April

Kuze umtimba waJesu nengati yakhe kusisite, kufanele sibe nekukholwa enhlawulweni. (Ef. 1:7) Labo Jesu lababita ngekutsi ‘nguletinye timvu,’ abasidli lesinkhwa futsi abalinatsi leliwayini njalo ngemnyaka nakuSidlo SeNkhosi Sakusihlwa, futsi akukafaneli bakwente loko. (Joh. 10:16) Nobe kunjalo, bayazuza kulenyama yaJesu Khristu nasengatini yakhe ngekutsi bakhombise kukholwa enhlawulweni yakhe nakuloko labatakutfola ngenca yalenhlawulo. (Joh. 6:53) Ngalokwehlukile, labo labadla lesinkhwa futsi banatse leliwayini bakhombisa kutsi basesivumelwaneni lesisha njengobe batindlalifa teMbuso wasezulwini. Ngako, ngisho nobe sigcotjiwe nobe singemalunga aletinye timvu, kufanele sibe nekukholwa lokucinile enhlawulweni kuze siphile phakadze. w24.12 13 ¶14, 16

Ngesikhatsi seSidlo SeNkhosi Sakusihlwa, Jesu wanika baphostoli bakhe sinkhwa lesite imvubelo futsi wabatjela kutsi simelela umtimba wakhe. Wabese ubanika liwayini futsi watsi limelela ‘ingati yakhe yesivumelwane.’ (Mak. 14:22-25; Luk. 22:20; 1 Khor. 11:24) Lesivumelwane wasibita ngekutsi ‘sivumelwane lesisha,’ futsi ngulabo labatawubusa naye eMbusweni waNkulunkulu labakulesivumelwane. (Heb. 8:6, 10; 9:15) NgeSidlo SeNkhosi Sakusihlwa, Jesu bekakhuluma ‘nemhlambi lomncane.’ Lelicembu lacala ngebaphostoli bakhe labetsembekile lebebanaye kulelikamelo. Ngibo labatawuba naJesu ezulwini. w24.12 11 ¶9-10

Jesu watsengiswa, waboshwa, wetfukwa, wanyundzelwa, walahlwa ngelicala futsi waphatfwa ngesibhuku. Emasotja aya naye endzaweni lebekatawubulawelwa kuyo futsi afike ambetsela elugodvweni. Njengobe abeketelela bonkhe lobuhlungu lobungaka ngekwetsembeka, bekukhona lebekeva buhlungu kakhulu. BekunguJehova Nkulunkulu. Bekanawo emandla futsi bekangakhona kusita iNdvodzana yakhe kutsi ingahlupheki kodvwa akazange akwente loko. Ngasiphi sizatfu? Kalula nje, lutsandvo. Umhlatjelo waJesu ubufakazi lobuhamba embili bekutsi Jehova ukutsandza kakhulu. Wanikela ngeNdvodzana yakhe layitsandzako kutsi ibe ngumhlatjelo futsi wabeketelela buhlungu lobungachazeki kuze akusindzise esonweni nasekufeni. (1 Joh. 4:9, 10) Ufuna kusita ngamunye wetfu kutsi alwe nesono futsi asincobe! w24.08 6 ¶13-14

Singayicondza kancono indlela Jehova lasitsandza ngayo ngekutsi sicabange ngendlela lalahlekelwa ngayo kuze kube nenhlawulo. Sathane utsi kute sikhonti saNkulunkulu lesitawuhlala setsembekile kuJehova nangabe kumatima kwenta njalo. Kuze Jehova akhombise kutsi lawo ngemanga, wavumela Jesu kutsi advonse kamatima ngaphambi kwekutsi afe. (Jobe 2:1-5) Njengobe Jehova bekabukile, baholi benkholo lebebaphikisa Jesu bahlekisa ngaye, emasotja amshaya futsi wabetselwa elugodvweni. Ngemuva kwaloko, Jehova wabona ngesikhatsi iNdvodzana yakhe layitsandzako ifa kabuhlungu. (Mat. 27:28-31, 39) Jehova bekanawo emandla ekukuvimba konkhe loku kutsi kungenteki. (Mat. 27:42, 43) Kodvwa kube wakwenta, bekutawuba bete inhlawulo futsi besitawuba bete litsemba. Ngako Jehova wavumela iNdvodzana yakhe kutsi ive buhlungu lobukhulu kwaze kwaba ngulapho ifa. w25.01 22 ¶7

