Lingisa Kutfobeka KwaJehova

1. Yini leyenta imangalise indlela Jehova latfobeke ngayo?

NAWUBUKA bantfu labasetikhundleni lamuhla, uyakubona yini kutfobeka kubo? Kungenteka imphendvulo ngu-cha. Nanobe kunjalo, Jehova longuSomandla, utfobekile. (Hla. 113:5-8) Kutfobeka kungulobunye bebuntfu bakhe lobuhamba embili; kute ngisho nalokuncane kutigcabha kuye. Kulesihloko, sitawucoca ngetindlela letine Jehova lasiphatsa ngayo futsi sibone kutsi ngayinye yato ikhombisa njani kutsi utfobeke kakhulu. Sitawuphindze sicoce ngendlela Jesu lalingisa ngayo kutfobeka kwaBabe wakhe. Kucoca ngaletintfo kutasisita kutsi sisondzelane kakhulu naJehova futsi silingise kutfobeka kwakhe ngelizinga lelisetulu.

JEHOVA UYANGENEKA

2. Tihlabelelo 62:8 tisitjelani ngaJehova? (Buka nesitfombe lesisekhasini lekucala.)

² Bantfu labatigcabhako abakavami kungeneka. Kutigcabha kwabo kwenta kutsi bente tintfo letenta labanye bangabate kuya kubo nobe babagweme ngalokuphelele. Kodvwa Jehova wehluke kakhulu! Ngenca yekutsi Babe wetfu wasezulwini utfobekile, usicela kutsi site kuye futsi simtjele ngetintfo letisikhatsatako. (Fundza Tihlabelelo 62:8.) Njengababe lonendzaba nebantfwabakhe lohlale akulungele kubalalela nabeta netikhalo tabo, Jehova uyayemukela imithantazo yetikhonti takhe futsi ayilalele. Ecinisweni, wabangela kutsi imithantazo yato leminyenti ibhalwe eBhayibhelini. Loko kukhombisa indlela Jehova langeneka ngayo. (Josh. 10:12-14; 1 Sam. 1:10-18) Kodvwa kutsiwani nangabe ngetizatfu letitsite sihle siva ngatsi asikufaneli kuthantaza kuJehova?

3. Yini lengakwenta uciniseke kutsi Jehova ufuna uhlale uthantaza kuye?

³ Singathantaza kuJehova ngisho nobe siva ngatsi lutsandvo lwakhe alusifaneli. Sisho ngani? Emfanekisweni waJesu wendvodzana leyahamba ekhaya, wafananisa Jehova nababe lonemusa lonendvodzana lephendvukile leyeva shengatsi ayikufaneli kuphindze yemukelwe ngubabe wayo ekhaya. Lobabe wenta njani nakabona lendvodzana yakhe ibuya ekhaya? Jesu watsi ngekushesha nje lobabe nakayibona, ‘wagijima wefika wayigaca futsi wayanga.’ (Luk. 15:17-20) Jehova ufana nalobabe. Ngekushesha nje nakeva imithantazo yalabo labephuke etinhlitiyweni futsi labacindzetelekile ngenca yekutiva banelicala nobe ngenca yekukhatsateka, kutfobeka kwakhe kumenta abanake ngalokugcwele. (Sil. 3:19, 20) Ngenca yeluvelo, kuba ngatsi Jehova ugijimela kubo kuze abadvudvute futsi abacinisekise ngemusa wakhe nangelutsandvo lwakhe. (Isa. 57:15) Jehova ‘ugijimela’ njani kitsi lamuhla? Loko uvame kukwenta asebentisa labadzala belibandla, emalunga emndeni laboFakazi, kanye nebazalwane betfu nabodzadze. (Jak. 5:14, 15) Lokwenta asisite ngalendlela kutsi ufuna sisondzelane naye.

