Kandiro Kanoenda Kunobva Kamwe—Chii?
“TARIRAI! Handinetsi vavakidzani vangu. Kana ndirini, ivo vanogona kuita zvavanoda. Asi, chokwadika, kana ivo vakava muchitambudzo, ndingaita zvandingagona kubetsera.” Iwoyo ndiwo murangariro wako here? Apo ngwavaira dzinorova, mabasa omutsa nokusava noudyire zvingawanda, kazhinji kazhinji kukushamiswa kwavazhinji. Asi ikoku kwakakwana here?
Kana iwe uri mubereki, pasina panikiro wakaraira vana vako kudzivisa kushatirisa vatambi biyavo. Vazhinji vedu tine mavanga omuhuduku hwedu anoratidza kuti kufuratira nhungamiro iyoyo kunounza matsive. Hungu, takadzidza uchenjeri hwechirevo chakajekeswa nomuzivi wokuMabvazuva Confucius: “Icho usingadi kuti chiitwe kwauri umene, usaita kuvamwe.” Unoziva here, kunyanguvezvo, kuti uku kunongova zvako kushandurwa kwakaderera, kusina kunanga kwokunozivikanwa seKandiro Kanoenda Kunobva Kamwe?
Mutemo Wakananga
Mukuwirirana neWebster’s New Collegiate Dictionary, “kandiro kanoenda kunobva kamwe” kunorondedzerwa so“mutemo womufambiro wetsika unonongedzera kuna [Mateo] 7:12 uye [Ruka] 6:31 uye unotaura kuti munhu anofanira kuita kuvamwe seizvo iye aizoita kuti vamwe vaite kwaari.” Ringa bhokisi riri kumugumo kwepeji uye rangarira kuti shanduro dzeBhaibheri dzakasiana-siana dzaMateo ganhuro 7, ndima 12 dzinobvumira sei kuisvonaka kweiyi nheyo inotungamirira kupenya.
Tapota cherechedza kuti kunyange zvazvo mashoko achisiana kushanduro neshanduro, mutemo wacho wakananga. Pashure pokurangarira zvose, seizvo Jesu akarangarira pamberi pezvi muMharidzo yapaGomo: “Rambai muchikumbira, uye muchapiwa; rambai muchitsvaka, uye muchawana; rambai muchigogodza, uye muchazarurirwa. Nokuti munhu ari wose anokumbira anogamuchira, uye munhu ari wose anotsvaka anowana, uye kumunhu ari wose anogogodza achazarurirwa.” (Mateo 7:7, 8, NW) Kukumbira, kutsvaka, kugogodza, zvose zviito zvakananga. “Zvinhu zvose, naizvozvo,” Jesu akapfuurira, “izvo munoda vanhu kuti vakuitirei, imiwo munofanira kuvaitira saizvozvo.”—Mateo 7:12, NW.
Bhaibheri rinoratidza kuti vadzidzi vaJesu vakatsigirawo kurarama nomutemo mumwe chetewo. (VaRoma 15:2; 1 Petro 3:11; 3 Johane 11) Nenzira isingafadzi, kunyanguvezvo, mugariro wazvino woukama hwavanhu unopupurira kuti, zvikurukuru, vanhu, vangava maKristu nezita kana kuti kwete, havauteveri. Ikoku kunoreva here kuti uyu mutemo womufambiro wetsika hausati uchakanaka? Zvichida wava wechinyakare here?
[Bhokisi riri papeji 3]
“Itai kuvamwe vanhu zvose izvo imi mungavaita kuti vaite kwamuri.”—The Holy Bible, rakashandurwa naR. A. Knox.
“Batai vamwe vanhu chaizvoizvo seizvo mungada kubatwa navo.”—The New Testament in Modern English, rakashandurwa naJ. B. Phillips.
“Chipi kana chipi chamunoshuva kuti vamwe vangaita kwamuri uye nokuda kwenyu, imi itaiwo saizvozvo kwavari uye nokuda kwavo.”—The Amplified New Testament.
“Itirai vamwe chinhu chiri chose chamunoda kuti vakuitirei.”—The New Testament in the Language of Today, rakashandurwa naW. F. Beck.
“Mumativi ose ipapoka, batai vanhu biyenyu seizvo mungashuva kuti vakubatei.”—The Four Gospels, rakashandurwa naE. V. Rieu.
“Munofanira kurovedza kubata navamwe sezvamungada kuti vabate nemi.”—The New Testament, rakashandurwa naC. B. Williams.