March

EBhayibhelini sifundza ngebantfu lebebalungile lokwatsi ngekuhamba kwesikhatsi baba bantfu labangakalungi. INkhosi Solomoni ingulomunye wabo. Beyiwati kahle umtsetfo waNkulunkulu futsi Jehova bekayibusise kakhulu; kodvwa ngekuhamba kwesikhatsi yabese ikhonta bonkulunkulu bemanga. Tono tayo tenta Jehova watfukutsela kakhulu futsi sonkhe sive sema-Israyeli sahlupheka iminyaka leminyenti ngenca yato. Kuliciniso kutsi imiBhalo itsi Solomoni “wangcwatjwa lapho kwangcwatjwa khona bokhokho bakhe,” lokufaka ekhatsi iNkhosi Davide lebeyetsembekile. (1 Khos. 11:5-9, 43; 2 Khos. 23:13) Kodvwa indlela langcwatjwa ngayo isho kutsi nakanjani utawuvuswa yini? LiBhayibheli alisho. Kuvuswa ekufeni kusipho lesivela kuNkulunkulu lonelutsandvo. Usipha labo lafuna kubanika litfuba lekumkhonta kuze kube phakadze. (Jobe 14:13, 14; Joh. 6:44) Solomoni utasitfola yini lesipho? NguJehova lowatiko, tsine asati. Kodvwa siyati kutsi loko Jehova latawukwenta kulungile. w24.05 4 ¶9

Nasinikela kuphila kwetfu kuJehova, siba tivakashi ethendeni lakhe lelingumfanekiso. Sitfola konkhe lesikudzingako kuze sihlale sinebuhlobo lobucinile naJehova futsi sibe bangani balabo labativakashi takhe. Kodvwa lelithende lelingumfanekiso alitfolakali endzaweni yinye. Lelithende litfolakala nobe ngukuphi lapho tikhonti takhe letetsembekile tikhona khona. (Semb. 21:3) Kutsiwani ngetikhonti taNkulunkulu letetsembekile lesetifile? Singasho yini kutsi solo titivakashi ethendeni laJehova? Yebo! Yini lesenta sisho njalo? Kungenca yekutsi solo basekhona enkhumbulweni yaJehova. Jesu watsi: “Endzabeni yesihlahla lesivutsako, ngisho naMosi waveta kutsi labafile batawuvuswa, ngesikhatsi abita Jehova ngekutsi ‘nguNkulunkulu wa-Abrahama, wa-Isaka newaJakobe.’ Yena unguNkulunkulu walabaphilako, hhayi walabafile, ngobe ngekwembono wakhe bonkhe bayaphila.”​—Luk. 20:37, 38. w24.06 3 ¶6-7

Sadoki waya eHebroni ahlomile futsi alungele imphi. (1 Khr. 12:38) Bekakulungele kulandzela Davide nakungenteka kube nemphi futsi avikele ema-Israyeli etitseni tawo. Nanobe Sadoki bekangasilo lisotja lelilichawe, kodvwa bekanesibindzi. Yini leyasita Sadoki kutsi abe nesibindzi? Bekati emadvodza lamanyenti lebekanemandla futsi anesibindzi. Siyaciniseka kutsi sibonelo sawo samsita. Sibonelo nje, ngenca yekutsi Davide wakhombisa sibindzi ‘nakahola ema-Israyeli nakaya etimphini,’ loko kwenta kutsi onkhe ema-Israyeli amsekele ngenhlitiyo yawo yonkhe. (1 Khr. 11:1, 2) Davide bekahlale atsembela kuJehova kuze amsite alwe netitsa takhe. (Hla. 138:3) Sadoki waphindze wafundza nakulamanye emadvodza lebekanesibindzi lafaka ekhatsi Jehoyada, kanye nendvodzana yakhe Bhenaya lebeyilichawe, kanye naletinye tindvuna letingu-22 lebetisekela Davide.​—1 Khr. 11:22-25; 12:26-28. w24.07 3 ¶5-6

Sawula waseThasusi bekabaphatsa ngelunya balandzeli baKhristu. Kungenteka emaKhristu lamanyenti bekacabanga kutsi akayuze ashintje. Nanobe kunjalo, Jesu lebekavusiwe bekati kutsi Sawula angashintja futsi aphendvuke. Yena naBabe wakhe babona lokuhle kuSawula. Jesu watsi: “Lomuntfu usitja sami lengisikhetsile.” (Imis. 9:15) Jesu waze wasebentisa simangaliso kuze asite Sawula kutsi aphendvuke. (Imis. 7:58–8:3; 9:1-9, 17-20) Ngemuva kwekutsi Sawula abe ngumKhristu, futsi ngekuhamba kwesikhatsi atiwe ngekutsi ngumphostoli Pawula, bekavame kubonga ngendlela lakhonjiswe ngayo umusa nebubele. (1 Thim. 1:12-15) Yini Pawula layenta ngesikhatsi eva ngenkinga lebeyikhona ebandleni laseKhorinte lemayelana nekutiphatsa lokubi? Loko lakwenta kusifundzisa lokukhulu mayelana nesijeziso saJehova lesinelutsandvo kanye nekubaluleka kwekukhombisa umusa. w24.08 13 ¶15-16

