Zemërimi mund të jetë i rrezikshëm

Pasi Adami dhe Eva dolën nga kopshti i Edenit, patën shumë fëmijë. Djali i parë, Kaini, u bë bujk, kurse djali i dytë, Abeli, u bë bari.

Një ditë, Kaini dhe Abeli i bënë blatime Jehovait. A e di çfarë është një blatim? Është një dhuratë për Perëndinë. Jehovai ishte i kënaqur me blatimin e Abelit, por jo me atë të Kainit. Kjo e zemëroi shumë Kainin. Jehovai e paralajmëroi Kainin se zemërimi mund ta shtynte të bënte diçka të keqe. Por ai nuk dëgjoi.

Në vend të kësaj, Kaini i tha Abelit: ‘Hajde me mua në fushë.’ Kur ishin vetëm atje, Kaini e sulmoi të vëllanë dhe e vrau. Çfarë do të bënte Jehovai për këtë? Jehovai e dënoi Kainin duke e dërguar larg familjes së tij. Kainit nuk do t’i lejohej të kthehej prapë.

Çfarë mësimi nxjerrim? Mund të nxehemi nëse gjërat nuk shkojnë siç duam. Nëse e ndiejmë se zemërimi po rritet brenda nesh—ose nëse të tjerët na paralajmërojnë sepse e vërejnë zemërimin tonë—menjëherë duhet t’i ndreqim dhe t’i kontrollojmë ndjenjat para se ato të na kontrollojnë ne.

Ngaqë Abeli e donte Jehovain dhe bëri çfarë ishte e drejtë, Jehovai e kujton atë gjithmonë. Perëndia do ta sjellë sërish në jetë Abelin kur ta bëjë tokën parajsë.