Ivai Vadzidzisi veShoko raMwari—Muchishandisa Bhuku raKurarama Nokusingaperi
1 Mushumiri ari wose akazvitsaurira waJehovha ane mutoro wokugoverana mubasa rokudzidzisa Shoko raMwari kuvamwe. Ukombi hwouyu mutoro hunova hwakajeka apo tinonzwisisa kuti ndiye uyo ane chiremera chose mudenga napasi pano uyo akatipa basa rokuti “muite vadzidzi vavanhu vamarudzi ose, . . . muchivadzidzisa.” (Mat. 28:18-20, NW) Naizvozvo, kugoverana mukuparidzwa kwamashoko akanaka kunoda kuti tive vadzidzisi!—2 Tim. 2:2.
2 Mukati maAugust tinogona kushandisa unyanzvi hwedu hwokudzidzisa apo tinenge tichigovera bhuku duku raKurarama Nokusingaperi. Tinogona kusarudza mimwe mifungo yapaMagwaro inofadza mariri ndokugadzirira tsinhiro shomanene idzo dzichatibetsera kutanga kurukurirano.
3 Pakugovera bhuku duku ra“Kurarama Nokusingaperi” ungagona kuti:
◼ “Tashanyira vakawanda vevavakidzani venyu uye tawana kuti vanoitira hanya pamusoro pewedzero huru muutsotsi, ugandanga, uye masimba masimba. Semafungiro enyu, neiko ikoku kwava chinetso chakadaro? [Bvumira mhinduro.] Ndekwefariro chaiyo kwatiri kuti Bhaibheri rakafanotaura kuti ikoku kwaizoitika. [Rava 2 Timotio 3:1-3.] Cherekedzai kuti ikoku kunofanira kuitika mu‘mazuva okupedzisira.’ Ikoku kunoreva kuti chimwe chinhu chodokuguma. Munofunga kuti chii?” Bvumira mhinduro. Tendeukira kupeji 156, ratidza mufananidzo, uye kurukurai rugwaro rumwe kana kuti maviri akanokorwa papeji iyoyo. Ita gadziriro dzokudzokera gare gare uye tsanangura kuti nei tichidavira kuti izvi zvikomborero zvava pedyo.
4 Ungada kushandisa uku kusvika:
◼ “Vanhu vakawanda vanowana chinetso mukuedza kuwana chinangwa chaichoicho mukurarama. Nepo vashomanene vachifarikanya mufarwa wakaganhurirwa, vakawanda zvikurusa vanorarama upenyu hwakazadzwa nokuora mwoyo nokutambura. Munofunga kuti iyi ndiyo nzira iyo Mwari aida kuti tirarame nayo here? [Bvumira mhinduro.] Bhaibheri rinoratidza kuti Mwari anoda kuti tirarame munyika yakaita seiyi.” Nongedzera kumufananidzo uri papeji 12, uye ipapo tendeukira kumapeji 10-14, ndima 11-14, uye tsanangura icho iye akapikira. Mutsa uyu mubvunzo nokuda kwekurukurirano apo unodzoka: “Tinogona sei kuva nechokwadi chokuti Mwari achazadzika zvipikirwa zvake?”
5 Ungagovera bhuku ra“Kurarama Nokusingaperi” kupfurikidza nokuratidza mufananidzo wakazara uri papeji 3 uye kubvunza, kuti:
◼ “Maizoda kurarama munyika yakazara navanhu vanofara seiyi here? [Bvumira mhinduro.] Bhaibheri rinotiudza kuti Mwari anoda vanhu uye anoda kuti ivo vararame nokusingaperi nomufarwa papasi rino.” Tendeukira kupeji 156 uye rava Pisarema 37:29, 34. Ipapo, tsanangura chatinofanira kuita kana tichida kurarama muiyi Paradhiso. Karakadza kudzoka ndokukurukura chikonzero nei kutenda Jesu Kristu kwakakosha kwazvo.
6 Jehovha anofadzwa apo tinoita kuti ‘kupfuurira mberi [kwedu] kuonekwe kupfurikidza nokungwarira kudzidzisa kwedu.’ (1 Tim. 4:15, 16) Bhuku raKurarama Nokusingaperi rinogona kuva betsero chaiyoiyo kwatiri munhamburiko dzedu dzokubetsera avo vanoshuva kunzwa “mashoko akanaka ezvinhu zvakanaka.”—Isaya 52:7.