Incwadzi YaJobe Ingakusita Nawubhekene Netimo Letimatima

1-2. Kuhle ngani kufundza incwadzi yaJobe?

KULAMALANGA, ukile yini wafundza incwadzi yaJobe? Nanobe yabhalwa eminyakeni lengaba ngu-3 500 leyendlulile, bantfu labanyenti batsi ingulenye yetincwadzi letimangalisa kakhulu kuletiketabhalwa. Bantfu bayamdvumisa umbhali walencwadzi ngobe usebentisa emagama lokumelula kuwacondza, kodvwa lamahle futsi lanemandla. NguMosi umbhali walencwadzi, kodvwa loko lakubhala bekakutjelwa nguJehova Nkulunkulu.​—2 Thim. 3:16.

² Incwadzi yaJobe yincwadzi lebaluleke kakhulu eBhayibhelini. Ngasiphi sizatfu? Kuletinye tato, kutsi ikhuluma ngentfo lebaluleke kakhulu letsintsa yonkhe indalo lehlakaniphile, lokukungcweliswa kwelibito laNkulunkulu. Iphindze isifundzise ngebuntfu baJehova lobuhle, lobufaka ekhatsi lutsandvo lwakhe, kuhlakanipha, kulunga kanye nemandla. Sibonelo nje, lencwadzi yaJobe ibita Jehova ngekutsi “nguSomandla” tikhatsi letingu-31, lokutikhatsi letinyenti kwendlula letinye tincwadzi teliBhayibheli tihlanganisiwe. Lencwadzi yaJobe iphindze iphendvule imibuto leminyenti lemayelana nekuphila, lokufaka ekhatsi umbuto lochubeka uhlupha bantfu labanyenti lotsi: Nkulunkulu ukuvumelelani kuhlupheka?

3. Kungasisita njani kufundza incwadzi yaJobe?

³ Kufundza incwadzi yaJobe kungafananiswa nekucanca intsaba. Nawusetulu entsabeni, ungakhona kuyibona kahle yonkhe indzawo lekutungeletile. Kufundza incwadzi yaJobe kungasisita sikhone kukubona ngalokucacile loko Jehova lakucabangako ngekuhlupheka kwetfu. Kulesihloko, sitawufundza ngekutsi indzaba yaJobe beyingawasita njani ema-Israyeli nekutsi ingasisita njani lamuhla. Sitawuphindze sifundze ngekutsi singayisebentisa njani lendzaba leseBhayibhelini kuze sisite labanye.

NKULUNKULU UVUMELA JOBE KUTSI AHLUPHEKE

4. Ngumuphi umehluko lomkhulu lebewukhona emkhatsini waJobe nema-Israyeli lebekaseGibhithe?

⁴ Ngesikhatsi ema-Israyeli atigcili eGibhithe, lenye indvodza lokutsiwa nguJobe beyihlala eveni lase-Uzi, mhlawumbe belingasemphumalanga yeliVe Lesetsembiso, ngasenyakatfo ye-Arabhiya. Ngalokwehluke kakhulu kuma-Israyeli lebesekacale kukhonta tithico eGibhithe, Jobe bekakhonta Jehova ngekwetsembeka. (Josh. 24:14; Hez. 20:8) Naku Jehova lakusho ngaJobe: “Kute umuntfu lofana naye emhlabeni.”a (Jobe 1:8) Jobe bekanjinge kakhulu futsi anesikhundla lesiphakeme kakhulu kwendlula nobe ngabe ngumuphi umuntfu eMphumalanga. (Jobe 1:3) Cabanga nje kutsi Sathane watfukutsela kanganani nakabona lendvodza leyatiwako futsi lehlonishwako ikhonta Nkulunkulu ngekwetsembeka!