NguNisani 16, 33 C.E. Bafundzi baJesu basebuhlungwini lobukhulu futsi besaba kakhulu. Lababili babo besuka eJerusalema baya e-Emawusi. Kwachamuka lomunye umuntfu labangamati futsi wahamba nabo. Labafundzi bamtjela indlela lebebadvumateke ngayo ngaloko bekwenteke kuJesu. Lomuntfu wabese ucala kukhuluma ngetintfo labangayuze batikhohlwe. “Wacala kulokwabhalwa nguMosi wayofika kulokwabhalwa ngibo bonkhe baPhrofethi,” wabachazela kutsi yini lebeyente kwadzingeka kutsi Mesiya ahlupheke futsi afe. Ngesikhatsi lamadvodza lamatsatfu efika e-Emawusi, lomuntfu labangamati wativeta kutsi ungubani, bekunguJesu lovusiwe! (Luk. 24:13-35) Jesu wabonakala tikhatsi letinyenti kubafundzi bakhe kulamalanga ekugcina langu-40 alamhlabeni. Kuleso sikhatsi, wakhutsata balandzeli bakhe lebebeva buhlungu futsi besaba. Bajabula baphindze baba nesibindzi sekushumayela nekufundzisa ngetindzaba letimnandzi teMbuso. w24.10 12 ¶1-3

Ngekuhamba kwesikhatsi umntfwana uyakhula, kodvwa akutentakaleli kutsi umuntfu abe ngumKhristu lovutsiwe. Sibonelo nje, bazalwane nabodzadze baseKhorinte batemukela tindzaba letimnandzi, babhajatiswa, batfola umoya longcwele futsi bafundza lokunyenti kuloko umphostoli Pawula labafundzisa kona. (Imis. 18:8-11) Nobe kunjalo, ngemuva kweminyaka babhajatisiwe, labanyenti babo bebasolo bangemaKhristu langakavutfwa. (1 Khor. 3:2) Kuze sibe ngemaKhristu lavutsiwe kufanele sicale sibe nesifiso sekuvutfwa. Labo ‘labatsandza kuba bete lwati,’ lokungulabo labatsandza kuba tinswane, angeke babe ngemaKhristu lavutsiwe. (Taga 1:22) Asifuni kuba njengalabo lasebakhulile kodvwa labachubeka betsembela kubatali babo kuze babentele tincumo. Kunaloko, sifuna kwenta loko lokufanele ngabe siyakwenta futsi sente konkhe lokusemandleni kuze buhlobo betfu naJehova buchubeke bukhula. Nangabe usalwela kuba ngumKhristu lovutsiwe, thantaza kuJehova, yena utakunika “sifiso nemandla ekwenta intsandvo yakhe.”​—Fil. 2:13. w24.04 4 ¶9-10

Jehova usitjela indlela lativa ngayo mayelana nekwehlulela bantfu. (Hez. 33:11) Jehova angeke amane nje ambhubhise phakadze umuntfu ngaphandle kwesizatfu lesivakalako. Umusa wakhe mkhulu kakhulu futsi uhlale awukhombisa bantfu nakunesidzingo. Yini lesiyatiko mayelana nebantfu labangeke bavuswe? LiBhayibheli lisitjela ngetibonelo letimbalwa. Jesu washo kutsi Judasi Skariyothi bekangeke avuswe. (Mak. 14:21) Judasi wenta ngemabomu intfo lephambene naloko bekufiswa nguJehova neNdvodzana yakhe. (Buka sihloko lesitsi “Yisono Esinjani Esingenakuthethelelwa” ku jw.org.) Jesu washo kutsi labanye baholi benkholo lebebamphikisa bebangeke bavuke nasebafile. (Mat. 23:33) Ngetulu kwaloko, nemphostoli Pawula wecwayisa kutsi tihlubuki letingaphendvuki betingeke tivuswe.​—Heb. 6:4-8; 10:29. w24.05 4 ¶10-11

Nasihlale sisondzelene naJehova, kute Sathane langakwenta lokungasilimata kuze kube phakadze. (1 Joh. 3:8) Eveni lelisha, Jehova utawuchubeka avikela bangani bakhe labetsembekile kunobe yini lengalimata buhlobo babo naye futsi bangasafi. (Semb. 21:4) Kuyintfo lekhetseke kakhulu kutsi sibe tivakashi ethendeni laJehova, lokusho kuba nebuhlobo lobuhle naye futsi sibe bangani bakhe kuze kube phakadze. (Hez. 37:27) Kufanele sitiphatse njani nangabe sifuna kuchubeka sitivakashi takhe? Nangabe bewungamenywa ekhaya lalotsite, bewungafuna kwati kutsi yini layilindzele kuwe. Ngendlela lefanako, natsi sifuna kwati kutsi yini Jehova layilindzele kulabo labafuna kuchubeka bativakashi ethendeni lakhe. Indlela lesimtsandza ngayo Jehova yenta kutsi sente konkhe lesingakwenta kuze ‘simjabulise ngalokuphelele.’ (Khol. 1:10) Kufanele simhloniphe ngalokujulile, singakhohlwa kutsi ungubani. Loko kutasisita kutsi singatenti tintfo langatitsandzi. Sifuna kuhlala ‘sitfobekile nasihamba naNkulunkulu’ wetfu.​—Mik. 6:8. w24.06 4 ¶8-9