Kuyo yonkhe leminyaka, Jehova bekakwenta kucace kancane kancane kutsi yini bantfu labanesono labangayenta kuze basondzele kuye. Indvodzana yesibili ya-Adamu na-Eva, lokungu-Abela, yaba ngumuntfu wekucala lowakholwa kuJehova ngemuva kwaloko lokwenteka e-Edeni. Ngenca yekutsi Abela bekamtsandza Jehova, afuna kumjabulisa futsi asondzele kuye, wenta umhlatjelo. Bekangumelusi, ngako watsatsa lamanye emazinyane etimvu wawahlaba futsi wanikela ngawo kuJehova. Yini Jehova layenta? “Wamemukela Abela nemnikelo wakhe.” (Gen. 4:4) Jehova wayemukela nemihlatjelo leyentiwa nangulabanye bantfu lebebamtsandza futsi bametsemba, njengaNowa. (Gen. 8:20, 21) Ngekwemukela lemihlatjelo, Jehova bekakhombisa kutsi angabemukela bantfu labanesono futsi bangasondzelana naye. w24.08 3 ¶5-6

Singahle sive buhlungu kakhulu futsi sicindzeteleke nasiphetfwe kabi. (Shu. 7:7) Bantfu baJehova labetsembekile, lokufaka ekhatsi Jobe naHabakhuki, bativa ngaleyondlela. (Jobe 6:2, 3; Hab. 1:1-3) Nanobe kuvamile kutiva ngalendlela, kufanele sikugadze loko lesikwentako kuze singenti intfo lebulima futsi sente simo sibe sibi kakhulu. Nakubonakala ngatsi abajeziswa labo labenta tintfo letingakalungi, singahle sitibute kutsi kusita ngani kwenta lokulungile. Cabanga ngemhlabeleli lowabona bantfu labakahle baphatfwa kabi ngulababi kodvwa laba lababi kubonakala ngatsi bayaphumelela. Watsi: “Banjalo-ke bantfu lababi, tintfo tihlale tibahambela kahle.” (Hla. 73:12) Bekumkhatsata kakhulu nekungalungi lakubona kangangekutsi bekangasaciniseki kutsi kusita ngani kukhonta Jehova, watsi: “Ngatsi nangetama kukucondza loku, kwangikhatsata kakhulu.”​—Hla. 73:14, 16. w24.11 3 ¶5-7

Sidvumisa Jehova ngenca yekutsi simhlonipha kakhulu. Sinetizatfu letinyenti tekumhlonipha. UnguSomandla; emandla akhe awapheli. (Hla. 96:4-7) Kuhlakanipha kwakhe lokukhulu kubonakala ngalokucacile etintfweni latentile. UnguMtfombo wekuphila kwetfu futsi usinike konkhe lesikudzingako kuze siphile. (Semb. 4:11) Wetsembekile. (Semb. 15:4) Konkhe lakwentako kuyaphumelela futsi uhlale atigcina tetsembiso takhe. (Josh. 23:14) Kungako umphrofethi Jeremiya atsi ngaJehova: “Kubo bonkhe bantfu labahlakaniphile labakuto tonkhe tive emhlabeni, kute ngisho namunye lofana nawe”! (Jer. 10:6, 7) Kusebaleni kutsi sinetizatfu letivakalako tekuhlonipha Babe wetfu wasezulwini. Ngetulu kwekutsi kufanele simhloniphe, unebuntfu lobuhle lobenta kutsi simtsandze kakhulu. Kantsi lokubaluleke kakhulu kutsi sinika Jehova ludvumo ngenca yekutsi simtsandza kakhulu. w25.01 3 ¶5-6

Labo labaphikisa Nkulunkulu betama kwenta tintfo letinhle ngenhlangano yetfu tibonakale titimbi. Sibonelo nje, sifundzile emiBhalweni kutsi Jehova ulindzele kutsi labo labamkhontako bahlanteke emtimbeni, nasendleleni labatiphatsa ngayo futsi bamkhonte ngendlela yena layemukelako. Ufuna kutsi nobe ngubani lowenta tintfo letingcolile futsi longaphendvuki ayekeliswe kuba nguFakazi. (1 Khor. 5:11, 12; 6:9, 10) Siyasilalela lesicondziso lesisekelwe emiBhalweni. Kodvwa labo labasiphikisako betama kusebentisa loko kuze basimangalele ngekutsi silukhuni, siyehlulelana futsi site lutsandvo. Kufanele sati kutsi ngubani lolobangela lokuhlaselwa. NguSathane Develi losakata tindzaba letingemanga. ‘Ungubabe wemanga.’ (Joh. 8:44; Gen. 3:1-5) Ngako singalindzela kutsi Sathane asebentise labo labamsekelako kuze asakate tindzaba letingemanga ngenhlangano yaJehova. w24.04 10-11 ¶13-14

