Zvinobatsira Zvinobva Pakuda Shoko raMwari
“Ude [uchenjeri], hugokurinda. . . . Huchakuvigira kukudzwa, kana uchihumbundikira.”—ZVIREVO 4:6, 8.
1. Kunyatsoda Shoko raMwari kunosanganisirei?
KURAVA Bhaibheri kunokosha kumuKristu. Zvisinei, kungorirava ikwo kwoga hakuratidzi kuda Shoko raMwari. Zvakadini kana mumwe munhu akarava Bhaibheri asi obva aita zvinhu zvinoshorwa neBhaibheri? Zviri pachena kuti haadi Shoko raMwari semadirwe araiitwa nomunyori wePisarema 119. Kuda Shoko raMwari kwakamuita kuti ararame maererano nezvaraida.—Pisarema 119:97, 101, 105.
2. Zvii zvinobatsira zvinobva muuchenjeri huri muShoko raMwari?
2 Kurarama maererano neShoko raMwari kunoda kuti munhu arambe achigadzirisa mafungiro ake nemararamiro. Maitiro akadaro anoratidza uchenjeri hwaMwari hunoreva kushandisa zvakanaka zivo nokunzwisisa zvinowanwa mukudzidza Bhaibheri. “Ude [uchenjeri], hugokurinda. Uhukudze, hugokukwidziridza iwe; huchakuvigira kukudzwa, kana uchihumbundikira. Huchapa musoro wako chishongo chakanaka; huchakuisira korona inobwinya.” (Zvirevo 4:6, 8, 9) Kukurudzira kwakanaka sei kwokuti tide Shoko raMwari ndokutungamirirwa naro! Ndiani asingadi kurindwa, kukwidziridzwa, nokupiwa mbiri?
Kurindwa Pakukuvadzwa Zvachose
3. Nei vaKristu vachifanira kurindwa kupfuura zvavaiitwa kare, uye pana ani?
3 Munhu anorindwa sei nouchenjeri hunowanwa nokudzidza nokushandisa Shoko raMwari? Chokutanga, anorindwa pana Satani Dhiyabhorosi. Jesu akadzidzisa vateveri vake kunyengeterera kununurwa pane wakaipa, Satani. (Mateu 6:13) Nhasi, kudiwa kwokubatanidza chikumbiro ichi muminyengetero yedu ndekwokukurumidzira zvechokwadi. Satani nemadhimoni ake vakadzingwa kudenga zvichitevera 1914, uye somugumisiro Satani “akatsamwa kwazvo, achiziva kuti ane nguva pfupi.” (Zvakazarurwa 12:9, 10, 12) Kutaura kuno, kutsamwa kwake kunofanira kuva kwakanyanya chaizvo zvaari kurwa asingabudiriri ne“vanochengeta mirayiro yaMwari uye vane basa rokupupurira Jesu.”—Zvakazarurwa 12:17.
4. VaKristu vanorindwa sei pakudzvinyirira kwaSatani uye misungo yake?
4 Mukutsamwa kwake Satani anopfuurira kukonzera vashumiri vechiKristu ava zvinetso uye kukonzera kutambudza kwechisimba kana kuti kukonzera zvimwe zvimhingamupinyi kubasa ravo. Anodawo kunyengedza vazivisi voUmambo kuti vafunge nezvezvinhu zvakadai somukurumbira wenyika, kuda kufaranuka, kuunganidza zvinhu zvokunyama, nokutsvaka mafaro, pane kufunga nezvebasa rokuparidza Umambo. Chii chinorinda vashumiri vakatendeka vaMwari kuti vasabvume kukurirwa nokudzvinyirira kwaSatani kana kubatwa mumisungo yake? Chokwadi, munyengetero, kunyatsova noukama naJehovha, uye kutenda kuti zvakavimbiswa naye zvichabudirira zvinokosha. Asi zvose izvi zvakabatanidzwa nokuziva zviyeuchidzo zveShoko raMwari nokutsunga kuzviteerera. Zviyeuchidzo izvi zvinouya nokurava Bhaibheri nemabhuku anobatsira kudzidza Bhaibheri, kupinda misangano yechiKristu, kuteerera zano romuMagwaro rinobva kune watinotenda naye, kana kuti nokungofungisisa nheyo dzeBhaibheri dzatinoyeuchidzwa nomudzimu waMwari tichiita zvokunyengetera.—Isaya 30:21; Johani 14:26; 1 Johani 2:15-17.
