Usapotsa Donzo Rorusununguko Runopiwa naMwari
“Pane mudzimu waJehovha, pane rusununguko.”—2 VAKORINTE 3:17, NW.
1. Neiko Isaya 65:13, 14 ichishanda kuZvapupu zvaJehovha?
JEHOVHA ndiMwari worusununguko. Uye chikomborero chakadini chiri rusununguko rwakapiwa naMwari! Nemhaka yokuti vabatiri vake vakazvitsaurira vane rusununguko rwakadaro, aya mashoko aChangamire Ishe Jehovha anoshanda kwavari: “Tarirai! Vabatiri vangu ndimene vachadya, asi imi mumene muchanzwa nzara. Tarirai! Vabatiri vangu ndimene vachanwa, asi imi mumene muchanzwa nyota. Tarirai! Vabatiri vangu ndimene vachafara, asi imi mumene muchatambura nyadzi. Tarirai! Vabatiri vangu ndimene vachadanidzira nomufaro nokuda kwomugariro wakanaka womwoyo, asi imi mumene muchachema nemhaka yokurwadziwa kwomwoyo uye muchaungudza nemhaka yokuputsika kwomudzimu.”—Isaya 65:13, 14, NW.
2. Neiko vanhu vaJehovha vachibudirira mumudzimu?
2 Vanhu vaMwari vanofarikanya uyu mugariro unobudirira womudzimu nemhaka yokuti vanotungamirirwa nomudzimu wake, kana kuti simba rinobata basa. Muapostora Pauro akati: “Jehovha Mudzimu; uye pane mudzimu waJehovha, pane rusununguko.” (2 VaKorinte 3:17, NW) Chii chiri donzo rorusununguko runopiwa naMwari? Uye chii chinodikanwa kwatiri kuti tirushandise zvakazara?
Rusununguko Runa Mwari
3. Rudzii rworusununguko runa Mwari, uye nei?
3 Jehovha oga ane rusununguko rwakakwana. Hapana nechimwe chezvisikwa zvake chinogona kuganhurira rusununguko rwake nemhaka yokuti iye ndiMwari Wamasimba ose uye Changamire Wechisiko Chapose pose. Munhu akatendeka Jobho akati, “ndiani ungamudzivisa? Ndiani ungati kwaari: ‘Unoiteiko?’” (Jobho 9:12) Nenzira yakafanana, mambo weBhabhironi Nebhukadnezari akamanikidzirwa kubvuma, kuti: “Hakuna ungadzora ruoko rwake [Mwari] kana ungati kwaari: ‘Unoiteiko?’”—Dhanieri 4:35.
4. Kunodaro sei kuti Jehovha anochengeta rusununguko rwake mukati memiganhu?
4 Zvisinei, nheyo dzakarurama dzaJehovha amene dzinochengeta rusununguko irworwo rwakakwana mukati memiganhu. Ikoku kwakaenzanisirwa apo Abrahama akaratidzira itiro hanya pamusoro pavagari veSodhoma uye akabvunza, kuti: “Mutongi wenyika yose haangaiti zvakarurama here?” Mhinduro yaMwari inoratidzira kuti iye anoziva mutoro wokuita chiri chakarurama. Iye angadai asina kuparadza Sodhoma kudai vagari vakarurama vapi navapi vakanga vasara. (Genesi 18:22-33) Mwari anochengetawo rusununguko rwake mukati memiganhu nemhaka yokuti rudo rwake nouchenjeri zvinomuita anononoka kutsamwa uye anoshandisa kuzvidzora.—Isaya 42:14.
Ganhuriro Dzorusununguko Rwomunhu
5. Ndezvipi zviri zvinhu zvinoganhurira rusununguko rwomunhu?
5 Kunyange zvazvo Jehovha ane rusununguko rwakakwana, zvimwe zvose zvinoshanda mukati meganhuriro dzinogadzwa nomusikirwo wazvo, mano, uye nzvimbo yokugara, pamwe chete nezvinhu zvakadai senduramo yazvino yakaganhurirwa yavanhu vanotadza. Mwari akasika munhu ane rusununguko rwakakwana rwokushanda mukati menzvimbo iyo Jehovha akanga amupa. Pane zvimwe zvikonzero zvinoverengeka nei rusununguko rwomunhu rwakaganhurirwa, rusina kukwana.
