Ungawulungiselela Njani Umshado Lodvumisa Jehova?

1-2. Yini Jehova lakufunela yona ngelilanga lakho lemshado?

WETSEMBISENE umshado nalotsite yini? Nangabe kunjalo, siyakuhalalisela! Kungenteka umatasatasa ulungiselela lomshado. Jehova unendzaba nemshado wakho. Ufuna ulijabulele lilanga lakho lemshadoa futsi nibe nelikusasa lelihle ndzawonye.​—Taga 5:18; Ngo. 3:11.

² Kuyamfanela Jehova kukhonjiswa ludvumo ngelilanga lakho lemshado. Sisho ngani? Ungakwenta njani loko? Nanobe lesihloko sicondziswe ngalokukhetsekile kulabo labalungiselela umshado wabo, timiso letikuso tingasisita sonkhe kutsi sidvumise Jehova nangabe siye emshadweni nobe nangabe sicelwa kutsi sivete umbono ngemalungiselelo lentiwako.

KUBALULEKE NGANI KUTSI SIDVUMISE JEHOVA?

3. Yini lokufanele acabange ngayo emaKhristu lalungiselela umshado, futsi ngasiphi sizatfu?

³ EmaKhristu lalungiselela umshado wawo kufanele loko akwente ngekuvumelana netimiso taJehova letiseVini lakhe. Ngasiphi sizatfu? Ngenca yekutsi Jehova unguMsunguli wemshado. Nguye lowahlela umshado wekucala, washadisa bo-Adamu na-Eva. (Gen. 1:28; 2:24) Ngako indlela Nkulunkulu lacabanga ngayo kufanele ihambe embili etingcondvweni talabo labalungiselela umshado.

4. Ngusiphi sizatfu labo labashadako lokufanele sibente badvumise Jehova ngelilanga labo lemshado?

⁴ Kunaletinye tizatfu letibalulekile lokufanele tikwente ucabange ngendlela Jehova lativa ngayo ngaloko lokwenteka ngelilanga lakho lemshado: UnguBabe wakho wasezulwini neMngani wakho lomkhulu. (Heb. 12:9) Siyaciniseka kutsi ufuna kuhlale kunjalo. Awufisi kutsi kwenteke nobe ngabe yini ngalelilanga lakho lemshado nobe ngalelinye nje lilanga letamvisa buhlungu loMngani wakho. (Hla. 25:14) Nawucabanga ngako konkhe Jehova lakwentele kona nalasetakwentela kona, awuvumi yini kutsi kuyamfanela kutsi umdvumise ngelilanga lakho lemshado?​—Hla. 116:12.

YINI LONGAYENTA KUZE UDVUMISE JEHOVA?

5. LiBhayibheli lingabasita njani labo labafuna kushada nabahlela umshado wabo?

⁵ LiBhayibheli alisiniketi luhla lwemitsetfo lwekutsi yini lokufanele yentiwe embutsanweni wemshado wemaKhristu nobe edzilini lawo. Ngako labo labashadako bangahlela umshado wabo ngendlela levumelana netimo tabo, emasiko endzawo, nobe loko labakufunako. EmaKhristu eliciniso aphindze ayihloniphe imitsetfo yahulumende lemayelana nemshado. (Mat. 22:21) Nobe kunjalo, umshado lohlelwe ngekuvumelana netimiso teliBhayibheli utawudvumisa Jehova futsi umente ajabule. Ngako ngutiphi timiso lokufanele uhlale ucabanga ngato?

6. Kubaluleke ngani kutsi labo labashadako bahloniphe imitsetfo yahulumende lemayelana nemshado?

⁶ Hlonipha imitsetfo yahulumende. (Rom. 13:1, 2) Emaveni lamanyenti, hulumende ubeke imitsetfo lemayelana nemshado lokufanele bayihloniphe labo labashadako ngaphambi kwekutsi bashade. Labashadako kufanele batfole kutsi ngumiphi lemitsetfo lapho bahlala khona. Nangabe unemibuto mayelana nekutsi ungakwenta njani loko, cela labadzala belibandla kutsi bakusite.b

7. Yini longayenta kuze uciniseke kutsi umshado wakho uhloniphekile?

⁷ Ciniseka kutsi lomshado uhloniphekile. (1 Khor. 10:31, 32) Yenta konkhe longakwenta kuze uciniseke kutsi lomshado ukhombisa titselo temoya waNkulunkulu kunekutsi ukhombise umoya welive. (Gal. 5:19-26) Ngekuvumelana nesimiso lesiseBhayibhelini sebunhloko, ngumsebenti wemkhwenyane kucinisekisa kutsi lomshado umnandzi futsi uhloniphekile. Yini lengamsita kutsi akwente loko? Inkhulumo yemshado lesekelwe eBhayibhelini, leniketwa ngelutsandvo, ngebungani nangendlela lehloniphekile, isita bonkhe labalalele bacondze kutsi umshado usipho lesivela kuNkulunkulu. Itawuphindze isite bonkhe labakhona babone kutsi ubaluleke kanganani lomcimbi. Ngako emaKhristu lamanyenti akhetsa kushadela eHholweni leMbuso nakungenteka. Nangabe ufisa kusebentisa liHholwa leMbuso, kufanele ubhalele sigungu salabadzala incwadzi kusesele sikhatsi kuze ucele kusebentisa liHholwa leMbuso.

