VENDI QË I DHA PERËNDIA IZRAELIT

VENDI që i dha Perëndia Izraelit ishte vërtet një vend i mirë. Kur Moisiu dërgoi para popullit vëzhgues që të eksploronin Tokën e Premtuar dhe të merrnin kampionë të prodhimeve të saj, ata sollën fiq, shegë e një bistak rrushi aq të madh, sa u desh ta vinin në një shkop e ta mbanin dy burra! Edhe pse u kthyen të frikësuar ngaqë u mungonte besimi, ata raportuan: «atje rrjedh vërtet qumësht e mjaltë».​—Nu 13:23, 27.

Tamam para se të hynin në atë vend, zëdhënësi i Jehovait e siguroi popullin: «Jehovai, Perëndia yt, po të çon në një vend të mirë, në një vend me lugina përrenjsh me ujë, me kroje e ujëra të thella që rrjedhin nëpër luginën e gjerë dhe nëpër rajonin malor; në një vend me grurë, elb, hardhi, fiq dhe shegë; në një vend ku ka mjaltë dhe ullinj plot vaj . . . ku nuk do të të mungojë asgjë; në një vend ku gurët janë hekur dhe nga malet nxirret bakër.» (Lp 8:7-9) Edhe sot e kësaj dite, ai është një vend i begatë që jep prodhime të bollshme.

Hijeshia dhe shkëlqimi i tokës së premtuar në lashtësi, zgjojnë shumë interes sot. Pse? Sepse në profecitë mesianike, bollëku me të cilin e bekoi Jehovai Izraelin e lashtë ilustron ç’do të bëjë Perëndia për njerëzimin mbarë kur të sundojë Jezu Krishti, ‘Princi i Paqes’.​—Is 9:6; Ps 67:4-7; 72:16.

[Figurat në botimin e shtypur]

Ishte një vend ku rridhte qumësht . . .

. . . dhe ku kishte mjaltë me bollëk

[Figurat në botimin e shtypur]

Ishte një vend plot ujë

Atje gruri bëhej det . . .

. . . dhe fushave rritej elb

[Figura në botimin e shtypur]

Vreshtat jepnin rrush me bollëk, e prej tij nxirrej verë që u gëzonte zemrën

[Figura në botimin e shtypur]

Fiku, që çmohej për frytin e shijshëm, u bë simbol i paqes dhe begatisë

[Figura në botimin e shtypur]

Me shegë bëhej një pije freskuese

[Figura në botimin e shtypur]

Ullinjtë jepnin vaj​—një pemë e vetme prodhonte boll për një familje të tërë