⁰ Jehova ubutsela ndzawonye labo labatsandza liciniso, asebentisa umsebenti lomkhulu kakhulu wekushumayela longazange sewentiwe emhlabeni. (Fundza Sembulo 14:6, 7.) Nanobe Jehova asebentisa bantfu kuze batjele labanye tindzaba letimnandzi, tingilosi tifaka sandla ekubabutseleni ndzawonye ebandleni lebuKhristu labo labanetinhlitiyo leticotfo. Lomsebenti wekushumayela uwabeka ebaleni emanga lafundziswa yiBhabhulona Lenkhulu, lokungumbuso wemhlaba wenkholo yemanga, leyo lesekuphele emakhulu eminyaka isetjentiswa nguDeveli kuze isakate emanga ngaJehova. (Semb. 18:2, 4) Ngekushesha, tonkhe tinkholo temanga titawubhujiswa ngalokuphelele, futsi bonkhe labatsandza Nkulunkulu lowetsembekile batamniketa ludvumo lolumfanele.​—Semb. 17:16.

11. Singatibona njani tikhonti taJehova teliciniso?

¹¹ Labo labatsandza liciniso bavela emhlabeni wonkhe. (Semb. 7:9, 10) Ngesikhatsi beva ‘tindzaba letimnandzi,’ balibona liciniso futsi ngekutitsandzela batihlanganisa nebantfu baJehova. (Mak. 13:10) Njengobe sikhatsi sichubeka, kube sebaleni kakhulu kutsi bobani labakhonta Nkulunkulu ngendlela layemukelako, nekutsi bobani labangakwenti loko. Umphrofethi Malakhi waphrofetha watsi: “Nitawuphindze nibone umehluko emkhatsini wemuntfu lolungile nemuntfu lomubi, nasemkhatsini walokhonta Nkulunkulu naloyo longamkhonti.” (Mal. 3:18) Bantfu baJehova bakhombisa kutsi bakhonta Nkulunkulu lowetsembekile ngendlela labatiphatsa ngayo nangemsebenti wabo wekushumayela.

12. Umsebenti wekushumayela usifaka njani sandla ekufezeni injongo yaJehova?

¹² Nasenta umsebenti wekushumayela ‘tindzaba letimnandzi teMbuso,’ sisuke silalela umyalo waJesu, futsi ngesikhatsi lesifanako sigcwalisa siphrofetho. (Mat. 24:14; 28:18-20) Ngenca yalomsebenti, bantfu emhlabeni wonkhe baba bafundzi baKhristu futsi bakubuke ngalabovu kukhonta Nkulunkulu lowetsembekile kuze kube phakadze. Kusipho lesiligugu kufaka sandla ekufezeni injongo yaJehova!

BUKA LIKUSASA NGESIBINDZI

13. Sathane uhlasela bobani ngalokukhetsekile, futsi ngasiphi sizatfu?

¹³ Sathane Develi utfukutsele kakhulu ngobe ‘uyati kutsi unesikhatsi lesincane’ ngaphambi kwekutsi kubhujiswe lelive. (Semb. 12:12, 13) Uhlasela ngalokukhetsekile labo labamelela uMbuso waNkulunkulu, lokungulabo “labagcina imiyalo yaNkulunkulu nalabanemsebenti wekufakaza ngaJesu.” (Semb. 12:17; 14:12) Uphindze ahlasele nobe ngubani lobasekelako, nalosekela umsebenti labawentako.

14. Yini letawenteka ngesikhatsi Sathane ahlasela bantfu baJehova? (Buka nesitfombe lesisekhasini lekucala.)

¹⁴ Ngemuva kwekubhujiswa kweBhabhulona Lenkhulu, labo labasekela Sathane batawetama kucotfula bantfu baJehova. Loko kutawuholela emphini ye-Amagedoni. (Semb. 16:13, 14, 16) Jesu kanye nelibutfo lasezulwini batawukhulula tikhonti taJehova, futsi batakubhubhisa ngalokuphelele konkhe lokutawube kusele kwelive laDeveli. (Semb. 19:19-21) Batawubhujiswa bonkhe labakhuluma emanga, lababi nalabakhohlisako. (Semb. 21:8) Nkulunkulu lowetsembekile nalolungile utawungcweliswa.

15. Yini leyenta sibuke likusasa ngesibindzi? (Isaya 65:16, 17) (Buka nesitfombe.)

¹⁵ Lamuhla, lelive lehlukene ekhatsi ngendlela lengazange seyibonwe. Kodvwa ngelusito lwaJehova, bantfu bakhe solo bamunye. Lomsebenti wekubutsela ndzawonye bantfu uyachubeka. Kute lokungavimba Jehova kutsi abusise bantfu bakhe kanye nemsebenti labawentako. (Fundza Isaya 65:16, 17.) Silibuke ngesibindzi likusasa. Emavi emphostoli Pawula laKubaseRoma 8:38, 39 ayasicinisekisa, atsi: “Ngisho nekufa, kuphila, tingilosi, babusi, tintfo letikhona nyalo naleto letitako, emandla, kuphakama, kujula, ngisho nanobe nguyiphi indalo, ngeke kukwati kusehlukanisa nelutsandvo Nkulunkulu lasikhombisa lona ngaKhristu Jesu iNkhosi yetfu.”

16. Yini leyenta umetsembe ngenhlitiyo yakho yonkhe Jehova?

¹⁶ Sinetizatfu letinyenti tekwetsemba Jehova, longuNkulunkulu lowetsembekile. UnguMdali wetfu. Usitsandza ngalokujulile. Sicumbi lesikhulu sikhula ngekushesha njengobe bantfu bato tonkhe tive beta kutokhonta Jehova. (Isa. 60:22; Zak. 8:23) Siyati kutsi uhlale ayifeza injongo yakhe nekutsi ngekushesha utawacedza emanga aSathane nekukhohlisa kwakhe. Sisho umthantazo lofanako newaDavide lowatsi: “Akadvunyiswe Jehova Nkulunkulu, . . . lokunguye yedvwa lowenta tintfo letinhle. Shengatsi libito lakhe lelikhatimulako lingadvunyiswa kuze kube phakadze, nenkhatimulo yakhe igcwale umhlaba wonkhe.”​—Hla. 72:18, 19.