6. Kuzvidavirira kuna Mwari kunei chokuita kurusununguko rwedu?
6 Kutanga, rusununguko rwomunhu rwakaganhurirwa nemhaka yokuti Mwari akasika munhu kuti abatire donzo Rake. Jehovha ‘akafanirwa nokugamuchira mbiri norukudzo nesimba nemhaka yokuti akasika zvinhu zvose uye nemhaka yokuda kwake zvakavapo uye zvakasikwa.’ (Zvakazarurwa 4:11) Naizvozvo munhu anozvidavirira kuMuiti wake, uyo akaita nomazvo mitemo iyo vanhu vanofanira kudzorwa nayo. Muna Israeri wakare muMutemo waMosesi, Mwari aida kuti vanhu vamwe navamwe vaurawe kana ivo vakashandisa zvisina kufanira zita rake kana kuti kuputsa mutemo weSabata. (Eksodho 20:7; 31:14, 15; Revhitiko 24:13-16; Numeri 15:32-36) Kunyange zvazvo isu samaKristu tisati tiri pasi poMutemo, rusununguko rwedu rwakaganhurirwa nemhaka yokuti tinozvidavirira kuna Jehovha, uyo ari Mutongi wedu, Mupi wemitemo, uye Mambo.—Isaya 33:22; VaRoma 14:12.
7, 8. (a) Mitemo yomuviri inoganhurira sei rusununguko rwomunhu? (b) Ndimimwe mitemoi yaMwari inoganhurira rusununguko rwedu savanhu?
7 Chechipiri, rusununguko rwomunhu rwakaganhurirwa nemhaka yemitemo yaMwari yomuviri. Somuenzaniso, nemhaka yomutemo wesimba rinokweva rapasi, munhu haagoni kusvetuka achibva pachivako chirefu pasina kuzvikuvadza amene kana kuti kuzviuraya. Nomutoo wakajeka, mitemo yaMwari yomuviri inoganhurira rusununguko rwomunhu kuti aite zvinhu zvakati.
8 Chechitatu, rusununguko rwomunhu rwakaganhurirwa nemhaka yemitemo yaMwari yetsika. Sezvingabvira zvikurusa, wakacherekedza kushanda kweizvo Pauro akanyora pana VaGaratia 6:7, 8, (NW): “Musatsauswa: Mwari haasati achifanira kusekwa. Nokuti zvipi kana zvipi zvinodyara munhu, iye achachekawo izvozvi; nemhaka yokuti iye unodyara nomurangariro wenyama yake achacheka kuora kunobva panyama yake, asi iye unodyara nomurangariro womudzimu achacheka upenyu husingaperi hunobva mumudzimu.” Nomutoo usingapokanidzwi, mitemo yaJehovha Mwari yetsika inoganhurirawo rusununguko rwedu, asi kuiteerera kunodikanwa kuti tiwane upenyu.
9. Kuva kwedu rutivi rwenzanga yavanhu kunoganhurira sei rusununguko rwedu?
9 Chechina, rusununguko rwomunhu rwakaganhurirwa nemhaka yokuti iye rutivi rwenzanga yomunhu. Nokudaro, iye anofanira kuva norusununguko bedzi kusvikira kutambanuko yokuti harudzongonyedzi zvisakafanira urwo rwavamwe. MaKristu anofanira kuzviisa pasi pe“zviremera zvikuru” zvehurumende, kuzviteerera chero bedzi zvisingarairi kuti tiputse mitemo yaMwari. (VaRoma 13:1; Mabasa 5:29) Somuenzaniso, tinofanira kuteerera mitemo pamusoro pokuterwa kwemitero, kumhanya kwatinoita pakuchaira motokari, uye zvichingodaro. Idi rokuti tinofanira kuteerera mitemo yakadaro ya“Kesari” rinoratidzazve kuti rusununguko rwedu runopiwa naMwari haruna kukwana.—Marko 12:17; VaRoma 13:7.
Neiko Rusununguko Rune Mwero?
10, 11. Nei Jehovha akapa vanhu rusununguko rune mwero?
