Kuvandudza Unyanzvi Hwedu Muushumiri—Kutanga Kutaura Nemunhu Kuti Uparidze Zvisina Kurongwa

Nei Zvichikosha: Patinoita ushumiri hwepaimba neimba, tinowanzowana vakawanda vasiri pamba. Zvisinei, tinogona kusangana nevanhu ivavo patinoshandisa zvifambiso zveruzhinji, patinenge takamirira chiremba, tichimbozorora kubasa kana kuti kuchikoro, uye mune dzimwewo nzvimbo. Jehovha anoda kuti vanhu vose vave nemukana wekunzwa mashoko eUmambo. (1 Tim. 2:3, 4) Kakawanda kacho tisu tinofanira kutanga kutaura navo kuti tikwanise kuparidzira.

Maitirwo Azvo:

Ona zvakaita munhu wacho. Anoratidza kuti ane ushamwari uye anoda zvekutaura here? Mamiriro ezvinhu anoita kuti mukwanise kukurukura zvakanaka here? Vamwe vaparidzi vanotanga vatarisana nemunhu wacho vonyemwerera. Kana akanyemwererawo, vanobva vaedza kutanga kukurukura naye.
Ita munyengetero mupfupi wemumwoyo kana uchitya kutanga kutaura.—Neh. 2:4; Mab. 4:29.
Tanga nemashoko ari nyore akadai sekumukwazisa. Jesu haana kungotanga kutaura nezveUmambo paakakurukura nemukadzi wekuSamariya. (Joh. 4:7) Dzimwe nguva unogona kutanga nekurumbidza munhu wacho uchiti: “Vana venyu vane tsika dzakanaka zvokuti!” Unogonawo kubvunza mubvunzo wakadai sokuti: “Makaonawo here nhau nezuro manheru?”
Kana mangotanga kukurukura, tsvaka mukana wekutaura nezvemashoko akanaka, asi usamukurumidzira. Unogona kutaura zvimwe zvinoita kuti ade kuziva obva akubvunza mubvunzo. Somuenzaniso, kana muri kukurukura nezvemhuri, ungati, “Ndakawana mazano anobatsira panyaya yekurera vana.” Kana muchikurukura nezvezvakabuda munhau, unogona kuti, “Pane mashoko akanaka andakaverenga mazuva apfuura aya.” Usaora mwoyo kana ukatadza kuparidzira munhu wacho.
Takura maturakiti nemamwe mabhuku aunogona kupa munhu anenge afarira.

Edza Izvi Mwedzi Uno:

Vhiki imwe neimwe edza kutanga kukurukura nemumwe munhu uine chinangwa chekuparidza zvisina kurongwa.