Zvaungaita Kuti Uyeuke Mavhesi

Wakamboomerwa nekuyeuka imwe vhesi iri muBhaibheri yaunofarira here? Inogona kunge iri vhesi inokunyaradza, inokubatsira kurwisa pfungwa dzakaipa, kana kuti yauri kuda kuudza mumwe munhu. (Pis. 119:​11, 111) Ona zvimwe zvinogona kukubatsira kuyeuka mavhesi.

• Shandisa matag paJW Library^®. Gadzira tag woripa zita rekuti “Mavhesi Andinofarira.” Paunenge uchiverenga Bhaibheri paJW Library wobva waona vhesi rauri kuda kuzoyeuka, unogona kuriisa tag iroro kuti zvizova nyore kuwana vhesi racho.

• Isa vhesi racho pekuti unogara uchiriona. Nyora pabepa vhesi rauri kuda kuyeuka wobva waisa bepa racho pekuti unogara uchiriona. Unogona kunamira bepa racho pamadziro kana kuti padhoo refiriji. Vamwe vanotora pikicha yevhesi racho vobva vaiisa mufoni kana mukombiyuta mavo pekuti kana vakangoibatidza vanobva vaiona.

• Gadzira makadhi anokubatsira kubata mavhesi nemusoro. Nyora mashoko evhesi raunoda kuyeuka kune rimwe divi rekadhi uye kuseri kwacho wonyora kuti vhesi racho nderipi. Unogona kuzotarisa divi rawanyora mashoko evhesi racho woedza kuona kana uchiri kuyeuka rugwaro rwakatorwa mashoko iwayo. Kana kuti unogona kutarisa divi rine rugwaro rwacho woedza kuona kana uchiri kuyeuka mashoko evhesi racho.