10 Neiko Mwari akapa vanhu rusununguko rune mwero? Chimwe chikonzero chaiva chokuti Musiki agova nezvisikwa zvakangwara papasi zvaizomuunzira rukudzo nerumbidzo kupfurikidza namashoko azvo akaisvonaka nomufambiro. Vanhu vanogona kuita ikoku, nepo mhuka dzisingagoni. Mhuka, dzichiva dzinodzorwa nomusikirwo, hadzizivi chinhu pamusoro petsika. Unogona kurovedza imbwa kusatora chimwe chinhu, asi haugoni kuidzidzisa kusarurama kwokuba. Mhuka ine zviito zvayo zvakarongwa, sokunge zvakadaro, haigoni kuita zvisarudzo zvinounza rumbidzo norukudzo kuna Mwari, nepo munhu achigona kusarudza norusununguko kubatira Muiti wake nokuda kworudo nokuonga.
11 Mwari anopawo vanhu urwu rusununguko nokuda kwebetsero yavo nomufaro. Vanogona kushandisa rusununguko rwavo rune mwero kupfurikidza nokutanga kuita nokurangarira zvinhu, vane mutsa navanobatira pamwe. Vanhu vanewo rusununguko rwechisarudzo muzvinhu zvakadai sebasa uye pokugara. Nhasi, zvinhu zvemari nezvamatongerwe enyika kazhinji kazhinji zvinoganhurira rusununguko irworwo rwechisarudzo, asi ikoku kungave nokuda kwamakaro omunhu, kwete nemhaka yenzira iyo Mwari akasika nayo rudzi rwomunhu pakuvamba.
12. Neiko voruzhinji vorudzi rwomunhu vari muusungwa?
12 Kunyange zvazvo Jehovha akapa vanhu rusununguko rukuru, voruzhinjisa nhasi vari muuranda hunokangaidza. Chii chakaitika? Vaviri vokutanga vohunhu, Adhama naEvha, vakapotsa donzo rorusununguko runopiwa naMwari. Vakapfuura ganhuriro dzoumwari parusununguko rwavo uye vakadenha utongi hune maruramiro hwaMwari pavari saChangamire Ishe, Jehovha. (Genesi 3:1-7; Jeremia 10:10; 50:31) Vasingagutsikani nokushandisa rusununguko rwavo kukudza Mwari, vakarushandisa noudyire, kusarudza nokuzvimirira chakanga chakarurama nechakanga chisina kururama, nokudaroko vachikumbanira Satani mukupandukira kwake Jehovha. Panzvimbo pokuwana rusununguko rwakawanda, zvisinei, Adhama naEvha vanotadza vakapinzwa muganhuriro dzinotambudza nousungwa, kuderedzwa kworusununguko rwavo, uye pakupedzisira rufu. Vazukuru vavo vakagara nhaka uku kurasika kworusununguko. “Nokuti vose vakatadza vakasasvika pambiri yaMwari.” “Mubairo wechivi rufu.”—VaRoma 3:23; 5:12; 6:23, NW.
13. Neiko Satani akakwanisa kuisa vanhu muuranda?
13 Nemhaka yorupandukiro muEdheni, Adhama navazukuru vake vakapindawo muusungwa kuna Satani Dhiabhorosi. Chokwadi, “nyika yose iri musimba rowakaipa”! (1 Johane 5:19, NW) Kuri nemhaka yesimba rake guru namano kuti Satani akakwanisa kunyengedza uye kuita varanda rudzi rwose rwomunhu rwakabva kuna Mwari. Uyezve, vanhu vane udyire vakatonga vanhu biyavo kukuvadziko yavo. (Muparidzi 8:9) Nokudaro, rudzi rwose zvarwo rwomunhu zvino rwuri muusungwa kuchivi norufu, kuna Satani namadhemoni ake, uye kumasangano enyika ezvamatongerwe enyika, ezvemari, uye orudzidziso.