5. Uchenjeri huri muShoko raMwari hunotirinda sei?
5 Vaya vanoda Shoko raMwari vanorindwa mudzimwe nzira. Somuenzaniso, vanodzivisa kuora mwoyo uye zvirwere zvinokonzerwa nezvinhu zvakadai sekushandisa zvinodhaka zvisina kufanira, kusvuta fodya, uye unzenza. (1 VaKorinde 5:11; 2 VaKorinde 7:1) Havavhiringi ukama nokuita guhwa kana kuti kutaura zvisingaratidzi mutsa. (VaEfeso 4:31) Havasi vanhu vasingagutsikani nokuongorora ruzivo runonyengera rwouchenjeri hwenyika. (1 VaKorinde 3:19) Nokuda Shoko raMwari, vanorindwa pazvinhu zvinogona kuvaita kuti vasave noukama naMwari netariro youpenyu husingaperi. Vanogara vakabatikana kuudza vavakidzani vavo kuti vatende zvinhu zvinoshamisa zvakavimbiswa zviri muBhaibheri, vachiziva kuti nokuita kudaro vacha‘zviponesa ivo nevanovateerera.’—1 Timoti 4:16.
6. Uchenjeri huri muShoko raMwari hungatirinda sei kunyange mumamiriro ezvinhu akaoma?
6 Chokwadi, vanhu vose—kunyange vaya vanoda Shoko raMwari—“vanowirwa vose nenguva nezvinoitika.” (Muparidzi 9:11) Hazvidzivisiki kuti vamwe vedu vachawirwa nengwavaira, kurwara zvikuru, tsaona, kana rufu rwunongoerekana rwaitika. Kunyange zvakadaro, takarindwa. Hapana nhamo ingakuvadza zvachose munhu anonyatsoda Shoko raMwari. Nokudaro, hatifaniri kunyanyonetseka pamusoro pezvingaitika munguva iri mberi. Kana tatora matanho ose okuzvidzivirira ane musoro, zviri nani kusiyira nhau mumaoko aJehovha ndokusarega kusachengeteka kwoupenyu kwanhasi kuchititorera rugare. (Mateu 6:33, 34; VaFiripi 4:6, 7) Ramba uchifunga nezvechokwadi chetariro yerumuko neyeupenyu huri nani apo Mwari ano“ita kuti zvinhu zvose zvive zvitsva.”—Zvakazarurwa 21:5; Johani 11:25.
Zviratidze Kuti Uri I“vhu Rakanaka”
7. Jesu akaudza mapoka akauya kuzomunzwa muenzanisoi?
7 Kukosha kwokuona Shoko raMwari zvakarurama kwakasimbiswa mune mumwe wemifananidzo yaJesu. Sezvo Jesu aizivisa mashoko akanaka muParestina yose, mapoka akaungana kuti amunzwe. (Ruka 8:1, 4) Zvisinei, havasi vose vainyatsoda Shoko raMwari. Hapana mubvunzo, vakawanda vakauya kuzomunzwa nokuti vaida kuona zvishamiso zvake kana kuti vainakidzwa nenzira yake inoshamisa yokudzidzisa. Saka, Jesu akataurira mapoka muenzaniso wokuti: “Mudyari akaenda kunodyara mbeu yake. Naizvozvo, zvaaidyara, imwe yayo yakawira parutivi pomugwagwa ikatsikwa-tsikwa, uye shiri dzokudenga dzakaidya yose. Imwe yakawira paruware, uye, yamera, yakaoma nemhaka yokushaya unyoro. Imwe yakawira pakati peminzwa, uye minzwa yakakura pamwe nayo yakaivhunga. Imwe yakawira pavhu rakanaka, uye, yamera, yakabereka zvibereko zvine zana.”—Ruka 8:5-8.
8. Mumuenzaniso waJesu, mbeu chii?
8 Mufananidzo waJesu wakaratidza kuti vanhu vaizodavidza zvakasiyana kumashoko akanaka, zvichienderana nemwoyo womunzwi wacho. Mbeu iri kudyarwa “ishoko raMwari.” (Ruka 8:11) Kana kuti, sematauriro anoita imwe nhoroondo yemufananidzo wacho, mbeu yacho i“shoko roumambo.” (Mateu 13:19) Jesu aigona kushandisa chero rimwe remashoko iwayo, sezvo musoro weShoko raMwari uri Umambo hwokudenga hunodzorwa naJesu Kristu saMambo huchashandiswa naJehovha kureverera uchangamire hwake nokutsvenesa zita rake. (Mateu 6:9, 10) Saka, chaizvoizvo mbeu mashoko akanaka ari muShoko raMwari, Bhaibheri. Zvapupu zvaJehovha zvinosimbisa shoko iri roUmambo sezvazvinodyara mbeu zvichitevedzera Mudyari wokutanga, Jesu Kristu. Zvinowana kudavidza kwakadini?