Ngisho nangemuva kwekucala kwekuhlupheka lokukhulu, kungenteka labanye batawutsi nababona “iBhabhulona Lenkhulu” ibhujiswa, bakhumbule kutsi sekuphele iminyaka leminyenti BoFakazi BaJehova batsi loku kutawenteka. Kungenteka yini kutsi labanye labatakubona loko babe nekukholwa kuJehova? (Semb. 17:5) Loko kutawufana nalokwenteka eGibhithe ngesikhatsi saMosi. Khumbula kutsi ‘licembu lelikhulu lebantfu’ lahamba nema-Israyeli ngesikhatsi aphuma eGibhithe. Kungenteka labanye babo bacala kuba nekukholwa ngesikhatsi babona tecwayiso taMosi letimayelana neTishayo Letilishumi tifezeka. (Eks. 12:38) Nangabe kwenteka intfo lefanako ngemuva kwekubhujiswa kweBhabhulona Lenkhulu, kutasidvumata yini kutsi labanye bacale kukhonta Nkulunkulu kanye natsi ngaphambi nje kwekutsi lelive libhujiswe? Cha! Sifuna kulingisa Babe wetfu wasezulwini, ‘longuNkulunkulu lonesihawu neluvelo, lowephuta kutfukutsela futsi lochichima lutsandvo lolucotfo neliciniso.’​—Eks. 34:6. w24.05 11 ¶12-13

Yini lengenteka nasingayekela kubambelela “esibonelweni semavi laphilile”? Cabanga nganasi sibonelo. Ngesikhatsi semaKhristu ekucala, bekunemahemuhemu lebekandzile emkhatsini walamanye emaKhristu latsi lilanga laJehova selifikile. Kungenteka bekunencwadzi lebekucatjangwa kutsi ibhalwe ngumphostoli Pawula lebeyisho loko. Ngaphambi kwekutsi lamanye emaKhristu aseThesalonika atinike sikhatsi sekuhlola kutsi kuliciniso yini loko, awetsemba lamahemuhemu futsi aze awasakata. Bewangeke adukiswe kube akhumbula tintfo Pawula lawafundzisa tona ngesikhatsi asenawo. (2 Thes. 2:1-5) Pawula wecwayisa bazalwane bakhe nabodzadze kutsi bangatetsembi tonkhe tintfo labativako. Kuze abasite kutsi bangadukiswa esikhatsini lesitako, wephetsa incwadzi yesibili lebekayibhalele baseThesalonika ngemavi latsi: “Mine Pawula ngiyanivusela futsi loku ngikubhale ngesandla sami. Tonkhe tincwadzi tami ngitibhala kanjena kuze nati kutsi tibhalwe ngimi.”​—2 Thes. 3:17. w24.07 12 ¶13-14

EmaKhristu langemaHebheru bekutawudzingeka abeketelele tintfo lebetitawuvivinya kukholwa kwawo njengobe timo betiya tiba timbi kakhulu eJudiya. Nanobe lamanye awo aphatfwa kabi kakhulu, kodvwa linyenti lawo beligucukele enkholweni yebuKhristu ngesikhatsi kunekuthula. Umphostoli Pawula watsi ngisho nobe bekabeketelele tinkinga letimatima letivivinye kukholwa kwawo, kodvwa bekasengakahlupheki njengaJesu, bekangakahlupheki aze afa. (Heb. 12:4) EmaJuda lamanyenti bekatfukutsele kakhulu futsi aneludlame ngenca yekutsi bantfu labanyenti bebaba ngemaKhristu. Eminyakeni lembalwa ngaphambi kwaloko, emaJuda langetulu kwalangu-40 “enta nesifungo sekutsi nakangadla nobe anatse lokutsite angakambulali Pawula, atawucalekiswa.” (Imis. 22:22; 23:12-14) Ngisho nobe lamaKhristu bekatawutondvwa futsi aphatfwe kabi, bekutawudzingeka achubeke nekuhlangana ndzawonye kuze akhonte Jehova, ashumayele tindzaba letimnandzi futsi achubeke acinisa kukholwa kwawo. w24.09 12 ¶15

