Tibone Ngeliso Lengcondvo Tindzaba LetiseBhayibhelini

LiBhayibheli linetindzaba letinyenti tetintfo letenteka mbamba letisifundzisa tifundvo letibalulekile. Nasakha sitfombe engcondvweni saloko lesikufundzako, singakhona kukucondza kancono futsi kungasisita kakhulu. Cabanga nganaku lokunye longakwenta lokungakusita kutsi utibone ngeliso lengcondvo tindzaba letiseBhayibhelini.

• Fundza uphumisele. Kufundza liBhayibheli uphumisele kungakusita kutsi ukubone ngeliso lengcondvo loko lokwentekako. Nanifundza liBhayibheli njengemndeni, ningayenta iphile lendzaba ngekutsi ninike lilunga lemndeni ngalinye kutsi lifundze emavi lakhulunywa ngulotsite kulendzaba.

• Kubone ngeliso lengcondvo loko lokwentekako kulendzaba. Yetama kucondza loko labakucabangako labo labakulendzaba nendlela labativa ngayo. Sibonelo nje, tibute: ‘Yini leyenta lomuntfu wakhuluma ngendlela lakhuluma ngayo futsi wenta ngendlela lenta ngayo? Kube bengikulesimo sakhe, yini lebengitayicabanga nobe bengitawutiva njani?’

• Dvweba loko lokwentekako. Kudvweba loko lokwentekako kulendzaba kungakusita kutsi ukubone ngeliso lengcondvo futsi ukukhumbule kancono, ngisho nobe loko lokudvwebile kungasikuhle.