9. Chii chinofananidzirwa nembeu inowira (a) parutivi pomugwagwa? (b) paruware? (c) pavhu rine minzwa?
9 Jesu akati imwe mbeu inowira parutivi pomugwagwa uye inotsikwa-tsikwa. Izvi zvinoreva vanhu vakanyanyobatikana zvokuti mbeu yoUmambo haigoni kudzika midzi mumwoyo yavo. Vasati vagona kuda Shoko raMwari, “Dhiyabhorosi anouya obvisa shoko mumwoyo mavo kuti varege kutenda voponeswa.” (Ruka 8:12) Imwe mbeu inowira paruware. Izvi zvinoreva vanhu vanofarira shoko reBhaibheri asi havaiti kuti richinje mwoyo yavo. Pavanoshorwa kana kuti pavanozviona zvakaoma kushandisa zano reBhaibheri, “vanorega” nokuti havana mudzi. (Ruka 8:13) Ipapo kune vaya vanonzwa shoko asi vanokurirwa “nokufunganya nepfuma nezvinofadza zvoupenyu huno.” Pakupedzisira, sezvirimwa zviri muminzwa, “vanovhungwa chaizvo.”—Ruka 8:14.
10, 11. (a) Ndivanaani vanofanananidzirwa nevhu rakanaka? (b) Chii chatinofanira kuita kuti ‘tichengete’ Shoko raMwari mumwoyo yedu?
10 Pakupedzisira, pane mbeu inowira pavhu rakanaka. Izvi zvinoreva vanhu vanogamuchira shoko ne“mwoyo wakanaka kwazvo.” Nomuzvarirwo, mumwe nomumwe wedu angada kudavira kuti ari muchikamu ichi. Kunyange zvakadaro, pakupedzisira maonero aMwari ndiwo anokosha. (Zvirevo 17:3; 1 VaKorinde 4:4, 5) Shoko rake rinoti kuva kwedu ne“mwoyo wakanaka kwazvo” chimwe chinhu chatinoratidza nezviito zvedu kubva zvino kusvikira tafa kana kuti kusvikira Mwari agumisa gadziriro ino yezvinhu yakaipa. Kana pakutanga tikadavidza zvakanaka kushoko roUmambo, zvakanaka. Zvisinei, vaya vane mwoyo wakanaka kwazvo vanogamuchira Shoko raMwari ndoku“richengeta vobereka zvibereko nokutsungirira.”—Ruka 8:15.
11 Nzira chete ine chokwadi yokuchengeta Shoko raMwari mumwoyo yedu ndeyokurirava nokuridzidza patinenge tiri toga uye patinenge tichiwadzana nevatinotenda navo. Izvi zvinosanganisira kushandisa zvakakwana zvokudya zvomudzimu zvinogoverwa nomutoo wakarongwa wokutarisira zvinodiwa zvomudzimu zvevateveri vechokwadi vaJesu. (Mateu 24:45-47) Nenzira yakadaro, kune vaya vanochengeta Shoko raMwari mumwoyo yavo, rudo rwunovaita kuti va“berek[e] zvibereko nokutsungirira.”
12. Zviberekoi zvatinofanira kubereka nokutsungirira?
12 Zviberekoi zvinoberekwa nevhu rakanaka? Mupasi, mbeu dzinokura kuva zvinomera zvinobereka zvibereko zvine rudzi rwakafanana rwembeu, dzinozogona kumwayiwa kuti dzibereke zvimwe zvibereko. Zvakangofananawo nokuda kwevaya vane mwoyo wakanaka kwazvo, mbeu yeshoko inokura mavari, ichivaita kuti vaenderere mberi mumudzimu kusvikira vava kugonawo kudyara mbeu mumwoyo yevamwe. (Mateu 28:19, 20) Uye basa ravo rokudyara rinoratidzwa nokutsungirira. Jesu akaratidza kukosha kwokutsungirira pakudyara paakati: “Anenge atsungirira kusvikira kumugumo ndiye achaponeswa. Uye aya mashoko akanaka oumambo achaparidzwa mupasi rose rinogarwa nokuda kwouchapupu kumarudzi ose; uye zvadaro mugumo uchasvika.”—Mateu 24:13, 14.