4. Jesu wakhombisa njani kutsi bekangeneka?

⁴ Jesu ulingisa Babe wakhe. NjengaBabe wakhe, Jesu utfobekile. Ngenca yaloko, ngesikhatsi alamhlabeni, bantfu bebativa bakhululekile kuya kuye. Bebangesabi ngisho nekumbuta imibuto. (Mak. 4:10, 11) Nakabacela kutsi bamtjele loko labakucabangako ngendzaba letsite, bebamtjela loko lokusetinhlitiyweni tabo. (Mat. 16:13-16) Nakwenteka benta liphutsa, bebangachachateli ngenca yekwesaba; bebati kutsi Jesu unemusa, ulungile, futsi unesineke. (Mat. 17:24-27) Ngenca yekutsi Jesu bekamlingisa kahle kakhulu Babe wakhe, balandzeli bakhe babese bamati kancono Jehova. (Joh. 14:9) Babona kutsi bekangafanani nebaholi benkholo bangaleso sikhatsi lebebete umusa, batigcabha, futsi bete bungani. Kunaloko, Jehova bekatfobekile futsi angeneka.

5. Kutfobeka kungasisita njani kutsi singeneke kakhudlwana?

⁵ Singamlingisa njani Jehova? Nasifundza kutfobeka, sitawungeneka kakhudlwana. Nasingakatfobeki, sitawubadlela umona labanye, sitigcabhe futsi singacoleli, lokutintfo letenta bantfu bangasondzelani natsi. Kodvwa nasitfobekile sitawuba nemusa, sibe nesineke, futsi sicolele, lokutintfo letenta bantfu basondzele kitsi. (Khol. 3:12-14) Labadzala belibandla kufanele batimisele kakhulu kungeneka. Kuze bakhone kukwenta loko, kutawudzingeka kutsi bavame kuba nebazalwane nabodzadze. Loko kusho kutsi batawutimisela kuya matfupha emihlanganweni yelibandla, ecinisweni banconote kona kunekutsi bangene ngetebuchwephesha ngalokungenasidzingo. Ngetulu kwaloko, nangabe timo tabo tivuma, bayetama kushumayela nebazalwane babo nabodzadze emtini ngemuti. Njengobe labazalwane babetayela labadzala belibandla, batakutfola kumelula kutsi baye kubo nakunesidzingo.

JEHOVA UYACABANGELA

6-7. Niketa tibonelo letikhombisa kutsi Jehova bekakulungele kwemukela umbono webantfu bakhe ngesikhatsi bathantaza kuye.

⁶ Bantfu labanyenti labatigcabhako ababacabangeli labanye. Kodvwa ngenca yekutsi Jehova utfobekile, uyacabangela nobe uyayilalela imibono yalabanye, ngisho nobe asesikhundleni lesiphakeme kwendlula nobe ngubani. Cabanga ngendlela laphatsa ngayo sisi waMosi lokunguMiriyamu. Miriyamu na-Aroni bakhonona ngaMosi, lebekamelele Jehova. Ngako loko lokwentiwa nguMiriyamu bekukhombisa kutsi akahloniphi Jehova. Ngenca yaloko, Jehova wamtfukutselela kakhulu futsi wamshaya ngebulephelo. Kodvwa ngesikhatsi Aroni amncengela futsi naMosi ancenga Jehova kutsi elaphe sisi wakhe, wenta njani Nkulunkulu? Umuntfu lotigcabhako bekangeke ayishintje ingcondvo, kodvwa Jehova wenta lokwehlukile. Ngenca yekutsi utfobekile, wawulalela umbono walabanye ngekutsi amelaphe.​—Num. 12:1-15.

⁷ Jehova waphindze wakhombisa kutsi utfobekile ngendlela laphatsa ngayo iNkhosi Hezekiya. Asebentisa umphrofethi wakhe, watjela lenkhosi kutsi beyitawukufa. Hezekiya wakhala wancenga Jehova kutsi amelaphe. Ngemusa, Jehova wawulalela umthantazo wakhe, futsi wamtjela kutsi bekatawuphila leminye iminyaka lengu-15. (2 Khos. 20:1, 5, 6) Kutfobeka kwenta Jehova kutsi abe neluvelo futsi emukele umbono walabanye.

