Astrologët vizitojnë Jezuin

Nga Lindja vijnë disa burra. Ata janë astrologë dhe pretendojnë se, duke studiuar pozicionin e yjeve, mund të shpjegojnë kuptimin e ngjarjeve që i ndodhin dikujt në jetë. (Isaia 47:13) Kur ishin në vendin e tyre, panë një «yll» dhe e ndoqën për qindra kilometra. Ku po i drejton ylli? Jo në Betlehem, por në Jerusalem.

Kur arrijnë në Jerusalem, astrologët pyesin: «Ku është fëmija që ka lindur për t’u bërë mbreti i judenjve? Pamë yllin e tij kur ishim në Lindje, prandaj kemi ardhur për t’i bërë nderime.»—Mateu 2:1, 2.

Teksa dëgjon këto fjalë, mbreti Herod turbullohet. Ja pse thërret krerët e priftërinjve dhe të tjerë udhëheqës fetarë judenj e i pyet se ku duhet të lindë Krishti. Duke iu referuar Shkrimeve, ata i përgjigjen: «Në Betlehem.» (Mateu 2:5; Mikea 5:2) Pas kësaj, Herodi thërret fshehtas astrologët dhe u thotë: «Shkoni, kërkojeni me kujdes fëmijën dhe, pasi ta keni gjetur, kthehuni e më njoftoni, që të shkoj edhe unë t’i bëj nderime.» (Mateu 2:8) Por, në të vërtetë ai ka si qëllim të vrasë fëmijën.

Pasi astrologët ikin, ndodh diçka e pazakontë. «Ylli» që panë kur ishin në lindje po lëviz përpara tyre. Duket qartë se nuk është një yll i zakonshëm, por është aty posaçërisht për t’i drejtuar. Astrologët e ndjekin yllin derisa ai ndalon mbi shtëpinë ku jetojnë Jozefi, Maria dhe Jezui i vogël.

Kur hyjnë në shtëpi, astrologët shohin Marinë me Jezuin e vogël. Në atë moment, përkulen para Jezuit dhe i japin dhurata, si ar, temjan të bardhë dhe mirrë. Pas kësaj, ndërsa bëhen gati të kthehen te Herodi, Perëndia i paralajmëron nëpërmjet një ëndrre që të mos shkojnë. Prandaj ata kthehen në vendin e tyre nga një rrugë tjetër.

Kush mendon se e dërgoi «yllin» që udhëhoqi astrologët? Nëse të kujtohet, «ylli» nuk i çoi direkt te Jezui në Betlehem. Përkundrazi, në fillim i drejtoi në Jerusalem ku takuan mbretin Herod, i cili donte ta vriste Jezuin. Dhe do t’ia kishte dalë, nëse Perëndia s’do të kishte ndërhyrë duke i paralajmëruar astrologët që të mos ia tregonin Herodit vendndodhjen e Jezuit. Është e qartë se «yllin» e dërgoi Satanai, armiku i Perëndisë. Ai donte ta vriste Jezuin, ndaj përdori këtë mjet që të arrinte qëllimin e tij.