Muti “Unochema” Ne“misodzi” Yawo Inoshandiswa Zvakasiyana-siyana

‘Torai barsami murape kurwadziwa,’ inodaro Jeremia 51:8. Kutsvaka kunobva uyu mushonga unonyaradza marwadzo nounorapa kunotisvitsa kuchitsuwa cheChios, muGungwa reAegean.

MUKUTANGA kwezhizha, varimi vomuChios vanogadzirira kukohwa munzira isingawanzoshandiswi pakukohwa zvimwe zvinhu. Vapedza kutsvaira pasi, vanoita uriri hwevhu hwakati sandara vachipoteredza zvinomera zvinenge makwenzi zvinonzi miti yemastic. Varimi vacho vanobva vabaya-baya pamakwati, vachiita kuti miti yacho “icheme.” “Misodzi” yakachenuruka yemanani inotanga kuchururuka. Papera vhiki mbiri kana nhatu, madonhwe emanani aya anogwamba uye varimi vanoaunganidza, kungava nokuabvisa zvakananga pahunde kana kuti pauriri hwevhu huri pasi. “Misodzi” iyi, inonzi chingamu yemastic yave ichishandiswa kugadzira barsami.

Asi, kukohwa kusati kwatanga, kushivirira nebasa rakaoma zvinodiwa. Hunde dzemiti yacho mipfumbu yakamonyana dzinokura zvishoma nezvishoma. Zvinotora makore anobva pa40 kusvika 50 kuti miti yacho inyatsosvika pakukura zvakazara—kunowanzova kureba kwemamita maviri kusvika kumatatu.

Kunze kwebasa rokutema hunde dzacho nokuunganidza “misodzi” yacho, rimwe basa rinodiwa kuti mastic igadzirwe. Varimi pavanenge vapedza kuunganidza “misodzi” yemastic, vanosefa, kusuka, uye kuisa mumhando dzayo maererano nokukura uye kunaka kwayo. Gare gare, mastic inozocheneswa uye inogona kuzoshandiswa zvinhu zvakasiyana-siyana.

Nhoroondo Yomuti Unokosha

Shoko rechiGiriki rokuti “mastic” rakafanana neshoko rinoreva “kutsenga nemazino.” Zita racho rinoratidza kuti kubva munguva dzekare, manani emastic ave achishandiswa sechingamu kuitira kuti mukanwa musanhuwa.

Mashoko ekaresa anotaura nezvemastic anobva kuna Herodotus, munyori wenhau dzakaitika wechiGiriki wezana remakore rechishanu B.C.E. Vamwe vanyori vekare nevarapi—kusanganisira Apollodorus, Dioscorides, Theophrastus, uye Hippocrates—vanodudza zvinoshandiswa mastic pakurapa. Kunyange zvazvo miti yemastic ichimera ichitevedza Mediterranean Coast yose, kubvira munenge muna 50 C.E., kurimwa kwemastic kwave kuchingoitwa kuChios chete. Uye mastic ndicho chinhu chikuru chaifarirwa nevose vakapamba Chios, kubvira pavaRoma, vaGenoa kusvika kuvaOttoman.

Mastic Inoshandiswa Zvakasiyana-siyana

Varapi veIjipiti yekare vaishandisa mastic kurapa zvirwere zvakasiyana-siyana, kusanganisira manyoka, uye zvirwere zvemajoini. Vaiishandisawo sezvokupisira zvinonhuwira uye pakuomesa zvitunha. Kumuti wemastic ndiko kungadaro kwakabva ‘barsami yeGiriyedhi,’ inotaurwa muBhaibheri nokuda kwokugona kurapa kwayo uye kushandiswa muzvizoro uye kuomesa zvitunha. (Jeremia 8:22; 46:11) Zvakataurwa kuti muti unobudisa sitakte, chimwe chezvinhu zvaisanganiswa zvinonhuwira zvokupisira zvaishandiswa pazvinhu zvinoyera chete unofanira kunge uri muboka remiti yemastic.—Eksodho 30:34, 35.

Nhasi, mastic inowanikwa muvhanishi inochengetedza mifananidzo yakapendwa nependi yeoiri, midziyo yakagadzirwa nemapuranga, uye zviridzwa. Inoshandiswa sechinhu chinodzivirira uye chinovhara mvura, uye inonzi ndiyo imwe yezvakanakisisa zvinoita kuti ruvara rusapera pazvipfeko uye papendi yevanyori vemifananidzo. Mastic yakashandiswawo muzvinonama uye mukugadzira matehwe. Nokunhuwirira kwayo uye zvimwe zvainazvo, mastic inoshandiswa musipo, muzvizoro, uye mupefiyumu.

Mastic yakatsanangurwa pakati pemishonga inozivikanwa zviri pamutemo pasi rose yakarongwa muzvikamu 25. Ichiri kushandiswa mumishonga yekare munyika dzechiArabhu. Mastic inoshandiswawo mukunama mazino uye mukunama mukati motuchubhu tunoputira mapiritsi.

Sezvo ichipa barsami, “misodzi” yomuti wemastic “unochema” yakanyaradza marwadzo uye kurapa kwemazana emakore. Saka nokuda kwechikonzero chakanaka, muprofita Jeremia anoti: ‘torai barsami murape kurwadziwa.’

[Mifananidzo iri papeji 31]

Chios

Kukohwa “mastic”

“Misodzi” ye“mastic” inounganidzwa nounyanzvi

[Kwazvakatorwa]

Chios uye mifananidzo yematanho okukohwa: Courtesy of Korais Library; mimwe yose: Kostas Stamoulis