8. Ngutiphi tibonelo letikhombisa kutsi Jesu uyacabangela? (Makho 3:1-6)

⁸ Jesu ulingisa Babe wakhe. Ngesikhatsi Jesu alamhlabeni, bekabentela lokuhle labanye nangabe kulunga. Sibonelo nje, welapha bantfu ngeliSabatha ngisho nobe labo labanetinhlitiyo leticinile futsi lebebamphikisa bamelene naloko. (Fundza Makho 3:1-6.) Jesu uyachubeka nekukhombisa kutsi uyacabangela njengobe ayinhloko yelibandla lebuKhristu. Sibonelo nje, nangabe lotsite ebandleni enta sono lesikhulu, uyambeketelela, amnikete ematfuba lamanyenti ekutsi alungise tindlela takhe.​—Semb. 2:2-5.

9. Singakufundza njani kucabangela futsi singakukhombisa njani? (Buka netitfombe.)

⁹ Singamlingisa njani Jehova? Kufanele sifundze kuJehova indlela yekucabangela ngaloko lesikucabangako nalesikwentako. (Jak. 3:17) Sibonelo nje, batali labacabangelako, nanobe bangayekeleli, abalindzeli lokungetulu kwaloko bantfwana babo labangakhona kukwenta. Sibonelo lesihle saloko nguJakobe, njengobe loko kubonakala kulendzaba letfolakala kuGenesisi 33:12-14. Batali labatfobekile nalabacabangelako kufanele bakugweme nekucatsanisa bantfwana babo. Labadzala belibandla nabo kufanele bacabangele. Lenye indlela labangakwenta ngayo loko kutsi bemukele umbono welinyenti wesigungu salabadzala nangabe kwenta njalo kungashayisani netimiso teliBhayibheli. (1 Thim. 3:2, 3) Ngetulu kwaloko, sonkhe singetama kucondza umbono walabanye ngisho nobe singaboni ngasolinye. (Rom. 14:1) Ngamunye wetfu ebandleni kufanele atimisele kuze ‘kucabangela kwakhe kwatiwe ngibo bonkhe bantfu.’​—Fil. 4:5.

JEHOVA UNESINEKE

10. Jehova ukhombise njani kutsi unesineke?

¹⁰ Mhlawumbe uke wanaka kutsi bantfu labatigcabhako abatsandzi nangabe lomunye abenta balindze. Kutigcabha kubenta babe bete sineke. Loko kwehluke kakhulu kuJehova, ngobe uhamba embili ngekuba nesineke! Sibonelo nje, ngemalanga aNowa, Jehova watsi bekatawulindza iminyaka lengu-120 ngaphambi kwekutsi abhubhise bantfu lababi. (Gen. 6:3) Nowa waba nesikhatsi lesenele sekukhulisa bantfwana bakhe nesekwakha umkhumbi kanye nemndeni wakhe. Ngekuhamba kwesikhatsi, lenye ingilosi lebeyimelele Jehova yamlalela ngesineke Abrahama ngesikhatsi ayibuta imibuto lemayelana nekubhujiswa kweSodoma neGomora. Umuntfu lotigcabhako bekatawutsi: ‘Usitsatsaphi sibindzi sekungibuta lemibuto!’ Kodvwa lengilosi yalingisa Jehova, yambeketelela Abrahama.​—Gen. 18:20-33.

11. Njengobe kuvetwe ku-2 Phetro 3:9, yini leyenta Jehova abe nesineke lamuhla?

¹¹ Jehova ukhombisa kuba nesineke nalamuhla. Ulindzele kutsi kufike sikhatsi lasibekile kuze abhubhise lelive. Yini leyenta abe nesineke? “Ngobe akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (Fundza 2 Phetro 3:9.) Kusebentile yini kuba nesineke kwakhe? Yebo! Tigidzi tebantfu labanetinhlitiyo leticotfo tisondzelene naye. Siyetsemba nekutsi letinye tigidzi letinyenti titawenta lokufanako. Nobe kunjalo, sineke sakhe sihambe sigcine. Uyabatsandza bantfu, kodvwa akayekeleli. Angeke abuvumele bubi kutsi buhlale bukhona kuze kube phakadze.​—Hab. 2:3.