Jehova wacela Abrahama kutsi ente umhlatjelo ngendvodzana yakhe Isaka. Lena bekuyintfo lematima nalebuhlungu kakhulu ku-Abrahama. Nobe kunjalo, wamlalela Jehova. Kodvwa Nkulunkulu wamvimba sekusele kancane nje kutsi abulale lendvodzana yakhe. Lesibonelo sifundzisa bonkhe bantfu labanekukholwa sifundvo lesibalulekile. Jehova bekatawuvuma kunikela ngeNdvodzana yakhe layitsandzako kutsi ibe ngumnikelo. Nguleyo-ke indlela labatsandza ngayo bantfu! (Gen. 22:1-18) Eminyakeni leminyenti leyalandzela, uMtsetfo lowaniketwa sive sema-Israyeli bewufuna kwentiwe iminikelo leminyenti kuze bantfu baNkulunkulu bacolelwe tono tabo. (Lev. 4:27-29; 17:11) Lemihlatjelo beyikhombisa kutsi Jehova bekatawenta umhlatjelo loncono kakhulu lebewutabasindzisa ngalokuphelele bantfu esonweni. Baphrofethi baNkulunkulu baphefumulelwa kutsi bachaze kutsi lentalelwane leyetsenjisiwe, lokuyiNdvodzana yaNkulunkulu lekhetsekile, bekutawudzingeka ihlupheke futsi ibulawe kuze kusindziswe bantfu esonweni nasekufeni, lokufaka ekhatsi nawe!​—Isa. 53:1-12. w24.08 4 ¶7-8

Nawufundza liBhayibheli, timisele kufuna tindlela longakusebentisa ngato loko lokufundzako. Njengobe ufundza emavesi eVini laNkulunkulu, tibute: ‘Loku lengikufundzako ngingakusebentisa njani nyalo nobe esikhatsi lesitako?’ Asesibekise, asesitsi nawusafundza liBhayibheli ufundza na-1 KubaseThesalonika 5:17, 18. Ngemuva kwekufundza lamavesi lamabili ungema ucabange ngekutsi uvame kuthantaza kangakhi nekutsi uvame kuthantaza ngalokujulile yini. Ngetulu kwaloko, ungacabanga nangetintfo lobongako ngato. Mhlawumbe uncuma kutsi utawubonga Jehova ngetintfo letintsatfu. Nawucitsa imizuzu lembalwa wenta loko, ngandlela tsite angeke ugcine ngekuva kodvwa utawuphindze ube ngumenti weliVi laNkulunkulu. Cabanga nje kutsi ungasitakala kangakanani nawungakwenta ngalokuphindzaphindziwe loko lilanga ngalinye, ucabange nangalamanye emavesi lowafundzako! Siyaciniseka kutsi utawutfutfuka ekubeni ngumenti weliVi laNkulunkulu. w24.09 4-5 ¶9-10

Jehova wasidala ngendlela lekhetsekile. Nanobe sikujabulela kuphiwa, sijabula kakhulu nasipha labanye. Siyajabula nasisita bazalwane betfu nabodzadze. Siyajabula nalapho babonga. Nobe kunjalo, ngisho nobe babonga nobe bangabongi, singajabula ngekutsi sente intfo lekahle. Ungakhohlwa kutsi nobe yini loyipha labanye, “Jehova angakhona kukunika lokungetulu.” (2 Khr. 25:9) Ngeke sikhone kwendlula Jehova ngekupha! Ngetulu kwaloko, kute injabulo leyengca kubongwa nguJehova. Ngako shengatsi singachubeka sitimisela kulingisa Babe wetfu lowephanako. w24.09 31 ¶20-21