5. Yini leyenta Jehova wavumela Jobe kutsi ahlupheke? (Jobe 1:20-22; 2:9, 10)

⁵ Sathane watsi Jobe bekatawuyekela kukhonta Jehova nakangahlupheka. (Jobe 1:7-11; 2:2-5) Nanobe Jehova bekamtsandza kakhulu Jobe, kodvwa lokunyundzela kwaSathane kwavusa letinye tindzaba letibalulekile, ngako Jehova wavumela Sathane kutsi etame kukhombisa kutsi loko lakushoko kuliciniso yini. (Jobe 1:12-19; 2:6-8) Sathane wenta kutsi Jobe alahlekelwe yimfuyo yakhe, wenta kutsi bantfwana bakhe labangu-10 bafe, futsi wamshaya ngematfumba labuhlungu kusukela enhloko kuya elutwaneni. Kodvwa letintfo letibuhlungu letentiwa nguSathane kuze acedze bucotfo baJobe atizange tiphumelele. (Fundza Jobe 1:20-22; 2:9, 10.) Ngekuhamba kwesikhatsi, Jehova wamelapha, wabuyisela umcebo wakhe nelidvumela lakhe futsi wamupha nalabanye bantfwana labangu-10. Ngalokusimangaliso, wenta kutsi Jobe aphile iminyaka lengu-140 ngemuva kwaloko, lokwaba sikhatsi lesidze ngalokwenele kutsi abone titukulwane takhe letine. (Jobe 42:10-13, 16) Lendzaba beyingabasita njani bantfu baJehova basesikhatsini lesendlulile, futsi ingasisita njani tsine lamuhla?

6. Bekungawasita njani ema-Israyeli kwati kutsi yini leyente Nkulunkulu wavumela kuhlupheka? (Buka nesitfombe.)

⁶ Indlela ema-Israyeli lebekangasitakala ngayo. Kuphila bekungasimelula kuma-Israyeli eGibhithe. Sibonelo nje, Joshuwa naKhalebi bacitsa iminyaka yabo yebusha batigcili. Nanobe bekungasilo liphutsa labo, bacitsa iminyaka lengu-40 basehlane. Nangabe ema-Israyeli bekakwati loko lokwehlela Jobe kanye nemiphumela yako, siyaciniseka kutsi kwawasita futsi kwasita nema-Israyeli lebekatawutalwa acondza kutsi ngubani mbambambamba lobangela kuhlupheka. Bewangacondza kancono nekutsi yini leyente Nkulunkulu wavumela kuhlupheka, nekutsi kubaluleke kanganani kuye kuba cotfo kwebantfu nekwetsembeka kwabo kuye.

7-8. Incwadzi yaJobe ingabasita njani labo labanetinkinga? Niketa sibonelo.

⁷ Singasitakala njani? Lokubuhlungu kutsi bantfu labanyenti lamuhla abasametsembi Nkulunkulu ngenca yekutsi abacondzi kutsi yini lebangela kutsi tintfo letimbi tenteke kubantfu labakahle. Cabanga ngesibonelo saHazelb waseRwanda. Ngesikhatsi asemncane, bekakholelwa kuNkulunkulu. Kodvwa tintfo tase tiyashintja. Batali bakhe badivosa, futsi make wakhe wabese ushada nalenye indvodza lebeyimphatsa kabi Hazel. Nakaseminyakeni yekutfomba, wadlwengulwa. Ngesikhatsi Hazel aya lapho bekakhontela khona Nkulunkulu kuze atfole indvudvuto, akazange ayitfole. Ngekuhamba kwesikhatsi, wabhalela Nkulunkulu incwadzi. Kulencwadzi watsi: “Nkulunkulu, ngithantazile kuwe, ngetama kwenta lokuhle, kodvwa wena ubuyisele lokuhle lengikwentile ngalokubi. Nyalo sengiyakushiya, futsi ngifuna kwenta nobe ngabe yini letangijabulisa.” Sibavela buhlungu kakhulu bantfu labanjengaHazel, labentiwe bakholelwa kutsi nguNkulunkulu lobangela kuhlupheka kwabo!

⁸ Kodvwa tsine sifundzile kulendzaba lesencwadzini yaJobe kutsi akusuye Nkulunkulu lobangela kutsi sibhekane netinkinga, kepha nguSathane! Siphindze safundza kutsi akukafaneli sicabange kutsi labo labanetinkinga bavuna loko labakuhlanyele. ImiBhalo isitjela kutsi “sikhatsi senhlekelele netimo letingakalindzeleki” kungehlela nobe ngubani nanganobe ngusiphi sikhatsi. (Shu. 9:11; Jobe 4:1, 8) Siphindze safundza kutsi nasihlala setsembekile nasibhekene netinkinga, siniketa Jehova litfuba lekutsi akhone kuphendvula Sathane kutsi unemanga. Loko kusita ekuvikeleni lidvumela lakhe. (Jobe 2:3; Taga 27:11) Asikubukeli phansi loko lesikufundzile, loko kusisita sati kutsi yini leyenta tsine kanye nalabo lesibatsandzako sibe netinkinga. Ngekuhamba kwesikhatsi, Hazel wadadisha liBhayibheli naBoFakazi BaJehova futsi wabese uyacondza kutsi akusuye Nkulunkulu lobangele kuhlupheka kwakhe. Watsi: “Ngaphindze ngathantaza kuNkulunkulu ngalokusuka enhlitiyweni. Ngamtjela Jehova kutsi ngesikhatsi ngitsi ngiyamshiya, bengingamshiyi mbamba. Ngetulu kwako konkhe, bengingamati kahle. Nyalo sengiyacondza kutsi Jehova uyangitsandza. Sengijabulile futsi ngenetisekile.” Kusijabulisa kakhulu kwati kutsi yini leyenta Nkulunkulu avumele kuhlupheka! Nyalo ase sicoce ngekutsi lendzaba yaJobe ingasisita njani nasinetinkinga.