Ku“bereka Zvibereko Mubasa Rose Rakanaka”
13. Muapostora Pauro akataura munyengeteroi wakabatanidza zvibereko nezivo yeShoko raMwari?
13 Muapostora Pauro akataurawo nezvekudiwa kwokubereka zvibereko, uye akabatanidza kubereka zvibereko neShoko raMwari. Akanyengetera kuti vaaitenda navo va‘zadzwe nezivo yakarurama pamusoro pokuda kwa[Mwari] nokuchenjera kwose nokunzwisisa kwomudzimu, kuti vafambe zvakafanira Jehovha vachimufadza kwazvo sezvavanoramba vachibereka zvibereko mubasa rose rakanaka.’—VaKorose 1:9, 10; VaFiripi 1:9-11.
14-16. Maererano nemunyengetero waPauro, zviberekoi zvinoberekwa nevaya vanoda Shoko raMwari?
14 Nokudaro Pauro anoratidza kuti kuwana zivo yeBhaibheri handiyo vavariro yokupedzisira. Asi, kuda Shoko raMwari kunotiita kuti ti“fambe zvakafanira Jehovha” nokuramba tichi“bereka zvibereko mubasa rose rakanaka.” Basa rakanaka rei? Kuparidza mashoko akanaka oUmambo ibasa guru nokuda kwevaKristu mumazuva ano okupedzisira. (Mako 13:10) Mukuwedzera, vaya vanoda Shoko raMwari vanoita zvavanokwanisa kuti vagare vachitsigira basa iri nemari. Vanofara neropafadzo iyi, vachiziva kuti “Mwari anoda mupi anofara.” (2 VaKorinde 9:7) Mipiro yavo inobhadhara mari yokushandisa muzvivako zveBheteri zvinopfuura zana kunobva nhungamiro yebasa rokuparidza Umambo uye mune mimwe yacho munodhindwa maBhaibheri, nemabhuku anotaura nezveBhaibheri. Mipiro yavo inobatsirawo kubhadhara mari yekokorodzano huru dzechiKristu uye yokutumira vatariri vanofambira, vafundisi, uye vamwe vaevhangeri venguva yakazara.
15 Mamwe mabasa akanaka anosanganisira kuvaka nokutarisira nzvimbo dzokunamata kwechokwadi. Kuda Shoko raMwari kunoita kuti vanamati vake vave nechokwadi chokuti Horo dzeMagungano neHoro dzoUmambo hadziregi kutarisirwa. (Enzanisa naNehemia 10:39.) Sezvo zita raMwari richiwanikwa pamberi pezvivako zvakadaro, zvinokosha kuti mukati nokunze zvichengetwe zvakachena uye zvakanaka uye kuti mufambiro wevanonamatira mukati mehoro dzakadaro usashorwe. (2 VaKorinde 6:3) Vamwe vaKristu vanokwanisa kuita zvakawanda. Kuda Shoko raMwari kunovaita kuti vafambe nzendo dzakareba kuti vavakewo nzvimbo itsva dzokunamatira munzvimbo dzenyika dzinoda kubatsirwa nemhosva yourombo kana kushayikwa kwounyanzvi.—2 VaKorinde 8:14.
16 Ku“bereka zvibereko mubasa rose rakanaka” kunosanganisirawo kutarisira mitoro yemhuri uye kuratidza kuva nehanya nevamwe vaKristu. Kuda Shoko raMwari kunotiita kuti tizive zvinodiwa nevaya “vane ukama nesu mukutenda” uye “kuva netsika yokuzvipira kuna Mwari mumba [medu].” (VaGaratiya 6:10; 1 Timoti 5:4, 8) Munhau iyi, ibasa rakanaka kushanyira vanorwara nokunyaradza vanochema. Uye ibasa rakaisvonaka zvakadini rinoitwa nevarume vakuru veungano neMatare Okubata Nechipatara mukubatsira vanhu vanotarisana neurwere hwakakura! (Mabasa 15:29) Uye kune nhamo dziri kuwedzera—dzimwe dzacho dzinongoitika dzega uye dzimwe dzinokonzerwa nokusachenjerera kwevanhu. Zvichibatsirwa nomudzimu waMwari, Zvapupu zvaJehovha zvava nemukurumbira wakanaka munzvimbo dzakawanda dzenyika wokukurumidza kuyamura vazvinotenda navo nevamwe vanenge vawirwa nengwavaira netsaona. Zvose izvi zvibereko zvakanaka zvinoratidzwa nevaya vanoda Shoko raMwari.