Jehova unemusa nesihawu. (Hla. 103:13; Isa. 49:15) Uneluvelo; nasiva buhlungu naye uva buhlungu. (Zak. 2:8) Wenta kube melula kutsi sisondzele kuye sibe bangani bakhe. (Hla. 25:14; Imis. 17:27) Ngetulu kwaloko utfobekile; “uyagobondzela kute abuke ezulwini nasemhlabeni, [aphakamise] lophansi amsuse elutfulini.” (Hla. 113:6, 7) Umuntfu angahlala njani nje angafuni kunika Nkulunkulu wetfu lomkhulu ludvumo? Sinika Jehova ludvumo ngobe sifuna labanye bamati. Bantfu labanyenti abalati liciniso ngaJehova. Kwentiwa yini loko? Kungenca yekutsi Sathane uvale tingcondvo tebantfu ngekutsi asakate emanga lamabi ngaJehova. (2 Khor. 4:4) Sathane wente bantfu bacabanga kutsi Jehova unguNkulunkulu lotfukutselako, longenandzaba nebantfu futsi lobangela kuhlupheka lokunyenti emhlabeni. Kodvwa tsine siyalati liciniso ngaNkulunkulu wetfu! Sinelitfuba lekutjela labanye liciniso ngaye futsi ngaleyondlela simnika ludvumo.​—Isa. 43:10. w25.01 3 ¶6-7

Ngesikhatsi semaKhristu ekucala, labo labasekela Sathane bakhuluma emanga lamanyenti ngeNdvodzana yaNkulunkulu lete sono futsi lebeyenta timangaliso. Sibonelo nje, baholi benkholo batjela bantfu kutsi Jesu bekawatsatsa ‘enkhosini yemadimoni’ emandla lebekawasebentisa kuze akhiphe emadimoni. (Mak. 3:22) Ngesikhatsi Jesu atekiswa licala, baholi benkholo bammangalela ngekutsi uyahlambalata futsi bagcugcutela bantfu kutsi batsi akabulawe. (Mat. 27:20) Ngekuhamba kwesikhatsi, njengobe balandzeli baKhristu bashumayela tindzaba letimnandzi, labo lababaphikisako ‘bafaka umoya lomubi kubantfu’ kuze babaphatse kabi. (Imis. 14:2, 19) Sikhuluma ngeMisebenti 14:2, Sicongosekulindza saDecember 1, 1998, satsi: “Baholi bemaJuda abagcinanga nje ngekungawemukeli umlayeto lebewushunyayelwa ngulamaKhristu, kodvwa basho tintfo letimbi ngawo kuze bantfu bangawalaleli futsi bawenyanye.” Lamuhla, Sathane solo uchubeka ‘udukisa umhlaba wonkhe.’ w24.04 11 ¶15-16

Kutsi umuntfu utawuvuswa yini akuyi ngekutsi ufe nini. Jehova unguMehluleli lophelele, uhlale enta tincumo letikahle naletilungile. (Hla. 33:4, 5) Singaciniseka kutsi ‘uMehluleli wemhlaba wonkhe’ utawenta lokulungile. Kunengcondvo kwephetsa ngekutsi, kutsi umuntfu utakutfola yini kuphila lokuphakadze akuyi ngekutsi uhlala kuphi. Jehova angeke ehlulele tigidzi tebantfu ngekutsi atsi “timbuti” ngenca nje yekutsi bahlala etindzaweni lapho umlayeto weMbuso ungefiki khona. (Mat. 25:46) UMehluleli wemhlaba wonkhe lolungile unendzaba kakhulu nalabantfu kwendlula tsine. Asati kutsi Jehova utawuticondzisa njani tintfo ngekuhlupheka lokukhulu. Kungenteka labanye balabantfu batawuba nalo litfuba lekufundza ngaJehova, babe nekukholwa kuye futsi babe seluhlangotsini lwakhe nakatingcwelisa embikwato tonkhe tive.​—Hez. 38:16. w24.05 12 ¶14-15

Bantfu baJehova bayakutsandza kusitana. (2 Khor. 8:4) Kodvwa ngaletinye tikhatsi loku kudzinga sibindzi. Sibonelo nje, nakunemphi, labadzala belibandla bayasibona sidzingo sekukhutsata bazalwane babo nabodzadze, babasekele, futsi bangabasita ngetintfo labatidzingako nobe babasite bacinise buhlobo babo naJehova. Labadzala belibandla bayabatsandza bazalwane babo nabodzadze kungako babeka kuphila kwabo engotini kuze baciniseke kutsi banako labakudzingako. Ngetikhatsi letinjalo, kubalulekile kutsi sihlale sinebunye. Lalela sicondziso lesivela ehhovisini leligatja longephansi kwalo. (Heb. 13:17) Labadzala belibandla kufanele bahlale babuketa ticondziso letisebenta endzaweni labakuyo kanye neticondziso letivela enhlanganweni tekutsi yini lokufanele bayente nakunesehlakalo. (1 Khor. 14:33, 40) Bani nesibindzi kodvwa ucaphele. (Taga 22:3) Sebentisa ingcondvo. Ungafaki kuphila kwakho engotini ngalokungenasidzingo. Yetsembela kuJehova. Angakusekela kuze ukhone kusita bazalwane bakho nabodzadze ngendlela lephephile. w24.07 4 ¶8; 5 ¶11