Johane bekangumphostoli waJesu Khristu lebekamtsandza. (Mat. 10:2) Johane bekahamba naJesu nakashumayela, wabona timangaliso lebekatenta futsi wanamatsela kuye nakabhekene netikhatsi letimatima. Wambona Jesu ngesikhatsi abulawa nalapho sekavusiwe. Wakubona nekwandza kwebuKhristu ngesikhatsi semaKhristu ekucala kusukela ecenjini lelincane lalabetsembekile kwaze kwaba ngulapho tindzaba letimnandzi tishunyayelwa “kuyo yonkhe indalo lengephansi kwelizulu.” (Khol. 1:23) Nasekatawufa, Johane waba nesandla ekubhaleni liVi laNkulunkulu leliphefumulelwe. Wabhala “sembulo saJesu Khristu.” (Semb. 1:1) Wabhala neliVangeli lelibitwa ngeligama lakhe. Waphindze wabhala letinye tincwadzi letintsatfu letiphefumulelwe. Incwadzi yesitsatfu wayibhalela lomunye umKhristu lowetsembekile lokutsiwa nguGayusi lebekamtsandza ngatsi ngumntfwanakhe. (3 Joh. 1) Loko lokwabhalwa ngulendvodza lekhulile futsi leyetsembekile kubakhutsate bonkhe balandzeli baJesu kuze kube ngulamuhla. w24.11 12 ¶15-16

Indvodza lemtsandzako umkayo imtsatsa njengaloligugu futsi imphatsa kahle. Imtsatsa njengesipho lesiligugu kakhulu lesivela kuJehova. (Taga 18:22; 31:10) Loko kwenta kutsi imphatse kahle futsi imhloniphe ngisho nalapho baya ecansini. Angeke imcindzetele kutsi ente tento letimenta ative angakhululeki nabaya ecansini, ehlelwa sitfunti nobe letihlupha nembeza wakhe. Nendvodza itawetama kuhlala inanembeza lohlobile embikwaJehova. (Imis. 24:16) Madvodza, cinisekani kutsi Jehova uyayibona imetamo leniyentako yekuhlonipha bafati benu kuto tonkhe tici tekuphila, futsi uyajabula ngayo. Timisele kuhlonipha umkakho ngekutsi ugweme kwenta nobe yini lengamenta ative angahlonishwa nangekutsi ube nemusa kuye, umhloniphe futsi umtsandze. Nawenta njalo, utamkhombisa kutsi uyamtsandza nekutsi uligugu kuwe. Mhloniphe umkakho, futsi nawenta njalo utawuvikela buhlobo lobubaluleke kakhulu, lokubuhlobo bakho naJehova.​—Hla. 25:14. w25.01 13 ¶17-18

Lenye intfo leyenta bantfu baJehova behluke kulabo labatibita ngekutsi bangemaKhristu, ngumdlandla wabo wekushumayela. Yini lengasisita kutsi sichubeke sinemdlandla nasishumayela nobe siwukhulise? Singafundza lokutsite mayelana nemdlandla nasishumayela ngekutsi sifundze ngesibonelo saJesu. Ngesikhatsi ashumayela, akazange aphelelwe ngumdlandla. Ecinisweni, njengobe sikhatsi sichubeka, waba nemdlandla kakhulu. Njengalesinye sisebenti lebesisebenta ensimini yemagilebisi lesacitsa iminyaka lemitsatfu setama kunaka sihlahla semkhiwa lebesingafuni kutsela, Jesu wacitsa iminyaka lengaba mitsatfu ashumayela emaJuda, futsi linyenti lawo belingawemukeli umlayeto wakhe. Nobe kunjalo, njengalesisebenti lesala kusheshe sisijube lesihlahla semkhiwa, Jesu akazange aphelelwe litsemba ngalabantfu nobe aphelelwe ngumdlandla wekubashumayela. (Luk. 13:6-9) Kufundza ngaloko lakufundzisa futsi silingise loko lakwenta kutasisita kutsi sihlale sinemdlandla lamuhla. w25.03 14-15 ¶1-4

Yini longayenta nangabe ucabanga kutsi lotsite angakulungela kutsi ushade naye? Kufanele usheshe umtjele yini indlela lotiva ngayo? LiBhayibheli litsi umuntfu lohlakaniphile wenta tintfo ngelwati. Ngako kukuhlakanipha kutsi umbukele khashane sikhatsi lesitsite ngaphambi kwekutsi umtjele indlela lotiva ngayo. Yini longayenta nawusambukela khashane loyo lofise kushada naye? Emihlanganweni yelibandla nobe nanindzawonye nilicembu, unganaka kutsi bunjani buhlobo bakhe naJehova, unake buntfu bakhe nendlela latiphatsa ngayo. Bobani bangani bakhe, futsi yini lakhuluma ngayo? (Luk. 6:45) Imigomo yakhe iyafana yini neyakho? Ungabuta labadzala belibandla lakulo kutsi unjani nobe ubute emaKhristu lavutsiwe lamati kahle. (Taga 20:18) Ungabuta ngelidvumela lakhe nangebuntfu bakhe. (Rut. 2:11) Nawusambuka, ungamenti ative angakhululeki. Hlonipha indlela lativa ngayo futsi ungahlali umlandzela. w24.05 22 ¶7-8