8. Yini lengakusita kuze uciniseke kutsi lidzili lemshado lihloniphekile? (KubaseRoma 13:13)

⁸ Fundza KubaseRoma 13:13. Nangabe ukhetsa kuba nelidzili lemshado, yini longayenta kuze ucinisekise kutsi lite umoya welive? Ligama lesiGriki lelihunyushwe ngekutsi “imicimbi lengalawulwa” belisho imibutsano lapho bantfu bebanatsa khona kakhulu tjwala futsi badlale umculo kuze kube sebusuku kakhulu. Nawukhetsa kutsi kube netjwala, cinisekisa kutsi kute lonatsa kakhulu.c Nangabe kutawuba nemculo, cinisekisa kutsi ukhala ngendlela yekutsi labo lobamemile bakhone kuvana nabacoca. Wukhetse kahle umculo futsi unakisise nemagama awo kuze kutawuba bete lokhubekako.

9. Yini lokufanele bahlale bayikhumbula labo labashadako ngaloko lokutawushiwo nobe kwekutijabulisa edzilini lemshado?

⁹ Kuletinye tindzawo edzilini lemshado, bangani netihlobo tamakoti nemkhwenyane kuyenteka tisukume tisho emavi lambalwa ngalaba labashadako. Ngetulu kwaloko, kuleminye imishado kudlalwa i-video nobe titfombe tamkhwenyane namakoti nobe kube nalolunye luhlobo lwekutijabulisa. Ngalokuvamile, loku kwenta lelilanga lijabulise kakhulu. Nobe kunjalo, ciniseka kutsi loko lokwentekako kuyakha. (Fil. 4:8) Tibute: ‘Kutawukhombisa kutsi ngiyabahlonipha yini labanye? Kutawukhombisa kutsi ngiyasihlonipha yini sipho semshado?’ Kantsi lokubaluleke kakhulu kutibuta: ‘Kutamdvumisa yini Jehova?’ Nanobe kungaba kuhle kusho tintfo letihlekisako, kufanele kugwenywe kusho tintfo letingakafaneli, njengaleto letitawenta labanye bacabange ngekuya ecansini. (Ef. 5:3) Cinisekisa kutsi emalunga emndeni nebangani labatawusho emavi latsite bayacondza kutsi yini lofise yenteke futsi bakuhloniphe.

10. Kubaluleke ngani kutsi labo labashadako balinganisele nabalungiselela umshado wabo? (1 Johane 2:15-17)

¹⁰ Ungabukisi. (Fundza 1 Johane 2:15-17.) Jehova uyajabula nangabe bantfu bakhe bafuna kudvumisa yena kunekutsi bente labanye banake bona kakhulu. Ngako emaKhristu lalinganiselako ayakugwema kusebentisa imali lenyenti kakhulu ‘nangekubukisa ngetintfo umuntfu lanato.’ Utawusitakala njani nangabe ulinganisela emshadweni wakho? Mhlawumbe kutawenteka loko lokwenteka kulomunye umzalwane waseNorway lokutsiwa nguMike. Utsi: “Asizange sibe netikweleti, futsi sakhona kuchubeka singemahlahlandlela. Umshado wetfu bewungasiyo inkimbinkimbi, kepha bewumuhle futsi nanyalo sisawukhumbula.” Lomunye dzadze wase-India lokutsiwa nguTabitha, utsi: “Asizange sikhatsateke kakhulu. Kwenta umshado wetfu ungabi yinkimbinkimbi kwasisita ngobe kwaba kuncane lokwadzingeka sikulungiselele nalebesingavumelani ngako.”

11. Umkhwenyane namakoti bangakhombisa njani kutsi bayalinganisela endleleni labagcoka futsi batilungise ngayo? (Buka netitfombe.)