INkhosi Davide beyimati Jehova futsi yetsembele kuye. Ngesikhatsi iNkhosi Sawula kanye nalabanye bafuna kuyibulala, Davide wathantaza kuJehova wacela kutsi amsite. Ngemuva kwekutsi Nkulunkulu aphendvule imithantazo yakhe futsi wamsita, Davide watsi: “Jehova uyaphila!” (Hla. 18:46) Ngalamavi, akusiko nje kutsi Davide bekamane avuma kutsi Nkulunkulu ukhona. Lenye incwadzi itsi Davide bekakhombisa kutsi uyametsemba Jehova “kutsi ungunkulunkulu lophilako lohlale abasita bantfu bakhe.” Davide wafundza kulokwenteka kuye kutsi Nkulunkulu wakhe uyaphila, futsi loko kwamenta watimisela kakhulu kutsi achubeke akhonta Jehova futsi amdvumise. (Hla. 18:28, 29, 49) Kuciniseka ngekutsi Jehova unguNkulunkulu lophilako kungasisita kutsi sitimisele nasimkhonta. Sitawuba nemandla ekubeketelela noma ngabe nguyiphi inkinga futsi sitawutimisela kuchubeka sisebenta kamatima emsebentini wakhe. Sitawuphindze sitimisele kuhlale sisondzelene naJehova. w24.06 20-21 ¶3-4

Yini lesingayifundza emavini emphostoli Pawula lawabhalela baseThesalonika? Nasiva lokutsite lokungavumelani nalesikufundzile eBhayibhelini, nobe nasiva indzaba lemangalisako, kufanele sisebentise kucondza. Ngesikhatsi seSoviet Union, titsa tetfu take tanika bazalwane betfu labanyenti incwadzi lebekutsiwa ibuya endlunkhulu. Lencwadzi beyikhutsata labanye bazalwane kutsi batakhele inhlangano yabo leyehlukile. Lencwadzi beyibonakala ngatsi vele ibuya endlunkhulu. Kodvwa bazalwane labetsembekile abazange badukiswe. Babona kutsi lomlayeto lebewukulencwadzi bewungavumelani naloko bebafundziswe kona. Lamuhla, titsa tetfu tihle tisebentisa tebuchwephesha kuze tetame kusidida nobe kusehlukanisa. Kunekutsi ‘sisheshe siyekele kucabanga kahle,’ singativikela ngekutsi sibuke kutsi loko lesikufundzako nobe lesikuvako kuyavumelana yini nemaciniso lesesiwafundzile.​—2 Thes. 2:2; 1 Joh. 4:1. w24.07 12 ¶14-15

Sincumo lesibaluleke kakhulu umuntfu langasenta kutinikela kuJehova futsi abe yincenye yetikhonti takhe. Jehova ufuna kutsi bonkhe bantfu bente njalo. Ngasiphi sizatfu? Ufuna babe nebuhlobo lobuhle naye futsi baphile phakadze. (Dut. 30:19, 20; Gal. 6:7, 8) Nobe kunjalo, Jehova akaphoceleli muntfu kutsi amkhonte. Uvumela umuntfu ngamunye atincumele loko latawukwenta. Kodvwa kutsiwani nangabe umKhristu ephula umtsetfo waNkulunkulu, ente sono lesikhulu? Nangabe angaphendvuki, kufanele asuswe ebandleni. (1 Khor. 5:13) Nobe kunjalo, Jehova ufuna mbamba kutsi lomuntfu abuyele kuye. Ecinisweni, nguleso sizatfu lesibalulekile lesamenta wasilungisela inhlawulo, kuze acolele toni letiphendvukile. Nkulunkulu wetfu lonelutsandvo ubancenga ngemusa labo labente bubi, ubacela kutsi baphendvuke.​—Zak. 1:3; Rom. 2:4; Jak. 4:8. w24.08 14 ¶1-2

Ngesikhatsi umphostoli Johane abhala incwadzi yesitsatfu, labanye bebasakata timfundziso letingemanga futsi babangela kwehlukana ebandleni. Nobe kunjalo, labanye bachubeka “bahamba ecinisweni.” Balalela Jehova futsi ‘bahamba ngekuvumelana nemiyalo yakhe.’ (2 Joh. 4, 6) LamaKhristu letsembekile akagcinanga nje ngekujabulisa Johane kodvwa ajabulisa naJehova. (Taga 27:11) Yini lesiyifundzako? Kwetsembeka kwenta umuntfu ajabule. (1 Joh. 5:3) Sibonelo nje, kuyasijabulisa kwati kutsi senta Jehova ajabule. Uyajabula nakasibona simelana netilingo talelive futsi semukela liciniso. Netingilosi ezulwini tiyajabula. (Luk. 15:10) Natsi siyajabula nasibona umuntfu ahlala etsembekile. (2 Thes. 1:4) Naliphela lelive, sitawujabula ngekwati kutsi sihleli setsembekile kuJehova ngisho nobe lelive belibuswa nguSathane. w24.11 12 ¶17-18

