KURARAMA KWECHIKRISTU

Chinhu Chitsva Pamusangano Wepakati Pevhiki

Kutanga muna January 2018, musangano wepakati pevhiki uchange wava nezvinhu zvichatorwa muBhaibheri rekudzidza reShanduro yeNyika Itsva yeMagwaro Matsvene reChirungu riri paindaneti, kunyange risati rava kuwanika mumutauro wenyu. Bhaibheri iri rine tsanangudzo dzemamwe mashoko, uye mapikicha nemavhidhiyo. Izvi zvichakubatsira pakugadzirira musangano uye zvichaita kuti uwedzere kuswedera pedyo naBaba vedu vane rudo, Jehovha!

TSANANGUDZO DZEMAMWE MASHOKO

Dzinokubatsira kunzwisisa tsika, nzvimbo uye mashandisirwo emamwe mashoko ari muBhaibheri.

Mateu 12:20

Tambo inopfungaira: Rambi raishandiswa nevakawanda raiva kamudziyo keivhu kadiki kaiiswa mafuta emuorivhi. Rambi racho raiiswa tambo yemufurakisi. Mashoko echiGiriki ekuti “tambo inopfungaira” anogona kureva tambo yava kuda kudzima. Uprofita huri pana Isaya 42:3 hwakataura kuti Jesu aizonzwira tsitsi vanhu vaizvininipisa uye vaidzvinyirirwa. Aizopfutidza tariro yavo yainge yava kudzima.

Mateu 26:13

Chokwadi: Shoko rechiGiriki rekuti a·menʹ rakatorwa sezvariri kubva pane rechiHebheru rekuti ʼa·menʹ, iro rinoreva kuti “ngazvive zvakadaro,” kana kuti “chokwadi.” Kakawanda, Jesu aitanga nekutaura shoko iri, pamwe pacho achitaura vimbiso kana kuti uprofita. Izvi aizviitira kuti aratidze kuti airevesa. Ndiye chete aishandisa seizvi shoko rekuti “chokwadi,” kana kuti ameni. Dzimwe nguva aidzokorora shoko racho kaviri (a·menʹ a·menʹ), sezviri muEvhangeri yaJohani.—Joh 1:51.

MAPIKICHA NEMAVHIDHIYO

Mapikicha nemavhidhiyo anobatsira kunzwisisa zvinhu zvakasiyana-siyana zviri muBhaibheri.

Bhetifage, Gomo reMiorivhi Uye Jerusarema

Vhidhiyo iyi inoratidza mugwagwa unoenda kuJerusarema uchibva nechekumabvazuva, uko kune nzvimbo inonzi et-Tur inofungidzirwa kuti ndiyo yainzi Bhetifage. Mugwagwa wacho unopfuura nechepamusoro peGomo reMiorivhi. Bhetani iri kumabvazuva kweBhetifage uye kweGomo reMiorivhi. Jesu nevadzidzi vake pavaiva muJerusarema, vaiwanzorara kuBhetani, iyo yava kunzi el-ʽAzariyeh (El ʽEizariya) muchiArabic, zvichireva kuti “Nzvimbo yaRazaro.” Jesu anofanira kunge ainorara kumba kwanaMarita, Mariya naRazaro. (Mt 21:17; Mk 11:11; Ru 21:37; Joh 11:1) Paainge ava kuenda kuJerusarema, Jesu anogona kunge aifamba nemugwagwa uri kuratidzwa muvhidhiyo. Paakatasva mwana wembongoro achipfuura nepaGomo reMiorivhi musi waNisani 9, 33 C.E., anogona kunge akashandisa mugwagwa uyu achibva kuBhetifage.

Mugwagwa unobva kuBhetani uchienda kuBhetifage
Bhetifage
Gomo reMiorivhi
Mupata weKidroni
Paiva neTemberi

Chipikiri Pabhonzo Repachitsitsinho

Pikicha iyi ndeyechitsitsinho chekugadzira chakarovererwa chipikiri chakareba 11,5 cm. Chitsitsinho chacho chaicho chakawanikwa muna 1968, paicherwa matongo nechekuchamhembe kweJerusarema, uye ndechemunguva yaitonga vaRoma. Chitsitsinho ichi chinoratidza kuti vanhu vanogona kunge vaiurayiwa vachirovererwa nezvipikiri padanda. Chipikiri chacho chinogona kunge chakafanana nezvipikiri zvakashandiswa nevaRoma pakuroverera Jesu Kristu padanda. Chitsitsinho chakawanikwa muna 1968 chaiva mubhokisi redombo, iro raiiswa mabhonzo echitunha anenge aoma. Izvi zvinoratidza kuti munhu airovererwa padanda aigona kuzovigwa.—Mt 27:35.