12. Jesu usilingisa njani sineke saJehova?

¹² Jesu ulingisa Babe wakhe. Sekuphele iminyaka leminyenti Jesu alingisa kutfobeka kwaJehova. Umbonile Sathane anyundzela Jehova kanye nebantfu labetsembekile. (Gen. 3:4, 5; Jobe 1:11; Semb. 12:10) Uphindze wabona kuhlupheka lokumangalisako. Cabanga nje kutsi kungenteka ukufuna kangakanani “kubhidlita imisebenti yaDeveli”! (1 Joh. 3:8) Yini lemsita alindze ngesineke kutsi Jehova amnike imvume yekubhidlita imisebenti yaDeveli ngalokuphelele? Lokunye kwako kutsi utfobekile, uyati kutsi nguJehova loncuma kutsi utakuletsa nini kuphela kwalelive.​—Imis. 1:7.

13. Jesu wakhombisa njani kutsi uyababeketelela baphostoli bakhe futsi ngasiphi sizatfu?

¹³ Ngesikhatsi Jesu alamhlabeni, bekababeketelela nebaphostoli bakhe. Sibonelo nje, ngesikhatsi baphikisana emahlandla ngekutsi ngubani lomkhulu emkhatsini wabo, Jesu akazange abacansukele. Kunaloko, wachubeka ababeketelela. (Luk. 9:46; 22:24-27) Beketsemba kutsi bebatawugcine balwentile lushintjo lolufanele. Ukile yini waphindzaphindza liphutsa lelifanako? Nangabe kunjalo, akukujabulisi yini kwati kutsi ubuswa yiNkhosi letfobekile nalenesineke?

14. Yini lesingayenta kuze sibe nesineke?

¹⁴ Singamlingisa njani Jehova? Nangabe sifundza kuba ‘nemicabango yaKhristu,’ sitawukhona kucabanga njengaJehova futsi sente njengaye. (1 Khor. 2:16) Yini lengasisita kutsi siyicondze kancono imicabango yaKhristu? Kute indlela yekujubela. Kufanele sifundze emaVangeli. Ngemuva kwaloko kutawudzingeka kutsi sicabange ngalokujulile ngaloko Jesu lakwenta kanye netizatfu tekukwenta. Ngetulu kwaloko, kufanele sicele Jehova kutsi asisite sitfobeke futsi sibe nesineke njengaJesu. Njengobe sichubeka siba nemicabango yaKhristu, sitamlingisa kakhulu Nkulunkulu ngekutsi sitibeketelele kakhudlwana tsine kanye nebazalwane betfu nabodzadze.​—Mat. 18:26-30, 35.

