Kutsvaka Mhinduro

“Anenge munhu wose ane maonero ake aanoita [Jesu]. Pasinei nokuti tinotenda kuti Jesu aivapo kana kuti hatina chokwadi nazvo, tose tinobvunza kuti, ‘Murume uyu anombova ani?’”—MUNYORI STAN GUTHRIE.

VANHU vanoda kuziva zvakawanda nezvaJesu. Kwava nemabhuku akawanda chaizvo nemafirimu akawanda anotaura nezvake. Kunyange zvakadaro, vanhu vachine mibvunzo yakawanda nezvaJesu. Vanotaura zvakasiyana-siyana nezvake.

Makore mashomanana apfuura, vamwe vatori venhau vaviri vakabvunza vanhu paIndaneti mubvunzo wokuti, “Jesu aimbova ani?” Pasi apa pane dzimwe mhinduro dzakapiwa nevanhu:

● “Anofanira kunge aiva rabhi (mudzidzisi) uyo akaratidza muenzaniso wokunzwira tsitsi.”

● “Aivawo munhu akangofanana nesu asi aine upenyu hunoshamisa.”

● “Hapana uchapupu hunoratidza kuti Jesu akamborarama pano pasi.”

● “Jesu Mwanakomana waMwari akaberekwa, akafa uye akamuka kubva kuvakafa kuti atinunure pazvitadzo zvedu. Nanhasi achiri mupenyu uye achadzoka panyika.”

● “Ndinofunga kuti Jesu Kristu ndiye chete mwanakomana waMwari, munhu wenyama asi ari mwari zvekare.”

● “Nyaya dzaJesu ingano dzinotendwa nevanhu vakapusa.”

Zviri pachena kuti mafungiro iwayo haangambovi echokwadi ose iwo akasiyana zvakadaro. Pane here chinhu chatingavimba nacho chingatiudza mhinduro dzechokwadi dzemibvunzo yedu pamusoro paJesu? Vanobudisa magazini ino vane chokwadi chokuti Bhaibheri iShoko raMwari uye ndiro chete rinotiudza chokwadi chizere nezvaJesu.a—2 Timoti 3:16.

Munyaya inotevera, tichakurukura mhinduro dzeBhaibheri dzemibvunzo inowanzobvunzwa nevanhu nezvaJesu. Jesu pachake akataura kuti “munhu wose anotenda maari” anogona kuponeswa. (Johani 3:16) Tinokukumbira kuti uongorore mhinduro dzacho wobva wasarudza kuti unoda here kudzidza zvakawanda nezvaJesu uye kuti ungaratidza sei kuti unotenda maari.

[Mashoko Omuzasi]