Kush e ka kontrollin?
«KUSH sundon mbi botën?» Nëse dikush do të të bënte këtë pyetje, si do të përgjigjeshe? Pjesa më e madhe e njerëzve besimtarë do të përgjigjej «Perëndia» ose «Jezui». Një artikull i botuar në një gazetë të Bahamas, jepte një përgjigje, të cilën pakkush mund ta priste.
«Unë gjeta një fletushkë poshtë derës,—kështu e fillonte artikullin shkrimtarja.—Zakonisht, unë nuk e përfill një komunikim të tillë, por këtë radhë vendosa ta lexoja atë. Titulli bënte pyetjen ‘Kush sundon në të vërtetë mbi botën?’.» (The Freeport News) Duke lexuar fletushkën e bazuar në Bibël, kjo grua mësoi që sundimtari i kësaj bote nuk është as Perëndia dhe as Jezui, por Satana Djalli.—Gjoni 12:31; 14:30; 16:11; 1. Gjonit 5:19.
«Sill në mend vetëm mizoritë gjakftohta në torturat e tmerrshme,—shpjegon fletushka.—Njerëzit kanë përdorur dhomat me gaz, kampet e përqendrimit, flakëhedhësit, bombat me napalm dhe metoda të tjera të tmerrshme për të torturuar dhe masakruar njëri-tjetrin pa mëshirë. . . . Cilat fuqi i shtyjnë njerëzit në vepra të tilla neveritëse apo i drejtojnë në situata, në të cilat ndihen të detyruar të kryejnë vepra mizore? A ke menduar ndonjëherë se mos ndonjë fuqi e ligë, e padukshme, ndikon te njerëzit që të kryejnë vepra të tilla dhune?» A duhet të habitemi që Bibla e quan Satanain «perëndi të këtij sistemi gjërash»?—2. Korintasve 4:4, BR.
Lumturisht, është afër koha kur Satanai dhe demonët e tij nuk do të ekzistojnë më. «Dhe bota kalon me lakminë e saj; por ai që bën vullnetin e Perëndisë mbetet përjetë.» (1. Gjonit 2:17) Po, Bibla premton se ata që kryejnë vullnetin e Perëndisë, kanë shpresën që të jetojnë përgjithmonë në një botë të re të drejtë. (Psalmi 37:9-11; 2. Pjetrit 3:13; Zbulesa 21:3, 4) Çfarë lehtësimi do të jetë kur ndikimi djallëzor i Satanait dhe i demonëve të tij të jetë eliminuar!
Pas përmbledhjes që i bëri përmbajtjes së kësaj fletushke të vogël, botuesja e artikullit të mësipërm përfundoi: «Jam shumë e gëzuar që e lexova këtë fletushkë . . . sepse edhe unë kam qenë e shqetësuar, në lidhje me gjendjen e botës dhe me faktin se kush e kontrollon atë.»