JEHOVA UNAKA LABO LABAPHANSI

15. Jehova ukhombise njani kutsi aliciniso emavi lakuTihlabelelo 138:6?

¹⁵ Fundza Tihlabelelo 138:6. Siyaciniseka kutsi bativa bakhetsekile labo labaphansi ngekunakwa nguMbusi wendalo yonkhe! Cabanga nganati tibonelo letimbalwa tebantfu labaphansi Jehova lakhetsa kubanaka kuleminyaka leminyenti leyendlulile. Kungenteka labanye babo abasheshi bafike engcondvweni, kodvwa kubhaliwe ngabo eBhayibhelini. Jehova waphefumulela Mosi kutsi abhale ngalomunye umnakekeli lokutsiwa nguDebhora, lowaphila kadzeni. Wasebenta emndenini wa-Isaka newaJakobe, futsi seyiyonkhe iminyaka layicitsa lapho beyingaba ngu-125! Nanobe kute lokunganani lokubhaliwe ngalomfati lowetsembekile, Jehova wacinisekisa kutsi eBhayibhelini kubhalwe kutsi bekatsandvwa kangakanani. (Gen. 24:59; 35:8, umbhalo longentasi) Ngemuva kweminyaka leminyenti, Jehova wakhetsa Davide, lebekangumelusi kutsi abe yiNkhosi yesive sema-Israyeli. (2 Sam. 22:1, 36) Ngekushesha nje ngemuva kwekutalwa kwaJesu, Nkulunkulu watfumela tingilosi kubelusi labaphansi kuze babe bekucala kwati kutsi loyo lebekatawuba nguMesiya besekatelwe eBhetlehema. (Luk. 2:8-11) Ngetulu kwaloko, ngesikhatsi boJosefa naMariya bamikisa Jesu ethempelini, Jehova wenta Simiyoni na-Ana lebesebakhulile bativa babakhulu ngekutsi abakhombise iNdvodzana yakhe. (Luk. 2:25-30, 36-38) Ngako kusebaleni kutsi “nanobe Jehova aphakeme, uyamnakekela lotfobekile”!

16. Jesu wamlingisa njani Babe wakhe endleleni laphatsa ngayo labanye?

¹⁶ Jesu ulingisa Babe wakhe. NjengaBabe wakhe, Jesu wabanaka bantfu labaphansi. Wafundzisa bantfu ‘lebebangakafundzi lokuyaphi nalababantfukatana’ emaciniso lamayelana neMbuso waNkulunkulu. (Imis. 4:13; Mat. 11:25) Ngetulu kwaloko, welapha labagulako, futsi loko bekakwenta ngendlela lebenta bative batsandvwa futsi bahlonishwa. (Luk. 5:13) Ngebusuku bekugcina ngaphambi kwekutsi afe, wenta intfo lebeyentiwa sisebenti, wageza tinyawo tebaphostoli bakhe. (Joh. 13:5) Ngaphambi kwekutsi enyukele ezulwini, waniketa bonkhe balandzeli bakhe bangaleso sikhatsi nebalamuhla, umsebenti lebewutabenta babe nesitfunti futsi lobaluleke kwendlula nobe ngabe ngumuphi longahle wentiwe bantfu, wekusita labanye kutsi batfole kuphila lokuphakadze.​—Mat. 28:19, 20.

17. Singakhombisa njani kutsi siyabatsandza futsi siyabahlonipha labanye? (Buka nesitfombe.)

¹⁷ Singamlingisa njani Jehova? Nasibacocela tindzaba letimnandzi bonkhe labo labasilalelako, sisuke sikhombisa kutsi siyabatsandza futsi siyabahlonipha ngisho nobe bakhule ngayiphi indlela, ngisho nobe linjani libala labo lesikhumba, nobe bafundze kangakanani. Ngetulu kwaloko, sisuke sibahlonipha bazalwane betfu nabodzadze nasibatsatsa njengalabakhulu kunatsi, ngisho nobe sinamaphi emakhono nobe senta miphi imisebenti ebandleni. (Fil. 2:3) Jehova uyajabula nangabe sitfobeka futsi ‘sihamba embili’ ekuhloniphaneni kuletintfo nangaletinye tindlela.​—Rom. 12:10; Zef. 3:12.

18. Yini lekwenta ufune kulingisa kutfobeka kwaJehova?

¹⁸ Njengobe sitimisela kulingisa kutfobeka kwaBabe wetfu wasezulwini, sitawungeneka kakhudlwana, sicabangele kakhudlwana, futsi sibe nesineke kakhudlwana. Ngetulu kwaloko, sitawubatsandza futsi sibahloniphe labanye njengobe Jehova enta. Shengatsi imetamo yetfu yekusondzela kakhulu kuNkulunkulu wetfu lotfobekile ingenta ngamunye wetfu kutsi abe ligugu nakakhulu emehlweni akhe!​—Isa. 43:4.