Ji i guximshëm dhe besnik si Benajahu

Benajahu ishte një luftëtar trim, që shërbeu gjatë mbretërimit të Davidit dhe të Solomonit. Ndonëse Benajahu ishte djalë i një prifti dhe normalisht nuk i kërkohej të përdorte armë, mori pjesë aktivisht në luftërat e Jehovait. Ai tregoi guxim të pashoq. Për shembull, vrau një luan brenda një grope uji dhe mundi një gjigant të armatosur. Davidi i besonte aq shumë Benajahut, sa e caktoi në krye të truprojës së vet.—2 Sam. 23:20-23.

Benajahu i qëndroi besnik Davidit gjatë rebelimit të Absalomit dhe të Adonijahut. (2 Sam. 8:18; 15:18; 1 Mbret. 1:8) Kur Davidi ishte në moshë të shkuar, Benajahu vazhdoi t’i tregonte besnikëri dhe e mbështeti kurorëzimin e Solomonit. (1 Mbret. 1:32-40) Po, Benajahu i qëndroi besnik Jehovait dhe të mirosurve të Tij, edhe kur të tjerët i tradhtuan.

Edhe neve na duhet guxim në luftën kundër armikut tonë të fortë, Satanait, dhe përkrahësve të tij. Veç kësaj, duhet të jemi të vendosur të vazhdojmë të jetojmë sipas standardeve të Jehovait. (Efes. 6:11; 1 Pjet. 5:8, 9) Madje edhe nëse disa zgjedhin të largohen nga Jehovai, ne i qëndrojmë besnikë, të sigurt se do të na shpërblejë.—2 Sam. 22:26.