Rusununguko Rwechokwadi Runoitwa Kuti Rubvire
14. Tariro yorudzi rwomunhu nokuda kworusununguko rwechokwadi yakabatanidzwa nechii?
14 Kuwana rusununguko kubva muchivi, rufu, uye Dhiabhorosi nenyika yake zvakabatana nokutsunga kwaMwari kugadzikisa nhau pamusoro poururami hwouchangamire hwake amene hwechisiko chapose pose. Nemhaka yokuti Satani akamutsa iyi nhau, Jehovha akamubvumira kuramba aripo, kunyange sezvo Iye akabvumira Farao kuvapo kwenguva yakati. Ikoku kuri nokuda kwokuti Jehovha agoratidza simba rake zvizere uye kuita kuti zita rake riziviswe mupasi rose. (Eksodho 9:15, 16) Mwari achakurumidza kuzvireverera amene saChangamire Wechisiko Chapose pose ndokutsvenesa zita rake dzvene kupfurikidza nokubvisa ruzvidzo rwakaunzwa pariri kupfurikidza norupandukiro rwaSatani, Adhama, uye Evha. Nokudaro, avo vanotya Jehovha vachasunungurwa muusungwa kuchivi norufu uye vachapinzwa munyika itsva yorusununguko runopiwa naMwari.—VaRoma 8:19-23.
15. Ibasai rakaita Jesu mukudzorera rusununguko kurudzi rwomunhu?
15 Kudzorera rusununguko kurudzi rwomunhu, Mwari akatuma Mwanakomana wake kupasi somunhu. Kupfurikidza nokupa nokuzvidira upenyu hwake hwakakwana hwohunhu, Mwanakomana waMwari, Jesu Kristu, akagovera chibairo chorudzikinuro, hwaro hwokusunungura rudzi rwomunhu. (Mateo 20:28) Iye akazivisawo shoko rorusununguko. Pamavambo oushumiri hwake, akashandisa kwaari amene mashoko, anoti: “Mudzimu waChangamire Ishe Jehovha uri pandiri, nokuda kwechikonzero chokuti Jehovha akandizodzera kuzivisa mashoko akanaka kuna vanyoro. Iye akandituma kuzosunga vakaputsika mwoyo, kuzoparidzira rusununguko kuna avo vakatapwa nokusvinudza meso kunyange kuna vasungwa.”—Isaya 61:1, NW; Ruka 4:16-21.
16. Inhanoi idzo vaJudha vomuzana rokutanga ramakore vaifanira kuita kuti vawane rusununguko rwechokwadi?
16 Vanhu vaizowana sei rusununguko irworwo? Jesu akati: “Kana imi muchigara mushoko rangu, muri vadzidzi vangu zvirokwazvo. Muchaziva zvokwadi, nezvokwadi ichakusunungurai.” Nokudaro, vateveri vaJesu vakasvika pakufarikanya rusununguko rwomudzimu. (Johane 8:31, 32, 36) Uyezve, Jesu akaudza gavhuna weRoma Pontio Pirato, kuti: “Ndakaberekerwa izvo, ndakauyira izvozvo panyika, kuti ndipupure zvokwadi. Mumwe nomumwe wezvokwadi unonzwa inzwi rangu.” (Johane 18:37) VaJudha vakagamuchira zvokwadi yakaparidzwa nokuenzanisirwa naJesu vakapfidza zvivi zvavo, vakaruramisa nzira yavo yokutadza, vakazvipa vamene kuna Jehovha, uye vakabhapatidzwa sezvakanga zvaitwa Jesu. (Mateo 3:13-17; Mabasa 3:19) Munzira iyoyi vakasvika pakufarikanya rusununguko rune mwero runopiwa naMwari.
17. Neiko Jehovha achipa vabatiri vake rusununguko?
17 Jehovha anopa vabatiri vake vakavimbika rusununguko zvikurukuru mukurevererwa kwouchangamire hwake amene asiwo nokuda kwenyaradzo yavo kana kuti betsero. Iye akasunungura vaIsraeri muusungwa hweEgipita kuitira kuti vagomukudza soumambo hwavaprista, zvapupu zvake. (Eksodho 19:5, 6; Isaya 43:10-12) Nenzira yakafanana, Jehovha akabudisa vanhu vake muutapwa hweBhabhironi zvikurukuru kuti vavakezve tembere yake ndokudzorera namato yechokwadi. (Ezra 1:2-4) Apo vatapwa vakaitira hanya bedzi zvinonyaradza zvavo vamene zvokunyama, Jehovha akatuma vaporofita vake Hagai naZekaria kuvayeuchidza nezvemisengwa yavo pamberi paMwari. Rusununguko rwavo runopiwa naMwari rwakanzarwozvo kuiswa munzvimbo yakafanira kwakaguma nokupedzwa kwetembere, kumbiri yaMwari, uyewo nyaradzo negarikano kuvanhu vake.