Kufanele utsatse sikhatsi lesingakanani ubuka umuntfu ngaphambi kwekutsi umtjele indlela lotiva ngayo? Nawushesha kumtjela, angahle acabange kutsi wenta tincumo ungakacabangisisi kahle. (Taga 29:20) Kodvwa nangabe sekabonile kutsi ufuna kumati kancono futsi utsatse sikhatsi lesidze solo ungamtjeli loko, angahle acabange kutsi utsatsa sikhatsi lesinyenti ungabata ngaphambi kwekutsi wente sincumo. (Shu. 11:4) Khumbula kutsi ngaphambi kwekutsi ukhulume nemuntfu, loko akusho kutsi kudzingeka ube sewuciniseka kutsi utawushada naye. Kodvwa kufanele uciniseke kutsi ukulungele kushada nekutsi lomuntfu uyakulungela kutsi ungashada naye. Kodvwa yini longayenta nawubona kutsi lotsite angatsandza kukwati kancono? Nangabe ungativa ngendlela lefanako, yetama kukwenta kucace loko ngetento takho. Angeke kube kahle kwenta umuntfu acabange kutsi ningatsandzana ube wati kutsi ngeke kwenteke loko.​—Ef. 4:25. w24.05 22-23 ¶9-10

Ngulabagcotjiwe labatsembekile kuphela labatawemukelwa nguJesu eMbusweni welizulu. Nobe ngubani logcotjiwe longahlali alindzile angeke ahlanganiswe ‘nalabakhetsiwe.’ (Mat. 24:31) Ecinisweni, bonkhe bantfu baNkulunkulu ngisho nobe banelitsemba lekuphila ezulwini nobe emhlabeni, kufanele batsatse lamavi aJesu njengesecwayiso sekutsi bahlale balindzile futsi bahlale betsembekile. Sesimati kahle Jehova, ngako siyayetsemba indlela lehlulela ngayo. Asikhatsateki nangabe akhetsa kugcoba labanye labetsembekile emalangeni etfu. Sikhumbula loko Jesu lakusho ngetisebenti letacala kusebenta nasekuyawushaya insimbi yesihlanu ntsambama emfanekisweni wakhe wensimu yemagilebisi. (Mat. 20:1-16) Labo lababitwa kutsi bayosebenta ntsambama batfola umholo lolinganako nalabo labacala kusebenta ekuseni. Ngendlela lefanako, ngisho nobe bagcotjwa nini, batawutfola umvuzo wabo nangabe betsembekile. w24.09 24 ¶15-17

Jesu wasibekela sibonelo lesihle kakhulu sekubeketelela kuphatfwa kabi. Waphatfwa kabi ngemalunga emndeni kanye nalabanye bantfu. Tihlobo takhe letingamkhonti Nkulunkulu tatsi uyahlanya, baholi benkholo batsi usebentelana nemadimoni futsi emasotja langemaRoma ahlekisa ngaye, amshaya abese ayambulala. (Mak. 3:21, 22; 14:55; 15:16-20, 35-37) Nobe kunjalo, Jesu wakubeketelela konkhe lokungalungi kanye nalokunye futsi akazange aphindzisele. Yini lesingayifundza esibonelweni sakhe? (1 Phet. 2:21-23) Jesu wasishiyela sibonelo lesihle kakhulu lesingasilingisa nasiphatfwa kabi. Bekati kutsi kunini lakufanele abindze khona nalapho kufanele akhulume khona. (Mat. 26:62-64) Bekangawaphendvuli onkhe emanga lebekashiwo ngaye. (Mat. 11:19) Nakwenteka akhuluma, bekangabetfuki labo bebamphatsa kabi nobe abasongele. w24.11 4-5 ¶9-10