INDZABA YAJOBE ISISITA NJANI KUTSI SICINISELE?

9. Ungasichaza njani simo saJobe njengobe ahleti emlotseni? (Jakobe 5:11)

⁹ Mbone ngeliso lengcondvo Jobe ahleti yedvwa emlotseni, agcwele ematfumba wonkhe umtimba futsi asetinhlungwini letimatima. Sikhumba sakhe sesishiswe ngulokugula, futsi sesiyacacabuka njengobe aphelile emtimbeni. Emandla lasasele nawo ekutenwaya ngelucetu lwesitja selubumba, futsi ukhala ngebuhlungu labuvako. Kodvwa bekungasiko nje kutsi uyaphila ngobe utawutsini, wachubeka etsembekile kuJehova futsi etsembele kuye. (Fundza Jakobe 5:11.) Yini leyasita Jobe kutsi acinisele?

10. Bebunjani budlelwane baJobe naJehova? Chaza.

¹⁰ Jobe watjela Jehova indlela lebekativa ngayo. (Jobe 10:1, 2; 16:20) Sibonelo nje, sehluko 3 sisitjela kutsi Jobe wakhonona kabuhlungu ngaletinhlekelele betimehlele, lebekente liphutsa lekucabanga kutsi nguJehova lebekatibangele. Etimphikiswaneni letilandzelanako laba nato nalamadvodza lamatsatfu lametayele, wabuvikela ngemandla bucotfo bakhe, futsi loko lebekakusho bekahle akubhekisela kuJehova. Emavi aJobe aveta kutsi kwaphela sikhatsi lesitsite atibona alunge kakhulu kunaNkulunkulu. (Jobe 10:1-3; 32:1, 2; 35:1, 2) Kodvwa wavuma kutsi bekahle ‘akhuluma tintfo letingenangcondvo’ njengobe etama kuvikela bucotfo bakhe. (Jobe 6:3, 26) Esehlukweni 31, sifundza kutsi Jobe bekafuna Nkulunkulu amphendvule, asho kutsi akakufaneli kujeziswa. (Jobe 31:35) Kodvwa bekungakafaneli aphikelele atsi Nkulunkulu akamtjele kutsi yini leyente waba naletinkinga.

11. Yini Jehova layenta ngesikhatsi Jobe atsi ucotfo?

¹¹ Sesiyabona kutsi ngesikhatsi Jobe akhuluma ngendlela lakhuluma ngayo, loko kungenca yekutsi bebabangani labakhulu naJehova futsi bekametsemba ngalokuphelele kutsi utamehlulela kahle. Ekugcineni, ngesikhatsi Jehova amphendvula asesivunguvungwini, akazange amchazele tonkhe tizatfu letente waba naletinkinga. Akazange futsi amsole ngekukhonona kwakhe nobe ngenca yekutsi utsite akanacala. Kunaloko, Jehova wakhuluma naJobe ngendlela babe langakhuluma ngayo nendvodzana yakhe. Leyo bekuyindlela lekahle. Umphumela waba kutsi ngekutfobeka, Jobe wavuma kutsi bekukuncane kakhulu lakwatiko, futsi waphendvuka kulamavi bekawakhulume angakacabangi. (Jobe 31:6; 40:4, 5; 42:1-6) Lendzaba beyingabasita njani bantfu baJehova basesikhatsini lesendlulile, futsi ingasisita njani lamuhla?