¹¹ Sewuncumile yini kutsi utawugcokani? Siyaciniseka kutsi ufuna kuba muhle ngalelo langa. Ngisho nangetikhatsi tekubhalwa kweliBhayibheli, umkhwenyane namakoti bebayinaka kakhulu indlela lababukeka ngayo. (Isa. 61:10) Kuliciniso kutsi loko lotakugcoka ngelilanga lemshado kungenteka kungafani naloko lokugcoka nawuya kuletinye tindzawo, kodvwa nako kufanele kuzitse. (1 Thim. 2:9) Ungavumi kutsi loko lotawube ukugcokile nobe indlela lotawutilungisa ngayo kube yintfo lebaluleke kakhulu emshadweni wakho.​—1 Phet. 3:3, 4.

12. Kubaluleke ngani kutsi labashadako bangawenti emasiko lavamile endzaweni yangakubo langahambisani nemiBhalo?

¹² Ungawenti emasiko langavumelani nemiBhalo. (Semb. 18:4) Lelive laSathane lifake emasiko lahambisana nenkholo yemanga, lanebudimoni futsi lanetinkholelo letilite emishadweni. Jehova usecwayisa ngalokucacile kutsi sikhweshe etintfweni letingcolile letinjengaleti. (2 Khor. 6:14-17) Nangabe kunemasiko endzaweni yangakini longaciniseki ngawo kutsi uyawavumela yini Jehova, cabanga ngekutsi acala njani kanye naletinye timiso letiseBhayibhelini letisebentako kuleso simo, ngaphambi kwekuncuma kutsi yini lotayifaka emshadweni wakho.

13. Labashadako bangamlingisa njani Jehova endzabeni yetipho?

¹³ Kuyintfo levamile yini endzaweni yangakini kutsi labo labamenyiwe baphatsele labo labashadako tipho? Simo setimali kulabanye singasifaka sandla kuloko labakhetsa kupha ngako. Kuliciniso kutsi emaKhristu akhutsatwa kutsi aphe, futsi loko kuwenta ajabule. (Taga 11:25; Imis. 20:35) Nobe kunjalo, asifuni kwenta labo lesibamemile bative baphocelelekile kutsi baphe, futsi asifuni kubenta beve shengatsi sipho lesishiphile ngeke semukelwe. Silingisa Jehova, futsi setama kuba nembono wakhe endzabeni yetipho ngekutsi sivumele labanye baphe ngaloko labangakhona kupha ngako futsi lokusuka enhlitiyweni.​—2 Khor. 9:7.

KUGWEMA TINKINGA NEKUTINCOBA

14. Ngutiphi tinkinga lababhekana nato labanye labashadako?

¹⁴ Kungenteka ube netinkinga njengobe ulungiselela umshado lodvumisa Jehova. Sibonelo nje, kungenteka ukutfole kumatima kulinganisela njengobe uhlela umshado wakho. Charlie waseSolomon Islands, utsi: “Bekumatima kuncuma kutsi bobani lesitabamema edzilini lemshado. Sinebangani labanyenti, futsi ngekwelisiko letfu wonkhe muntfu ulindzele kutsi amenywe!” Tabitha, lesike sakhuluma ngaye utsi: “Langihlala khona, kuvamile kutsi kwentiwe lidzili lelikhulu. Kwatsatsa sikhatsi kutsi batali betfu bemukele sincumo setfu sekumema bantfu labangaba ngu-100 nje kuphela.” Sarah, lohlala e-India, utsi: “Lokubaluleke kakhulu kulabanye bantfu lizinga. Bomzala bami baba nebumengemenge bemshado, ngako ngativa ngicindzeteleke kutsi ngente lokungetulu kwalokwabo.” Yini lengakusita kutsi uncobe letinkinga kanye naletinye?

15. Kubaluleke ngani kuthantaza nanilungiselela umshado?

¹⁵ Thantazani njalo nanilungiselela umshado wenu. Ningathantaza kuJehova nimtjele nganobe nguyiphi inkinga leninayo nobe indlela lenitiva ngayo. (Fil. 4:6, 7) Ningamcela anisite nente tincumo letihlakaniphile, nehlise umoya nanitiva senicala kukhatsateka, futsi anisite nikhombise sibindzi lakudzingeka nisikhombise khona. (1 Phet. 5:7) Nitametsemba kakhulu Jehova njengobe nimbona anisita. Tabitha, lesike sakhuluma ngaye utsi: “Mine nesithandwa sami besikhatsateke ngekutsi kungenteka singavumelani ngaletinye tintfo, nangekutsi imindeni yetfu ngeke ivumelane natsi kulokunye. Ngako njalo nasihlela loko lesitakwenta emshadweni wetfu, besicala ngekuthantaza. Sambona Jehova asisita futsi saba nekuthula.”

16-17. Kukhulumisana kahle kunganisita njani nanilungiselela umshado?