Kusapotsa Donzo Rorusununguko Runopiwa naMwari
18. Neiko kuchigona kutaurwa kuti vabatiri vaJehovha vomuzuva razvino uno havana kupotsa donzo rorusununguko rwavo runopiwa naMwari?
18 Zvakadiniko navabatiri vomuzuva razvino uno vaMwari? Sesangano, havana kupotsa donzo rorusununguko rwavo runopiwa naMwari. Muma 1870 vakavamba kubuda muzvikanganiso zveBhabhironi nokufarikanya rusununguko rwechiKristu rwakawedzerwa. Ikoku kwaiva muwirirano naZvirevo 4:18, iyo inoti: “Asi gwara ravakarurama rakaita sechiedza chamambakwedza, chinoramba chichiwedzera kubwinya kusvikira pamasikati makuru.” Bva, sezvo vanhu vaMwari vakare vakapinzwa muutapwa hweBhabhironi kwenguva yakati, muna 1918 vabatiri vaJehovha vakapinda mumwero wousungwa hwakati kuBhabhironi Guru. (Zvakazarurwa 17:1, 2, 5) Mitezo youmambo ihwohwo hwenyika hworudzidziso rwenhema yakafara apo “zvapupu zviviri” zvokufananidzira zvakarara zvakafa mumudzimu. Asi kupfurikidza nomutsa usakafanirwa waMwari, muna 1919 vabatiri vake vakazodzwa vakamutsidzirwa, vachisunungurwa mumudzimu. (Zvakazarurwa 11:3, 7-11) Vachishandisa rusununguko rwavo runopiwa naMwari, vakava zvapupu zvinoshingaira zvoWokumusorosoro. Naizvozvo, kwakanga kwakafanira sei kuti ivo, muna 1931, nomufaro vakagamuchira zita rokuti Zvapupu zvaJehovha! (Isaya 43:10-12) Zvikurukuru chibviro cha 1935 Zvapupu zvakazodzwa zvakakumbanirwa ne“boka guru,” avo vanokarira kuwana upenyu husingagumi pasi pano. Ivowo havasati vari kupotsa donzo rorusununguko rwavo runopiwa naMwari.—Zvakazarurwa 7:9-17, NW.
19, 20. (a) Ndeipi iri nzira imwe inokosha iyo mairi vanhu vaJehovha vanoshandisa zvakanaka rusununguko rwavo runopiwa naMwari? (b) Zvapupu zvaJehovha zvinoshandisa zvakanaka rusununguko rwazvo runopiwa naMwari muimwe nzirai inokosha?
19 Vanhu vaJehovha vari kushandisa zvakanaka rusununguko rwavo runopiwa naMwari zvikurukuru munzira mbiri dzinokosha. Yokutanga, vanorushandisa kuronda nzira yakarurama. (1 Petro 2:16) Uye mukurumbira wakaisvonaka zvakadini wavanawo! Somuenzaniso, mumwe murume akambopinda muHoro yoUmambo muZurich, Switzerland, uye akati aida kuva mumwe weZvapupu zvaJehovha. Abvunzwa chikonzero nei, akataura kuti hanzvadzi yake yakanga iri Chapupu uye yakanga yadzingwa nokuda kwoutere. Iye akati: ‘Ndiro sangano randinoda kukumbanira—iro risingashiviriri mufambiro wakaipa.’ Nechikonzero chakanaka New Catholic Encyclopedia yakataura kuti Zvapupu zvaJehovha zvakawana mukurumbira wokuva “rimwe ramapoka anozvibata zvakanakisisa munyika.”