Ase uticabange upha umuntfu lomtsandzako sipho lesikhetsekile, lesihle futsi lesilusito. Ungadvumateka nangabe angavele asibeke lakuhlala khona tintfo langatisebentisi futsi angaphindzi acabange ngaso! Ngakulokunye, ungajabula nakangasisebentisa futsi akhombise kutsi uyasitsandza. Liyini liphuzu? Jehova unikele ngeNdvodzana yakhe ngenca yetfu. Ujabula kakhulu nasikhombisa kutsi siyabonga ngalesipho lesiligugu nangelutsandvo lwakhe lolumente kutsi asinike inhlawulo! (Joh. 3:16; Rom. 5:7, 8) Kodvwa njengobe sikhatsi sichubeka, singacala kungabi nandzaba nalesipho lesiyinhlawulo. Kungafana nekutsi sibeke lesipho lesiligugu lasibeka khona tintfo lesingatisebentisi. Siyajabula ngekutsi sinaso, kodvwa asicabangi ngaso. Kuze loko kungenteki, kufanele sihlale sicabanga ngako konkhe Nkulunkulu naKhristu labasentele kona. w25.01 26 ¶1-2

Umzalwane lofanelekako kutsi abe ngulomdzala welibandla kufanele angabi yindvodza lesandza kuba ngumKhristu. Nanobe loko kungasho kutsi kufanele ube neminyaka leminyenti ubhajatisiwe, kepha kudzingeka ube nesikhatsi kuze ube ngumKhristu lovutsiwe. Ngaphambi kwekutsi ube ngulomdzala welibandla, njengaJesu, kufanele ukhombise kutsi utfobekile futsi ukulungele kulindzela Jehova kutsi akunikete nobe ngusiphi sabelo. (Mat. 20:23; Fil. 2:5-8) Ungakhombisa kutsi wetsembekile ngekutsi unamatsele kuJehova nasetimisweni takhe letilungile futsi ulandzele sicondziso lositfola enhlanganweni yakhe. ImiBhalo ikwenta kucace kutsi umbonisi kufanele akwati kufundzisa. Loku kusho kutsi kufanele ube sikhulumi lesihle kakhulu yini? Cha. Labadzala belibandla labanyenti bafundzisa kahle nabashumayela nalapho bavakashela bazalwane nabodzadze kuze babakhutsate ngisho nobe bangasito tikhulumi letinhle. w24.11 23-24 ¶14-15

Nangabe kunendzaba leseBhayibhelini longayicondzi kahle, cwaninga ngayo. Njengobe kuchubeka lilanga, cabangisisa ngaloko lokutfolile nekutsi kukutjelani ngaJehova, ngeNdvodzana yakhe nangelutsandvo labanalo ngawe. (Hla. 119:97, umbhalo longentasi) Ungadvumateki nangabe kute lokusha lokutfolako nobe lokujabulisako njalo nje nawufundza nobe nawucwaninga. Ngandlela tsite, ufana nemuntfu lofuna ligolide. Ngalokuvamile umuntfu lofuna ligolide kufanele acitse ema-awa lamanyenti nobe emalanga lamanyenti etama kufuna ligolide, ngisho lilincane kangakanani. Kodvwa uyachubeka nekulifuna ngobe liligugu ngisho nobe lingakanani. Kakhulu kangakanani-ke ngeliciniso leliligugu leliseBhayibhelini! (Taga 8:10) Ngako bani nesineke futsi unamatsele eluhlelweni lwakho lwekufundza liBhayibheli.​—Hla. 1:2. w25.01 25 ¶14-15

Jehova ulindzele kutsi sihlale sikulungele kucolela labo labasivisa buhlungu. (Hla. 86:5; Luk. 17:4; Ef. 4:32) Singahle siviswe buhlungu nguloko lokushiwo ngulotsite nobe akwente, ikakhulukati nangabe angumngani nobe lilunga lemndeni. (Hla. 55:12-14) Ngalesinye sikhatsi, buhlungu lesibuva ngekhatsi bungafananiswa nebuhlungu lesibuvako nasigwazwa. (Taga 12:18) Singahle sitsalalise nobe singayinaki indlela lesitiva ngayo. Kodvwa kwenta njalo kungafanana nekugwazwa bese kushiywa lomukhwa kulelinceba. Ngendlela lefanako, ngeke silindzele kuba ncono nangabe singayinaki indlela lesitiva ngayo. Singacale sitfukutsele nangabe umuntfu asiphatsa kabi. LiBhayibheli liyavuma kutsi kungenteka sitfukutsele. Nobe kunjalo, liyasecwayisa kutsi singakuvumeli kutsi kusincobe. (Hla. 4:4; Ef. 4:26) Ngasiphi sizatfu? Ngobe intfukutselo ayikavami kuba nemiphumela lemihle. (Jak. 1:20) Khumbula, kutfukutsela kuyatentakalela, kodvwa sitawukhetsa kutsi sitawuhlale sitfukutsele yini nobe cha. w25.02 15 ¶4-6