12. Indzaba yaJobe beyingawasita njani ema-Israyeli?

¹² Indlela ema-Israyeli lebekangasitakala ngayo. Ema-Israyeli bekangafundza kuloko lokwenteka kuJobe. Cabanga ngesibonelo saMosi. Kwadzingeka abeketelele tinkinga letinyenti, kudvumateka nekucedvwa emandla njengobe atsatsa umsebenti wekuba ngumholi wesive saka-Israyeli. Ngalokwehlukile kuma-Israyeli lebekavukela, futsi lebekavame kukhonona ngaJehova, Mosi watjela Jehova loko bekumkhatsata. (Eks. 16:6-8; Num. 11:10-14; 14:1-4, 11; 16:41, 49; 17:5) Kwadzingeka nekutsi Mosi abeketele ngesikhatsi alungiswa. Sibonelo nje, ngesikhatsi ema-Israyeli amise emathende awo eKhadeshi, mhlawumbe ngemnyaka wesi-40 asehlane, Mosi ‘wakhuluma kabi’ futsi wehluleka kudvumisa libito laNkulunkulu. (Hla. 106:32, 33) Ngenca yaloko, Jehova akazange amvumele kutsi angene eVeni Lesetsembiso. (Dut. 32:50-52) Kungenteka lesijeziso samvisa buhlungu kakhulu Mosi, nobe kunjalo, wasemukela. Lendzaba yaJobe beyingatisita titukulwane letitako tema-Israyeli kutsi tibeketelele tinkinga letabhekana nato. Ngekucabangisisa ngalendzaba, labetsembekile bangafundza kutsi bangayiveta njani indlela labativa ngayo kuJehova, nekutsi bangakugwema njani kutibona balunge kakhulu kunaJehova. Bebangafundza nekutsi bangasemukela njani sijeziso lesivela kuJehova ngekutfobeka.

13. Indzaba yaJobe ingasisita njani kutsi sicinisele? (KumaHebheru 10:36)

¹³ Singasitakala njani? Njengobe singemaKhristu, natsi siyakudzinga kucinisela. (Fundza KumaHebheru 10:36.) Sibonelo nje, labanye betfu bayagula nobe bakhatsateke kakhulu, babhekene nenkinga lematima emndenini, bashonelwe ngumuntfu labamtsandzako, nobe babhekene nalenye inkinga lematima. Ngetulu kwaloko, ngaletinye tikhatsi loko lokushiwo ngulabanye nobe labakwentako kungenta kube matima kutsi sibeketelele simo lesikuso. (Taga 12:18) Nobe kunjalo, incwadzi yaJobe isifundzisa kutsi singamtjela Jehova indlela lesitiva ngayo, sibe siciniseka kutsi utawusiva. (1 Joh. 5:14) Angeke asisole nangabe loko lesimtjela kona lokusuka enhlitiyweni kuhle kuba ‘ngemavi langenangcondvo,’ njengobe kwenteka kuJobe. Kunaloko, Nkulunkulu utasinika kuhlakanipha kanye nemandla lesiwadzingako kuze sicinisele. (2 Khr. 16:9; Jak. 1:5) Angaphindze asilungise kuye ngelizinga lesidzinge ngalo, njengobe enta kuJobe. Incwadzi yaJobe iphindze isifundzise kutsi singacinisela njani nangabe sitfola seluleko nobe sijeziso lesivela eVini laJehova, enhlanganweni yakhe nobe kubangani labavutsiwe. (Heb. 12:5-7) Njengobe kwamsita Jobe kutitfoba emukele siyalo lasitfola, natsi kuyasisita kuvuma kulungiswa. (2 Khor. 13:11) Nembala, kuyasisita loko lesikufundza kuJobe! Nyalo ase sicoce ngekutsi singayisebentisa njani lendzaba yaJobe kuze sisite labanye.

SEBENTISA INCWADZI YAJOBE KUZE USITE LABANYE

14. Nguyiphi indlela lesingachazela ngayo umuntfu kutsi kwentiwa yini kube nekuhlupheka?

¹⁴ Nawushumayela, uke wahlangana yini nemuntfu lowakubuta kutsi kwentiwa yini kutsi sihlupheke? Wawuphendvula njani lombuto? Kungenteka wakhuluma ngaloko liBhayibheli lelitsi kwenteka ensimini yase-Edeni. Mhlawumbe wacala ngekumtjela kutsi Sathane losidalwa semoya lesibi watjela bantfu bekucala emanga lenta kutsi bavukele Nkulunkulu. (Gen. 3:1-6) Mhlawumbe wabese uyamtjela kutsi ngemuva kwekuvukela kwabo-Adamu na-Eva, umhlaba wabese ugcwala tinkinga kanye nekufa. (Rom. 5:12) Kungenteka ekugcineni wachaza kutsi Nkulunkulu uvumele kutsi kwengce sikhatsi lesenele kuze kubonakale kutsi Sathane unemanga, futsi kushunyayelwe tindzaba letimnandzi tekutsi esikhatsini lesitako bantfu batawuphindze babe bete sono. (Semb. 21:3, 4) Lena yindlela lekahle yekuphendvula lombuto, futsi ingaba nemiphumela lemihle.