Bazalwane labakha ikomidi yalabadzala belibandla abasheshi baphetse ngekutsi lolowonile angeke aphendvuke. Nanobe labanye bangaphendvuka kulomhlangano wabo wekucala nekomidi yalabadzala belibandla, kodvwa labanye bangahle badzinge sikhatsi lesinyenti. Ngako labazalwane bangahlela kuhlangana nalona lowonile tikhatsi letingetulu kwasinye. Mhlawumbe ngemuva kwalomhlangano wabo wekucala, lolowonile angacala kucabangisisa ngaloko latjelwe kona. Mhlawumbe angatitfoba athantaze kuJehova. (Hla. 38:18) Ngako emhlanganweni lolandzelako, lolowonile angahle abe nesimo sengcondvo lesishintjile kunaleso bekanaso kulomhlangano wekucala. Labazalwane bakhombisa luvelo nemusa kuze basite lowonile kutsi aphendvuke. Bayetsemba kutsi Jehova utayibusisa imetamo yabo, baphindze bakuthantazele loko kanye nekutsi lomKhristu asanguluke futsi aphendvuke.​—2 Thim. 2:25, 26. w24.08 22-23 ¶12-13

Jehova akafuni kutsi kubhubhe ngisho namunye! Ufuna kutsi labonile babuyisane naye. (2 Khor. 5:20) Kungako kusukela kadzeni, Jehova bekasolo abacela tikhatsi letinyenti bantfu bakhe labangalaleli kutsi baphendvuke futsi babuyele kuye, loku bekakwenta ngisho nakumuntfu ngamunye. Labadzala belibandla basebenta kanye naJehova kuze basite labo labente tono letinkhulu kutsi baphendvuke. (Rom. 2:4; 1 Khor. 3:9) Cabanga nje kutsi iba ngakanani injabulo ezulwini nangabe labo labonile baphendvuka! Babe wetfu losezulwini Jehova ujabula kakhulu njalo nje nangabe yinye yetimvu takhe letilahlekile ibuyela ebandleni. Simtsandza kakhulu Jehova nasichubeka sicabangisisa ngelutsandvo lwakhe, sihawu sakhe nemusa wakhe lomkhulu.​—Luk. 1:78. w24.08 31 ¶16-17

Kube Jesu wakuvumela kutsi labantfu bamente inkhosi, bekatawube usekela emaJuda kutepolitiki, lebekabuswa ngemaRoma. Jesu “waya entsabeni.” Ngako nanobe acindzetelwa ngulabanye, akazange atingenele tepolitiki. Lesi sifundvo lesihle! Kuliciniso kutsi labanye ngeke basicele kutsi sandzise tinkhwa ngalokusimangaliso nobe selaphe labagulako; ngeke futsi betame kusenta inkhosi nobe umbusi. Kodvwa bangahle basicele kutsi singenele tepolitiki ngekutsi sivote nobe sisho kutsi sisekela lotsite lababona ngatsi utawenta kuphila kwabo kube ncono. Kodvwa sibonelo saJesu sicacile. Wala kungenela tepolitiki, ngekuhamba kwesikhatsi waze watsi: “UMbuso wami awusiyo incenye yalelive.” (Joh. 17:14; 18:36) EmaKhristu lamuhla enta kahle ngekulingisa indlela Jesu bekacabanga ngayo nalenta ngayo. Sisekela uMbuso wakhe, sifakaze ngawo futsi siwuthantazele.​—Mat. 6:10. w24.12 4 ¶5-6

Njengobe udadisha, funa tindlela longakusebentisa ngato loko lokufundzako. Sibonelo nje, yenta tintfo ngekulunga njengaJehova ngekutsi uphatse labanye ngekungakhetsi. Lingisa indlela Jesu lamtsandza ngayo Babe wakhe nebantfu ngekutsi utimisele kuhlupheka ngenca yelibito laJehova futsi utidzele ngenca yebazalwane bakho nabodzadze. Ngetulu kwaloko, lingisa Jesu ngekutsi ushumayele labanye kuze nabo batawuba nelitfuba lekwemukela sipho saJehova lesiligugu kakhulu. Nasichubeka siyicondza kakhulu inhlawulo futsi sibonga kakhulu ngayo, sitamtsandza kakhulu Jehova neNdvodzana yakhe. Nabo batasitsandza kakhulu. (Jak. 4:8) Ngako shengatsi singachubeka sikusebentisa loko Jehova lasinike kona kuze sichubeke sifundza ngenhlawulo. w25.01 25 ¶16-17

Umbhalo welusuku walamuhla ungabekwa ngekutsi: “Utisuse tonkhe tono tami emehlweni akho.” Lomfanekiso ukhombisa kutsi Jehova utsatsa tono talabo labaphendvukile futsi atilahle tingasabonakali. Lendzaba ingaphindze ibekwe ngekutsi: “Wente [tono tami] kwaba ngatsi atikase taba khona.” LiBhayibheli liphindze lisebentise lomunye umfanekiso kuze ligcizelele leliphuzu, lotfolakala kuMikha 7:18, 19. Lamavesi atsi Jehova ujike tono tetfu ekujuleni kwelwandle. Kadzeni, bekungeke kwenteke kutsi umuntfu alandze intfo lejikwe ekujuleni kwelwandle. Ngalemifanekiso, sesifundzile kutsi Jehova nakasicolela usetfula umtfwalo losono. Davide bekacinisile nakatsi: “Bayajabula labo labatsetselelwe tento tabo letimbi, nalabo labatsetselelwe tono tabo.” (Rom. 4:7, 8) Loko kucolela mbamba! w25.02 9 ¶7-8