Jesu waveta kutsi kubulima kanganani kutsi umuntfu acongelele imali “kodvwa abe angakacebi emehlweni aNkulunkulu.” (Luk. 12:16-21) Kute lowatiko kutsi likusasa limphatseleni. (Taga 23:4, 5; Jak. 4:13-15) Njengobe sibalandzeli baKhristu, sonkhe kunenkinga lesibhekana nayo. Jesu watsi kufanele sikulungele ‘kushiya tonkhe tintfo’ lesinato kuze sibe bafundzi bakhe. (Luk. 14:33) EmaKhristu aseJudiya akwenta ngenjabulo loko. (Heb. 10:34) Lamuhla, bazalwane nabodzadze labanyenti kudzingeke kutsi badzele imali ngenca yekwala kusekela emacembu etepolitiki. (Semb. 13:16, 17) Yini lebasitile kutsi bakwente loko? Basetsemba ngalokuphelele setsembiso saJehova lesitsi: “Ngeke ngize ngikushiye, futsi ngeke ngize ngikulahle.” (Heb. 13:5) Senta konkhe lesingakwenta kuze sibe naloko lesitakudzinga esikhatsini lesitako, futsi nakuvela timo letingakalindzeleki ekuphileni kwetfu, siyetsemba kutsi Jehova utasinakekela. w25.03 29 ¶13-14

Jehova akalindzeli kutsi sikhule sibe ngemaKhristu lavutsiwe kube kute lusito lesilutfolako. Labo lababelusi futsi lababafundzisi ebandleni lebuKhristu bakulungele kusisita kutsi ‘sikhule ngalokwenele’ ekukhonteni Jehova, “sivutfwe ngelizinga leliphelele njengaKhristu.” (Ef. 4:11-13) Jehova uphindze asiphe umoya wakhe longcwele kuze asisite sibe ‘nemicabango yaKhristu.’ (1 Khor. 2:14-16) Ngetulu kwaloko, Nkulunkulu waphefumulela kutsi kubhalwe emaVangeli lamane kuze asikhombise kutsi Jesu bekacabanga njani, akhuluma njani futsi atenta njani tintfo ngesikhatsi alamhlabeni. Nangabe ulingisa indlela Jesu lebekacabanga ngayo futsi enta ngayo, ungawufinyelela umgomo wakho wekuba ngumKhristu lovutsiwe. Kodvwa kuze sibe ngemaKhristu lavutsiwe, kufanele sati lokungetulu ‘kwemfundziso lesisekelo lemayelana naKhristu,’ lokusho timfundziso letisisekelo tebuKhristu. w24.04 4-5 ¶11-12

Onkhe malanga kudzingeka sente tincumo. Letinye kumelula kutenta, njengekutsi sitawudlani ekuseni nobe kutsi sitawuya nini kuyolala. Kantsi letinye kumatima kutenta. Tingatsintsa imphilo yetfu, injabulo yetfu, bantfu lesibatsandzako nobe kukhonta kwetfu Nkulunkulu. Sifuna kutsi tincumo tetfu tisite tsine nemindeni yetfu. Ngetulu kwako konkhe, siyetsemba kutsi titamjabulisa Jehova. (Rom. 12:1, 2) Intfo lebalulekile lengakusita kuze wente sincumo lesikahle kutsi utfole emaciniso ngendzaba. Kubaluleke ngani loko? Ase sitsi umuntfu uya kudokotela ngenca yekugula lokumatima lokumphetse. Lodokotela utovele ente sincumo sekutsi utamelapha njani yini angakampopoli nobe wambuta imibuto? Cha. Nawe utawenta tincumo letikahle nangabe ucala ngekutfola onkhe emaciniso ngendzaba. w25.01 14 ¶1-3

Yini lesiyatiko mayelana nemusa waJehova? Ukhombise njani kutsi “akafisi kubhubhe ngisho namunye”? (2 Phet. 3:9) Cabanga ngemusa lawukhombisa labanye labenta tono letinkhulu. INkhosi Davide yenta tono letinkhulu, letifaka ekhatsi kuphinga nekubulala. Nanobe kunjalo, Davide waphendvuka ngako Jehova wamcolela. (2 Sam. 12:1-12) Cishe kuko konkhe kuphila kwayo, iNkhosi Manase yenta tono letinkhulu. Ngisho nobe leNkhosi yenta tintfo letinyenti letimbi, kodvwa Jehova wayikhombisa umusa ngobe yaphendvuka futsi wayicolela. (2 Khr. 33:9-16) Letibonelo tisikhumbuta kutsi Jehova ukhombisa umusa wakhe ngaso sonkhe sikhatsi nakanesizatfu sekwenta njalo. Utawubavusa bantfu labanjalo ngobe bavuma kutsi bente tono letinkhulu futsi baphendvuka. w24.05 4 ¶12