¹⁶ Khulumisanani kahle. (Taga 15:22) Kutawudzingeka nente tincumo letinyenti mayelana nemshado wenu ninobabili. Loko kufaka ekhatsi kuncuma lilanga lemshado, kutsi nitawusebentisa malini, labo lenitawubamema kanye nalatinye tintfo letinyenti. Ngaphambi kwekutsi nente sincumo, cocani ngalokunye leningakukhetsa, nicoce ngetimiso teliBhayibheli letisebentako kuleso simo, nanganobe ngusiphi seluleko lenisitfolile kumaKhristu lavutsiwe. Nawuveta loko lofuna kwentiwe, bani nemusa, ucabangele futsi wemukele imibono yalabanye. Nangabe emalunga emndeni lenisondzelene nawo, njengebatali benu bacela kutsi nente lokutsite lokungasikubi, yetamani kukwenta. Leli lilanga lelikhetsekile nakubo. Nangabe ningakhoni kukwenta loko labakucelako, bachazeleni kahle tizatfu tenu. (Khol. 4:6) Kwenteni kucace kumalunga emndeni kutsi umgomo wenu kuba nemshado lomnandzi nalodvumisa Jehova.

¹⁷ Kungahle kube matima kuchazela batali benu labangasibo boFakazi ngaloko lenikhetse kukwenta emshadweni wenu, kodvwa ningakhona kukwenta. Lomunye umzalwane wase-India lokutsiwa nguSanthosh utsi: “Imindeni yetfu beyifuna sente emasiko lehlukahlukene ebuHindu. Kwaphela sikhatsi lesidze mine nesithandwa sami sibachazela ngetincumo tetfu. Salwenta lushintjo labesibona khona kutsi ngeke simdvumate Jehova. Sibonelo nje, sakushintja loko besitakudla edzilini lemshado safaka loko labakutsandzako, sancuma kungakufaki kuhlabela nobe kujayiva ngobe abakakwetayeli.”

18. Yini lengakusita uciniseke kutsi lilanga lemshado lihamba kahle? (1 KubaseKhorinte 14:40) (Buka nesitfombe.)

¹⁸ Hlelani ngekucophelela. Nanihlelekile, mancane ematfuba ekutsi nikhatsateke ngelilanga lenu lemshado. (Fundza 1 KubaseKhorinte 14:40.) Wayne, waseTaiwan utsi: “Nasekusele emalanga lambalwa ngaphambi kwemshado wetfu, saba nemhlangano lomncane nalabo bebavolontiye kusisita kulomcimbi. Sacoca ngaloko besikuhlelile futsi saphrakthiza lokunye kwako kuze siciniseke kutsi konkhe kuhamba kahle.” Kuze nikhombise kutsi niyabahlonipha labo lenibamemile, yentani konkhe leningakwenta kuze nigcine sikhatsi.

19. Yini lengakusita kuze ukhone kulawula loko lokwenteka edzilini lakho lemshado?

¹⁹ Tinkinga letinyenti tingagwenywa ngekutsi ucabange ngetinkinga letingavela nekutsi yini longayenta nasetivelile. (Taga 22:3) Sibonelo nje, nangabe uhlala endzaweni lapho kuvamile kutsi bantfu bete bangakamenywa edzilini lemshado, cabanga kutsi yini longayenta kuze ukuvimbele loko kutsi kungenteki. Ciniseka kutsi tihlobo letingasibo boFakazi tiyakwati loko letingakulindzela, futsi utichazele ngembono wakho ngalamanye emasiko lentiwa emshadweni. Ungabakhombisa sihloko lesitsi “Kwentekani Emshadweni WaBoFakazi BaJehova?” lesitfolaka ku jw.org. Ungacela umzalwane lovutsiwe kutsi abe ‘ngumcondzisi welidzili’ kuze akusite alawule loko lokwenteka edzilini lakho lemshado. (Joh. 2:8) Nangabe umtjela ngalokucacile loko lokuhlelile, angakusita uciniseke kutsi lomshado uchubeka ngendlela lehloniphekile nalohlele ngayo.

20. Yini labo labashadako lokufanele bayikhumbule ngemshado wabo?

²⁰ Kungenteka ukhatsateke nawucabanga ngako konkhe lokufanele ukwente njengobe ulungiselela umshado wakho. Nobe kunjalo, khumbula kutsi umshado wakho ulilanga linye. Usicalo semphilo lenhle nikhonta Jehova ndzawonye. Yenta konkhe longakwenta kuze ulinganisele emshadweni wakho futsi uwugcine uhloniphekile. Yetsembela kuJehova. Ngekucondziswa nguye, utawukhona kuhlela umshado lotawutsi nawubuka emuva uwukhumbule ujabulile futsi ungatisoli ngalutfo.​—Hla. 37:3, 4.