Hatina Kumbozvinzwa Here?
1 Chokwadi takazvinzwa! Jehovha anodzokorora zvinhu zvakawanda muShoko rake kuti vanhu vake vabetserwe. Jesu aiwanzodzokorora dzidziso dzake pamusoro pezvinhu zvakasiyana-siyana zvoUmambo. Vaapostora vake vairamba vachidzokorora nhau dzomudzimu nevaya vaiva vakanyatsosimba muchokwadi.—VaR. 15:15; 2 Pet. 1:12, 13; 3:1, 2.
2 Munguva yedu sangano raJehovha rakaronga kuti nhau dzinokosha dzidzokororwe dzadzokororwazve pamisangano yeungano. Mamwe mabhuku akadzidzwa adzidzwazve. Hungu, zvinokosha kunzwa zvinhu zvatakambonzwa!
3 Kudzokorora Kunoita Chinodikanwa Chinokosha: Zviyeuchidzo zvaJehovha zvinodzamisa kunzwisisa kwedu, zvinokudza mafungiro edu, uye zvinosimbisa kutsunga kwedu kurambira panzira mumudzimu. (Pis. 119:129) Kudzokorora zvinodiwa naMwari nenheyo kwakafanana nokutarira mugirazi. Kunotibetsera kuzviongorora uye kunorwisana nokuda kuva “munzwi anokanganwa.”—Jak. 1:22-25.
4 Kana tisingarambi tichizviyeuchidza nezvechokwadi, zvimwe zvinhu zvichapesvedzera mwoyo yedu. Zviyeuchidzo zvaMwari zvinotisimbisa kuti tidzivise kupesvedzera kunoshatisa kwenyika yaSatani. (Pis. 119:2, 3, 99, 133; VaF. 3:1) Zviyeuchidzo zvenguva dzose zvatinowana maererano nokuzadzika kwezvinangwa zvaMwari zvinotiita kuti ti“rambe [t]akarinda.” (Mako 13:32-37) Kudzokorora chokwadi cheMagwaro kunotibetsera kuramba tiri mumugwagwa unoenda kuupenyu husingaperi.—Pis. 119:144.
5 Nzira Yokubetserwa iwe Pachako: Tinofanira ku‘kwevera mwoyo yedu kuzviyeuchidzo zvaMwari.’ (Pis. 119:36) Chidzidzo chakajairwa pachinodzidzwa pamusangano weungano, tinofanira kugadzirira pachine nguva, kutarira magwaro arimo, uye kufungisisa mashandisire atingaita mashoko acho. Ngatisarega kugadzirira kudzokorora tichinyora kuri muChikoro Choushumiri Chokutonga Kunoitwa naMwari, tichifunga kuti hazvina basa. (Ruka 8:18) Hatimbodi kuva vasingateereri nemhaka yokuti chokwadi chinokosha chinowanzodzokororwa pamisangano yedu.—VaH. 5:11.
6 Ngativewo nemafungiro omunyori wepisarema okuti: “Ndakafara kwazvo munzira yezvipupuriro zvenyu, sezvandinofarira pfuma yose.” (Pis. 119:14) Hungu, takambonzwa zvinhu izvi zvinokosha, uye zvimwe tichazvinzwazve. Nemhaka yei? Nokuti Jehovha anoziva kuti tinofanira kuzvinzwa!