Zvinobatsira Zvine Mbiri Zvomunguva iri Mberi
17, 18. (a) Chii chiri kuitwa nokudyara mbeu yoUmambo? (b) Zviitikoi zvinokosha zvikuru zvichaonekwa nevanoda Shoko raMwari munguva pfupi iri kutevera?
17 Kudyarwa kwembeu yoUmambo kunoramba kuchiunza zvinhu zvakanaka zvinobatsira vanhu zvikuru. Mumakore achangobva kupfuura vanhu vanopfuura 300 000 gore roga roga vakabvumira shoko reBhaibheri kuti ridzike midzi mumwoyo yavo zvokuti vakatsaurira upenyu hwavo kuna Jehovha ndokuratidza izvi nokubhabhatidzwa mumvura. Inguva iri mberi ine mbiri zvakadini yakavamirira!
18 Munguva pfupi iri kutevera, vanoda Shoko raMwari vanoziva kuti Jehovha Mwari achasimuka kuti akudze zita rake. “Bhabhironi Guru,” sangano renyika rechitendero chenhema, richaparadzwa. (Zvakazarurwa 18:2, 8) Ipapo, vaya vanoramba kurarama maererano neShoko raMwari vachaurayiwa naMambo, Jesu Kristu. (Pisarema 2:9-11; Dhanieri 2:44) Kana izvozvo zvaitwa, Umambo hwaMwari huchaunza rusununguko rwechigarire pautsotsi, hondo, uye dzimwe nhamo. Vanhu havazofanirizve kunyaradzwa pamarwadzo, kurwara, uye rufu.—Zvakazarurwa 21:3, 4.
19, 20. Vaya vanonyatsoda Shoko raMwari vakachengeterwa nguva iri mberi ine mbiri zvakadini?
19 Ipapo mabasa akanaka ane mbiri zvakadini achaitwa nevaya vanoda Shoko raMwari! Vapukunyuki veAmagedhoni vachatanga nebasa rinofadza rokuchinja pasi rino kuti rive paradhiso. Vachava neropafadzo inofadza yokugadzirira zvinodiwa nevanhu vakafa zvino vakazorora havo muguva uye vanoyeukwa naMwari vane tarisiro yokumutswawo murufu. (Johani 5:28, 29) Munguva iyoyo, vagari vepasi vachatungamirirwa zvakakwana naChangamire Ishe, Jehovha, achishandisa Mwanakomana wake akakwidziridzwa, Jesu Kristu. ‘Mipumburu ichazarurwa,’ ichizivisa mirayiridzo yaMwari yekurarama munyika itsva.—Zvakazarurwa 20:12.
20 Munguva yaJehovha yaakaronga, boka rakakwana revaKristu vakazodzwa richamutsirwa kumubayiro waro wokudenga se“vagari venhaka pamwe naKristu.” (VaRoma 8:17) MuKutonga Kwemakore Ane Chiuru kwaKristu, vanhu vose vari pasi pano vanoda Shoko raMwari vachasimudzirwa kuti vakwane mupfungwa nomumuviri. Kana varatidza kuti vakatendeka pamuedzo wokupedzisira, vachapiwa mubayiro woupenyu husingaperi uye vachava ne“rusununguko rune mbiri rwevana vaMwari.” (VaRoma 8:21; Zvakazarurwa 20:1-3, 7-10) Iyoyo ichava nguva inoshamisa zvakadini! Chokwadi, kana Jehovha atipa tariro yokudenga kana kuti yepasi, kuramba tichida Shoko rake uye kutsunga kurarama maererano nouchenjeri hwaMwari kuchatirinda. Uye munguva iri mberi ‘kuchatipa mbiri nokuti tinokumbundikira.’—Zvirevo 4:6, 8.
Unogona Kutsanangura Here?
◻ Kuda Shoko raMwari kuchatirinda sei?
◻ Mbeu yomumuenzaniso waJesu chii, uye inodyarwa sei?
◻ Tingaratidza sei kuti tiri i“vhu rakanaka”?
◻ Vanoda Shoko raMwari vangatarisira zvinhui zvinobatsira?
[Mufananidzo uri papeji 16]
Mbeu yomumuenzaniso waJesu inofananidzira mashoko akanaka ari muShoko raMwari
[Kwazvakatorwa]
Garo Nalbandian
[Mufananidzo uri papeji 17]
Zvapupu zvaJehovha zvinotevedzera Mudyari Mukuru
[Mifananidzo iri papeji 18]
Vapukunyuki veAmagedhoni vachanakirwa nezvibereko zvepasi