Ramba Uchifambira Mberi Semushumiri
1. Mienzaniso ipi yekare inoratidza kuti tinofanira kufambira mberi sevashumiri?
1 VaKristu vanofanira kufambira mberi sevashumiri. Ndosaka Jesu akadzidzisa vateveri vake kuti vafambire mberi pakuparidza. (Ruka 9:1-5; 10:1-11) Ndozvakaitawo kuti Prisira naAkwira vatore Aporo, vakava naye, “vakamutsanangurira nzira yaMwari zvakanyatsorurama.” (Mab. 18:24-26) Ndozvakaitawo kuti Pauro akurudzire Timoti, uyo aiva muevhangeri akanga agara nebasa kuti arambe achishingairira kudzidzisa kuti kufambira mberi kwake “kuonekwe nevanhu vose.” (1 Tim. 4:13-15) Pasinei nekuti tava nenguva yakareba sei tichishandira Ishe sevaparidzi vemashoko akanaka, tinofanira kuramba tichivandudza unyanzvi hwedu muushumiri.
2. Tingadzidza sei kune vamwe?
2 Dzidza Kune Vamwe: Imwe nzira yekuti tivandudze unyanzvi hwedu ndeyekudzidza kune vamwe. (Zvir. 27:17) Saka tarisa zvinoitwa nevamwe pavanoparidza. Bvunza vaparidzi vane unyanzvi zvaunofanira kuvandudza, wonyatsoteerera zvavanotaura. (Zvir. 1:5) Zvinokuomera here kunoonazve munhu anenge afarira, kutanga chidzidzo cheBhaibheri kana kuti zvimwewo zvatinoita muushumiri? Kumbira kubatsirwa nemutariri weboka renyu rekuparidza kana kuti nemuparidzi agara nebasa. Yeukawo kuti mudzimu mutsvene waJehovha unogona kutibatsira kuvandudza unyanzvi hwedu, saka gara uchiunyengeterera.—Ruka 11:13.
3. Tinofanira kuita sei kana tikaudzwa patinofanira kuvandudza kunyange kana tisina kukumbira?
3 Usagumbuka kana ukaudzwa paunofanira kuvandudza, kunyange kana usina kukumbira kubatsirwa. (Mup. 7:9) Sezvakaitwa naAporo, bvuma kubatsirwa uchizvininipisa uye uchiratidza kuti unoonga. Kuita izvi kunoratidza kuti une uchenjeri.—Zvir. 12:15.
4. Ndechipi chikonzero chikuru chakataurwa naJesu chekuti tifambire mberi sevaevhangeri?
4 Kufambira Mberi Kunokudza Mwari: Jesu akashandisa muenzaniso kuti akurudzire vateveri vake kufambira mberi sevashumiri. Jesu akati ndiye muzambiringa uye vateveri vake vakazodzwa ndivo mapazi. Akati Baba vanochenesa bazi rose rinobereka zvibereko “kuti ribereke zvibereko zvizhinji.” (Joh. 15:2) Sezvinoita muridzi wemunda wemazambiringa uyo anoda kuti mizambiringa yake iwedzere kubereka, Jehovha anoda kuti tirambe tichivandudza unyanzvi hwedu pakupa “chibereko chemiromo” yedu. (VaH. 13:15) Chii chinofadza chinoitika kana tikafambira mberi sevaevhangeri? Jesu anotipa mhinduro yekuti: “Baba vangu vanokudzwa neizvi, kuti munoramba muchibereka zvibereko zvizhinji.”—Joh. 15:8.