Mwari Anoti Kudii Panyaya Yekubheja?

Mhinduro yeBhaibheri

Kunyange zvazvo Bhaibheri risina parinonyatsotaura nezvekubheja, kana tikaongorora zvarinotaura tinogona kuona kuti munhu anenge achiita zvekubheja anenge achiita chivi pamberi paMwari.​—VaEfeso 5:17.a

• Makaro ndiwo anoita kuti munhu ade kubheja, uye Mwari anovenga makaro. (1 VaKorinde 6:9, 10; VaEfeso 5:3, 5) Munhu anobheja anenge achitarisira kuti dai vamwe vakaruza iye ahwine. Bhaibheri rinoshora kuchochora zvinhu zvemumwe munhu.​—Eksodho 20:17; VaRoma 7:7; 13:9, 10.

• Kubheja uchida kuhwina kunyange kamari kashoma, kunogona kuzoita kuti upedzisire wava kuda mari zvakanyanya.​—1 Timoti 6:9, 10.

• Kakawanda kacho vanhu vanobheja vanotenda mashura kana kuti vanoti dai vakaita mhanza yakanaka vakahwina. Asi Mwari anoona zvinhu zvakadaro sekutonamata zvidhori, uye haafariri zvinhu zvakadaro.​—Isaya 65:11.

• Bhaibheri rinokurudzira kushanda nesimba, kwete kuti munhu angowana zvinhu zvaasina kushandira. (Muparidzi 2:24; VaEfeso 4:28) Vaya vanoteerera zano iroro reBhaibheri ‘vanodya zvokudya zvavanozvishandira.’​—2 VaTesaronika 3:10, 12.

• Kubheja kunoita kuti munhu atange kuita makwikwi, nepo Bhaibheri richitoshora kuita zvemakwikwi.​—VaGaratiya 5:26.