Purogiramu Itsva Yegungano Redunhu

Tingakwanisa sei kumira takasimba patinenge tichishorwa zvinotyisa nevaya vanopikisa kunamata kwechokwadi? Tingakunda sei masimba anoramba achida kutidzorera shure munyika isingadi Mwari? Purogiramu yegungano redunhu yegore rebasa ra2009 ichapindura mibvunzo iyi inokosha. Musoro wacho uchange uchiti, “Ramba Uchikunda Zvakaipa Nezvakanaka.” (VaR. 12:21) Chimboona zvatakachengeterwa.

Mutariri weruwa achakurukura hurukuro dzinoti, “Kusimbiswa Kuti Tikunde Zvakaipa Nezvakanaka,” “Ngwarira Kunyanya Kuzvivimba!,” “Zvakaipa Zvose Zvava Pedyo Nokuguma!,” uye “Kusimbisa Kutenda Kwedu Kuti Tikunde Nyika.” Mutariri wedunhu achatipa hurukuro dzinoti, “Uno Ndiwo Mwaka Wokuramba Takamuka!,” inobva pana VaRoma 13:11-13, uye “Usaora Mwoyo Pazuva Rokutambudzika,” inobva pana Zvirevo 24:10. Tiri kutarisirawo hurukuro yomutariri wedunhu inoti, “Kukurukura Zvinodiwa Nedunhu.” Imwe hurukuro inokurudzira ichange ichiti, “Ungava Here ‘Paushumiri Uhwu,’ Nokupayona?” Chikamu chokutanga chehurukuro mbiri dzokusiyirana chichange chichiti, “Mirai Makasimba Murwisane Nemanomano aDhiyabhorosi.” Zvinotibatsira kuziva uye kuramba manomano aDhiyabhorosi muzvinhu zvinobudiswa nesayenzi, zvinovaraidza, uye dzidzo. Hurukuro yokusiyirana inoti, “Wana Simba Rokurwisa Satani Mazuva Ano Akaipa” ichatiratidza kuti tinganyatsoshandisa sei zano rakafuridzirwa ratinowana pana VaEfeso 6:10-18.

Kana tichiparidzira mashoko oUmambo tinenge tichitokunda zvakaipa kubva pazvinotangira. (Zvak. 12:17) Ndicho chikonzero nei Satani ari kuramba achitambudza Zvapupu zvaJehovha! (Isa. 43:10, 12) Asi Dhiyabhorosi achanyatsokundikana nokuti takatsunga ‘kuramba tichikunda zvakaipa nezvakanaka.’ Nyatsoronga kuti ubatsirwe zvikuru nezvikamu zvina zvegungano redunhu iri.