Lamuhla emhlabeni kunelipharadisi lelinebantfu labenta tintfo letinhle. Linebantfu labatigidzi labanekuthula mbamba. Labo labakulelipharadisi batimisele ngekungacali balishiye. Bafuna nekutsi bantfu labanyenti kakhulu babe nabo kulendzawo lengakavami. Nguyiphi lendzawo? Lipharadisi lelingumfanekiso! Kuyamangalisa kutsi Jehova wente indzawo lapho khona bantfu bakhe bahlala ngekuthula nangebunye, nanobe baphila eveni laSathane leligcwele bubi, leliyingoti futsi lelinebantfu labenyanyanako. (1 Joh. 5:19; Semb. 12:12) Nkulunkulu wetfu lositsandzako uyabona kutsi lelive libaphatsa kabi bantfu, kodvwa wente kutsi labo labamtsandzako bative bavikelekile kuze bachubeke bamkhonta bajabulile. LiVi lakhe lichaza lelipharadisi lelingumfanekiso ngekutsi liyindzawo ‘yekukhosela’ levikelekile nangekutsi ‘liyingadze leniselwa kahle.’ (Isa. 4:6; 58:11) Ngekusitwa nguJehova, labo labahlala kulelipharadisi bativa bavikelekile futsi bajabulile nanobe baphila kulesikhatsi lesimatima.​—Isa. 54:14; 2 Thim. 3:1. w24.04 20 ¶1-2

Nangabe ufuna kushada, siyaciniseka kutsi ukile wakuthantazela kutfola umuntfu lotawushada naye. Kuliciniso kutsi Jehova aketsembisi muntfu kumnika loyo latawushada naye. Kodvwa unendzaba naloko lokudzingako nendlela lotiva ngayo, futsi angakusita nawusafuna loyo longashada naye. Ngako chubeka umtjela loko lokufisako nendlela lotiva ngayo. (Hla. 62:8) Thantazela kubeketela nekuhlakanipha. (Jak. 1:5) Ngisho nobe ungamtfoli ngekushesha umuntfu lokahle longashada naye, Jehova wetsembisa kutsi utawuchubeka akunakekela, akutsandza futsi akunaka. (Hla. 55:22) Naku lokufanele ukunake: Kufuna umuntfu lotawushada naye akukafaneli kube yintfo leta kucala ekuphileni kwakho. (Fil. 1:10) Injabulo sibili ayiyi ngekutsi ushadile yini nobe awukashadi, kodvwa itfolakala ngekuba nebuhlobo lobuhle naJehova. (Mat. 5:3) Nawusengakashadi, uba nematfuba lamanyenti ekwentela Jehova lokunyenti. (1 Khor. 7:32, 33) Sisebentise kahle lesikhatsi. w24.05 21 ¶4; 22 ¶6

Kufanele sibe sidze kangakanani sikhatsi senu sekuganana? Nangabe singatiniki sikhatsi lesenele kuze sicabange ngesincumo lokufanele sisente, loko kungaba nemiphumela lemibi. (Taga 21:5) Ngako sikhatsi sekuganana kufanele sibe sidze ngalokwenele kuze umati kahle lona lomunye umuntfu. Nanobe kunjalo, akukafaneli nisente sibe sidze kakhulu ngalokungenasidzingo. LiBhayibheli litsi: “Nangabe solo kungenteki loko umuntfu lakulindzele, ubese ulahlekelwa litsemba.” (Taga 13:12) Yini labanye labangayenta nangabe bakhona labaganene lababatiko? Singabamema kutsi batawudla natsi, babe khona ekukhonteni kwemndeni nobe babe natsi nasitijabulisa. (Rom. 12:13) Bayamdzinga yini umuntfu wesitsatfu, kwekuhamba nobe indzawo lapho bangakhuluma khona? Nangabe kunjalo, singabasita yini? (Gal. 6:10) Nangabe labaganene bakucela kutsi ube kanye nabo, loko kutsatse njengendlela yekusita bangani bakho. Ciniseka kutsi awubashiyi bodvwa kodvwa sebentisa kucondza nawubona kutsi badzinga sikhatsi sekukhuluma tindzaba tabo. w24.05 30 ¶13-14

