Çfarë mësojmë nga Jezui
Si ndikojnë te ne engjëjt?
Jezui ka jetuar në sferën qiellore bashkë me Atin e tij «para se të ishte bota». (Gjoni 17:5) Prandaj, ai është më se i kualifikuar t’u përgjigjet pyetjeve vijuese:
A interesohen engjëjt për ne?
▪ Nga Jezui mësojmë se engjëjt interesohen thellësisht për njerëzit. Ai tha: «Engjëjt e Perëndisë [gëzohen] për një mëkatar që pendohet.»—Luka 15:10.
Jezui tregoi se engjëjt kanë përgjegjësi t’i ndihmojnë shërbëtorët e Perëndisë ta ruajnë të fortë marrëdhënien me Të. Kështu, Jezui i paralajmëroi dishepujt që të mos pengonin të tjerët: «Kini kujdes se mos përbuzni një nga këta të vegjlit, sepse po ju them se engjëjt e tyre në qiell shohin gjithnjë fytyrën e Atit tim që është në qiell.» (Mateu 18:10) Me këto fjalë, Jezui nuk donte të thoshte medoemos se çdo dishepulli të tij i është caktuar një engjëll mbrojtës. Por, tregoi se engjëjt që punojnë ngushtësisht me Perëndinë, interesohen konkretisht për të krishterët e vërtetë.
Si mund të na dëmtojë Djalli?
▪ Jezui i paralajmëroi dishepujt se Satanai përpiqet t’i pengojë njerëzit të mësojnë të vërtetën për Perëndinë. Jezui tha: «Kur dikush e dëgjon fjalën e mbretërisë, por nuk e kap kuptimin e saj, vjen i ligu dhe e rrëmben atë që u mboll në zemër.»—Mateu 13:19.
Me ilustrimin për një njeri që mbolli farë gruri në arën e tij, Jezui nxori në pah një mënyrë se si i mashtron Satanai njerëzit. Njeriu përfaqëson Jezuin dhe gruri përfaqëson të krishterët e vërtetë të cilët do të sundojnë me Jezuin në qiell. Gjithsesi, Jezui tha se erdhi një armik dhe «mbolli egjër nëpër grurë». Egjrat përfaqësojnë të krishterët e rremë. «Armiku që i mbolli, është Djalli.» (Mateu 13:25, 39) Ashtu si egjrat duken si filiza gruri, ata që pohojnë se janë të krishterë mund të duken si adhurues të vërtetë. Fetë që mësojnë doktrina të rreme i mashtrojnë njerëzit, duke bërë që të mos i binden Perëndisë. Satanai përdor fenë e rreme që njerëzit të mos bëhen miq të Jehovait.
Çfarë mund të bëjmë që të mos na dëmtojë Satanai?
▪ Jezui e quajti Satanain ‘sundimtar të kësaj bote’. (Gjoni 14:30) Në një lutje drejtuar Perëndisë, ai tregoi si të mbrohemi nga Satanai. Jezui iu lut Atit qiellor për dishepujt e tij: ‘Ruaji nga i ligu. Ata nuk janë pjesë e botës, ashtu si unë nuk jam pjesë e botës. Shenjtëroji me anë të së vërtetës. Fjala jote është e vërteta.’ (Gjoni 17:15-17) Njohuria për Fjalën e Perëndisë na mbron që të mos ndikohemi nga bota mbi të cilën sundon Satanai.
Si ndikojnë sot engjëjt te ne?
▪ Jezui tha: «Në përfundim të sistemit . . . engjëjt do të dalin e do të ndajnë të ligjtë nga të drejtët.» (Mateu 13:49) Sot po jetojmë në ‘përfundim të sistemit’, dhe miliona njerëz po i përgjigjen lajmit të mirë për Mbretërinë e Perëndisë.—Mateu 24:3, 14.
Por, jo të gjithë ata që fillojnë të studiojnë Fjalën e Perëndisë marrin miratimin e tij. Engjëjt drejtojnë veprën e shërbëtorëve të Jehovait dhe njerëzit që e duan vërtet Perëndinë, ndahen nga ata të cilët nuk duan të zbatojnë gjërat që mësojnë. Duke përshkruar ata që fitojnë miratimin e Perëndisë, Jezui tha: «Ata . . . pasi e dëgjojnë fjalën me një zemër të shkëlqyer e të mirë, e mbajnë dhe japin fryt me qëndrueshmëri.»—Luka 8:15.
Për më shumë informacion, shih librin Çfarë mëson vërtet Bibla?, kapitullin 10, botuar nga Dëshmitarët e Jehovait.
[Figura në faqen 16]
Engjëjt i ndihmojnë njerëzit e sinqertë që kërkojnë të vërtetën