Ungaita Ushumiri Misi yeSvondo Here?
1. Tingadzidzei pane zvakaitwa naPauro neshamwari dzake kuFiripi?
1 Raiva Sabata, zuva raizorora vaJudha vakawanda vaiva kuFiripi. Pauro neshamwari dzake vaishanyira guta racho pane rumwe rwenzendo dzavo dzoumishinari. Kudai vakanga vazorora pakuita ushumiri hwavo pazuva iroro hapana angadai akavashora. Zvisinei, vakaziva kuti vaJudha vaiungana kunze kweguta racho kuti vanyengetere, saka vakashandisa mukana wacho kuvaparidzira. Pauro neshamwari dzake vanofanira kunge vakafara zvikuru Ridhiya paakateerera uye pakabhabhatidzwa vose veimba yake! (Mab. 16:13-15) Sezvo vakawanda mazuva ano vachizorora misi yeSvondo, wadii kushandisa imwe nguva yemusi uyu kuvaparidzira?
2. Zvipingamupinyi zvipi zvakakurirwa nevanhu vaJehovha kuitira kuti vaparidze misi yeSvondo pasina kunetswa?
2 Hondo Yekuparidza Musi weSvondo: Muna 1927, vanhu vaJehovha vakakurudzirwa kushandisa imwe nguva yemusi weSvondo wega wega muushumiri. Izvi zvakaita kuti vashorwe nekukurumidza. MuUnited States, vakawanda vakasungirwa kuputsa mitemo yeSabata reSvondo, kukanganisa rugare, uye kutengesa pasina rezinesi. Asi vanhu vaJehovha havana kukanda mapfumo pasi. Mumakore ekuma1930, vakaronga “mishandirapamwe yemapoka,” vaparidzi vemuungano dzakapoteredza pavaibatana kuti vaparidze mune imwe ndima. Dzimwe nguva vaparidzi pavaisungwa, vainge vakawandisa zvokuti zviremera zvaitadza kuvamisa kuparidza. Unonyatsoonga here kuzvibayira kwakaita hama idzodzo kuitira kuti tikwanise kuparidza misi yeSvondo pasina anotinetsa?
3. Chii chinoita kuti musi weSvondo uve zuva rakanaka rokuita ushumiri?
3 Zuva Rakanaka Zvikuru Kuparidza: Vanhu vakawanda havaendi kubasa musi weSvondo saka vanenge vari pamba. Kakawanda vanenge vakanyatsozorora. Vamwe vanoenda kuchechi vanganyanya kuda kutaura nezvaMwari musi uyu. Kana tiine musangano wedu musi weSvondo, tinenge takatopfeka sezvatinoita tichienda kuushumiri, saka tadii kuronga kuita ushumiri tisati taenda kumusangano kana kuti pashure pemusangano? Gadzira kambuva kadiki kekuenda nako kana uchizokada.
4. Mufaro wei watingawana kana tikashandisa imwe nguva yemusi weSvondo pakuita ushumiri?
4 Kunyange tikashandisa imwe nguva musi weSvondo muushumiri, tichangova nenguva yekuzorora kwatinoda. Uye pakuzorora kwatichaita tichavawo nekugutsikana kunobva pakuita basa dzvene. (Zvir. 19:23) Tinogonawo kuwana mufaro unobva pakuwana munhu anenge Ridhiya!