Shfaqet Mesia

MË SHUMË se 500 vjet pasi Danieli dha profecinë, engjëlli i Perëndisë, Gabrieli, iu shfaq një virgjëreshe të re me emrin Mari, një pasardhëse e mbretit David. Gabrieli i tha asaj: «Tungjatjeta, o ti që ke gjetur shumë hir, Jehovai është me ty!» (Luka 1:28) Por Maria ishte e frikësuar. Çfarë do të thoshte përshëndetja e Gabrielit?

«Mos ki frikë, Mari, sepse ke gjetur hir nga Perëndia. Ti do të mbetesh shtatzënë, do të lindësh një djalë dhe do t’ia vësh emrin Jezu,​—shpjegoi Gabrieli.—​Perëndia Jehova do t’i japë fronin e Davidit, të atit, . . . dhe mbretëria e tij s’do të ketë fund.» (Luka 1:​30-33) Ç’lajm i mrekullueshëm! Maria do të lindte Mesinë, ‘farën’ e shumëpritur!

Rreth nëntë muaj më pas, lindi Jezui në Betlehem. Atë natë, një engjëll u tha barinjve vendës: «Unë po ju shpall lajmin e mirë për një gëzim të madh . . . sepse sot, në qytetin e Davidit, ju lindi një Shpëtimtar, që është Krisht, Zotëria.» (Luka 2:​10, 11) Më vonë, familja e Jezuit u transferua në Nazaret, ku ai u rrit.

Në vitin 29 të e.s.​—pikërisht në vitin kur duhej të shfaqej Mesia—​Jezui filloi të shërbente si profet i Perëndisë, kur ishte «rreth tridhjetë vjeç». (Luka 3:23) Shumë njerëz kuptuan se atë e kishte dërguar Perëndia. Ata thanë: «Mes nesh ka dalë një profet i madh.» (Luka 7:​16, 17) Por, çfarë u mësonte Jezui njerëzve?

Jezui i mësonte njerëzit ta donin dhe ta adhuronin Perëndinë: Ai deklaroi: «Jehovai, Perëndia ynë, është një Jehova, dhe duaje Jehovain, Perëndinë tënd, me gjithë zemrën tënde, me gjithë shpirtin tënd, me gjithë mendjen tënde dhe me gjithë forcën tënde.» (Marku 12:​29, 30) Gjithashtu, tha: «Jehovain, Perëndinë tënd, adhuro dhe vetëm atij bëji shërbim të shenjtë.»​—Luka 4:8.

Jezui i nxiste njerëzit të donin njëri-tjetrin: «Duaje të afërmin tënd si veten»,​—tha ai. (Marku 12:31) Po ashtu, tha: «Gjithçka që dëshironi të bëjnë të tjerët për ju, bëjeni edhe ju për ta. Kjo është, në të vërtetë, domethënia e Ligjit dhe e fjalëve të profetëve.»​—Mateu 7:12.

Jezui u fliste me zell të tjerëve për Mbretërinë e Perëndisë: ‘Duhet të shpall lajmin e mirë për mbretërinë e Perëndisë, sepse për këtë u dërgova’,​—tha ai. (Luka 4:43) Pse Mbretëria e Perëndia është kaq e rëndësishme?

Shkrimet mësojnë se Mbretëria e Perëndisë është një qeveri qiellore që do të sundojë mbi tokën. Jezui, Mesia, është Mbreti i emëruar nga Perëndia. Profeti Daniel paratha se në qiell Perëndia do t’i jepte Mesisë «sundim, lavdi dhe mbretëri». (Danieli 7:14) Kjo Mbretëri do të vendosë Parajsën në mbarë tokën dhe do t’i shpërblejë shërbëtorët e Perëndisë me jetën e përhershme. A nuk është ky lajmi më i mirë që mund të ekzistojë?