Bazalwane labakha ikomidi yalabadzala belibandla betama kutfola kutsi ngutiphi timo letiholele lotsite esonweni. Sibonelo nje, lomKhristu ube butsakatsaka kancane kancane ngobe angasatidadisheli yini liBhayibheli nobe angasawenti umsebenti wekushumayela? Besekayekele yini kuthantaza njalo kuJehova nobe imithantazo yakhe beyingasasuki yini enhlitiyweni? Uvumele tifiso letimbi kutsi timlawule yini? Wente tincumo letingakahlakaniphi yini nakakhetsa latihlanganisa nabo nobe latijabulisa ngako? Letincumo takhe tiyitsintse njani inhlitiyo yakhe? Uyabona yini kutsi tincumo latentile naloko lakwentile kumtsintse njani Babe wakhe Jehova? Labazalwane nababuta lolowente bubi imibuto lenengcondvo kodvwa babe bangamphenyi tindzaba takhe, ngemusa bangamsita kutsi akhone kukhuluma avete konkhe lokusenhlitiyweni yakhe, futsi bangamsita kutsi acabangisise ngaloko lakwentile. (Taga 20:5) Ngetulu kwaloko, bangasebentisa imifanekiso kuze bamsite acabange kahle futsi abone kutsi kubi ngani lalakwentile. Mhlawumbe nabahlangene naye kwekucala, angabese utisola kakhulu ngaloko lakwentile futsi mhlawumbe angaze aphendvuke. w24.08 22 ¶9-11

Ngemdlandla Jesu washumayela ‘tindzaba letimnandzi teMbuso waNkulunkulu’ ngenca yekutsi bekati kutsi nguloko Nkulunkulu lebekafuna akwente. Wenta umsebenti wekushumayela weta kucala ekuphileni kwakhe. Ngasekupheleni kwemsebenti wakhe wekushumayela, Jesu wahamba “emadolobha nemadolobhana” afundzisa labanye. (Luk. 13:22) Waphindze wacecesha nalabanye bafundzi bakhe kutsi bashumayele kanye naye. (Luk. 10:1) Nalamuhla, kushumayela tindzaba letimnandzi ngumsebenti lobalulekile Jehova naJesu labafuna siwente. (Mat. 24:14; 28:19, 20) Singachubeka sinemdlandla wekushumayela ngekutsi sibuke bantfu ngendlela Jehova lababuka ngayo. Ufuna kutsi bantfu labanyenti kakhulu bative tindzaba letimnandzi futsi batemukele. (1 Thim. 2:3, 4) Kuze sikwente loko, uyasicecesha kutsi siwumemetele ngendlela lephumelelako lomlayeto losindzisa kuphila. Ngisho nobe bantfu bangasilaleli nyalo, mhlawumbe batawuba nalo litfuba lekutsi bemukele umlayeto wetfu ngaphambi kwekutsi kuphele kuhlupheka lokukhulu. w25.03 15-16 ¶5-7

UmKhristu ngamunye kufanele asebentise nembeza wakhe loceceshwe liBhayibheli endleleni laphatsa ngayo umuntfu losusiwe ebandleni. Labanye ngeke babe nenkinga nekumbingelela nobe kumemukela emihlanganweni yetfu. Nobe kunjalo, angeke sicoce naye sikhatsi lesidze nobe sibe naye nasinesikhatsi lesimnandzi. Labanye bangahle batibute: ‘LiBhayibheli alisho yini kutsi umKhristu lobingelela umuntfu losusiwe ebandleni uhlanganyela naye ebubini bakhe?’ (2 Joh. 9-11) Nawubuka lendzaba iyonkhe, iyakhombisa kutsi lesicondziso sisho labo labatihlubuki nalabo labakhutsata labanye kutsi bente lokubi. (Semb. 2:20) Ngako nangabe umuntfu akhutsata timfundziso tetihlubuki nobe akhutsata labanye kutsi bente bubi, labadzala belibandla angeke bahlele kuyomvakashela. Nobe kunjalo, litawuhlale likhona litsemba lekutsi utawusanguluka. Kodvwa kusengakenteki loko, angeke simbingelele umuntfu lonjalo nobe simmeme kutsi abe khona emihlanganweni yelibandla. w24.08 30-31 ¶14-15

Ngemuva kwekutsi Jesu anikete sicumbi kudla, watjela baphostoli bakhe kutsi babuyele eKhaphanawume ngesikebhe, futsi yena waya entsabeni, lokwenta kutsi lesicumbi singakhoni kumenta inkhosi. (Joh. 6:16-20.) Ngesikhatsi labaphostoli baseselwandle, kwaba nesivunguvungu lesikhulu, lokwenta kutsi kube nemagagasi layingoti. Jesu weta ngakubo ahamba etikwemanti. Watjela umphostoli Phetro kutsi naye ente lokufanako. (Mat. 14:22-31) Ngesikhatsi Jesu sekakulesikebhe, lesivunguvungu sabinza. Labafundzi bamangele, batsi: “Vele uyiNdvodzana yaNkulunkulu.” (Mat. 14:33) Nobe kunjalo, abazange babone kutsi lesimangaliso bekasandza kusenta besihlangana njani nalesimangaliso bekasentele lesicumbi. Makho washo naku: “[Labaphostoli] bamangala kakhulu, ngobe bebangakasifundzi sifundvo kulesimangaliso setinkhwa lebekasentile.” (Mak. 6:50-52) Labafundzi behluleka kubona kutsi nguJehova lebekanikete Jesu emandla ekwenta letimangaliso. w24.12 5 ¶7

