Paradhiso Isina Zvinetso—Chiroto Bedzi Here?
“KUNE rugare kwazvo!” Ari musango remipaini mhiri kweRedfish Lake muruwa rweIdaho, U.S.A., chiono chacho chaiva norunyararo zvirokwazvo. “Ndizvo chaizvo zvandinofungidzira paradhiso kuva yakaita,” akadaro mufambi wacho.
Zuva raipenya zvakajeka pamhenderekedzo yokumaodzanyemba yechitsuwa cheMediterranean cheCyprus. Masaisai airova zvinyoronyoro mahombekombe. Akagara paresitorendi yaiva pamusoro pamawere akatarisana neichi chiono, mushanyi akati: “Iyi iparadhiso!”
Vazhinji vedu tinokoshesa kuyeukwa kwezviono zvakaita seizvi. Asi vagari vanoziva kuti mhoteredzo dzakafanana neparadhiso kazhinji kazhinji dzinopa murangariro usiriwo wezvinhu chaizvoizvo zvakaipa zvoupenyu hwezuva riri rose: moto yemusango mujinga mune miti meRocky Mountains, kushatswa kwegungwa kunotapura hove uye pakupedzisira vanhu—tisingataure chinhu pamusoro perwisano dzinotyisidzira upenyu dzamarudzi akawanda uye pakati penzanga.
Paradhiso—Chii?
Iwe unofungidzira sei paradhiso? The New Shorter Oxford English Dictionary rinopa serondedzero yaro yokutanga: “Bindu reEdheni rinorondedzerwa muna Gen[esi] 2, 3.” Iyi inonongedzera kurondedzero iri mubhuku rokutanga reBhaibheri yenzvimbo iyo Mwari akaisa munhu wokutanga, Adhama. MuParadhiso iyoyo yapamavambo, miti “inofadza meso, neyakanaka kudya” yaikura yakawanda.—Genesi 2:9.
Rondedzero yechipiri yeduramazwi iroro inobatanidza “paradhiso” ne“Denga, mudzidziso yechiKristu neyechiMuslim” asi ipapo rinowedzera kuti: “Zvino yava zvikurukuru [yoku]detemba.” Kumufambi nomushanyi wedu, zvisinei, paradhiso yaiva “nzvimbo yorunako rwukuru kana kuti mufaro,” yechitatu yerondedzero dzeduramazwi.
Nyanzvi yezvehurumende yeBritain yezana ramakore rechi 16 Sir Thomas More yakanyora bhuku rine musoro unoti Utopia umo iyo yakarondedzera nyika yokufungidzira umo mitemo, hurumende, uye mamiriro ezvinhu enzanga akanga akakwana. Yakaratidzika kuva isiri chaiyoiyo kwazvo zvokuti nhasi Webster’s New Collegiate Dictionary rinopa imwe rondedzero ye“Utopia” se“chirongwa chisingashandi chokuvandudza nacho nzanga.”
Kuvateveri vomutungamiriri wesekete rePeople’s Temple Jim Jones, Utopia yaiva nzvimbo yakabviswa miti nouswa musango reGuyana. Nenzira inosuruvarisa, muna 1978 iyi paradhiso yaikarirwa yakava chiono chorufu rwavanopfuura 900 vavo—chiroto chinotyisa zvirokwazvo! Somugumisiro, vanhu padzimwe nguva vanobatanidza murangariro weparadhiso nemasekete echienzi ane miitiro inovhundutsa nokukangaidza.
Munyika umo utsotsi namasimba masimba zvinotyisidzira, umo hosha inotyisidzira vakuru navaduku zvakafanana, uye umo ruvengo nemisiyano yorudzidziso zvinokamura nzanga, mhoteredzo dzakaisvonaka kazhinji kazhinji dzinongova chokubata kumeso bedzi. Hazvishamisi kuti vanhu vanofunga paradhiso kuva chiroto bedzi! Asi izvi hazvina kumisa vamwe vanhu kuedza kuwana kana kuti kunyange kuzviitira paradhiso. Vave vachibudirira sei?