15. Singayisebentisa njani incwadzi yaJobe nasisita umuntfu lobuta kutsi yini leyenta kube nekuhlupheka? (Buka netitfombe.)

¹⁵ Cabanga ngalenye indlela longayisebentisa lesencwadzini yaJobe nawuphendvula lombuto. Ungacala ngekumncoma lomuntfu kutsi ubute umbuto lonengcondvo. Ngemuva kwaloko, ungasho kutsi lenye indvodza leyetsembekile lokutsiwa nguJobe leyaba netinkinga letinyenti, nayo yaba nembuto lofanako. Yaze yacabanga nekutsi nguNkulunkulu lebekabangela lobuhlungu lebeyibhekene nabo. (Jobe 7:17-21) Kungenteka lomuntfu ajabule ngekutsi kusukela kadzeni bantfu bebasolo batibuta lombuto. Ngemuva kwaloko, ngekuhlakanipha ungamchazela kutsi bekungasuye Nkulunkulu lowabangela tinkinga taJobe, kepha bekunguDeveli. Develi wakwenta loko ngobe beketama kukhombisa kutsi bantfu bakhonta Nkulunkulu ngenca yetizatfu tebugovu. Ungaphindze wengete kutsi nanobe kungasuye Nkulunkulu lowabangela tinkinga taJobe, kepha wativumela, ngaleyondlela akhombisa kutsi uyabetsemba bantfu labetsembekile kutsi batawukhombisa kutsi Sathane unemanga. Ekugcineni, ungamchazela kutsi ngekuhamba kwesikhatsi Nkulunkulu wambusisa Jobe ngenca yekuhlala etsembekile. Ngako singabadvudvuta labanye ngekubacinisekisa kutsi tinkinga ativeli kuJehova.

16. Shano lokwenteka lokukhombisa kutsi incwadzi yaJobe ingamsita njani umuntfu lonetinkinga.

¹⁶ Cabanga ngendlela incwadzi yaJobe leyamsita ngayo Mario. Ngalelinye lilanga nga-2021, lomunye dzadze bekashumayela ngelucingo. Umuntfu wekucala lamshayela kwaba nguMario, futsi wamfundzela livesi wabese uyamchazela kutsi Nkulunkulu akagcini nje ngekulalela imithantazo yetfu kepha uphindze asetsembise likusasa lelihle nekusinika litsemba. Ngesikhatsi lodzadze ambuta kutsi ucabangani ngaloko, Mario wamtjela kutsi bekabhala incwadzi lenemavi ekugcina afuna kutibulala. Mario watsi: “Ngiyakholelwa kuNkulunkulu, kodvwa lamuhla ekuseni bengitibuta kutsi ungishiyile yini.” Ngesikhatsi lodzadze aphindze amshayela, bacoca ngetinkinga taJobe. Mario wancuma kuyifundza yonkhe incwadzi yaJobe. Ngako lodzadze wamtfumelela Lihumusho Lemhlaba Lomusha LemiBhalo Lengcwele ngetebuchwephesha. Waba yini umphumela? Mario wasemukela sifundvo seliBhayibheli futsi wakujabulela kufundza lokunyenti ngaNkulunkulu lonelutsandvo lowakhombisa kutsi unendzaba naye.

17. Yini lekwenta ubonge Jehova ngekutsi wafaka incwadzi yaJobe eVini lakhe leliphefumulelwe? (Jobe 34:12)

¹⁷ Kusebaleni kutsi liVi laNkulunkulu linemandla lamakhulu ekusita bantfu, lokufaka ekhatsi labo labanetinkinga. (Heb. 4:12) Sibonga kakhulu ngekutsi Jehova wafaka lendzaba yaJobe eVini lakhe leliphefumulelwe! (Jobe 19:23, 24) Incwadzi yaJobe iyasicinisekisa kutsi vele “Nkulunkulu akatenti tintfo letimbi.” (Fundza Jobe 34:12.) Iphindze isifundzise kutsi yini leyenta Nkulunkulu avumele kuhlupheka, nekutsi singakubeketelela njani. Ngetulu kwaloko, isisita sikwati kudvudvuta labo lababhekene netinkinga. Esihlokweni lesilandzelako, sitawucoca ngalokunye kuhlakanipha lesikutfola encwadzini yaJobe, lokunjengekutsi singabeluleka njani kahle labanye.