Singakhombisa kutsi siyabonga ngelutsandvo lwaJehova ngekutsi sisebentise lesikhatsi seSikhumbuto kuze sikhombise Jehova kutsi sibonga kanganani ngenhlawulo. Ngetulu kwekuhlela kutsi sibe khona eSikhumbutweni, singamema nalabanye kutsi babe khona. Chazela labo lobamemako kutsi kutawube kwentekani eSikhumbutweni. Kungakusita nekubakhombisa i-video letsi Kungani Jesu Afa? naletsi Kukhumbula Kufa KwaJesu, latfolakala ku jw.org. Labadzala belibandla kufanele baciniseke kutsi bamema nalabo lasebaphelelwe ngumdlandla wekukhonta Jehova. Cabanga nje kutsi kuba nenjabulo lenganani ezulwini nasemhlabeni nangabe letinye tetimvu taJehova lebetilahlekile tiphindze tibuyela emhlambini wakhe! (Luk. 15:4-7) ESikhumbutweni, kufanele sitimisele kungagcini nje ngekuvuselana sodvwana, kodvwa sivusele nalabo labacalako kuta nobe lesekunesikhatsi bagcina kuba khona. Sifuna kubenta bative bemukelekile!​—Rom. 12:13. w25.01 29 ¶15

Nanobe inhlawulo isisita sicondze kutsi Jehova ulungile, iphindze isisite sicondze kutsi lujule kangakanani lutsandvo lwakhe. (Joh. 3:16; 1 Joh. 4:9, 10) Imfundziso yenhlawulo iveta kutsi Jehova ufuna siphile phakadze futsi sibe yincenye yemndeni wakhe. Cabanga nganaku: Ngesikhatsi Adamu ona, Jehova wamcosha emndenini wakhe. Ngenca yaloko, sonkhe nasitalwa sisuke singasiyo incenye yemndeni waNkulunkulu. Kodvwa ngesisekelo senhlawulo, Jehova usicolela tono tetfu futsi ekugcineni utawubenta babe yincenye yemndeni wakhe bonkhe bantfu labanekukholwa nalabalalelako. Ngisho nanyalo, singaba nebuhlobo lobuhle naJehova kanye nabomnaketfu nabodzadze. Loko kusikhombisa kutsi Jehova usitsandza mbamba!​—Rom. 5:10, 11. w25.01 21 ¶6

Siyaciniseka kutsi uyavuma kutsi inhlawulo isipho lesiligugu kakhulu! (2 Khor. 9:15) Ngenca yekutsi Jesu wanikela ngekuphila kwakhe, nyalo ungaba ngumngani waJehova Nkulunkulu. Ungaphindze ube nelitsemba lekuphila phakadze. Kungako kubalulekile kutsi sikhombise kutsi siyabonga ngenhlawulo futsi simbonge Jehova, lowasipha lesipho ngobe asitsandza! (Rom. 5:8) Kuze Jesu asisite kutsi sihlale sibonga futsi singacali siyibukele phasi inhlawulo, wasungula Sikhumbuto sekufa kwakhe lesigujwa njalo ngemnyaka. (Luk. 22:19, 20) Kulomnyaka, Sikhumbuto sitawuba ngaLesine, April 2, 2026. Siyaciniseka kutsi sonkhe sitawuhlela kuba khona. Kutasisita kakhulu nekutsi ngemalanga eSikhumbuto sitinike sikhatsi sekuzindla ngaloko Jehova neNdvodzana yakhe labasentele kona. w25.01 20 ¶1-2

Ungachubeka ufundza ngelutsandvo Jehova Nkulunkulu naKhristu Jesu labanalo ngatsi nangabe uchubeka uzindla ngalo. Mhlawumbe ngemalanga eSikhumbuto kulomnyaka ungafundza ngekucophelela liVangeli linye nobe ngetulu. Ungetami kufundza tintfo letinyenti ngasikhatsi sinye. Kunaloko, yehlisa litubane futsi ufune letinye tizatfu tekutsi kubaluleke ngani kutsi simtsandze Jehova naJesu. Nangabe sekuphele iminyaka leminyenti usecinisweni, mhlawumbe uyatibuta kutsi kungenteka yini utfole lokunye lokusha ngetihloko letivamile njengesihloko lesimayelana nekwehlulela kwaJehova ngekulunga, lutsandvo lwakhe nangenhlawulo. Liciniso likutsi sitawuhlale sifundza tintfo letinsha ngaloku nangaletinye tihloko. Ngako fundza futsi udadishe tincwadzi tetfu. w25.01 24-25 ¶13-15