20 Zvapupu zvaJehovha zvinoshandisawo rusununguko rwazvo runopiwa naMwari kupfurikidza nokuita basa razvo rokuparidzira mashoko akanaka oUmambo, sezvakaita Jesu. (Mateo 4:17) Kupfurikidza neshoko romuromo nepeji yakatsikirirwa, zvose zviri zviviri nenzira yakarongwa uye nenzira yamasanga, zviri kuzivisa Umambo hwaJehovha. Mukuita saizvozvo izvo zviri kuzvibetsera zvimene zvikuru kupfurikidza nokusimbisa kutenda kwazvo uye kujekesa tariro yazvo. Uyezve, uyu mubato unobatira kuponesa vose vari vaviri izvo naavo vanozviteerera. (1 Timotio 4:16) Pamusoro pouyu mubato, bhuku rinonzi Dynamic Religious Movements, rinoti: “Kungava kwakaoma kuwana mitezo yerimwe boka ripi neripi rinoshanda zvakaoma zvakafanana parudzidziso rwavo sezvinoita Zvapupu.”
21. Ufakazii huripo hwokuti Jehovha ari kukomborera ushumiri hwavanhu vake?
21 Jehovha ari kutikomborera sei mukuita donzo rorusununguko rwedu runopiwa naMwari! Ikoku kunogona kuonwa kubva mumushumo webasa romumunda wegore rapera—chiverengero chapamusoro chavaparidzi voUmambo vanopfuura mamirioni mana, navanopfuura mamirioni gumi vakapinda Chirangaridzo chorufu rwaJesu. Mune kumwe kunzvera, Ireland yakava nezviverengero zvapamusoro zvavaparidzi zvomwedzi nomwedzi 29 zvakatevedzana; Mexico yakava nezviverengero zvapamusoro 78 mumwedzi 80; uye Japan yakava nezviverengero zvapamusoro 153 munhevedzano!
Shandisa Zvakanaka Rusununguko Rwako Runopiwa naMwari
22. Chii chiri pfundo guru remibvunzo inonyandura mufungo yatingazvibvunza timene?
22 Kana iwe uri mumwe weZvapupu zvakazvitsaurira zvaJehovha, uri kushandisa zvakanaka rusununguko urwo Mwari akakupa here? Mumwe nomumwe wedu angaita zvakanaka kuzvibvunza amene, kuti: ‘Ndinongwarira kushandisa rusununguko rwangu runopiwa naMwari here kuti ndidzivise kugumbura ani naani nomufambiro usina kururama? Ndinoteerera nenzira yokutungamirirwa nehana mitemo yaKesari here, kunyange zvazvo ndichiisa mutemo waMwari pakutanga? Ndinobatira pamwe zvizere navakuru veungano here? Ndiri kushandisa rusununguko rwangu runopiwa naMwari zvakazara mukuparidzira mashoko akanaka here? Ndinova ne“zvakawanda zvokuita mubasa raShe” nguva dzose here? Ndiri kuronda nokudisisa basa rokunyika here apo ndingagona kuva ndichishandisa zviri nani rusununguko rwangu runopiwa naMwari kupfurikidza nokukudza ushumiri hwangu, kusvasvavirira mutoro mukuru zvikuru muungano kana kuti basa renguva yakazara?’—1 VaKorinte 15:58, NW.
23. Tinofanira kuitei kuti tirege kupotsa donzo rorusununguko runopiwa naMwari?
23 Tose zvedu ngati“ravirei ndokuona kuti Jehovha wakanaka.” (Pisarema 34:8) Ngativimbei naye, kuwirirana nemitemo yake, uye kurumbidza zita rake dzvene kupfurikidza nokuzivisa nokushingaira Umambo hwake. Yeuka kuti avo ‘vanodyara zvakawanda vachachekawo zvakawanda.’ (2 VaKorinte 9:6) Naizvozvo, ngatipei basa romwoyo wose kuna Jehovha ndokuratidza kuti hatina kupotsa donzo rorusununguko rwedu runopiwa naMwari.
Waizopindura Sei?
◻ Rudzii rworusununguko runa Mwari?
◻ Rusununguko rwomunhu rune ganhuriroi?
◻ Rusununguko rwechokwadi rwakaitwa kuti rubvire sei?
◻ Chii chatinofanira kuita kuti tidzivise kupotsa donzo rorusununguko runopiwa naMwari?
[Mufananidzo uri papeji 9]
Rusununguko rwomunhu rwakaganhurirwa nezvinhu zvakadai somutemo wesimba rinokweva rapasi