Bhokisi Remibvunzo

◼ Chidzidzo cheBhaibheri chemhuri chinofanira kushumwa kuungano here?

Kana mubereki wechiKristu achiitisa chidzidzo cheBhaibheri chemhuri uye painewo vana vasina kubhabhatidzwa, mubereki wacho angashuma isingapfuuri awa imwe chete pavhiki, kudzokerazve kumwe chete pavhiki, uye chidzidzo cheBhaibheri chepamusha chimwe chete pamwedzi. Izvi ndizvo zvinofanira kuitwa kunyange kana chidzidzo chacho chichipfuura awa imwe chete, chichiitiswa kanodarika kamwe chete pavhiki, kana kuti kudzidza kwacho kuchiitwa nomwana mumwe nomumwe.—Ona bhuku raHushumiri Hwedu, p. 104.

Kana vose vomumhuri vari Zvapupu zvakabhabhatidzwa, ipapo nguva yacho kana chidzidzo chacho hazvishumwi sebasa romumunda (kunze kwokuti mwana wacho achiri kudzidza bhuku rechipiri pashure pokubhabhatidzwa). Zvinodaro nokuti mushumo webasa romumunda weungano unoratidza zvikurukuru zviri kuitwa pakuparidza mashoko akanaka nokudzidzisa chokwadi cheBhaibheri vaya vasiri vashumiri vaJehovha vakazvitsaurira uye vakabhabhatidzwa. (Mat. 24:14; 28:19, 20) Zvisinei, izvi hazvimboderedzi kukosha kwokuitisa chidzidzo chakadaro nguva dzose.

Mutoro wevabereki vechiKristu kudzidza nevana vavo. Vaya vanoda kubatsirwa kutanga kana kuti kuvandudza chidzidzo chavo chemhuri vangakumbira rubatsiro kuvakuru. Kana mamiriro ezvinhu achida kuti mumwe muparidzi adzidze Bhaibheri nomwanakomana kana mwanasikana asina kubhabhatidzwa wemhuri yechiKristu inosonganirana neungano, mutariri anotungamirira kana kuti mutariri webasa anofanira kubvunzwa. Kana chidzidzo ichocho chikatenderwa, uya ari kuchiitisa angachishuma sokungoshuma kwaaizoita chimwe chidzidzo cheBhaibheri chipi nechipi.

Kudzidzisa vana munzira dzaJehovha kunoda nguva yakawanda kwazvo uye kushanda nesimba kupfuura zvinoshumwa sebasa romumunda. (Dheut. 6:6-9; Zvir. 22:6) Vabereki vechiKristu vanofanira kurumbidzwa nokuda kwokutarisira mutoro wavo unorema wokurera vana vavo “mukuranga nomukutungamirira ndangariro kwaJehovha.”—VaEf. 6:4.