Hurumende Dzinokwanisa Kushanda Pamwe Chete Here Kuti Dzigadzirise Dambudziko Rekuchinja Kwemamiriro Ekunze?—Bhaibheri Rinomboti Kudii?

Musi weSvondo, 20 November 2022, musangano une chekuita nekuchinja kwemamiriro ekunze weCOP27 United Nations Climate Change Conference wakapera. Kunyange zvazvo vatungamiriri venyika vakaita chibvumirano chekuti vachapa mari kunyika dzisina kubudirira yekuti dzibatsirikane panoitika njodzi dzinokonzerwa nekuchinja kwemamiriro ekunze, vakawanda vari kubvuma kuti izvozvo hazvisi kuzogadzirisa dambudziko rekuchinja kwemamiriro ekunze.

• Musi wa19 November 2022, munyori mukuru weSangano Remubatanidzwa Wenyika Dzepasi Rese (United Nations) anonzi António Guterres akati: “Ndiri kufara kuti tawirirana kuti pave nehomwe yamari yekubatsira vaya vanenge vachitambura nemhaka yekuchinja kwemamiriro ekunze.” Akazoenderera mberi achiti: “Asi tinoziva kuti izvozvo zvega hazvina kukwana . . . Tiri kutofanira kumhanya-mhanya kuti nyika yedu isaparare.”

• “Mamiriro ekunze panyika anogona kungochinja chero nguva uye zvichakanganisa mararamiro evanhu vese panyika.”—Mary Robinson, aimbova purezidhendi weIreland uye aimbovawo mutungamiriri wesangano reUnited Nations rinoona nezvekodzero dzevanhu (UN High Commissioner for Human Rights), 20 November, 2022.

Vechidiki ndivo vari kunyanya kunetseka nezveramangwana renyika yedu. Asi hurumende dzichabudirira kushanda pamwe chete here kuti dzigadzirise dambudziko iri rekuchinja kwemamiriro ekunze? Bhaibheri rinomboti kudii?

Hurumende dzichabatana dzogadzirisa dambudziko iri here?

Bhaibheri rinoratidza kuti kunyange hurumende dzikashanda nesimba uye nemwoyo wese kuti dzigadzirise dambudziko rekuchinja kwemamiriro ekunze, hadzikwanisi kuripedza zvachose. Ona zvikonzero zviviri zvinoita kuti zvidaro:

• “ Chakakombama hachigoni kutwasanudzwa.”—Muparidzi 1:15.

  Zvazvinoreva: Hurumende dzine zvimwe zvinhu zvadzisingakwanisi nekuti vanhu havana kusikirwa kuti vazvitonge. (Jeremiya 10:23) Kunyange kana hurumende dzikabatana, hadzikwanisi kugadzirisa matambudziko ari panyika pasinei nekuti dzashanda nesimba zvakadii.

• “Nekuti vanhu vachava vanozvida, vanoda mari, . . . vasingatombodi kubvumirana.”—2 Timoti 3:2, 3.

  Zvazvinoreva: Bhaibheri rakagara rataura kuti vanhu vakawanda vemazuva ano vaizova vanhu vanongofunga zvakavanakira uye vasingadi kushanda pamwe chete nevamwe kuti zvinakire munhu wese.

Tariro yekuti zvichanaka

Hurumende dzevanhu hadzisi idzo dzichaita kuti nyika ino isaparare. Mwari akagadza Jesu Kristu kuti azotonga nyika yese zvakanaka. Bhaibheri rinoti nezvake:

• “Hurumende ichava papfudzi rake. Zita rake richanzi Chipangamazano Anoshamisa, Mwari Ane Simba, Baba Vasingagumi, Muchinda weRugare.”—Isaya 9:6, mashoko emuzasi.

Jesu ndiye Mambo weUmambo hwaMwari, kana kuti hurumende yekudenga. (Mateu 6:10) Ane simba, uchenjeri uye chido chekuita kuti nyika isaparare uye vanhu vagare vasina chekutya. (Pisarema 72:12, 16) Paanenge achitonga panyika, hurumende yake ichaita kuti vanhu vasaramba ‘vachiparadza nyika’ zvoita kuti nyika inake sezvayaimbova kare.—Zvakazarurwa 11:18, Isaya 35:1, 7.

Kuti unzwe zvakawanda nezvekuti dambudziko rekuchinja kwemamiriro ekunze richapedzwa sei, verenga nyaya yakanzi “Zvinotaurwa neBhaibheri Nezvemamiriro Ekunze Uye Ramangwana Redu.”